Levetekɔ 21 - Yálá laawoo hɛɓɛ (dc)

Ɉaláá laa həli nuą diɛ kpinį lee di mąą mɛ̨nį

¹ Yai-Laa yɛ Moisə ɓa: «'Mo Aarɔn lonnii a ɉaláá laa həli nuą diɛ, yɛ́ diɛ: Mąą hvo nɛ̨ɛ̨li haláá laa həli mun da hvo tɔ́n bɛlɛ gbɔwɔ ɓa a gaayɔwɔɠaa ta powa mąą mɛ̨nį.

² Kɛlaa, akɛ a gbinį ɓa mun da, bowai tii, ə kɛ a nee, ə kɛ a nąn, ə kɛ a non ɉulɔnu, a wala kɛ tii, non nɛ̨ɛ̨nu, ə kɛ nwɔ̨nɔ̨ a nąn non ɉulɔnu ta,

³ akɛ a mąąhala ta, yii hvo hulɔnu mɛ̨nį hu kɔ́lɔn; mąąhɔlɔɓo, hvo nii li li hilɛtaai, gaa nii a ɉaláá laa həli mun gbinį ɓa mun da, a gaayɔwɔ, a lɛɠɛ bowa ɓa, a tɔ́n bɛlɛ gbɔwɔ ɓa.

⁴ Ɉaláá laa həli mun tii, gɛɛ mɔ̨ɔ̨ a nu kɛnɛ̨ ɲəi bɛlɛ́n nuą lɔwai, mąą hvo nɛ̨ɛ̨li hvo tɔ́n bɛlɛ gbɔwɔ ɓa, yili hvo pa nəi mɛlɛkpɛɛ mą.

⁵ «Haa a too ɉaláá laa həli nuą tii ta ɓa, mąą hvo nɛ̨ɛ̨li di hvo di nwun galaan di tona, di hvo di laa kwɛlɛ lɛɠa kalaan, di hvo di kpɔwɔ mąą nwąną.

⁶ Di kaa a di wɔ Yálá nwɔɔ, mąą hvo nɛ̨ɛ̨li di hvo di wɔ Yálái laa ɓɛlɛkpɛɛ mą. Diɛ ɓə da Yai-Laa nwɔ haláá kəlee laa həli, yii gaa a di wɔ Yálái kɔ̨nɔ̨n, mąąnɛ̨ɛ̨ di mąą ə lɛɛ a ɉəɠɛɛ.

⁷ «Mąą hvo nɛ̨ɛ̨li di hvo wɛlikɛnɛ̨ɛ̨nu həɠə a di nɛ̨ą, a wala kɛ tii, nɛ̨ɛ̨nui mɛlɛkpɛɛ mą. Nɛ̨ɛ̨nui ɉilɛ a gulɔ lɔwɛi, di hvo ɉəɠə a nɛ̨ą. Mąąhɔlɔɓo, haláá laa həli mun gaa a Yálá nwɔɔ.

⁸ Hvo kɛli nuą di gaa a nu mąąhəɠɛɛ, mąąhɔlɔɓo, ya ɓə gaa a Yálá kɔ̨nɔ̨n naa həli mun. Gaa a nu mąąhəɠɛɛ, mąąhɔlɔɓo, ɲą́ą́ Yai-Laa, ɲą́ą́i ŋą́ ka mąąhəɠə, mą́ą́ həɠɛɛi.

⁹ «Haláá laa həli mun lon nɛ̨ɛ̨nu a gbɔwɔ kɛ a wɛli kɛmun, a gbɔwɔ ɓɛlɛ too, ɛlɛɛ aa nąn mɛlɛ too; mąąnɛ̨ɛ̨ di gələn.

¹⁰ «Ɉaláá laa həli mun gɛnɛ̨mun nąn nonnii ɲɛ̨i tɔwɔi, yai tii di nwulɔ mąąhəɠɛɛ pu nwuɔ̨, diɛ ɉee, yɛ ɉəɠəɠaa too gwąną, mąą hvo nɛ̨ɛ̨li hvo nwuɔ̨ kɛ yai-yai, hvo mąąhəɠəɠaa huɓɛla,

¹¹ hvo tunwɔ̨n powai lɔpee ta ɓa, hvo tɔ́n bɛlɛ gbɔwɔ ɓa, nąn ə mą kɛ nee mąą mɛ̨nį hu.

¹² Hvo mąą kwɛa gɛɛnąą mąąhəɠɛɛ ɓa, hvo pa nəi nwɔ Yálái nwɔ kɛɛnąą mąąhəɠɛɛi laapu; Mąąhɔlɔɓo, Yálá nwɔ wulɔ mąąhəɠɛɛ ɓə di ɉiɛ mą; Ɲą́ą́ gáá a Yai-Laa.

¹³ «Mąąnɛ̨ɛ̨ ɉaláá laa həli mun gɛnɛ̨ nɛ̨ą ə kɛ a nɛ̨ɛ̨nui hulɔnu hvo ni tunwɔ̨n ni mą.

¹⁴ Hvo kalanin ɉəɠə a nɛ̨ą, ə mą kɛ nɛ̨ɛ̨nui daa gulɔ lɔwɛi, hvo wɛlikɛ nɛ̨ɛ̨nu həɠə a nɛ̨ą. Kɛlaa, di huwu ta ɓə a ɉəɠə,

¹⁵ mąą hvo nɛ̨ɛ̨li hvo huwu takpɛli lɔ ɉuwu hu, mąąhɔlɔɓo, ɲą́ą́ ɓə gáá a Yai-Laa, ɲą́ą́i ɉəɠə ɉu.»

Mɛ̨nįɠaai da gɛ nu hva pɛli kɛi a haláá laa həli mun

¹⁶ Yai-Laa yɛ Moisə ɓa:

¹⁷ «'Mo Aarɔn ɓa, yɛ́ mą: Ə həɠə yiihu ɓa, ə li la tɔwɔ pələ, ɉuwu hu mun nɔpee kpɛɠii a kɛ mą, hvo kɛ gaa Yálá kɔ́ hɛn naa həlii.

¹⁸ Mąąhɔlɔɓo, nui lɔpee kpɛɠii kaa mą, mąą hvo nɛ̨ɛ̨li hvo lɛɠɛ Yálá kɔ́i, ə kɛ a ɲɛ̨ipumun, ə kɛ a nui a too gɔwɔ mɛ̨i, ə kɛ a nui ɉunwɔ̨ tinɛ̨ɛ̨, ə kɛ a nui gɔwɔ huheɛ,

¹⁹ nui gɔwɔ yaliɛ, a wala kɛ tii, ɲee yaliɛ,

²⁰ ə kɛ a kiikpo nąmu, ə kɛ a nu kpąin-kpąin, ə kɛ a nui tən gaa ɲɛ̨i kɔ́w ɓa, ə kɛ a nui gbɔwɔlɔ kaa mą, ə kɛ a nui daa mɛla.

^21-22 Ɉaláá laa həli mun Aarɔn huwuhu mun lɔpee kpɛɠii a kɛ mą, mąą hvo nɛ̨ɛ̨li hvo lɛɠɛ Yai-Laa kɔ̨nɔ̨n naa həlii, yii kpɔ kpɛɠii a kɛ mą, hvo lɛɠɛ laa yɛ kɛ ə Yálá nwɔ kɔ̨nɔ̨n ta laa həli, haláá hɛn mąąhəɠɛɛ li.

²³ Kɛlaa, mąą hvo nɛ̨ɛ̨li di hvo həli ɉəɠə ɓɛla ɓa, di hvo həli ɉaláá kulɔ kəhi ɓa; mąąhɔlɔɓo, gbɛɠii gaa mą, hvo gɛɛnąą mąąhəɠɛɛ mąąliɓi, da mu hɛnŋąą, mąąhɔlɔɓo, ɲą́ą́ Yai-Laa, ɲą́ą́ ɓə nwɔ́ nuąi tɔɔ nwɔ́ kólói ɓa.»

²⁴ Moisə ə mɛ̨nįɠaai tii kəlee laa həli Aarɔn da nonnii diɛ, ə mą kɛ Israɛlə lonnii kəlee.