Lonon mo 4 - Yálá laawoo hɛɓɛ (dc)

Levi nu huwu kɛ kóló Kehatə nu huwu

¹ Yai-Laa yɛ Moisə da Aarɔn diɛ:

² «Levi lonnii lɔwai, ka Kehatə yəi bɛlɛ́n nuą hee a gwəliɠaa laa, da bɛlɛ́ɠaa;

³ nuąi di kaa kwɛlan gaa pow haaɓa, yɛ həli pow lɔɔli pɔ, diɛi da pɛli kɛi a tínuą gee kaa kələ mu.

⁴ Kehatə lonnii tii di kɛ kóló ka gee kaa kələ mu; hɛnŋąąi kpɔ mąąhəɠɛɛ yili kaa di nwuɔ̨.

⁵ Da kɛi pa muwu muhəɠəi diɛ li, Aarɔn lonnii ɓə da pa, ɉəɠə ɓɛlai ŋɛ̨i bələi, di gulɔ, di mįnɛ̨ kəhi mɛ̨i kpulu.

⁶ Da nini kɔ́lɔ paa pɛlɛ mɛ̨i, di ɉɛnŋąąi tii kəlee mɛ̨i kpulu a həɠə ɓɛla kpɔluɔ mu tɛɠiɛ. Yili pulu, di mįnɛ̨ kəhi həɠə wuluɠaa laa mu.

⁷ Da Yálá kɔ́ taɓali mɛ̨i kpulu, a həɠə ɓɛla kpɔluɔ mu tɛɠiɛ, gbələ kɔ́ɔɠaa, gəgənŋąą nɔɔ pu hɛnŋąą, nɛɠɛi a kɛ daɓali tii mɛ̨i a yələ kəlee, da lɛɛ nąą.

⁸ Da həɠə ɓɛla kpɔluɔ pɛlɛ ɉɛnŋąąi tii kəlee mɛ̨i, da nini kɔ́lɔ paa. Yili pulu di daɓali kpəŋə hɛnŋąą laa mu.

⁹ Di bənə di həɠə ɓɛla kpɔluɔ mu tɛɠiɛ pɛlɛ nwulɔ nwɔ̨n ɉee hɛn mɛ̨i, yai a kɛ nąą pɔ̨nɔ̨i, nwɔ gbɛ̨ą pɛlɛɛɠaa da nuwu kələ hɛnŋąą, da nwulɔ pu hɛnɲaŋą, yii nuą da kɛ kóló kɛi la laa.

¹⁰ Da ɉɛnŋąąi tii da gwɛlɛ hɛnŋąą kəlee pu nini kɔ́lɔ paa hu, di naa gbɛa-gbɛan ŋą.

¹¹ Di həɠə ɓɛla ɓahiɓoɔ pɛlɛ ɉaláá kulɔ kəhii tii a ɉɛni mɛ̨i, di nini kɔ́lɔ pɛlɛ mɛ̨i. Di gbəŋə wuluɠaa lɔ mą.

¹² Yili pulu, di ɉaláá kulɔ hɛnŋąą kəlee həɠə, da ɉɛnŋąąi tii da kóló kɛ a diɛ bɛlɛ́ mąąhəɠɛɛ mu, di di laa həɠə ɓɛla ɓahiɓoɔ hu, di huwɔ kɔ́lɔ pɛlɛ gəlee mɛ̨i, di di laa gbɛa-gbɛan ŋą.

¹³ Di nuwu kələ ɉaláá kulɔ kəhi mɛ̨i, di həɠə ɓɛla kpɔluɔ pɛlɛ mɛ̨i,

¹⁴ ɉɛnŋąąi kpɔ da kóló kɛ la gəhii tii mɛ̨i di gəlee laa mɛ̨i nwɔ̨n ɉəɠə kunwunugala, nwɔ̨n dɛ hɛnŋąą, nuwu kələ hɛnŋąą, gəhi mɛ̨i hɛnŋąą kəlee. Di huwɔ kɔ́lɔ pɛlɛ di mɛ̨i, di gbəŋə wuluɠaa lɔ gbonoɠaa hu.

¹⁵ Ɓɛlɔwai nuą da kɛ di muhəɠə la, Aarɔn lonnii da di yee laa kulɔ a gee kaa kələ mąą kpinįn gɛɛ, mu hɛnŋąą kəlee. Yili pulu, Kehatə lonnii da pa kɛa di ɉəɠə, di hva tunwɔ̨n bɛlɛ́ mąąhəɠɛɛ ɓa; ə gɛ di hvo pa nəi haa. Gee kaa kələ nwɔ hɛnŋąą hu, yii Kehatə lonnii da ɉəɠə, ya ka tii.

¹⁶ Ɉaláá laa həli mun Aarɔn lon Eleazarə ɓə nwɔ̨n ɉee wulɔ mɛ̨nį nwun na, da ɉɛn gun nɛ̨ɛ̨ɠaai da di kələn, yələ kəlee haláá hɛn, da nwulɔ mąąhəɠɛɛ. Ya ɓə bɛlɛ́ da mu hɛnŋąą kəlee mąą mɛ̨nį kaa nwuɔ̨, ə mą kɛ gɛɛnąą mąąhəɠɛɛ da nąą hɛnŋąą kəlee.»

¹⁷ Yai-Laa yɛ Moisə da Aarɔn diɛ:

¹⁸ «Ka hvo gɛ di hvo pa Kehatə nwɔ kwəlii hu nuą laa kulɔ Levi nu huwu lɔwai.

¹⁹ Ka gɛ pələ kwɛli mą, ə gɛ, da lɛɠɛ gɛɛnąą mąąhəɠɛɛ kpɔ hva-hva mą, di hvo pa haa. Yii ka gɛ, ya ka: Aarɔn da nonnii ɓə da pa di nu tɛitɛi tɔɔ gɛ kóló ɓa, da yii a ɉəɠə.

²⁰ Bələ ɓə da gɛ la, ə gɛ, di hvo pa di ɲɛ̨i pili gɛɛnąą mąąhəɠɛɛ mɛ̨i, akɛ da nąą kaa, da haa.»

Gɛrsɔn lonnii kɛ kólóɠaa

²¹ Yai-Laa yɛ Moisə ɓa:

²² «Gɛrsɔn lonnii diɛ kpɛli, di lonon a gwəliɠaa laa da bɛlɛ́ɠaa laa.

²³ Yiiɠaa di kaa kwɛlan a həɠə pow haaɓa ɓa, yɛ həli pow lɔɔli ɓa, diɛ pɛli di kɛ kóló kɛi gee kaa kələ mu, di lonon.

²⁴ Gɛrsɔn yəi gwəlii nuą di kɛ kóló ka: ɉɛn mąąnɛ̨ɛ̨ di gbəŋə,

²⁵ diɛ ɓə da bɛlɛ́ mu həɠə ɓɛlaɠaa həɠə, da gee kaa kələ, da ɉəɠə ɓɛlai da bɛlɛ mɛ̨i, da ɉuwɔ kɔ́lɔi tii da bɛlɛ mɛ̨i, ə mą kɛ, ɉəɠə ɓɛlai da ɉɛlɛn gee kaa kələ laaləi.

²⁶ Ɉəɠə ɓɛlaɠaa tii da gwəli hąmąi pɛli la, da ɉəɠə ɓɛlai tii gwəli laaləi, yɛ bɛlɛ da gəhi di mɛ̨i, yɛ mąątinɛ̨n na, yɛ doo gee hu, da gbulɔn ɲɛliɠaa, da góló kɛ hɛnŋąą kəlee.

²⁷ Aarɔn da nonnii di yee mu ɓə Gɛrsɔn lonnii da gólóɠaa tii kɛ laa. Ə kɛ a diɲɛ mɛ̨nį-o, ə mą nwɔ̨nɔ̨ kɛ a góló mɛ̨nįɠaa. Ɉɛnŋąą kpɔ mąąnɛ̨ɛ̨ di gɛ a di wɔ kóló, ka gəlee lɛ diɛ.

²⁸ Gɛrsɔn yəi gwəlii nuą kɛ kólóɠaa ka tii, gee kaa kələ mu, di wɔ mąą tíiɠaa ka tii ɉaláá laa həli mun Aarɔn lon Itamarə yee mu.

Merari lonnii kɛ kólóɠaa

²⁹ «Merari lonnii lonon a gwəliɠaa laa, da bɛlɛ́ɠaa laa.

³⁰ Nuąi di kaa kwɛlan a həɠə pow haaɓa ɓa yɛ həli pow lɔɔli ɓa, di wɔ kóló kaa pai kɛi gee kaa kələ mu.

³¹ Yiiɠaai mąąnɛ̨ɛ̨ di gɛ, ya ka; gólói lɔ di yəi gee kaa kələ mu ya ɓaa: Bɛlɛ́ hvilɛn nwuluɠaa, di hulɔ wuluɠaa, bɛlɛ́ hɔlɔɔnŋąą da di kɔ́wɔ hvilɛn ɉɛnŋąą, yiliɠaa ɓə da ɉəɠə,

³² Nwulu hɔlɔɔnŋąąi da gwəli tɔɔ la, da di kɔ́wɔ hvilɛn ɉɛnŋąą, da nwulu kpiɛɠaa, da gbulɔn ɲɛliɠaa, da góló kɛ hɛnŋąą kəlee. Ɉɛn mąąnɛ̨ɛ̨ nu tɛitɛi ə ɉəɠə, ka nɛ mą.

³³ Merari lonnii di wɔ kóló ka tii. Yii mąąnɛ̨ɛ̨ di gɛ gee kaa kələ ɓa, gəlee lɔ ka tii. Ɉaláá laa həli mun Aarɔn lon Itamarə yee mu.»

Di Levi huwu hu nuą lonon

³⁴ Moisə, Aarɔn da gbɔn ɲɛ̨itɔwɔ nuą, di Kehatə lonnii lonon, a gwəliɠaa da bɛlɛ́ɠaa laa.

³⁵ Nuąi di kaa kwɛlan ə həɠə pow haaɓa ɓa, yɛ li pow lɔɔli ɓa, diɛ di wɔ kóló kɛ gee kaa kələ mu.

³⁶ Di pɛlɛɛ di kee ɓa, di kɛ a hinąą waa hveelɛ pulu nwun mɛ̨ihveelɛ ɲee lɔɔli (2750).

³⁷ Kehatə lonnii lonoɔ ka tii, diɛi kpɔ kɛi kóló kɛ gee kaa kələ mu. Diɛi tii Moisə da Aarɔn di di laa pɛ̨ɛ̨, yɛ bələi Yai-Laa ə Moisə tí la.

³⁸ Gɛrsɔn lonnii lonoɔ ka; di laa pɛ̨ɛ̨ a gwəliɠaa laa, da bɛlɛ́ɠaa laa.

³⁹ Nuąi kpɔ di kaa kwɛlan a həɠə pow haaɓa ɓa, yɛ həli la pow lɔɔli ɓa, diɛi mąąnɛ̨ɛ̨ di di tí gee kaa kələ mu kólóɠaa ɓa,

⁴⁰ Di kəlee di pɛlɛɛ di kee ɓa di kɛ a hinąą waa hveelɛ pulu nwun mɛ̨ida ɲee haaɓa (2630).

⁴¹ Gɛrsɔn lonnii ka, diɛi kpɔ kɛi kóló kɛ gee kaa kələ mu, diɛi Moisə da Aarɔn di di laa pɛ̨ɛ̨, yɛ bələi Yai-Laa ə Moisə tí la.

⁴² Merari lonnii lonoɔ ka, diɛi kpɔ di di laa pɛ̨ɛ̨ a gwəliɠaa laa, da bɛlɛ́ɠaa laa.

⁴³ Nuąi kpɔ di kaa kwɛlan a həɠə pow haaɓa ɓa, yɛ li la pow lɔɔli ɓa, diɛi di kɛli di tí gee kaa kələ mu kólóɠaa ɓa,

⁴⁴ di kəlee di pɛlɛɛ di kee ɓa, di kɛ a hinąą waa haaɓa pulu nwun veelɛ (3200).

⁴⁵ Merari lonnii lonoɔ ka tii, diɛi kpɔ kɛi kóló kɛ gee kaa kələ mu, diɛi Moisə da Aarɔn di di laa pɛ̨ɛ̨, yɛ bələi Yai-Laa ə Moisə tí la.

⁴⁶ Levi nu huwu pɛlɛɛ gee ɓa, di lonoɔ ka, diɛi Moisə, Aarɔn da Israɛlə ɲɛ̨itɔwɔ nuą di di laa pɛ̨ɛ̨, a gwəliɠaa laa da bɛlɛ́ɠaa laa;

⁴⁷ nuąi kpɔ di kaa kwɛlan a həɠə pow haaɓa ɓa, yɛ həli pow lɔɔli ɓa, di yee ə ɓo gee kaa kələ hee mɛ̨nį gee la ɓa, da ɉəɠə mɛ̨nį,

⁴⁸ di pɛlɛɛ di kee ɓa, di kɛ a hinąą waa mɛ̨ihaaɓa pulu nwun nɔɔli ɲee mɛ̨ihaaɓa (8580).

⁴⁹ Yɛ bələi Yai-Laa ə mo la Moisə ɓa, yɛ naa həli nuą diɛ. Di di lonon, diɛ nu tɛitɛi kəlee kɛ kóló lɛ mą. Di di lonon, yɛ bələi Yai-Laa ə Moisə tí la.