Lomaŋ 6 - Yálá laawoo hɛɓɛ (dc)

Nu ə haa nɛ̨ŋɛ̨n ma da yɛnɛ̨ɛ̨ kɛɛ Jesus laa hu

¹ Gwa pɛli kɛi lə: Akɛti, mąąnɛ̨ɛ̨ gu kɛ lɔ nɛ̨ŋɛ̨n ɉəɠə munɛ hu ə gɛ Yálá nwɔ mɛ̨inɛ̨ɛ̨ hu ə kɛnɛ̨?

² Gɛ́ diɛ: Kpaa! Akɛ gwaa haa nɛ̨ŋɛ̨n ma, gwa pɛli nwɔ̨nɔ̨ yɛnɛ̨ɛ̨ kɛ pələ kɛi ləi nɛ̨ŋɛ̨n Ɉu?

³ A wala kɛti, ka hvo gɔlɔn kaa diɛ guɔi daa gu mąąwaa Jesus Kristə laa hu nwɔ haai mąą pɔɔ kɔ́ɔn ga ti gwaa gɛ?

⁴ Nwɔ haai mąą pɔɔ kɔ́ɔn ŋɛ̨i gu gɛ a mąąwaa, gwaa nɛ guɔ ma: Gwa diɛ ni gwaa haa, daa gu loo. Yɛ bələi ti Kristə ə kulɔ la haaɓɛlaa lɔwai Nąn nwɔ mąąwiɛ hu, guɔ kpɛli, gwaa yɛnɛ̨ɛ̨ kɛ pələ nįnɛ̨ hɔlɔɓo.

⁵ Mąąhɔlɔɓo, akɛ gwaa kɛ yɛ Kristə, nwɔ haai mąą pɔɔ kɔ́ɔn Ɉu, pələ lɔ ɓə gu kaa pai gu kɔ́wɔ ɉii la ma yɛ pələi ə muhəɠə la ə kulɔ haaɓɛlaa lɔwai.

⁶ Mąąnɛ̨ɛ̨ ka gu mɛ̨nį ŋɛ̨i kpaɠala kaa a nɛlɛɛ: Gu kɛ pələ pɔlɔi wɔlɔ gu kɛ ɉu, yili ka ti gu nɛɛ Kristə ɓa yɛ haa la wulu ɓa. Ə gɛ nɛ̨ŋɛ̨n gɔlɔi ti hu ə kala, ə lɛɛ, gu hvo kɛa kɛ a nɛ̨ŋɛ̨n nwɔ luwɔɠaa.

⁷ Mąąhɔlɔɓo, nui aa haa, nwun mąą a ɓo nɛ̨ŋɛ̨n ɲəi.

⁸ Akɛ gu laai na guɔ diɛ gwa Kristə a ni gwaa haa gu kee pɔ, gu laai na guɔ diɛ gwa diɛ ni gu kaa pai yɛnɛ̨ɛ̨ kɛi gee pɔ.

⁹ Gu gɔlɔn guɔ diɛ kulɔi ŋɛ̨i Kristə ə mo haa yəi, hvo kɛa pai pənəi hvo haa; haa nwɔ huwalawala hvo kɛa mɛ̨i.

¹⁰ Haai ti ə mo, ə haa lɔ tanɔ̨n nɛ̨ŋɛ̨n mąą mɛ̨nį ɓa. Kɛlɛɛ, ɲɛnɛ̨ɛ̨ ti kɛa gaa gɛi, gaa gɛi Yálá ɓa.

¹¹ Kaa kpɛli mɛ̨n, ka ka kpɔɔ kaa yɛ ka haa nɛ̨ŋɛ̨n ma, ka yɛnɛ̨ɛ̨ kɛ Yálá ɓa Jesus Kristə laa hu.

¹² Mąą hvo nɛ̨ɛ̨li nɛ̨ŋɛ̨n və kɛa tɔɔlaa kɛ ka mɛ̨i pələi mɛ̨n ka káá pai haai la, ə gɛ, ka hvo pa hvilɛn kɔ́lɔ liiɓa pulu kaa gɛ.

¹³ Ka hvo ka tɔɔ-tɔɔiɠaa ta lɛɛ laa hvo kɛ a nɛ̨ŋɛ̨n nwɔ tiɓo kɛhɛn, yii a kɛ mɛ̨nį ɲɔ̨n gɛi la. Kɛlɛɛ yaamunn, ka ka kpɔɔ tɛɛ Yálá pɔ yɛ nuąi daa kulɔ haa hu daa kɛ a di húlu. Ka ka kɔ́lɔ nąą kəlee lɔ nwɔ tiɓo hu, ə gɛ, yii gaa a tələnmo mɛ̨nį ka yili kɛ.

¹⁴ Mąą hvo nɛɛ li nɛ̨ŋɛ̨n və tɔɔlaa kɛ kɛa ka mɛ̨i, mąąhɔlɔɓo, ka hvo kɛa tɔ́n mu, kɛlɛɛ, ka káá kɛa mɛ̨inɛ̨ɛ̨ mu.

Tələnmolaa nwɔ luwɔ

¹⁵ Akɛti mąąnɛ̨ɛ̨ kɛa guɔ nɛ̨ŋɛ̨n ɉəɠə mun mąąhɔlɔɓo, gu hvo kɛa tɔ́n mu gu kaa Yálá nwɔ mɛ̨inɛ̨ɛ̨ mu? Gɛ́ diɛ: Kpaa!

¹⁶ Ka hvo gɔlɔn kaa diɛ akɛ ya kɛi tiɓo kɛ nu ɓa ə gɛ ə́ nwoo hon, ə́ kaa ɲəi yɛ luwɔ. Yili ɓaa yɛ: Nɛŋɛ̨n yii a nu lɔ haa hu, a wala kɛti, Yálá woo honŋąa yɛnɛ̨ɛ̨ kpɛɛ hvo mą a nu lɔ tələnmo laa hu.

¹⁷ Kɛlɛɛ, kaa gu Yálá hɛɠɛɛɓo! Mąąhɔlɔɓo, ka kɛ tɔlɔɔ nɛ̨ŋɛ̨n nwɔ luwɔlaa hu, kɛlɛɛ, niɛwoo ŋɛ̨i di galan kaa ka ka yee hee mu, ka nwoo hon a ka lii kəlee.

¹⁸ Kaa kulɔ nɛ̨ŋɛ̨n nwɔ luwɔlaa hu, kaa kɛ a tələnmolaa nwɔ luwɔ.

¹⁹ Ka wɔ hvii kpɛɛ laa mąą mɛ̨nį ɓa, gáá nwooɠaai ŋɛ̨i ɓoi kaa a nu kiliŋąhiɛ. Pələi ti tɔlɔɔ ka ka kpinį kəlee kɛ la a mɛ̨nį ɲɔ̨n nwɔ luwɔ, kaa ka kwɛli tee Yálá ɓa, yiihu kɛa ka ka kpinįi kəlee kɛ a tələnmolaa nwɔ luwɔ, ə gɛ, ka wɔ yɛnɛ̨ɛ̨ kɛ pələ ə kɛ a Yálá liiɓa.

²⁰ Ɓɛlɔwai ka kɛ la nɛ̨ŋɛ̨n nwɔ luwɔlaa hu, ka hvo kɛ a tələnmolaa nwɔ luwɔ,

²¹ tɔ̨nɔ̨ ləi ɓə ka ɉɔlɔɓo ɉu? Háákələi yili kɛ nwumɛ̨ kaa kaa, mąąhɔlɔɓo, ɲąąkpɛɛi ɓaa haa.

²² Kɛlɛɛ yiihu kɛa, kaa kulɔ nɛ̨ŋɛ̨n nwɔ luwɔlaa hu. Kaa kɛ a Yálá nwɔ luwɔɠaa; tɔ̨nɔ̨ yii gaa ɉu ya ɓaa: Kaa kɛ a Yálá liiɓa mɛ̨nį kɛ nuą, yili ɲąąkpɛɛi ɓaa yɛnɛ̨ɛ̨ kpɛɛ hvo mą.

²³ Mąąhɔlɔɓo, nɛ̨ŋɛ̨n vɛla ɓaa a haa, kɛlɛɛ, Yálá nwɔ mɛ̨inɛ̨ɛ̨ ɓaa yɛnɛ̨ɛ̨ kpɛɛ hvo mą, yii gwa ɉɔlɔɓo gu Ną́mu Jesus Kristə laa hu.