Lukə 14 - Yálá laawoo hɛɓɛ (dc)Jesus ə ɲɔ̨n gɛ mun da kɔ́lɔi pono a vįitɔɔ yələ 1 Hvįįtɔɔ yələ ta, Jesus ə li Farisiɛ̨ nwun nąmu ta pɔɔli, kɔ̨nɔ̨n mį́į́ mɛ̨nį ɓa. Nuą tii kɛ laa, di ɲɛ̨i heɛ kpɔ kɛ Jesus ɓa, diɛ mąąkpɛɛ. 2 Hulɔnu ta ə kɛ Jesus lííla, yii hvɛɛ ɲɔ̨n ə kɛ mą. 3 Ɉɛɓɛ́ kɛ nuą da Farisiɛ̨ɠaa tii kɛ laa, Jesus ə mo diɛ, yɛ diɛ: «Akɛti, gu wɔɔ tɔ́n a hvaa mą gu nu ta ɓalo a vįitɔɔ yələ, awala kɛ tii, gu nɛɛ laa?» 4 Kɛlaa, di hvo gɛ di hvo nwoo ŋąąpənə. Jesus ə ɲɔ̨n gɛ mun tii kɔ́lɔi pono, yɛ mą: «'Li.» 5 Yili pulu, ə tínɛ̨n yɛ diɛ: «Akɛ hoohvaalən a kɛ ka ta yəi, a wala kɛ tii nįŋɛ̨, a too ɲəi yálɔwa hu a vįitɔɔ yələ, hva nɛ̨ɛ̨mą hvo gulɔ, ə mą kɛ, hvįitɔɔ yələ li?» 6 Di hvo pɛli nwoo ŋąąpənəi. Nuą təli pələ da di hee pələ 7 Nuą tii di di təli, Jesus ə gaa diɛ heei lɛlɛɛɠaa mąą kɔ́nwɔ̨. Ə ɉanwon ŋɛ̨i hɔɔ diɛ, yɛ diɛ: 8 «Ɓɛlɔwai nu ta a ka təli la kɔ̨nɔ̨n ma, hvó ə́ mąąhulɔ, hvó hee tɔwɔ. Gbəli, di nu takpɛli təli, yii mąąwia dɛɛ yɛ́. 9 A kɛ tii, nui ŋɛ̨i ka nu hveelɛ ka təli, a pa yɛ kɛ yɛ́: həɠə gbəlin ɲii ŋą, ə́ li ə́ hee pulu pələ ɓɛi tii. Nąąlɔwai, ya kɛi li heei pulu pələ, nwumɛ̨ a tɛ a yɛ́. 10 Kɛlaa yaamun, ɓɛlɔwai da ə́ təli la, li ə́ hee pulu pələ. Ya ɓə a gɛ, nui ŋɛ̨i ə́ təli, a pa yɛ yɛ́: mə́la mun, tɛ tɔwɔ pələ. Nąąlɔwai, ə́ mąą a wiɛ nuą tii di di təli di ɲɛ̨i ɓa. 11 Mąąhɔlɔɓo, nui lɔpee a gbɔwɔ kɛnɛ̨, da mąą yɛɛ. Nui a gbɔwɔ mąą yɛɛ, da gɛnɛ̨.» 12 Nui ŋɛ̨i dəli, yɛ yili ɓa: «Yá kɛ ə́ kaa nuą təli la kɔ̨nɔ̨n mai, ə kɛ a hvóló ŋą, ə kɛ a yələwulii, hvó gɛ lɔ a ə́ wɛlikɛmąą nuą da ə́ kaayɔɠaa, a wala kɛ tii, hɛn nąmįnąi di kaa ə́ kwɛlɛ; əgɛ, diɛ kpɛli di hvo pa ə́ təli kɔ̨nɔ̨n ma hvóló ta. A kɛ tii, mɛ̨inɛ̨ɛ̨ tii ə́ gɛ, daa gwələ kulɔ. 13 Kɛlaa, yaa kɛi nuą təli hɛli kɔ̨nɔ̨n ma, gɛ a yeehvowolo nuą, kpɛɠii ɲɔ̨n gɛ nuą, kɔ́wɔ nwaną nuą da ɲɛ̨ipu nuą. 14 Akɛ yá yili kɛ, nwun na nɛ̨ɛ̨mun maa a yɛ́. Mąąhɔlɔɓo, hɛn da hvo di yəi, di hvo gwələ kulɔi. Kɛlaa da gwələ kulɔ yɛ́ a telmo nuą nwun ɲələ, diɛ kulɔ haaɓɛlaa lɔwai.» Nui mɛlaa təli kɔ̨nɔ̨n ma mąą hanwon ( Matie 22.1-10 ) 15 Yii kɛa Jesus ə kpɛɛ a nwooɠaa tii ɓoɔ, nuąi da diɛni di kɛi kɔ̨nɔ̨n mį́į́ gee ɓa, dɔ̨nɔ̨ ə mo yɛ mą: «Nui pai ɉeei hɔlɔɓo Yálá-taa tɔɔlaa kɔ̨nɔ̨n ma, nwun na nɛ̨ɛ̨i.» 16 Jesus ə mo mą, yɛ mą: «Hulɔnu ta ə kɔ̨nɔ̨n gɛnɛ̨ɛ̨ pɛli, ə nu kpulu kɛnɛ̨ɛ̨ təli mą. 17 Gɔ̨nɔ̨n tii mį́i lɔwai, ə mo nwɔ koló kɛmun ma, yɛ mą: ‹'Li, nuą tii ŋą di təli, ə́ mo diɛ, di pa. Hvó gaai, ŋą́ą́ mɛ̨nį kəlee aa pɛli.› 18 «Kɛlaa, di kəlee di di kpaan nwoo hukulɔ. Dɔlɔɔ yɛ mą: ‹Ŋą́ą́ tíi ya, hvo kɛli, ŋą li, ŋį́ nąą kaa. Yili ɓa, gáá nɛ̨ɛ̨mąą hvəə yɛ́, mą́ą́hvaalɛɛ.› 19 Da kpɛli yɛ mą: ‹Ŋą́ą́ kɛɛhii nįŋɛ̨ pow ya, hvo kɛ li ŋą li ŋį́ di hu kɔ́ɔn. Yili ɓa, ə́ mą́ą́hvaalɛɛ.› 20 Dɔnɔ̨ yɛ mą: ‹Kələi lɔ ɓə ŋą́ą́ nɛ̨́ą ya la, yili ɓa, vá pɛli pai.› 21 «Góló kɛmun tii ə pənə ə pa nąmu pɔ, ə nwooɠaa tii kəlee hukulɔ mą. Bɛlɛ nąmui tii ə nii ŋąnwąną kpɔ kɛnɛ̨, ə mo nwɔ tímun ma, yɛ mą: ‹'Li gwəli hɛ̨ąiɠaa ɓa, daa pɔ, nui lɔpee yá kwiɛn na, ə́ mo mą; ə kɛ a: yeehvowolomun, ə kɛ kpɛɠiimu, ə kɛ a ɲɛ̨ipumun, mo diɛ di pa ɓɛ.› 22 «Nąą ta wolo əgɛ lɔ, góló kɛmun ə pənə ə pa, yɛ nąmu ɓa: ‹Mɛ̨nįi ə́ mo, ŋą́ą́ gɛ, kɛlaa, heei aa nwɔ̨nɔ̨ lɛɛ.› 23 «Ɉulɔnui tii ə mo nwɔ̨nɔ̨ nwɔ tímun ma, yɛ mą: ‹'Li daa pulu, ɲɛa pələɠaa pɔ, galaɠaa koo ɓa, nui lɔpee yá gaa laa, ə́ mo mą kpɔ a ə́ nwąnąąi ə pa, əgɛ, nwɔ́ɔ́ pɛlɛi laa ə hvɛɛ. 24 Gáá moi kaa, nuą tii ŋį́ di təli, dɔ̨nɔ̨ kpɛli hva kɛa nwɔ́ kɔ̨nɔ̨n tii ta mį́į́.›» Nui gaa bɔ ə hvilɛn Jesus pulu ( Matie 10.37-38 ) 25 Hvóló ta, nu kpulu kɛnɛ̨ɛ̨ ə kɛ Jesus pulu, diɛ li. Ə tínɛ̨n yɛ diɛ: 26 «Nui gaa bɔ ə hvilɛn búlú, mąąnɛ̨ɛ̨ ə mą́ą́ mɛ̨nį hviɛlaɓo ə dɛɛ gaa nuą diɛ, ə dɛɛ nɛ̨ą ɓa da lonnii, ə dɛɛ gaayɔɠaa diɛ, ə mą kɛ gbɔwɔ kpinįi mąą mɛ̨nį. Nui a wala yili kɛ tii, a kɛ tii hva pɛli kɛi a nwɔ́ kalan non ta. 27 Nui a wala gbɔwɔ ŋą kolɔwa həɠə hvo hvilɛn búlú, mąą nu hva pɛli kɛi a nwɔ́ kalan non ta. 28 «Ká nɛlɛ ɓə, a kɛ yɛ ə pɛlɛ kɛnɛ̨ tɔɔ, hva gbɛa hee, hvo giliŋąhiɛ, akɛ hɛn gaa ɲəi a pɛli góló tii kɛi ə naa kulɔ. 29 Awala kɛ tii, a bɛlɛ kɔ́wɔ tɔɔ, hva nąą kulɔ. Nuą da nąą kaa ɲəi, da yɛlɛ kulɔ ɉu. 30 Diɛ kɛ mą: ‹Ɉulɔnui ŋɛ̨i aa pɛlɛ kɔ́wɔ tɔɔ, hvo naa kulɔ li.› 31 «Bələ lɔ ɓə gaa la, akɛ tɔɔmun da a kɛi li kɔ́ pɛlɛi mɛlan dɔɔmun ma, hvo kɛli ə gbɛa hee ə giliŋąhiɛ, akɛ nu waa powi ŋɛ̨i gaa ɲəi, di yee a pɛli mɛlan nwɔ nu waa pow hveelɛi ɓa. 32 Akɛ ɲee hva pɛli, a kɛla tɔɔ mɛlan bɔɔli, əgɛ, di di lɔwai pɛli, di nɛ̨ɛ̨ a di kee.» 33 Jesus yɛ nwɔ̨nɔ̨ diɛ: «Yili ɓə gaa mą, ka ta hva pɛli kɛi a nwɔ́ kalan non, akɛ hvo lənə li gbɔwɔ ɓa da ɉɔlɔɓo hɛnŋąą kəlee.» Kpoloi neen hvə mą ( Matie 5.13 ; Markə 9.50 ) 34 «Kpolo nɛ̨ɛ̨i. Kɛlaa, akɛ kpolo leen a kpɛɛ mą, lə ɓə da da neen na? 35 Hvo kɛa a pɔlɔ lɛlɛ hɛn, hvo nwɔ̨nɔ̨ a tulun bɔlɔ; bili lɔ ɓə da mo. Nui mɛ̨nį mɛ̨n nwəli kaa mą, ə mɛ̨n a nɛlɛɛ.» |