Levetekɔ 15 - Yálá laawoo hɛɓɛ (dc)

Hinąą ɲɔ̨nŋaai da nu mąąliɓi

¹ Yai-Laa yɛ Moisə da Aarɔn diɛ:

² «'Ka mo Israɛlə lonnii diɛ, kaa diɛ: «Hulɔnui lɔpee lə́ŋąn a kɛ mą, nə́ŋąn tii a mąąliɓi.

³ Ɉɛn a gɛ mąą yɛ liɓi, ya ka: Ɲá ə kulɔ-o; ə kanąn mą-o; mąą a liɓi.

⁴ Nui ɲɔ̨n tii kaa mą, gbin lɔpee a laa ŋą, tɔ́n gaa gbin tii ɓa, hɛn lɔpee nui ti a hee mɛ̨i, tɔ́n gaa mą.

⁵ Nui a tunwɔ̨n gbin tii ɓa, mąąnɛ̨ɛ̨ mąą nu ə mąą həɠəɠaa waa; ə gbinį waa a yá, ɛlɛɛ, Dɔ́n a lɛɛ mąą nu ɓa ə lɛɛ ɉu yələ ə wulu.

⁶ Ɉulɔnui ɲɔ̨n gaa mą, ɓɛi lɔpee a hee laa, nu ta a hee gɛɛnąą ti ɓa, mąąnɛ̨ɛ̨ mąą nu ə mąą həɠəɠaa waa; ə gbinį waa a ya, ɛlɛɛ, tɔ́n a lɛɛ mą, ə lɛɛ ɉu yələ ə wulu.

⁷ Nui a tunwɔ̨n ɲɔ̨n gɛmun ti ɓa; mąąnɛ̨ɛ̨ ə mąą həɠə waa ə gbinį lee waa a yá, tɔ́n a lɛɛ mą, ə lɛɛ ɉu yələ ə wulu.

⁸ Ɉulɔni ɲɔ̨n tii kaa mą, a nɛayá pili nu yii tɔ́n və mą; mąąnɛ̨ɛ̨ mąą nu ə mąą həɠəɠaa waa. Ə gbinį lee wa a yá, tɔ́n a kɛ mąą nu ɓa ə lɛɛ ɉu yələ ə wulu.

⁹ Nui ɲɔ̨n tii kaa mą, hoo lɔpee a tɛ mɛ̨i yɛ hiɛ kulɔ la, tɔ́n gaa ɉooi tii ɓa.

¹⁰ Nui ɲɔ̨n tii kaa mą, hɛn nɔpee gaa mu, nui a tunwɔ̨n mą tɔ́n gaa mąą nu ɓa, ə lɛɛ ɉu yələ ə wulu. Nui nwɔ̨nɔ̨ a ɉɛn tii kpəŋə, mąąnɛ̨ɛ̨ ə mąą həɠəɠaa waa, ɛlɛɛ ə gbinį lee waa a yá, tɔ́n a lɛɛ mąą nu ɓa ə lɛɛ ɉu yələ ə wulu la.

¹¹ Ɲɔ̨n gɛmun tii a túnwɔ̨n nu ta ɓa, a wala ɲəi waa, ə gbinį lee waa a ya, tɔ́n gaa mą ə lɛɛ ɉu yələ ə wulu.

¹² Nui ɲɔ̨n tii kaa mą a tunwɔ̨n hɛnɲąŋą ta ɓa yɛ ɓo a pɔlɔ hɛnɲąɲą, mąąnɛ̨ɛ̨ di nwolo, a kɛ a wulu hɛɲaŋą, mąąnɛ̨ɛ̨ di ɉu waa a yá.

¹³ «Ɲɔ̨n a kpɛɛ nu ɓa, bələi a tɛɛ la tɔ́n yɛ kulɔ mą, bələ ka: A hvóló mɛ̨ihveelɛ kɛ, ə nwɔ həɠəɠaa waa, ə gbinį lee waa tɛɛyá hu, akɛ tii, mąą aa həɠə.

¹⁴ Voló mɛ̨ihaaɓa yələ a pa a tɔ́nwələn veelɛ a wala kɛ tii ɓopo hveelɛ, ə paa la Yai-Laa lííla gee kaa kələ laaləi, ə di tɛɛ ɉaláá laa həli mun bɔ.

¹⁵ Ɉaláá laa həli mun a donwələn tii tɔ̨nɔ̨ kɛ a nɛ̨ŋɛ̨n mąąhvaalɛɛ haláá hɛn, ə dɔ̨nɔ̨ kɛ a haláái da gəlee kələn. Ɉaláá laa həli mun a nɛ̨ŋɛ̨n mąąhvaalɛɛ woo ɓo mɛ̨i Yai-Laa lííla Dɔ́n ti kulɔ mɛ̨nį ɓa mą.

¹⁶ «Hulɔnui mąąkalaya a kulɔ, mąąnɛ̨ɛ̨ ə gbinį kəlee waa a ya, tɔ́n gaa mą, ə lɛɛ ɉu yələ ə wulu.

¹⁷ Həɠə lɔpee gəlee, huwɔ kɔ́lɔ paa lɔpee, lə́ŋąn nąmu a tunwɔ̨n mą, da nwaa a yá; tɔ́n a kɛ ɉɛnŋąą diɛ ə lɛɛ ɉu yələ ə wulu.

¹⁸ «Hulɔnu ta da nɛ̨ɛ̨nu ta da laa, mąąnɛ̨ɛ̨ di di waa a ya tɔ́n gaa diɛ ə lɛɛ ɉu yələ ə wulu.

Mɛ̨nįɠaai da tɔ́n bɛlɛ nɛ̨ɛ̨nu ɓa

¹⁹ «Nɛ̨ɛ̨nu a ɲąnin gaa, tɔ́n gaa mą hvóló mɛ̨ihveelɛ yee mu, nu a tunwɔ̨n mą, tɔ́n gaa mąą hulɔnui ɓa ə lɛɛ ɉu yələ ə wulu.

²⁰ Ɲąnin a lɛɛ nɛ̨ɛ̨nu ɓa, hɛn lɔpee a laa mɛ̨i, tɔ́n a kɛ ɉɛn tii ɓa, hɛn lɔpee a hee mɛ̨i, tɔ́n a kɛ mą.

²¹ Nui lɔpee a tunwɔ̨n nwɔ gbin ma, mąąnɛ̨ɛ̨ ə mąą həɠə waa a yá, ɛlɛɛ ə gbinį lee waa, tɔ́n a lɛɛ mąą nu ɓa ə lɛɛ ɉu yələ ə wulu.

²² Hɛn lɔpee a hee mɛ̨i, nui a tunwɔ̨n ɉɛn tii ɓa, mąąnɛ̨ɛ̨ ə mąą həɠəɠaa waa, ə gbinį lee waa a yá. Ɛlɛɛ, tɔ́n a lɛɛ mąą nu ɓa ə lɛɛ ɉu yələ ə wulu.

²³ Hɛn da akɛ nwɔ gbin ŋą a wala kɛ tii ɓɛi a hee laa, nu a tunwɔ̨n ɉɛn tii ɓa, tɔ́n a kɛ mąą nu ɓa ə lɛɛ ɉu yələ ə wulu.

²⁴ Ɲąnin a lɛɛ nɛ̨ɛ̨nu ɓa hulɔnu a laa la, tɔ́n gaa mąą hulɔnui ɓa hvóló mɛ̨ihveelɛ yee mu, gbin lɔpee ɉulɔnui tii a laa ŋą tɔ́n gaa mą.

²⁵ «Ɲąnin a nɛ̨ɛ̨nu hon, a wala kɛ a ɲąnįn gaai lɔwai, a wala kɛ tii a kɛi kulɔ yɛ tɛɛ ɲąnįn gaai lɔwai ɓa, bələi lɔ ɲąnįn a lamun na mą, bələ lɔ ɓə Dɔ́n a lamun la mą.

²⁶ Yii kpɔ ɲąnįn ti kaa ni mą, gbin lɔpee a laa mɛ̨i, tɔ́n a kɛ mąą gbin ɓa. Hɛn lɔpee a hee mɛ̨i, tɔ́n a kɛ mąą hɛn ɓa.

²⁷ Nui lɔpee a tunwɔ̨n ɉɛnŋąąi tii ta ɓa, tɔ́n a kɛ mąą nu ɓa, hvo kɛ li ə mąą həɠəɠaa waa; tɔ́n a lɛɛ mąą nu ɓa ə lɛɛ ɉu yələ ə wulu.

²⁸ «Nɛ̨ɛ̨nu nwɔ ɲąnįn a kpɛɛ, a hvóló mɛ̨ihveelɛ kɛ, a kɛ tii mąą aa həɠə, tɔ́n və mą.

²⁹ Voló mɛ̨ihaaɓa yələ, a tonwələn, a wala kɛ tii ɓopo hveelɛ həɠə, ə paa la ɉaláá laa həli mun bɔ gee kaa kələ laaləi.

³⁰ Ɉaláá laa həli mun a dɔ̨nɔ̨ kɛ a nɛ̨ŋɛ̨n mąąhvaalɛɛ haláá hɛn, ə dɔ̨nɔ̨ kɛ a haláái da gəlee kələn. Ɉaláá laa həli mun a nɛ̨ŋɛ̨n mąąhvaalɛɛ woo ɓo mąą nu mɛ̨i, Dɔ́n tii kɛ mą mąą mɛ̨nį ɓa.

³¹ «'Ka mo Israɛlə lonnii diɛ, kaa diɛ: tɔ́n a kɛ nu ta ɓa, ə lɛɛ dɔ̨nɔ̨ kon ɉu, hvo kɛ gaa pai gee kaa kələ laaləi,, hvo pa nəi haa a nwɔ́ pɛ́lɛ́i mąąliɓi a mo.»

³² Nui lə́ŋąn gaa mą, da nui mąąkalayá a pu; yɛ tɔ́n bɛlɛ mą, mąą mɛ̨nį kɛ pələ ka ti.

³³ Nɛ̨ɛ̨nui aa ɲąnin gaa, nui lɔpee, yɛi kɛ a hulɔnu a wala kɛ tii nɛ̨ɛ̨nu, mąą yá yɛ pu, hulɔnu a laa a nɛ̨ɛ̨nui aa ɲąnin gaa, di mąą mɛ̨nį hon bələ ka tii.