Osia 1 - Yálá laawoo hɛɓɛ (dc)1 Mɛ̨nįi Yai-laa ə mo Beeri lon Ose ɓa, ɓɛlɔwai Oziasə, Yotamə, Akazə da Ezekiasə di kɛ la a Ɉuda tɔɔɓɛlaa; ɛlɛɛ, Ɉoasə lon Ɉeroboamə ə ɓo a Israɛlə tɔɔmun. Yálá woo 2 Yai-Laa ə pələ ɓo Ose ɓa, Yai-Laa yɛ Ose ɓa: «'Li nɛ̨ɛ̨nui a gbɔwɔ lɔwɔ́tɔɔ hinąą diɛ, bɔ, ɉəɠə a ə́ nɛ̨ą, ə́ wɛli lonnii kaa mą, mąąhɔlɔɓo nɔi yee kaa lɔ túwɔ́ pələ ɲɔ̨n ɉu; a bulu tinɛ̨n aa mo Yai-Laa ɓa.» 3 Ose ə li ə Divlaimə lon nɛ̨ɛ̨nu Gomɛrə həɠə a nɛ̨ą yili ə koo həɠə, ə lon ɉulɔnu kaa mą, 4 Yai-Laa yɛ Ose ɓa: «Naa hee a Izreɛlə, mąąhɔlɔɓo ɉu hvo kɛa kwɛali, gáá pai Ɉehu nwɔ pɛlɛ́i mąąnikɛi Izreɛlə ɲąmą mąą mɛ̨nį ɓa. Ɛlɛɛ gáá pai Israɛlə tɔɔlaa kpɛɛi. 5 Nąąlɔwai, ŋą Israɛlə nwɔ kilɛn hu yali, Izreɛlə yee lɔwai lɔi hu.» 6 Ə pənə ə koo həɠə, ə lon nɛ̨ɛ̨nu kaa, Yai-Laa yɛ Ose ɓa: «Naa hee a Lo-Ruhama, mąąhɔlɔɓo Israɛlə nwɔ pɛlɛ́i ɲɛ̨imąąwɛli hvo kɛa pai lɛɛi lɔ mą́ą́. Gáá pai nwɛli kpɛɛi mą́ą́ kpɔ tɛ̨ɛ̨ tɛ̨ɛ̨. 7 «Ɉuda nwɔ pɛlɛ́i nwɛi, ŋą́ nwɛlilakɛ, gɛ́ di nwun mąąɓo, ɲą́ą́ Yai-Laa di wɔ Yálái, və́ pai di nwun mąąɓoi a kilɛn, a wala kɛ tii kɔ́ kɔ́ ɓɔwa, a wala kɛ tii a kɔ́, ə mą kɛ hoo da hoo mɛ̨i kɔ́ kɔ́ nuą.» 8 Ɓɛlɔwai ə Lo-Ruhama laa kulɔ la ɲįnį ɓa, ə pənə ə koo həɠə, ə lon ɉulɔnu kaa, 9 Yai-Laa yɛ mą: «Naa hee a Lo-Ami, mąąhɔlɔɓo, nwɔ́ nu huwu hvaa a kaa, ɛlɛɛ, və́ kɛa a ka wɔ Yálá.» |