Nehemi 5 - Yálá laawoo hɛɓɛ (dc)

Nehemi ə hulu mɛ̨nį kulɔ nɔi

¹ Nąąlɔwai, nɔi lonnii di kɛ di woolaa kɛnɛ̨, di kaayɔwɔɠaa Ɉuifəɠaa yəi.

² Daɠaa di kɛi kɛ diɛ: «Ku lon ɉinąą da ku lon nɛ̨ąą, kwaa tamą. Ku kaa bɔ ku kɔ̨nɔ̨n ɉɔlɔɓo ku mɛɛ.»

³ Daɠaa diɛ kɛ diɛ: «Ku wɔ tíiɠaai, ku wɔ viɲə yɛɛɠaai, da ku wɔ pɛlɛ́ɠaai, ku kaa di tolaa heei kɔ̨nɔ̨n ma, ə gɛ, ku pɛli kɔ̨nɔ̨n ɉɔlɔɓoi a bulu yələi ŋɛ̨i.»

⁴ Daɠaa diɛ nwɔ̨nɔ̨ kɛ diɛ: «Tɔɔmun nwɔ nįįhɔ̨nwɔ̨i mɛ̨nį ɓa, kwaa wali kwələ həɠə a ku wɔ tíiɠaai laa, da ku wɔ viɲə yɛɛɠaai laa.

⁵ Kɛlaa yaan, kwa ku kaayɔwɔɠaa ku kɔ́lɔ ə ɓo lɔ tɔ̨nɔ̨, ku lonnii da di lonnii di kɔ́lɔ ə ɓo tɔ̨nɔ̨. Bələi mąn gaa la tii, mąąnɛ̨ɛ̨ ku ku lon ɉinąą da ku lon nɛ̨ąą taɠaa tɛɛ luwɔlaa hu. Ku lon nɛ̨ąą taɠaa kaa mun kɛa luwɔlaa hu. Ku hva pɛli mɛ̨nįi lɔpee ta kɛi, ku wɔ tíiɠaai da ku wɔ viɲə yɛɛɠaai kaa kɛa nu takpɛliɠaa yəi.»

⁶ Di wɔ woolaa wooɠaa tii ŋį́ mɛ̨n, yili ə níí gələn gwə́i kpɔ kɛnɛ̨.

⁷ Ŋą́ gaa, gɛ́ diɛ, mą nɛɛ ŋį́ haŋą kalanɉonŋąą da ɲɛ̨itɔwɔ nuą diɛ. Yili ɓə gɛ, ŋį́ mo diɛ, gɛ́ diɛ: «Tiɲɛ̨ wiaa ka ŋɛ̨i ka káá ɉeei ka kee nwuɔ̨.» Yili pulu, ŋį́ di kəlee di təli ŋąąkpɔn kɛnɛ̨ ɓa.

⁸ Gɛ́ diɛ: «Ɉuifəɠaa ŋɛ̨i a gu kaayɔwɔɠaa, diɛi kɛ daa di lɔwɔ́tɔɔ hį́i takpɛliɠaa diɛ, guɔ kpinįi ɓə di nwun mąąɓo, yɛ pələi guɔ yee pɛli mąą mɛ̨nį kaa la. Kɛlaa, kaa mun, ka káá ka kaayɔwɔɠaa lɔwɔ́tɔɔi, ku wɔ ɓə ka káá di lɔwɔ́tɔɔi kuɔ.» Di di mɛ̨i haa, di hvo pɛli mɛ̨nįi lɔpee ta ɓoi.

⁹ Ɛlɛɛ, gɛ́ diɛ: «Yii ŋɛ̨i ka káá gɛi, hvo pɛli li ɉu. Kɛlaa, mąąnɛ̨ɛ̨ ka gu hiɛ gu wɔ Yálái nwɔ ɲɔw mąą laa hu, ə gɛ, gu hvo pa nwunmɛ̨ hį́i takpɛliɠaa ɲɛ̨i ɓa, diɛi di kaa a gu yowoɠaa.

¹⁰ Ɲą́ą́ gbɛli mąn, kwa ną́n nonnii, ku wɔ kwələ kaa diɛ, kɛlaa, ku kaa nɛɛi diɛ a mɛ̨inɛ̨ɛ̨.

¹¹ Háákələi, ka di wɔ tíiɠaai tɛɛ di pɔ, da di wɔ viɲə yɛɛɠaai di wɔ pɛlɛ́ɠaai. Ɛlɛɛ di wɔ waliɠaai, da nɔɔ nįnɛ̨, da wulɔɠaai ka gwələtɔɔ diɛ, ka dɛɛ di pɔ.»

¹² Diɛ diɛ: «Kwaa hvaa mą, ku kaa dɛɛi di pɔ, ku hvo hɛn da hvɛlii diɛ. Ku kaa gɛi yɛ pələi ə́ mo la.» Ŋą́ ɉaláá laa həli nuą təli, nuąi tii di di kwɛla di ɲɛ̨i ɓa, di gɛ yɛ pələi di mo la.

¹³ Ə lɛɛ, ŋį́ nwɔ́ həɠəi hu kpɛŋɛn, gɛ́ diɛ: «Bələ ɓə, nui lɔpee a wala nwoo pɔ mɛ̨nį kɛ, Yálá kaa pai gbɛŋɛ̨n ɉii la, yɛ gulɔ ɲəi bɛlɛ́n, yɛ mąą kwɛa ɲəi hɛnŋąą diɛ. Bələ ɓə da mąą nu kpɛŋɛn na, diɛ nɛɛ a ɲee hvowolo.» Nu kpɔn gəlee diɛ mą: «Ə kɛ tii!» Ə lɛɛ, di Yai-Laa mąątɛ̨nɛ̨ di gɛ yɛ pələi di mo la.

¹⁴ Ə həɠə ɲələi di dí la, diɛ kɛ ŋį́ kɛ a di wɔ gbahanama Ɉuda lɔi hu, ə həɠə tɔɔmun Artasɛrsɛsə nwɔ kwɛlan bow hveelɛnąą ɓa, ə həli la gwɛlan bow haaɓa gɔw hveelɛnąą ɓa, kwɛlan bow kɔ́w hveelɛ yee mu, yii da dɛɛ nɔi ɲąąwooɓomun bɔ a gɔ̨nɔ̨n, ɲą́ą́ kwa gááyɔwɔɠaa, ku hvo yili ta mįi.

¹⁵ Nɔi ɲąąwooɓo nuą tɔlɔɔ-tɔlɔɔɠaai kɛ dɔ́wɔ, di kɛi too nɔi lonnii mɛ̨i, diɛ kɔ̨nɔ̨n gulɔ di yəi, da lɔɔ, ɛlɛɛ yili pulu diɛ wali kwələ pow nąąn ɉəɠə di yəi. Di yee pɔ nuą kpɛli mąn, di kɛi hee nuą mɛ̨i. Kɛlaa nwɛi, və́ tíwɔ́ tii, mąąhɔlɔɓo, ŋį́ ɲɔw Yálá ɓa.

¹⁶ Ŋą́ ɲéé lɛɛ daa mąąkpɛ hįį tɔɔ mɛ̨nį ɓa, ku hvo tíi ya, ɛlɛɛ, ɲéé pɔ nuą kəlee di kɛ ɓɛ golói tii ɓa.

¹⁷ Ɉuifəɠaa da ɲąąwooɓo kɛ nuąi kɛ ɓɛ golói tii gɔwɔ hu, di kɛ a nu nwundɔ̨nɔ̨ ɲee lɔɔli, da yiiɠaai kɛi həɠə ku kwɛlɛ lɔiɠaa hu, diɛ pa ku pɔ.

¹⁸ Hvóló kəlee yee mu, yii ŋį́ kɛi gɛ a nuą kɔ̨nɔ̨n ya ka: Nįŋɛ̨ tɔ̨nɔ̨, ɓɛlaa huwu lɛlɛɛ mɛ̨ida, da tɛɛɠaa; ɛlɛɛ, hvóló pow pow tɛɛ pulu, lɔɔ ə kɛi pa kpɔ kɛnɛ̨, kɛlaa, ə mą kɛ tii, və́ nɔi ɲąąwooɓomun gɔ̨nɔ̨n ɉu hvɛli, mąąhɔlɔɓo, koló kɛnɛ̨ ə kɛ nɔi nuą diɛ.

¹⁹ «Námu Yálá, mɛ̨nįɠaai kpɔ ŋį́ gɛ nuąi ŋɛ̨i mąą mɛ̨nį ɓa, ə́ kili lɛɛ ɉu, ə́ bɔɔ kɛ mą́ą́ a mɛ̨inɛ̨ɛ̨.»