Osia 9 - Yálá laawoo hɛɓɛ (dc)Ɲɛ̨iyá kɔ̨nɔ̨n 1 Israɛlə, 'hvo kwəinɛ̨ɛ̨ kulɔ! 'Hvo mąną, yɛ lɔi ta kpɛliɠaa, mąąhɔlɔɓo, ə́ kaa wɛli hon ɉii a ə́ mąą kwɛai ə́ kaa moi ə wɔ Yálái ɓa, yɛ́ yili mąą hvɛla wɛlila kɛ, mɔ̨nun danɉii kəlee ɓa. 2 Mɔ̨nun danɉii mąnwoo, gɔwɔla mąnwoo, da hvo pai hɛn da hɔlɔɓoi, di ɲɛ̨i kaa pai lɛɛi nɔɔ nįnɛ̨ tɔwɔ kpɛli kpɛli, hva hɔlɔɓo di yəi. 3 Di hvo pai pɛlii lɛɛi Yai-Laa nwɔ lɔi hu, Ɛfraimə kaa pai pənəi ə li Eziptə lɔi hu, ɛlɛɛ, kɔ̨nɔ̨n tɔ́n gaa mą, gaa pai mį́į́ Asiri lɔi hu. 4 Di hvo pai Yai-Laa kɔ́i a lɔɔ, di wɔ halááɠaa di hvo pai nii hon ɉi: gaa kpɔlɔ pai kɛi di yəi yɛ haa mɛ̨i kɔ̨nɔ̨n, nui lɔpee a da mį́i, mąą a luwu. Gɔ̨nɔ̨n tii a di laa hɔnmo yɛnɛ̨ɛ̨, Kɛlaa hva lɔ Yai-Laa yəi bɛlɛ́n. 5 Ləɓə ka káá pai gɛi a ɉɛli pu yələ? A Yai-Laa nwɔ hɛli yələi? Di wɛlikpɛɛmąą laa kulɔ a Yálá kwəi mɛ̨nį hu kulɔmun 6 Diɛ ka pui di hu kala mɛ̨nį tɔwɔ, diɛ li di ɲąąkpɔn ɉii Eziptə, Mɛmfisə kaa pai kɛi a di kámą. Di yəi hɛngɔw kpɛa kpɛaɠaa kaa pai lɛɛi a kala kpili nwɔɔ, ɲąąlən gbɔlɔ yɛ lɔ di yəi bɛlɛ́nŋaa. 7 Ɉu tɔɔ yələ aa həli, di woo hu kulɔ yələ aa həli: Israɛlə kaa pai yili kaai! Yálá kwəi mɛ̨nį hu kulɔmun aa ɓowo, gili nąmui kili aa kpɛɛ ɲəi, yɛ́ túwɔ́ pələ ɲɔ̨n ɉu kɛnɛ̨ pələ ɓa, da nwɛli kpɛɛmąą di gulɔ a yɛ́, ɉu kɛnɛ̨ pələ ɓa. 8 Ɛfraimə mąąkpɛmun, da nwɔ́ Yálái ɓə, Yálá kwəi mɛ̨nį hu kulɔmun mə, daa ɓaalə tɛ dɔwɔ, pələ kəlee hu, wɛlikpɛɛ mąą kaa nwɔ Yálái yəi bɛlɛ́n. 9 Di yee aa ɓɔ nɔgwəi mɛ̨nį hu, yɛ bələi ə kɛ la Givea, di hɔn gɛnɛ̨i tii, kili kaa pai lɛɛi Yai-Laa ɲą, gaa pai di wɔ nɛ̨ŋɛ̨nŋąą i kwələ kulɔi diɛ. Baalə-Peɔrə 10 Ŋą́ Israɛlə kaa lɔ, yɛ bələi da towələ kaa la, wɛla pun ɉu, ŋį́ ka nąnni kaa lɔ, yɛ bələi ɓolaa a ɓa la mɛlaa tɔwɔ, da gaa la. Kɛlaa, di pa lɔ Baalə-Peɔrə, diɛ di yee pɛlɛ nwumɛ̨ mɛ̨nį ɓa, diɛ kɛ la a nu kɔ́hɔɓoɔɠaa, lɔ yɛ bələi di liiɓa hɛn tii kaa la. 11 Ɉɛn Ɛfraimə a nwun dɛ ɉu, da lɛɛ kpɔlɔ gaai, aa mą kala, mąą koo a kɛ kpɔlɔɔ nee ɓa, a lɛɛ kpɔlɔɔ mun tooi nee kwəi, a mą kwɛlɛɛn ɲəi, yɛ nwɛ̨ni. 12 Di mąn lɛapɛlɛɛ kulɔ ɉu, ŋą́ di hvɛɠɛ nɛapɛlɛɛi tii hu, di nu kɛɛ tɔwɔ. A tɛ̨ą, ŋą́ pa həɠəi di pɔ, di kaa pai mɔ̨nɔ̨ mįi. 13 Gáá Ɛfraimə kaai yɛ Tirə taa ta, dɔɔ kɛɛnąą lɛlɛɛ ɓa, Kɛlaa, ə mą kɛ tii, hvo kɛli Ɛfraimə ə pa nonnii tɛɛ paa ɓo pɔ. 14 Yai-Laa! Dɛɛ di pɔ! Lə ɓə ə́ kaa dɛɛi di pɔ? Di kɛ lɔ a yəi kala nɛ̨ąą, di ɲį́niyá hvo ɉu. 15 Di kwəi kili ɲɔ̨nwɔ̨ɔ̨ tii ə too pɔ̨nɔ̨ ɲą Gilgalə: Nąą ɓə di wɛli ə kpɛɛ laa mą́ą́; Di kɛ mɛ̨nįɠaa ɲɔ̨nwɔ̨ pələ, gáá pai di kpɛi ɲə́i bɛlɛ́n, di wɛli hva kɛa too mą́ą́, di ɲɛ̨itɔwɔ nuą kəlee kaa a kulɔ nwoo mu nuą. 16 Daa Ɛfraimə kɛlɛ, di hamu aa kpala, di hvo kɛa pai ɓai. Di mąn lon gaa, ŋą́ di wɛlikɛmąą lon tii paa. 17 Nwɔ́ Yálái kaa pai di pilii, gbala ə tɔɔ, di hvo di wəli tɔɔ li nwoo ɓa, ɛlɛɛ di kaa pai kɛi lii di nwun ma lɔiɠaa hu. |