Wɛli 2 - Yálá laawoo hɛɓɛ (dc)1 Ɲą́ą́n gáá a Sarɔn yagbudɛn, a yaɓoloon bɔ wulu powa. Nwɛli hulɔnu 2 Yɛ bələi wulu powa kaa la ɲąąlənŋaa lɔwai, bələ ɓə nwɔ́ wɛlii ka laa mɛlaa nɛ̨ąą lɔwai. Nwɛli nɛ̨ɛ̨nu 3 Bələi magolon nwulu kaa la wɛlai wuluɠaa lɔwai bələ ɓə nwɔ́ wɛlii kaa la mɛlaa hinąą lɔwai, nwɔ nįnįn ɲąą laɠiɛ mu ɓə ŋą́ hee laa nɛ̨́ɛ̨́ hu. Ɛlɛɛ ma ləɠən a lɔ nɛ̨́ŋɛ̨-nɛ̨́ŋɛ̨ mu. 4 Kwa yaa kwa lɔ lɔɔ pɛlɛ́ mu, nwɔ wɛlikɛmąą ɓə a mą́ą́ kwɛnąn na. 5 'Váŋą lɔ kilɛ a viɲə nwɔ̨mįi pənə ə́ nį́ilɔ kilɛ a ɓɔlaa ɓa. Mąąhɔlɔɓo, yɛ wɛlikɛmąąlaa kaa mą́ą́ a ɲɔ̨n. 6 Gɛɓɛyee kaa laani nwún mu. Mamįiyee laŋąnŋąą gbíni ɓa. Nwɛli hulɔnu 7 Ka ka gwɛla, Ɉerusalɛmə nɛ̨ɛ̨lɛa, ka ka kwɛla a palai-lomąɠaa, kpɔ a kpalan mɛlaɠaa laa, kaa ka hvo pai yíi tee wɛlikɛmąą ɲɛ̨i, ka hvo wɛlikɛmąą nwun; gwəinɛ̨ɛ̨ mɛ̨nį hvo pa tee mɛ̨i. Nwɔ́ wɛlii woo kaa tɔɔi 8 'Ka ka wəli tɔɔ tai! Nwɔ́ wɛlii woo ka tii! Ya ka tii pai! Yɛ laɠin yeeɠaa mɛ̨i, yɛ hvilɛn yeekpu kpuɠaa nwuɔ̨. 9 Nwɔ́ wɛlii kaa yɛ Lomą, gaa yɛ Dɔlɔ. Ya ka tii! Ya ka tii tɔɔni ku yəi bɛlɛ́ nwąną ɓa. Yɛ nwun mąąlaŋąn vənɛtɛlɛ wolo ɓa. Yɛ ɲɛ̨i pili nwoloɠaa diɛ. 10 Nwɔ́ wɛlii kaa də́lii, Yɛ kɛ mą́ą́: «Nwɛ́likɛmąąmun, nííɓa nɛ̨ɛ̨nu! Ə́ muhəɠə kilɛ ɉa, ə́ pa ɓɛ. 11 Hvo gaai, ɲa kpɔlu nəɠii aa tɛɛ, tulɔ kaa kɛa lii, gbɛɛ yee la. 12 Mɔ̨nun yɛ gbowolo kɛ, kwəinɛ̨ɛ̨ wələ tooi lɔwai yɛ kɛa həli, kpala nwɛ̨nįɠaa woo yɛ tɔɔ. 13 Ɓɔlaa wulu aa ɓa, viɲəɠaa daa powa mąą kun nɛ̨ɛ̨ yɛ tɛ. Nwɔ́ wɛli lɛlɛɛ, ə́ muhəɠə. Níiɓa wɛli! Pa kani. 14 Nwɔ́ tonwələn gbɔlun yɛ́i ə́ kaa kwɛni wolo hu, ə́ loɔ gwɛniɠaa lɔwai, ə́ nwun gulɔ, ŋį́ ə́ ɲɛ̨ilai kaa; 'hvaa, ə́ woo ə too nwə́lii. Mąąhɔlɔɓo, ə́ woo nɛ̨ɛ̨i, ə́ ɲɛ̨ilaa mąąhəɠɛɛ.» Nee 15 Ka gɛlɛnŋaa tii hon! Ka gɛlɛn bɛlɛɛɠaa tii hon, diɛi da kɛ viɲə kalai. Mąąhɔlɔɓo, ku wɔ viɲəɠaa daa powa. Nwɛli nɛ̨ɛ̨nu 16 Nwɛ́likɛmąąmun kaa a nwɔ́ɔ́, gɛ́ ɓo a nwɔɔ, a li a nwɔ taatɛlɛɛɠaai yágbudɛn ɉu. 17 Gɛɛ pɛlɛ́ kɔ́n nįnįn ɲee hvo pu gee hu, hvitili hvo pu, pənə ə́ pa bɔ́, nwɛli, yɛ lomą, yɛ Dɔlɔ, ɲee ɓɛlaɓoɔɠaa nwuɔ̨. |