Lonon mo 11 - Yálá laawoo hɛɓɛ (dc)Yai-Laa nwɔ nwɔ̨n 1 Yələ ta, Israɛlə lonnii di pɛlɛ diɛ di woolaa. Di woo tii ə too Yai-Laa wəli, hvo nɛ̨ɛ̨ mą. Di woo mɛ̨n Yai-Laa ə mo, ə níiholi kpɔ kɛnɛ̨. Yai-Laa nwɔ nwɔ̨n ə di wɔ ɓuwui bələ tɔ̨nɔ̨ kələn. 2 Nuą kəlee di wɔlɔ Moisə ɓa, Moisə ə di mąą nɛ̨ɛ̨mąą hvə Yai-Laa ɓa, nwɔ̨n tii ə luwun. 3 Di gɛɛnąąi tii laa hee a: Taveera. Mąąhɔlɔɓo, Yai-Laa nwɔ nwɔ̨n ə too Israɛlə lonnii hu. Nuą di hvɛnɛ̨ hɛn nwɔlɔ ɓo 4 Israɛlə lonnii lɔwai, nwɛ̨ą ɲɛ̨i tamąą di kɛ laa. Ɲɛikulɔ ɓɔ ə lɔ di hu, da Israɛlə lonnii, diɛ kɛa di woolaa, diɛ kɛ mą: «Gbɛɛ ɓə pai hvɛnɛ̨ hɛn dɛɛi ku pɔ, ku mįi! 5 Kwa ku kiliŋąhiɛ, kwa vilɛn ɉɔ̨nwɔ̨leeɠaa ku kɛi mįi a kpɛli Eziptə lɔi hu, da nwɛlikwɛnɛ̨ɛ̨ kpɛa-kpɛaa, yaɓaɠaa, tea kpuwuluɠaa, da nɔ́w huwu tamąą diɛ. 6 Ya ka kɛa ku kaa ɓɛ, ku kpala kpalaa, hɛn nɔpee ta hvo kɛa mą, hvo kɛli lɔ manəi ŋɛ̨i ku kaa mįi.» 7 Manə ə kɛ yɛ mɔ̨nun ɲin, mukpɔluɔ yɛ hąmą. 8 Nuą di kɛi kulɔ diɛ taɠa taɠa, diɛ li diɛ gələ, diɛ vunwɔ kwəną hu, diɛ ɲili, diɛ da kɛ a lɛɠɛ. Neen bələ a kɛ yɛ nwɔ̨mįi da ɲələn a wulɔ. 9 Yələ ɓɔi lɔwai, ɓɛlɔwai luwuluwu a kɛ pui la, nąąlɔwai ɓə mane ə kɛi pu la. 10 Nuą ɲąąkpɔn ŋąąi kɛ di wɔɔ kwəliɠaa hu, diɛ di woolaa di yəi gələ laaləiɠaa ɓa. Di woolaa woo ə too Moisə wəlii. Yai-Laa ə niiɲąnwąną kpɔ kɛnɛ̨, yili ə nwąną Moisə ɓa, yɛ Yai-laa ɓa: 11 «Yai-Laa, lə mɛ̨nį ɓa, ə́ kaa mɛ̨nį nwąnąą laai ə́ wɔ tí mun ma? Lə mɛ̨nį ɓa hvó ə́ ɲɛ̨i lɛlɛɛ hee li mą́ą́? Yɛ́ nuą ŋɛ̨i mąą mɛ̨nį diɲɛ laa nwúɔ̨? 12 Akɛti, ɲą́ą́ ɓə mɔ̨ɔ̨ nuą ŋɛ̨i kəlee mąą koo həɠə? Ɲą́ą́ ɓə mɔ̨ɔ̨ di kaa a lon diɛ kɛ yɛnɛ̨ɛ̨? Yaai ə́ kaa kɛi mą́ą́: ‹Di laa ə́ yee kɔ́nwɔ̨n ɉu, yɛ bələi kɔ̨nwɔ̨lee a non ɉon na, ə́ bɛlɛ ə́ lii pɔ.› Yɛ́ kɛ diɛ, di lɛɛ tii ɲə́i ə lɛɛ ɉu kwəli ɓɛi ə́ nąą laakwɛlanmo di nąnni diɛ. 13 Mįnɛ̨ ɓə ŋą́ pɛli huwɔ hɔlɔɓoi laa, gɛ́ dɛɛ nu kpulu kɛnɛ̨i ŋɛ̨i pɔ, diɛi di hvilɛn ŋąą búlu, diɛ di woolaa, diɛ kɛ mą́ą́: ‹Huwɔ tɛɛ ku pɔ ku mįi!› 14 Ɲą́ą́ dɔ̨nɔ̨ vá pɛli nuą ŋɛ̨i kəlee mu, di wiai. 15 Akɛ bələ ɓə ə́ kaa gɛi la a ɲą́ą́, viɛlaɓoɔi ə́ báá. Bələ ɓə gáá bɔ ə́ ə́ ɲɛ̨i lɛlɛɛ hee la mą́ą́, ŋą́ kulɔ mɔ̨nɔ̨i ŋɛ̨i hu.» 16 Yai-Laa yɛ Moisə ɓa: «Israɛlə kalanɉon pow mɛ̨ihveelɛ ɲąąkpɔn, diɛi kpɔ ə́ di kɔ́lɔn a nu pɔlɔ pɔlɔɠaa, diɛ pɛli nuą lɔwai mɛ̨nį ɓoi. Ka diɛni ka pa gee kaa kələ laaləi. 17 Gáá pai yɛɛi, ŋą́ mɛ̨nį ɓo yɛ́. Gilii tii ə́ yəi, gáá pai da wolo həɠəi, ŋį́ dɛɛ di pɔ, ka diɛni ɓə pai kɛi nuą ŋɛ̨i lɔwai mɛ̨nį hutɔɔi, yɛ́ tɔ̨nɔ̨ hvəi kɛa di kaa pai lɛɛi ə́ nwuɔ̨. 18 Israɛlə lonnii di wɛi, yá kɛ diɛ: ‹Tinąą, ka ka mąąhəɠə, ka káá pai huwɔ mįi! Hvo gaai, kaa ka woolaa kpɔ tii a mɔlɔ, Yai-Laa aa ka woo mɛ̨n; ka woolaa woo ŋɛ̨i ka kɛ diɛ: Gbɛɛ ɓə pai huwɔ tɛɛi ku pɔ ku mįi? Ku kɛɛ Eziptə lɔi hu, ku kɛ kani ku nɛ̨ɛ̨ hu-ee! Yai-Laa kaa huwɔ tɛɛi ka pɔ ka mįi. 19 Ka hva ɉuwɔi tii mįi lɔ a hvóló tɔ̨nɔ̨, awala kpɛli kɛ tii, hvóló hveelɛ, awala kɛ tii, hvóló lɔɔli, awala kɛ tii hvóló pow, awala kɛ tii, hvóló pow hveelɛ. 20 Kɛlaa, ka káá mįi ɲąnin dɔ̨nɔ̨ yee mu, ə lɛɛ ɉu nwɛli ə kpɛɛ kaa, gun ə hee ka hu. Yili kaa pai kɛi tii, mąąhɔlɔɓo kaa ka kili kulɔ Yai-Laa hu, yai gaa ka pɔ, kaa ka woolaa kaa kɛ mą: Lə mɛ̨nį ɓa ku kulɔ Eziptə lɔi hu?.›» 21 Moisə ə pənə yɛ Yai-Laa ɓa: «Nu kpului ŋɛ̨i gáá di lɔwai, di kaa a nu waa nwun mɛ̨ida. Ya ɓə yá kɛ diɛ; ə́ kaa huwɔ tɛɛi di pɔ di mįi ɲąnin dɔ̨nɔ̨ yee mu! 22 Ə mą kpɛli kɛ kwaa ku wɔ nįŋɛ̨ɠaa da mɛlaaɠaa kəlee paa, da ɉuwɔ tɛɛ di pɔ, yili a mɔ̨ɔ̨ pɛli diɛ? Ə mą kpɛli kɛ daa gboloyá tuluun daa ɉu hɔ̨nwɔ̨lee kəlee tɛɛ di pɔ, yili hva pɛli diɛ.» 23 Yai-Laa yɛ Moisə ɓa: «Gaa ə́ kwəi Yai-Laa yee hvo walawala li? Ə́ ɲɛ̨i hee laa, akɛ mɛ̨nįi ŋį́ mo, nwóó hvo pai gulɔi mą.» Yálá ə nwɔ kilii ta tɛɛ nu pow mɛ̨ihveelɛ tii pɔ 24 Moisə ə kulɔ gee kaa kələ mu, ə li, nwooi Yai-Laa ə mo mą, ə ɉukulɔ nuą diɛ. Ə galanɉon bow mɛ̨ihveelɛi ɲąąkpɔn, ə di tɔɔ gee kaa kələ koo ɓa nąą kəlee. 25 Yai-Laa ə yɛɛ da Moisə di lono kɛ. Yili pulu, ə Moisə nwɔ kilii tawolo həɠə, ə dɛɛ nu pow mɛ̨ihveelɛi tii pɔ. Yii kɛa ə dɛɛ tii di pɔ, di hvo kɛa kɛ di kpɔɔ yee kɔ́nma, diɛ kɛa Yálá kwəi mɛ̨nį ɓo; kɛlaa, di hvo lamun ɉu. 26 Nu hveelɛ di lɛɛ muwu la, diɛ kɛ dɔ̨nɔ̨ laa ɓaa Ɛldadə, diɛ kɛ dɔ̨nɔ̨ ɓa Medadə, Gilii tii ə pa di pɔ, di laa ə kɛ galanɉonŋąąi tii pɔ; di wɛi, di hvo gɛ di hvo li gee kaa kələ laaləi. Di kɛ laa diɛ kpɛli, diɛ Yálá kwəi mɛ̨nį ɓo. 27 Hulɔnon da ə həɠə laa, yɛ pa ɉukulɔi Moisə ɓa, yɛ mą: «Ɛldadə da Medadə di kaa laa diɛ Yálá kwəi mɛ̨nį ɓo.» 28 Nun lon Ɉosue, yai kɛ a Moisə nwɔ tímun, ə həɠə kpɔ ɉulɔnon ɲələ ɓa, ə mɛ̨nįi tii ta ɓo, yɛ Moisə ɓa: «Nwɔ́ mɛ̨nį nąmu Moisə, mo diɛ di kpəla mą.» 29 Moisə yɛ Ɉosue ɓa: «A kɛ tii ə́ kaa mą́ą́ toló kulɔi? Ə li kɛ mun, Yai-Laa a hvaa mą, ə nwɔ Kilii tɛɛ nwɔ nu kpului ŋɛ̨i kəlee pɔ, gəlee di kɛ a Yálá kwəi mɛ̨nį hukulɔ nuą!» 30 Moisə da Israɛlə kalanɉonŋąąi tii di pənə di li muwu la. Yai-Laa ə huwɔ tɛɛ Israɛlə lonnii pɔ 31 Yai-Laa ə hvaŋą kɛnɛ̨ ta tɛɛ yɛ həɠə gboloyá mɛ̨i pələ, ə hee lɔwɔ haɉaliɠaa hu, di pa di pɛlɛ ɓɛi Israɛlə lonnii di di taa pu laa, nąą kwɛlɛ. Ə həɠə daa ɓa yɛ li, ə kɛ a pələ kələn dɔ̨nɔ̨, ɉaɉaliɠaa tii di pɛlɛɛ nąą kəlee, ə həɠə nɔi ɓa ə tɛ́, ə kɛ a yee laa mą hveelɛ, di puɔ tii di kee mɛ̨i. 32 Nuą di túwɔ́ di kɔ́wɔ ŋą a volói tii kəlee da gbinįi tii, ə mą kɛ mąą yələ laa ɓoɔ, diɛ haɉaliɠaa hon nɔ. Nui hvo ɉon tamąą, nwɛi a pɛli kɛ ə tea kpɛa kpɛa nwun dɔ̨nɔ̨ laa hvɛɛ. Diɛ di kpala daa kwɛlɛ nąą kəlee. 33 Ɉuwɔi tii ə lɛɛ lɔ di la, di hvo kpɛli ni kɛ ɲąą wolo li, Yai-Laa nwɔ liiholi ə yɛɛ nwɔ nuąi mɛ̨i, ə mɛ̨nį nwąnąą laa diɛ. 34 Di gɛɛnąąi tii laa hee a Kivrotə-Taawa; mąąhɔlɔɓo, nąą ɓə nuąi kpɔ nii pɔ tee mɛ̨nį kɛ di di powa loo laa. 35 Nuą di həɠə Kivrotə-Taawa, diɛ li Haserotə pələ, di daa pu Haserotə. |