Lonon mo 32 - Yálá laawoo hɛɓɛ (dc)Nɔi ɲąąkwɛlɛ pələ nuą lɔwai 1 Taatɛlɛɛ kpulu kɛnɛ̨ ə kɛ Rubɛn lonnii da Gadə lonnii di yəi. Di Yazerə da Galaadə lɔi kaa, di gaa diɛ nɔi lɛlɛɛi taatɛlɛɛɠaa mąą mɛ̨nį ɓa. 2 Yili ɓə gɛ, Gadə lonnii da Rubɛn lonnii di pa diɛ Moisə da ɉaláá laa həli mun Eleazarə da nɔi ɲɛ̨itɔwɔ nuą diɛ: 3 «Atarotə, Divɔn, Yazerə, Nimra, Hɛsbɔn, Eleale, Sevan, Nebo, Beɔn, 4 a nɔi tii Yai-Laa ə ɉon a kɔ́ Israɛlə lonnii mąą mɛ̨nį ɓa, taatɛlɛɛ ɲąą kɔ́n nɔi li. Taatɛlɛɛ kpulu kaa ə́ wɔ tínuą yəi. 5 Akɛ kwaa ə́ lii hon, nɔi tii tɛɛ ə́ wɔ tínuąi pɔ a di kwɛlin. Hvó ku lɛɛ laa ku hvo li Ɉurdɛn pulu pələ.» 6 Kɛlaa, Moisə yɛ Gadə lonnii da Rubɛn lonnii diɛ: «Éé! Ka nąn nonnii diɛ pa lii kɔ́ ɓa, ka káá bɔ ka lɛɛ ɓɛ? 7 Lə mɛ̨nį ɓa yai ka káá yɔgbɔlɔn bilii Israɛlə lonnii kɔ́wɔi di li mɛ̨nį ɓa nɔi Yai-Laa ə naakwɛlanmo diɛ ɉu? 8 Mɛ̨nįi lɔ ka nąnni di gɛ ɓɛlɔwai ŋį́ kɛ la Kadɛsə-Barnea, gɛ́ di tɛɛ nɔi hu kaai, da lɔ ka ŋɛ̨i ka laa ɓa. 9 Di tɛ kpɔ di həli Ɛskɔlə yɛɛ kɔ́wɔ hu, di nɔi kaa. Yili pulu, di Israɛlə lonnii hviikpɛɛ, diɛ kɛ yiliɠaai di hvo lɔ nɔi Yai-Laa ə dɛɛ di pɔ ɉu. 10 Yai-Laa lii ə holi a volói tii, ə gwɛla, yɛ kɛ diɛ: 11 ‹Nuąi kpɔ tii kulɔ Eziptə lɔi hu a kwɛlan bow hveelɛ da bulu, nɔi ŋį́ naakwɛlanmo Abrahamə, Isaakə da Ɉakɔbə ni diɛ, di hvo pai gaai; hvo gaai di kaa tɔɔi tai tai di hvilɛn mɛ̨nį ɓa búlu.› 12 Nuąi lɔ di laa hvo ɉu diɛ ɓaa Yefunɛ lon Kalɛbə Kenizi mun da Nun lon Ɉosue. Hvo gaai di wɛi di hvilɛn Yai-Laa pulu, ɲinɛ̨ ɲinɛ̨n və kɛ di hu. 13 Yai-Laa lii ə holi Israɛlə pɔ, ə di nwun ɉu hiɛ nɔi pun ɉu kwɛlan bow nąąn ɲeemu. Ə lɛɛ ɉu nuąi kpɔ tii Yai-Laa líiholi, gəlee di haa. 14 Ɛlɛɛ ya ka, kaai ŋɛ̨i a nɛ̨ŋɛ̨n nonnii, kaa hvilɛn ka nąnni pɔɔŋą, kaa kɛ ka Yai-Laa líiholi Israɛlə pɔ. 15 Akɛ ka wala gɛ ka hvo hvilɛn bulu, gaa nwɔ̨nɔ̨ pai Israɛlə lamui nii nɔi pun ɉu, ɛlɛɛ nu huwui ŋɛ̨i kəlee nwun na pili mɛ̨nį wulu yɛ lɛɛ ka nwuɔ̨.» 16 Nuąi tii di lɛɠɛ Moisə ɓa, diɛ mą: «Kwɛnąnŋąą lɔ ɓə ku kaa dɔɔi ɓɛ a ku wɔ taatɛlɛɛɠaai da ku lonnii mąą mɛ̨nį ɓa. 17 Kuɔ kpinįi kwa gɔ́ kɔ́ hɛnŋąą həɠə a mąą hulaa, kuɔ tɛɛ Israɛlə lonnii ɲɛ̨itɔwɔ; ə lɛɛ ɉu ku di lɔ di wɔ lɔi hu. Ku lonnii kaa lɛɛi ɓɛ daaɠaa hu, di mąątínɛ̨n ŋąą a hįį kpoloon. Di mąą yɛ kpɛ la tii nɔi hu nuą tɔwɔ. 18 Ku hvo pai pənəi ku hvo pa ku wɔ pɛlɛ́ɠaai mu, hvo kɛi Israɛlə lonnii kəlee da lɔ di hɔlɔɓo lɔiɠaa hu. 19 Kɛlaa, ku wɔɔ hvo kɛa pai kɛi ɉɛnŋąąi pai hɔlɔɓoi Ɉurdɛn pulu di hu, mąąhɔlɔɓo ku wɛi kaa voló kulɔi pələ ɲá pulu ɓɛli pələ. 20 Moisə yɛ diɛ: Ka gɛ tii, ka gɔ́ kɔ́ kwɛli hɛnŋąą həɠə ka li gɔ́ ɓa Yai-Laa ɲɛ̨i ɓa. 21 Ka wɔ kɔ́ kɔ́ nuąi kəlee da Ɉurdɛn teen Yai-Laa ɲɛ̨i ɓa, ə lɛɛ ɉu ə ɲowoɠaa kəlee kpɛ ɲɛ̨i tɔwɔ. 22 Akɛ ka hva pənə ka hvo pa, hvo kɛi nɔi a lɛɛ Yai-Laa yəi, ka gɛ tii. Yai-Laa nwɔ mɛ̨nį hva kɛ kaa; ɛlɛɛ Yai-Laa ɲɛ̨i ɓa, nɔi ŋɛ̨i ka gu kaa tɔɔni ɉu, a lɛɛ a ka kwɛlin. 23 Kɛlaa ka wala gɛ, a kɛ tii kaa nɛ̨ŋɛ̨n ɉəɠə Yai-Laa ɓa; mąąnɛ̨ɛ̨ ka gɔlɔn kaa ka wɔ nɛ̨ŋɛ̨n tii a hvilɛn ka pulu. 24 Ka taaɠaa tɔɔ ka lonnii diɛ, ka galaɠaa tɔɔ ka wɔ ɓɛlaaɠaai diɛ. Kɛlaa mɛ̨nįi kulɔ ka la kaa naakwɛlanmo, ka bɔ mɛ̨nį kɛ.» 25 Gadə lonnii da Rubɛn lonnii di mo Moisə ɓa, diɛ mą: «Mɛ̨nįi ku wɔ mɛ̨nį nąmu ə mo, ə́ wɔ tínuą kaa pai gɛi tii. 26 Ku nɛ̨ąni, ku lonnii, ku wɔ nįŋɛ̨ɠaa da ku wɔ taatɛlɛɛ pɛlɛɛɠaa kəlee kaa pai lɛɛi ɓɛ, Galaadə taaɠaa hu. 27 Ɛlɛɛ, ə́ wɔ tínuą da di hąą yili, diɛ li gɔ́ ɓa, da tɛɛ Yai-Laa lííla diɛ li gɔ́ ɓa, yɛ bələi ku wɔ mɛ̨nį nąmu ə mo la.» 28 Moisə ə di mąą mɛ̨nį ɓo ɉaláá laa həli mun Eleazarə ɓa, da Nun lon Ɉosue, da Israɛlə ɲɛ̨itɔwɔ nuą, 29 yɛ diɛ: «Gadə lonnii, da Rubɛn lonnii, di kaa pai Ɉurdɛn yá teen ɉii, ka diɛni, di hąą yiliɛi diɛ li gɔ́ pɛlɛi Yai-Laa ɲɛ̨i ɓa. Nɔi a pa lɛɛi ka yəi, ka Galaadə lɔi tɛɛ di pɔ a di kwɛlin nɔi. 30 Kɛlaa, da wala lɛɛ ka pɔ ka diɛni ka hvo li, da di wɔɔ lɔi hɔlɔɓo Kanaan lɔi hu, ka diɛni.» 31 Gadə lonnii da Rubɛn lonnii di nwoo pulu pənə diɛ mą: «Mɛ̨nįi Yai-Laa a mo ə́ wɔ tínuą diɛ, ya ɓə di kaa gɛi. 32 Kuɔ kpinįi ku hąą yiliɛ, ku ku wɔ kɔ́laɠai həɠə, ku tɛɛ Kanaan lɔi hu, Yai-Laa ɲɛ̨i ɓa. Kɛlaa, ɓɛi nąą kaa pai kɛi a ku kwɛlin nɔi, nąą kaa Ɉurdɛn yá pulu, ɓɛli pələ.» 33 Moisə ə Amɔrə nuą di wɔ tɔɔmun Sihɔn nwɔ lɔi da Basan tɔɔmun Ogə nwɔ lɔi tɛɛ Gadə da Rubɛn lonnii, da Ɉosɛfə lon Manase huwu bələ tɔ̨nɔ̨ pɔ, nɔi da nwɔ taaɠaa, bɛlɛɛ nwɔ yɛɛ kɔ́wɔɠaa diɛ, da di kwɛlɛ taaɠaa. 34 Gadə lonnii di pənə di Divɔn tɔɔ, da Atarotə, da Aroɛrə, 35 Atrotə-Sofan, Yazerə, Yogboha, 36 Bɛtə-Nimra da Bɛtə-Haran. Di daaɠaa tii tɔɔ, di mąątinɛ̨n a hįį kpoloon, di ɓɛlaa kwənąnŋąą tɔɔ. 37 Rubɛn lonnii di Hɛsbɔn, Eleale, Kiriataimə, 38 da Nebo, Baalə-Meɔn tɔɔ, di di laaɠaa mąąhvalin, di Sivma tɔɔ; di laa takpɛliɠaa hee diɛ. 39 Manase lon Makirə lonnii di wɛi, di li Galaadə, di nɔi hon, Amɔrə nuąi kɛ laa di di kpɛ. 40 Moisə ə Galaadə tɛɛ Manase lon Makirə pɔ, yili ə hee laa. 41 Manase lon Yairə ə li ə di wɔ taa pɛlɛɛɠaai hon a kɔ́, ə di laa hee a: Yairə. 42 Nova ə li ə Kenatə da nwɔ yɛɛ kɔ́wɔɠaa hon a kɔ́, ə di laa hee a: Nova, ə gbɔwɔ laa hee mą. |