Lomaŋ 1 - Yálá laawoo hɛɓɛ (dc)

Túwɔ́-woo

¹ Ɲą́ą́ Polə, gáá a Jesus Kristə ŋą tímun, yai Yálá ə dəli ə gɛ a nwɛlɛɛ lɛlɛɛ mąą kɛla.

² Nwɛlɛɛ lɛlɛɛ ti wɔlɔ Yálá ə naakwɛlanmo naa woo hɛɓɛ́ hu, gwəi mɛ̨nį hukulɔ nuą diɛ,

³ Nwɛlɛɛ lɛlɛɛ ti hvilɛŋąai non ɉulɔnu ɓa, yai hɔlɔɓo kɔ́lɔ hu Davidə huwu hu.

⁴ Kɛlaa, di gu Ną́mu Jesus Kristə laa hee a Yálá Lon, Kili-Mąąhəɠɛɛ nwɔ hvaŋąi haalai, yai nwun, ə gulɔ haa yəi.

⁵ Yaa ɉaalai ɓə ŋį́ kɛ la nwɔ kɛla ə gɛ, huwu kəlee di kɛ nwoo mu laa na laa háálai.

⁶ Nuąi Yálá aa di təli ə gɛ, di kɛ a Jesus Kristə nwɔ nuą, kaa kpɛli ka láá kaa ɉu.

⁷ Kaai ka káá a Yálá wɛlikɛmąą nuąi Romə, a mąąhəɠə nuą Yálá nwɔ təliɓo háálai, káá ɓə gáá ɉɛɓɛ́i ŋɛ̨i tɛɛi kaa, ə gɛ, ka kɛ a nwɔ nuą. Gɛ́ nwun nanɛ̨ɛ̨ da liilaa di kɛ ka pɔ gu Ną́n Yálá da gu Ną́mu Jesus Kristə laa hu.

Polə ə kɛ bɔ ə li ə ɲɛ̨i tɔɔ Romə nuą diɛ

⁸ Gɛɛ və́ mɛ̨nį lɔpee ta ɓo, gáá nwɔ Yálá hɛɠɛɛɓoi Jesus Kristə laa hu ka mąą mɛ̨nį ɓa. Mąąhɔlɔɓo, nu kəlee kaa ka wɔ laa na mɛ̨nį mąą kɛla hvaa ɓoi a nɛlɛɛ.

⁹ Hvó gaai, Yálá kaa a nwɔ́ kɛla, yai gáá tíi mą níí hu, gɛ́ non mąą wɛlɛɛ lɛlɛɛ laa həli, ə gɔlɔn gbɔ yɛ, ŋą́ kɛ gílíŋąhiɛi kaa nwɔ́ Yálá hvɛliɛ pələ kəlee hu.

¹⁰ Ɓɛlɔwai lɔpee ŋą́ kɛ Yálá hvɛli la, ŋą́ vɛli gɛ́ ə hvaa mą ŋį́ pa ŋį́ ɲɛ̨́i tɔɔ kaa.

¹¹ Mąąhɔlɔɓo, yii kpɔ nwɛli kaa mą́ą́, ya ɓaa ŋį́ pa ŋį́ ɲɛ̨́i tɔɔ kaa, ə gɛ, Yálá yəi mɛ̨inɛ̨ɛ̨i ə dɛɛ bɔ́ aa dɛɛ bɔ́, ŋį́ dɛɛ ka pɔ, ə ka huwalawala.

¹² Ɛlɛɛ, nwɔ̨nɔ̨, gáá kpɔ bɔ ŋį́ kɛ ka lɔwai, ə gɛ, gu gu kee ni hvaŋą lɔ. Ka wɔ laa na laa ə váŋąlɔ, nwɔ laa na laa ə kaa kpɛli mąn ka hvaŋąlɔ.

¹³ Nąn nonnii, gáá bɔ ka gɔlɔn kaa diɛ: ŋį́ kɛ kpɔlɔɔ ka pɔɔli kiliŋąhiɛ kɛi a yələ kəlee. Kɛlaa, mɛ̨nįɠaa da kɛ kpɔlɔɔ kpɛ̨ąn ɉii ɉu. Ŋą́ kɛ bɔ gɛ́ kólo dɔlɔ ə kɛ mą ka yəi, kaai ka hvo a Ɉuifəɠaa, yɛ bələi gaa kɛi la huwu takpɛliɠaa pɔɔli.

¹⁴ Gwələi kaa mą́ą́, ya ɓaa ŋį́ Yálá lawoo laa həli nu kəlee ɓa; nu ə kɛ a yíi lɔwɛi mun, ə mą kɛ a taalee hu ɓomun. Nu ə kɛ a mɛ̨nį kɔ́lɔn mun, ə mą kɛ a nui hvo mɛ̨nį kɔ́lɔn.

¹⁵ Yili ɓə gɛ, kaa ŋɛ̨i a Romə nuą, nwɛlɛɛ lɛlɛɛ laa həli mɛ̨nį kaa, mąą liihɛlɛn gaa la mą́ą́.

Yálá ŋą tələnmolaa

¹⁶ Gbala ə tɔɔ vá nwumɛ̨ nwɛlɛɛ lɛlɛɛ laa həli. Mąąhɔlɔɓo, nuąi pai laa na, yili kaa di yəi a Yálá nwɔ huwalawala laa. Ə gɔwɔ tɔɔ Ɉuifəɠaa diɛ, ə mą kɛ diɛi di hvo a Ɉuifəɠaa.

¹⁷ Yaan, bələi Yálá a nu kɛ la a tələnmomun yaa kpinįi ɲɛ̨i ɓa, nwɛlɛɛ lɛlɛɛ ɓə a yili lɛ. Ə həɠə gɔwɔ tɔɔi lɔwai ɓa, ə lɛɛ ɉu ɲąąkpɛɛi lɔwai, laa na laa lɔ ɓə. Yɛ bələi bɛ̨ɛ̨i la, diɛ kɛ mą: Nui tələnmoɔ a yɛnɛ̨ɛ̨ kɛ, nwɔ laa na laa háálai.

Nu kəlee kaa a nɛ̨ŋɛ̨n ɉəɠəmun Yálá ɲɛ̨i ɓa

¹⁸ Yili ɓa, hɔn ɲɔ̨n da nɛ̨ŋɛ̨n nɔpee nuą da ɉəɠə, Yálá nwɔ liiɲąnwąną a həɠə yələi ə yɛɛ di mɛ̨i. Mąąhɔlɔɓo, di wɔ hɔn ɲɔ̨n ti ɓə gbəɲąn ŋąą tɛ̨ą mɛ̨nį tɔwɔ.

¹⁹ Mąąhɔlɔɓo, mɛ̨nįi kpɔ gwa pɛli gɔlɔn ɉii Yálá mɛ̨nį hu, gəlee huponoi diɛ Yálá yaa kpinįilee aa nɛ diɛ.

²⁰ Ə həɠə yɛnɛ̨ɛ̨ pɛli yələ ɓa, ə həli la yiihu ɓa, Yálá kɛ pələɠaai nu hva pɛli gaai: nwɔ huwalawalalaai kpɛɛ hvo mą, nwɔ Yálá laa, gəlee kulaai pono ŋą gɛ kólóɠaa kəlee hu. Mɛ̨niɠaa di hu ɓə nuą da pɛli di Yálá kɔ́lɔn naa. Yili ɓa, mąąhvaalɛɛ hvo diɛ.

²¹ Mąąhɔlɔɓo, bələi mąn di Yálá kɔ́lɔn na gɛ mɛ̨nįɠaa kəlee hu, di hvo gɛ li di hvo mąąwiɛ, di hvo ɉɛɠɛɛɓo, yɛ bələi mąąnɛ̨ɛ̨ la. Kɛlaa yaamun di di wɔ kiliŋąhiɛ mąą a kwɛa Yálá ɓa, di hvilɛn ŋąą la ɓowo mɛ̨nį pulu, diɛ ɓo la a kpinį ŋą luwɔɠaa.

²² Da kɛ di kpɔɔ kaai yɛ kilimąą nuą, a mɛ̨nį gɛ, diɛmun daa ɓowo.

²³ Diɛmun, di hvo gɛ li, Yálá ŋɛ̨i a vulúmąą, di hvo kɛnɛ̨ pələ mąąwiɛ. Daa li diɛmun, diɛ haa hɛnŋąa mąąwiɛ, yɛ pələi: Nu kan gaa la, nwɛ̨nį, ɛlɛɛ, huwɔɠaa da tala-hɛnŋąa.

²⁴ Yili ɓə gɛ, Yálá ə di kwɛlɛ di wɔ ɓowo mɛ̨nįɠaa yee kɔn ma, diɛ nwumɛ̨ túwɔ ɓo di kee lɔwai.

²⁵ Tɛ̨ą mɛ̨nįi vilɛn ŋąą Yálá ɓa, diɛ mąąhvalin a lɛɛ. Hɛn gəlee pɛli mun Mąąwiaa, Lúwɔ́ ə ɓo mą a yələ kəlee, diɛ nɛ̨ɛ̨laa, diɛ tí nwɔ pɛli hɛnŋaa diɛ, diɛ kwɛli hvilɛn diɛ.

²⁶ Yili ɓə gɛ, Yálá ə ɓo diɛ, diɛ lɔ di kpɔɔ nwumɛ̨ mɛ̨nį hu. Di kpɔ-kpɔɔ nɛ̨ąąi ti, yii kɛ mąąnɛ̨ɛ̨ ə kɛ da di diɛni di lɔwai, da yili kɛi lɛɛ laa, diɛ gɛ di kee ni lɔwai.

²⁷ Bələ lɔ ɓə ɉinąą diɛ kpɛli da gɛ la, da di nɛ̨ąni lɛɛ laa nɛ̨ąwɛli yɛ di kələn yɛ nwɔ̨n; diɛ laa a di kee ni. Tɔlɔi bɛliɛ di túwɔ́ pələi ti ɓa, ya ɓə da ɉɔlɔɓo.

²⁸ Yii di hvo gɛ li di hvo Yálá kɔ́lɔn, ya ɓə gɛ, Yálá ə di lɛɛ laa di lɔ di kpɔkpɔɔ kili ɲɔ̨nwɔ̨ɔ̨ ti hu, yii kɛ mąą hvo nɛ̨ɛ̨li nu hvo gɛ, diɛ gɛ.

²⁹ Di laa hvɛɛ a mɛ̨nį ɲɔ̨n ɉuwɔ lɔpee gəlee: nwąną lɔɔ, ɲɛ̨i kulɔ bɔ ɲɔ̨nwɔ̨ɔ̨, nu paa mɛ̨nį, tolo ɲɔ̨nwɔ̨ɔ̨, hvaa kɛɛ, gbana laa ɲɔ̨nwɔ̨ɔ̨, di hva di kiliŋąhiɛ a nɛlɛɛ nu ta ɓa, ə lɛɛ, di laa kpɔn və hee li.

³⁰ Diɛ hiɛ nɔwai kɛ, di laa pələ ɓoɔɔ, diɛ ɓo a Yálá ɲowo, di woo ɲɔ̨nwɔ̨ɔ̨, di huɲąŋą kɛnɛ̨, di ɲɛ̨i tɛɛ, di yɛlɛɛ mɛ̨nį ɲɔ̨n bɛlii, ɛlɛɛ, di kwɛli tiɛɛ di kaa nuą yəi, di kili kpɛɛ di yəi.

³¹ Kiliŋąhiɛ hvo diɛ, di hva kulɔ di woo ɓa, yii da mo, di hva gɛ, di kili wala-walaa, ɛlɛɛ, di hva nu ta ɲɛ̨i mąą wɛli kaa.

³² Di Yálá nwɔ kitii kɔ́lɔn, di gɔlɔn diɛ: Nui a túwɔ́ ti, vɛla ɓaa a haa. Diɛ kpinįilee da mɛ̨nį ɲɔ̨n ti kɛ, yili pulu, nuąi da kɛi mɛ̨nį ɲɔ̨n ti ɲɔ̨nwɔ̨mąn gɛ, diɛ di mąątɛ̨nɛ̨.