Levetekɔ 3 - Yálá laawoo hɛɓɛ (dc)

Liilaa haláá

¹ «Nu ta a kɛ bɔ ə liilaa haláá kulɔ, a kɛ taatɛlɛɛ kpɛa-kpɛa ta ɓə, a gɛ a ɉilɛ, a wala kɛ tii, ɉaa. Mąą hvo nɛ̨ɛ̨li, hɛn ə́ kaa Yai-Laa kɔ́i la, kpɛɠii hvo kɛ mą.

² A ɲee pɛlɛ daatɛlɛɛ tii nwuɔ̨, di nwun dee gee kaa kələ laaləi. Aarɔn lonnii a ɉaláá laa həli nuą, di ɲąmą pu ɉaláá kulɔi koo ɓa nąą kəlee.

³ Niilaa haláá tii, nwulɔi gaa gboyɛli ɓa, da yii a kɛ gboyɛli mɛ̨i, ya ɓə da naa həli Yai-Laa ɓa, di gələn.

⁴ Nwulɔi a kɛ gwəi kwɛni kɔ́w hveelɛi ɓa, da ɲɛlɛ hunwɔ̨ la, da gəlee kulɔ.

⁵ Yili pulu, Aarɔn lonnii di gəlee kələn ɉaláá kulɔ kəhi mɛ̨i, ɉaláá hɛn tii a kɛ nwɔ̨n ɉu, gwɛi mɛ̨i, yili mɛ̨i pələ. Yili kaa a haláá mąą kun nɛ̨ɛ̨, yɛ Yai-Laa liilaa.

⁶ «Akɛ taatɛlɛɛ pɛlɛɛ ta ɓə, daa paa la Yai-Laa pɔ, a liilaa haláá; mąąnɛ̨ɛ̨ ə kɛ a ɉilɛ, awala kɛ tii ɉaa, kpɛɠii hvo kɛ mą.

⁷ Akɛ ɓɛlaa ɓə di paa la a Yálá kɔ́ hɛn, da naa həli Yai-Laa ɓa,

⁸ da di yee pɛlɛ daatɛlɛɛ tii nwuɔ̨, di nwun dee gee kaa kələ laaləi, Aarɔn lonnii di ɲąmą pu ɉaláá kulɔ kəhi koo ɓa di dínɛ̨n mą di doo gee hu.

⁹ Yii mąąnɛ̨ɛ̨ di naa həli Yai-Laa ɓa niilaa haláá tii hu, ya ɓaa: daatɛlɛɛ nwulɔɠaa, nwon gəlee, di dee kpɔ dɔɔi, nwulɔi tii a kɛ gboyɛli ɓa, da yii a kɛ pɛlɛ ni gboyɛli mɛ̨i,

¹⁰ ə mą kɛ gwəi kwɛni kɔ́w hveelɛi da nwulɔi a kɛ mą, da ɲɛlɛ hunwɔ̨ la.

¹¹ Yili pulu, ɉaláá laa həli mun ə di kələn ɉaláá kulɔ kəhi mɛ̨i. Ɉaláái da gələn a Yai-Laa nwɔɔ, yaa lii.

¹² «Akɛ ɓolu ɓə di paa la, da naa həli Yai-Laa ɓa;

¹³ di di yee pɛlɛ nwuɔ̨, di nwun dee gee kaa kələ laaləi, Aarɔn lonnii di ɲąmą pu ɉaláá kulɔ kəhi koo ɓa di dínɛ̨n mą.

¹⁴ Yii mąąnɛ̨ɛ̨ di naa həli Yai-Laa ɓa, ya ɓaa: nwulɔi a kɛ gboyɛli ɓa, da nwulɔi a kɛ gboyɛli mɛ̨i,

¹⁵ ə mą kɛ, gwəi kwɛni kɔ́w hveelɛi ɓa wulɔ, da ɲɛlɛ hunwɔ̨ la;

¹⁶ yili pulu, ɉaláá laa həli mun ə ɉuwɔ kpuwɔɠaa tii kələn ɉaláá kulɔ kəhi mɛ̨i. Haláá kɔ̨nɔ̨n ni, yai da gələn, mąą kun nɛ̨ɛ̨, yɛ Yai-Laa liilaa. «Haláá huwɔ, nwulɔ kəlee kaa a Yai-Laa nwɔɔ.

¹⁷ Yili kaa a ka wɔ yɛnɛ̨ɛ̨ mąą tɔ́n hva ɉəɠə mą, kwɛlan gəlee yee mu, ɓɛi kpɔ ka kɛ laa. 'Ka hvo huwɔ wulɔ, da ɲąmą di mį́i.»