Osia 8 - Yálá laawoo hɛɓɛ (dc)

Nɔi ɲąąwooɓo nuą di kɛi nɔi hon a ɲɔ̨nwɔ̨ɔ̨

¹ 'Dulú hvɛɛ, mɔ̨nɔ̨ kaa pai Yai-Laa nwɔ pɛlɛ́i mɛ̨i, yɛ kuwɔ. Mąąhɔlɔɓo, daa nwɔ́ mįnɛ̨i hu kala, dɔ́n ŋį́ naa diɛ, daa di nwun gulɔ mu.

² Di kaa pai tómąi bɔ́ pələ, diɛ kɛ mą́ą́: «Ku wɔ Yálá, ku ə́ kɔ́lɔn, kuɔi a Israɛlə lonnii.»

³ Israɛlə aa lənə mɛ̨nį lɛlɛɛ ɓa, ɲowo ə hvilɛn bulu.

⁴ Di tɔɔɓɛlaa hee di hvo mą́ą́nin gɛ, di di ɲɛ̨itɔwɔ nuą hee, və́ kɛ hvaa li mą. Di haliɠaa pɛli di kpɔwɔ ɓa, a di yəi waliɠaa, da di yəi hɛniɠaa, diɛ kpinįi, di hu yɛ pɛli kalai la.

⁵ Yai-Laa aa lənə ə́ wɔ nįŋɛ̨ lon ɓa, Samari. Nwɔ́ líiholii aa muhəɠə di laa ɓa, lə yələ kpɔ ɓə hɔn gaa pai kpɛɛi la kaa?

⁶ Mąąhɔlɔɓo, ə həɠə Israɛlə pələ, yɛlɛ mun da ɓə bɛli, Yálá hvo li; a tɛ̨ą Samari nwɔ nįŋɛ̨ lon hu kaa ɓuwɔi a gbuɔ kpuɔ.

⁷ Di kaa hvaŋą hin ɉii, di kaa pai tulɔ hvaŋą hɔlɔɓoi, mɔ̨nun gbaɠa a wala kɛ mą, gɔw hva kɛ ɉu, da a kɛ nwɔ̨nɔ̨ ɉu, nwɛ̨ąą ɓə da mįi.

⁸ Daa Israɛlə mu kpələ, gaa lɔiɠaa lɔwai yɛ hɛn dɔlɔ hvo mą.

⁹ Mąąhɔlɔɓo ə tɛ Asiri lɔi hu, yɛ hoohvaalən a lɛɛ gbɔwɔ ɓa, Ɛfraimə ə gbɔwɔ wɛliɠaa ya laa.

¹⁰ Di mą hamą pilɛɠaa ɲąąkwɛlɛ nɔiɠaa hu, gáá kɛa pai di ɲąąkpɔn ɉii, ɛlɛɛ ɉu hvo pai kwɛai, di mąą kaa pai kɛi kpalin ɉii, tɔɔɓɛlaa di wɔ tɔɔmun nwiɛ mu.

¹¹ Ɛfraimə aa ɉaláá kulɔiɠaa tamą, nɛ̨ŋɛ̨n ɉəɠə mɛ̨nį ɓa, ɛlɛɛ ɉaláá kulɔiɠaai tii daa kɛ ɲəi a nɛ̨ŋɛ̨n ɉəɠə nwun.

¹² Ŋą́ mą nwɔ́ tɔ́n ɉu woo waa tɔ̨nɔ̨ pɛ̨ɛ̨ a mąą mɛ̨nį, da di kaa lɔ yɛ nwɛ̨ąą ɓə da di pɛ̨ɛ̨.

¹³ Yii di yəi a haláá ya ka; ɉuwɔi da gulɔ a haláá, da pənə di mįi; Kɛlaa, yili hva nɛ̨ɛ̨ Yai-Laa ɓa, yiihu, gaa giliŋąhiɛi di wɔ nɛ̨ŋɛ̨nŋąąi ɓa, yɛ di wɔ túwɔ́ pələ ɲɔ̨nŋąąi lonon. Hvo kɛli nwɔ̨nɔ̨ di pənə di li Eziptə lɔi hu.

¹⁴ Israɛlə aa lɛ̨ą bɛlimun ma, aa gbɔwɔ nwɔ tɔɔ pɛlɛ́ɠaa tɔɔ. Ɉuda nwɛi, gaa nwɔ taaɠaai mąątinɛ̨n ɉii a di mąąkpɛ hįį. Kɛlaa, gáá pai nwɔ̨n bilii nwɔ taaɠaai hu, yɛ daa mąą kɔ̨nwɔ̨ pɛlɛ́ɠaa kələn.