Mąątɛ̨nɛ̨ 2 - Yálá laawoo hɛɓɛ (dc)

Dɔɔmun Yálá ə ɉee

¹ Lə ŋą ɉuwu ɉuwu ɓə lɔiɠaa di hvo ɉui, nu kanŋaa diɛ hvaa lɔ di nwun ɉu nwɔ̨ɔ̨? Ya pa di yee hva lɔ.

² Yɛnɛ̨ɛ̨ tɔɔɓɛlaa daa di muhəɠə a kɔ́, lɔi ɲɛ̨itɔwɔ nuą diɛ nwun dɔɔ ɲɔ̨nwɔ̨ɔ̨ kɛ, a Yai-Laa da nui ə dɔɔwulɔ hiɛ mą, di laa.

³ Diɛ kɛ diɛ: «'Ka gu di wɔ kponoɠaai hu yali tai, gu di wɔ yɔwɔnŋąąi pili.»

⁴ Nui hɛn gəlee nwun mɛ̨i yələ kɔ́lɔn ɉu, gaa yɛ́lɛ́i diɛ, Yai-Laa kaa yɛlɛ kulɔi di hu.

⁵ Yili pulu, gaa pələ ɓoi diɛ a níi holiɛ, níi holi pələ kɛnɛ̨, gaa di hu pui diɛ, yɛ kɛ diɛ:

⁶ «Ɲą́ą́ ɓə nwɔ́ tɔɔmun hee Siɔn yee nwuɔ̨, yai a nwɔ́ yee mąąhəɠɛɛi.»

⁷ Mɛ̨nįi Yai-Laa ə mąą kili tee gwəi, 'ka tɔɔ ŋą́ mo, ə kɛ mą́ą́: «Nón maa yɛ́, ɲą́ą́ kpɔ ɓə ə́ kaa háákələi.

⁸ Ɉu hvɛli mą́ą́, ŋą́ lɔi kəlee tɛɛ ə́ pɔ a ə́ kwɛlin, ŋą́ yɛnɛ̨ɛ̨ kəlee tɛɛ ə́ pɔ a ə́ wɔɔ.

⁹ Ə́ kaa pai di kɛlɛi a kwɛli hvaɠa, yɛ́ di wolo yɛ ləɠi tɔɔ mun a kɛi nwɔ ləɠi wolo.»

¹⁰ Ə həli kɛa kaa, kaai a tɔɔɓɛlaa, 'ka kili hɔlɔɓo, 'ka ka hɔn mąąhvalin, kaai a lɔi ɲąąwooɓo nuą.

¹¹ 'Ka tí Yai-Laa ɓa a ɲɔwmąąlaa, 'ka ka yee yɛɛ a gɔwɔ kaa kpɛlin.

¹² 'Ka mąąwiɛ tɛɛ Non bɔ, hvo pa nəi níiholi, ka nwun na hvo nee pili bələi, nwɔ liiholi a kulɔ lɔ tanɔ̨n. Nui a mąąkilɛ nįnįn mu, mąą nu nwun na nɛ̨ɛ̨i ɓə.