Lonon mo 23 - Yálá laawoo hɛɓɛ (dc)Balaamə ə lúwɔ́ too Israɛlə ɓa 1 Balaamə yɛ Balakə ɓa: haláá kulɔi mɛ̨ihveelɛ tɔɔ ɓɛ mą́ą́. Ə́ nįŋɛ̨ hilɛ mɛ̨ihveelɛ da ɓɛlaa hilɛ mɛ̨ihveelɛ tɛɛ bɔ́. 2 Balakə ə gɛ yɛ bələi Balaamə ə mo la. Di nu hveelɛi di nįŋɛ̨ hilɛ tɔ̨nɔ̨ da ɓɛlaa hilɛ tɔ̨nɔ̨ kulɔ a haláá, ɉaláá kulɔi tɛi tɛi kəlee ɓa. 3 Balaamə yɛ Balakə ɓa: «Tɔɔ ə́ wɔ haláái kwɛlɛ, ŋą́ mąą tawolo tɛ. Gbəli hu Yai-Laa kaa pai mɛ̨nį ɓoi mą́ą́, yii lɔpee a mo mą́ą́, ŋą́ ɉukulɔ yɛ́.» Ə tɛ yee ta ɓa, mąą pɔ̨nɔ̨ɔ̨. 4 Yálá ə pa Balaamə pɔ, Balaamə yɛ mą: «Ŋą́ą́ mo daa haláá kulɔi mɛ̨ihveelɛ pɛli, daa nįŋɛ̨ hilɛ tɛi tɛi da ɓɛlaa hilɛ tɛi tɛi kulɔ a haláá, dɛi tɛi mɛ̨i.» 5 Yai-Laa ə woo ta ɓo Balaamə ɓa, ə gɛ yili ə li, ə nwooi tii ɓo Balakə ɓa. 6 Balaamə ə pənə ə li Balakə pɔ, ə gaa tɔɔni nwɔ halááɠaai kwɛlɛ, da Moabə kalanɉonŋąą kəlee. 7 Nąąlɔwai, Balaamə yɛ kɛa nwələi ŋɛ̨i too, yɛ kɛ mą: «Balakə ə də́li Aramə lɔi hu, Ŋą́ kɛ Kɛdɛmə yee lɔiɠaa hu, Moabə tɔɔmun yɛ də́li. Yɛ kɛ mą́ą́: 'Pá ə́ Ɉakɔbə nɛ̨ŋɛ̨n naa! 'Pa ə́ Israɛlə ɲɛ̨i paa. 8 Nui Yálá hvo nɛ̨ŋɛ̨n naa li, Ŋą́ pɛli nɛ̨ŋɛ̨n naa pələ kɛi ləi? Nui Yálá hvo ɲɛ̨i paa li, Ŋą́ pɛli ɲɛ̨i paa pələ kɛi ləi? 9 Ŋą́ kɛ ŋɛ̨i tɔɔni kwɛni mɛ̨i, gɛ́ gaa, Ŋą́ kɛ ŋɛ́i tɔɔni yee tonna, gɛ́ mąą kpɛɛ. Gáá gaai a nu huwui dɔɔ a dee. Da lɔi takpɛliɠaa di hvo tɔɔ li. 10 Gbɛɛ ɓə a pɛli Ɉakɔbə nwɔ muluun gbalai nonon ɉii? Da Israɛlə nwɔ nu kpului tii líi lɔ daną danąi? Yálá ə gɛ ŋį́ haa a dələnmo nuąi ŋɛ̨i haa pələ. Nwɔ́ yɛnɛ̨ɛ̨ laa kulɔi ə kɛ yɛ di wɛi.» 11 Balakə yɛ Balaamə ɓa: «Lə ɓə ŋɛ̨i ə́ gɛi a ɲą́ą́? Ŋą́ ə təli ɲówoɠaa nɛ̨ŋɛ̨n naa mɛ̨nį ɓa, ya ɓə yá di kɔ́lɔɓa kpɛɛ mą a lúwɔ́.» 12 Balaamə ə nwoo pulu pənə yɛ mą: «Ŋą́ kɛi hvaa, mɛ̨nįi Yai-Laa a bu ná, ya hvəi mɔ̨ɔ̨ mąąnɛ̨ɛ̨ ŋį́ mo?» Balaamə nwɔ lúwɔ́ veelɛnąą 13 Balakə ə pənə yɛ mą: «'Pa gwəli kɛɛnąą takpɛli ɓa, yá kɛ laa yɛ́ nu kpului ŋɛ̨i kaa. Ɛlɛɛ ə́ nɛ̨ŋɛ̨n naa laa ɲə́i. Bələ tɔ̨nɔ̨ lɔ ɓə ə́ kɛi gaa, hvo kɛi nu kpulu kəlee kaa.» 14 Ə li la kɛɛnąą yee muhəɠɛɛ ɓa, Pisga Yee tonna. Ə haláá kulɔi bɛli laa mɛ̨ihveelɛ. Ə nįŋɛ̨ hilɛ tɛi tɛi da ɓɛlaa hilɛ tɛi tɛi paa nąą tɛi tɛi ɓa. 15 Balaamə yɛ mą: «Tɔɔ ɓɛ ə́ wɔ haláái kwɛlɛ, ŋą́ li ɓɛi tii gɛ́ nąą mąą kpɔn.» 16 Yai-Laa ə pa Balaamə pɔ, ə woo ta lɔ na, ə gɛ yili ə li ə mo Balakə ɓa. 17 Balaamə ə pənə ə pa Balakə pɔ, ə gaa tɔɔ ni nwɔ haláái kwɛlɛ, yaa da Moabə kalanɉonŋąą. Balakə yɛ mą: «Lə mɛ̨nį ɓə Yai-Laa ə mo yɛ́?» 18 Balaamə ə́ nwɔ wələi ŋɛ̨i too, yɛ kɛ mą: «Ə́ muhəɠə Balakə, ə́ ə́ wəli tɔɔ. Sipɔrə lon, ə́ wəli tɔɔ kpɔ a nɛlɛɛ 19 Yálá hvo yɛ bələi nu kaa la, hva pɛli lɛɛ kɛi, hvo yɛ Adamə lon da, yɛ pɛli nwoo mąą pənəi. A mɔ̨ɔ̨ pɛli mɛ̨nį ɓoi a kɛ hvo mąą mɛ̨nį kɛ li? A mɔ̨ɔ̨ woo ɓo yii hvo bɔ mɛ̨nį kɛ li? 20 Daa dí, diɛ ŋį́ lúwɔ́ too, Mąąhɔlɔɓo, Yálá aa lúwɔ́ too, və́ pai nwóó yalii bulu. 21 Və́ mɛ̨nį ɲąąnwąnąą kaai Ɉakɔbə pɔɔli. Və́ mɔ̨nɔ̨ kaai Israɛlə nwɔ lɔi hu. Yai-Laa yai a nwɔ Yálá, gaa bulu, di kaa di yee lɔwai mą yɛ tɔɔmun. 22 Yálá ə gulɔ Eziptə lɔi hu, vaŋą kɛnɛ̨i yɛ lan. 23 Tɔlukpɛɛ hvo Ɉakɔbə pɔɔli. Ɲɛ̨ąkpɛ mɛ̨nį hvo Israɛlə pɔɔli. Mɛ̨nįi Yálá a gɛ, a ɓo Ɉakɔbə ɓa. A ɓo Israɛlə ɓa a guu. 24 Nu huwu ka tii, a muhəɠə yɛ yala, a haŋą ə tɔɔ yɛ yala hilɛ, hva pɛlɛ akɛ hvo huwɔ hon ni yɛ ɉu ɓɛla. Yii hvo huwɔ hon ni, yɛ ɲąmą kpələ.» 25 Balakə yɛ Balaamə ɓa: «Yá wala nɛ̨ŋɛ̨n naa, hvó tɔɔ yɛ́ lúwɔ́ too mą.» 26 Balaamə ə nwoo pulu pənə, yɛ mą: «Və́ mo gɛ́ yɛ́, mɛ̨nįi lɔpee Yai-Laa a mo, ya ɓə gáá pai gɛi?» Balaamə nwɔ lúwɔ́ ɉaaɓa nąą 27 Balakə yɛ Balaamə ɓa: «'Pa tai, gáá lii a yɛ́ kɛɛnąą takpɛli ɓa. Yálá kaa kiɛ pai hvaai mą, ə́ nu huwui tii nɛ̨ŋɛ̨n nąą gɛɛnąąi tii ɓa mą́ą́.» 28 Balakə ə li a Balaamə Peɔrə Yee tonna, yai tɔɔ ni nɔi pun dənən ma. 29 Balaamə yɛ mą, di haláá kulɔi mɛ̨ihveelɛ pɛli mą́ą́. Ə́ nįŋɛ̨ hilɛ mɛ̨ihveelɛ da ɓɛlaa hilɛ mɛ̨ihveelɛ ɲąą pɛli ɓɛ mą́ą́. 30 Balakə ə gɛ yɛ bələi Balaamə ə mo la mą. Yili pulu, ə nįŋɛ̨ hilɛ tɛi-tɛi da ɓɛlaa hilɛ tɛi-tɛi kulɔ a haláá, ɉaláá kulɔi tɛi-tɛi ɓa. |