Lonon mo 16 - Yálá laawoo hɛɓɛ (dc)Kore ə gwɛli tee 1 Kehatə mąnįn Yiseharə lon Kore, yai a Levi mun, ə pili Datan da Abiramə di wəlii, diɛi a Eliavə lonnii da Pɛlɛtə lon On, diɛi kɛ a Rubɛn huwu hu nuą. 2 Di tɔɔ Moisə la, da Israɛlə lonnii nwun veelɛ yee lɔɔli. Di kɛ a nu kpɔn ɲɛ̨itɔwɔ nuą, a laa nąmįną. 3 Di hvaa pɛlɛ Moisə da Aarɔn diɛ, diɛ kɛ diɛ: «Ka káá kɛa ka yee ɓɔi ɉu, nɔi lonnii kəlee mąąhəɠɛɛ ɓə, ɛlɛɛ, Yai-Laa kaa di lɔwai, lə laa hu ɓə ka káá ka nwun dɛi la Yai-Laa nwɔ nu kpului mɛ̨i?» 4 Nwooɠaai tii mɛ̨n Moisə ə mo, ə pɛlɛ niiɓa nɔi ɓa. 5 Yili pulu, yɛ Kore da bulu nuą kəlee diɛ: «Tínąą yələ wala pɔ, nui gaa a Yai-Laa nwɔ nu, yai mąąhəɠɛɛ yɛ pɛli lɛɠɛi mą, Yai-Laa a tinąą nɛ. Nui a nɛɛ laa yɛ lɛɠɛ mą, mąą nu ɓə a niiɓamun. 6 Yii mąąnɛ̨ɛ̨ ka gɛ, ya ka: Kore ka ə́ pulu nuą ka ka wɔ lansan kələn ɉɛnŋąąi həɠə, 7 ka nwɔ̨n dəŋą pu di hu, tínąą, ka lansan kələn Yai-Laa lííla. Nui Yai-Laa kaa pai ɉəɠəi ɉu mąą nu ɓə mąą həɠɛɛ. Kaai a Levi lonnii, kaa ku hviikpɛɛ kɛa a mɔlɔ.» 8 Moisə yɛ nwɔ̨nɔ̨ Kore ɓa: «Ka ka wəli tɔɔ, Levi lonnii. 9 Ka həɠəi ŋɛ̨i Yai-Laa ə mo Israɛlə lonnii lɔwai, yɛ hvaa mą kaa lɛɠɛ mą, kaa Yai-Laa nwɔ pɛ́lɛ́i mu kólóɠaa kɛ nɔi nuą kəlee mąą mɛ̨nį ɓa, yili hvo ka kulɔ li? 10 Da ka lɛɛ laa kaa lɛɠɛ mą, yɛ ka ə́ nąn nonnii kpɔ a Levi huwu hu nuą, ya ɓə nwɔ̨nɔ̨ ka hvilɛn ɉaláá laa həli nuą pulu. 11 Yili mąą mɛ̨nį ɓə ka ə́ pulu nuą kəlee ka tɔɔ la Yai-Laa la. Aarɔn hvəi ka káá naa ɓoi.» 12 Moisə ə Eliavə lonnii Datan da Abiramə di təli. Yiliɠaai diɛ mą: «Ku hvo lii. 13 Ku kulɔi ŋɛ̨i ə́ mo lɔi ta hu, ɓɛi hɛn gəlee da lɛlɛ laa, yɛ́ pa ku paai nɔi pun ŋɛ̨i hu, yili hva pɛli yɛ́, hvo kɛ li nwɔ̨nɔ̨ yá kɛ diɛ ə́ kaa ku ɲąąwooɓoi? 14 A tɛ̨ą, hvó pa li a kuɔ ɓɛi hɛn gəlee a lɛlɛ laa. Hvo tíi kɛi da hihɛnŋąą tɛɛ li ku pɔ a ku wɔɔ. Gaa ə́ kwəi nuąi ŋɛ̨i ɲɛ̨i puɔ ɓə mɔ̨ɔ̨? Ku hva pɛli pai.» 15 Moisə lii ə holi kpɔ kɛnɛ̨, yɛ Yai-Laa ɓa: «Hvó ə́ yee hee di wɔ kɔ́ɓo hɛn mu. Və́ ta kpɛli hoohvaalən gulɔ li di yəi, və́ ta hvulu mɛ̨nį kɛ li a di ta.» Kore, Datan da Abiramə di hutɔɔ pələ 16 Moisə yɛ Kore ɓa: «Yɛ́ ka ə́ pulu nuą kəlee, ka pa tínąą ɓɛ Yai-Laa lííla. Yɛ́, diɛ, ɛlɛɛ Aarɔn. 17 Nu kəlee nwɔ lansan kpowo ə kɛ ɲəi, ka lansan pu ɉu, ɛlɛɛ nu kəlee ə nwɔɔ laa həli Yai-Laa ɓa. Lansan kpowo nwun veelɛ yee lɔɔli. Aarɔn yaa kpɛli, ɛlɛɛ, yɛ́ kpɛli, ka pa a ka wɛiɠaa.» 18 Di kəlee di di wɔ lansan kpowoi həɠə di nwɔ̨n bu ɉu da lansan. Di tɔɔ gee kaa kələ laaləi, da Moisə ni ə mą kɛ Aarɔn. 19 Kore ə nuą kəlee ɲąąkpɔn gwɛlɛ, gee kaa kələ laaləi. Nąąlɔwai, Yai-Laa nwɔ mąąwiɛ ə gbɔwɔ lɛ nu kəlee ɓa. 20 Yai-Laa yɛ Moisə da Aarɔn diɛ: 21 «Ka həɠə nuąi tii kwɛlɛ, gáá di hukalai kpɔlɔ yiihu.» 22 Moisə da Aarɔn di too nɔi ɓa, diɛ Yai-Laa ɓa: «Ee kə Yálá, yɛ́i pɛli hɛn gəlee nɔ̨ɔ̨ kaa ə́ yee kɔ́nma, nu tɔ̨nɔ̨ lɔ ɓə nɛ̨ŋɛ̨n ɉəɠə, ya ɓə ə́ kaa ə́ liiholii nu kpulu kəlee pɔ.» 23 Yai-Laa yɛ Moisə ɓa: 24 «Mo nɔi nuą diɛ, di di mąą kwɛa Kore, Datan da Abiramə di wɔ pɛlɛ́ɠaai diɛ.» 25 Moisə ə muhəɠə ə li, Datan da Abiramə di pɔ. 26 Moisə ə mo nuą diɛ, yɛ diɛ: «Ka ka mąą kwɛa nu ɲɔ̨nwɔ̨ɔ̨ɠaai ŋɛ̨i di wɔ pɛlɛ́ɠaai diɛ. Ka hvə tunwɔ̨n di yəi hɛn da ɓa, ka hvo nee pa haa di wɔ nɛ̨ŋɛ̨nŋąąi mąą mɛ̨nį ɓa.» 27 Nuą di həɠə Kore, Datan da Abiramə di wɔ pɛlɛ́ɠaai kwɛlɛ. Datan da Abiramə daa kɛ kulɔ, di ɓo tɔɔni di wɔ pɛlɛ́ɠaai laaləi, da di nɛ̨ąni, di lonnii da di mąnįn ni. 28 Moisə ə mo, yɛ diɛ: «Bələi ka gɔlɔn na kaa kɛ Yai-Laa ɓə dɔ́ɔ́ gɛ́ mɛ̨nįɠaai ŋɛ̨i kəlee kɛ, və́ lɛɛ li gbɔwɔ ɓa gɛ́ gɛ tii, bələ ka. 29 Nuąi ŋɛ̨i da haa lɔ a nu kəlee haa pələ, mɛ̨nįi bɛ̨ɛ̨ nu kəlee nwuɔ̨ yɛ laa diɛ, a kɛ tii Yai-Laa hvo dɔ́ɔ́ li. 30 Kɛlaa, Yai-Laa a kpalo mɛ̨nį ta kɛ, lɔi ə naa ɓo, ə di kpələ diɛ da di yəi hɛnŋąą kəlee, di lɛɛ a di hvulú diɛ yɛɛ ɲąmuą-taa, ka kili a pu ɉu kaa kɛ nuąi ŋɛ̨i di tɛɠɛɓo Yai-Laa hu.» 31 Moisə ə kpɛɛ lɔ a nwoo laa kulaa, lɔi ə ɓɛla nuąi tii kɔ́wɔ mu. 32 Lɔi ə naa ɓo, ə di kpələ da di yəi bɛlɛ́n nuą, ə mą kɛ Kore nwɔ nuą da di yəi hɛnŋąą kəlee. 33 Da di yəi hɛnŋąą kəlee di lɛɛ a di hvulú, di yɛɛ ɲąmuątaa, nɔi ə pənə ə naa kpulu di mɛ̨i. Bələ ɓə di kulɔ la nuą lɔwai. 34 Di tómą woo ə gɛ, Israɛlə lonnii kpɔ tii kɛ tɔɔni di kwɛlɛ, di pu. Diɛ kɛ di kee ni diɛ, ka gu pu lɔi hvo pa nee ka gu kpələ guɔ kpɛli. 35 Nwɔ̨n ə kulɔ Yai-Laa pɔ, nu nwun veelɛi ɲee lɔɔli tii kɛi lansan laa həli Yai-Laa ɓa, ə gəlee kələn. |