Levetekɔ 14 - Yálá laawoo hɛɓɛ (dc)

Hvólóɲɔ̨n nąmu mąąhəɠə mɛ̨nį

¹ Yai-Laa yɛ Moisə ɓa:

² «Ɲələi hvólóɲɔ̨n gɛmun da mąą a həɠə la, bələi da mąą mɛ̨nį kɛ la, bələ ka: mąąnɛ̨ɛ̨ di li la ɉaláá laa həli mun bɔ.

³ Ɉaláá laa həli mun a kulɔ daa pulu, ə mąąkpɛɛ, a gaa yɛ volóɲɔ̨n balaɠaa daa kpɛɛ, voló aa kpɛɛ mąą nu ɓa,

⁴ nąąlɔwai, ɉaláá laa həli mun a mo di nwɛ̨ni húlu hveelɛ yii tɔ́n və diɛ di hon, di paa la nui tii mąąhəɠə mɛ̨nį ɓa, di bɛlɛ kpitili kwɛi ɓa, həɠə ɓɛla pɛ̨ɛ̨ a gbɔluɔ da isopə kpaɠa.

⁵ Ɉaláá laa həli mun a mo di nwɛ̨ni dɔlɔɔ nwun dee hɛn ɲąŋą hu, yii bɛliɛ a ləɠi pɔlɔ, yá ton ma yá ə ɓo ɉu.

⁶ Yili pulu, ə nwɛ̨ni hulu həɠə ə bɛlɛ gwɛi, ɉəɠə kpɔlu da isopə kpaɠa ɓa, ə di lɔ nwɛ̨nii tii di nwun dee ŋą mɛ̨i, ɲąmą hu.

⁷ Yili pulu, nui ŋɛ̨i mąąnɛ̨ɛ̨ di mąą waa volóɲɔ̨n ɲəi, di da kpɛŋɛn mą, gee mɛ̨i mɛ̨ihveelɛ. Ə mo kɛa yɛ diɛ tɔ́n və mą, ə ɓo nwɛ̨ni hului tii ɓa ə li.

⁸ Nui tii di mąą waa, a mąą həɠəɠaa waa ə gɔlɔ ɓa ləɠa kəlee kalaan, ə nwaa yái, ə gɛ mąą ə həɠə. Yili pulu, ə tɛ taai, kɛlaa a hvóló mɛ̨ihveelɛ kɛ hva lɔ ɲəi bɛlɛ́n.

⁹ Voló mɛ̨ihveelɛ yələ, ə gɔlɔɓa ləɠa kəlee kalaan nwun nəɠa da gbɛlɛ, ə mą kɛ ɲɛ̨i kɔ́lɔn mɛ̨i ləɠa, a yili kəlee kalaan, ə mąą həɠəɠaa waa, ə gbinįlee waa yái; mąą a kɛ kɛa a ɉəɠɛɛ.

¹⁰ «Voló mɛ̨ihaaɓa yələ, ə ɓɛlaa hilɛ lon veelɛ həɠə, kpɛɠii hva kɛ diɛ, kwɛlan dɔ̨nɔ̨ ɓɛlaa lon ɉaa tɔ̨nɔ̨, kpɛɠii hva kɛ mą, lɛɠɛ hunwɔ̨ kəgən ɉu mɛ̨inąąn a haláá hɛn, ə ɲɔwɔn a wulɔ, ɛlɛɛ kəgən gbulɔ wulɔ hu.

¹¹ Ɉaláá laa həli mun tii mąąhəɠə kóló kɛi, a nui tii da nwɔ haláá hɛnŋąąi di tɔɔ Yai-Laa lííla, gee kaa kələ laaləi.

¹² Ɉaláá laa həli mun a mɛlaa hilɛ lon dɔ̨nɔ̨ həɠə, ə naa həli a nu pɔɔŋą pɛli haláá, ə wulɔ kəɠən gbulɔ pɛlɛ mą; Ə di lɛ Yai-Laa ɓa a naa həli pələ, a di laa həli pələ pɔlɔ.

¹³ A mɛlaa lon nwun dee ɓɛi da kɛ nɛ̨ŋɛ̨n ɉaláá da ɉaláái da gələn nwɔ taatɛlɛɛ nwun deei laa, gɛɛnąą mąąhəɠɛɛ ɓa. Mąąhɔlɔɓo, nu pɔɔŋą pɛli haláá kulɔ pələ kaa lɔ yɛ nɛ̨ŋɛ̨n mąą hvaalɛɛ haláá. Yili kaa a hɛn mąąhəɠɛɛ, yii a lɛɛ ɉaláá laa həli mun ɲəi.

¹⁴ Ɉaláá laa həli mu a ɉaláá taatɛlɛɛi ti ɲąmą laa həli ə da hiɛ nui di mąą haláá kulɔi mamįiyee wəli ɓa, da mamįiyee kpiɛ ɉinɛ̨ ɓa, ə mą kɛ mamįiyee kɔ́wɔ kpiɛ ɉinɛ̨.

¹⁵ Ɉaláá laa həli mun a gəgən gbulɔ wulɔi tii həɠə, ə da wolo pu gɔɓɛ yee ɲą,

¹⁶ ə mamįiyee kpiɛ bələ kəleen nɔ nwulɔi tii gɔɓɛ yee ɲą ɉu, ə nwulɔ taɠa a ɲeekpiɛ Yai-Laa lííla gee mɛ̨i mɛ̨ihveelɛ.

¹⁷ Gbəlii tii a lɛɛ ɉaláá laa həli mun ɲee ɲą, a da lɔ nui tii ɓa-mįi-yee wəli ɓa, ə da lɔ mamįiyee kpiɛ ɉinɛ̨ ɓa, ə da lɔ nwɔ̨nɔ̨ mamįiyee kɔ́wɔ kpiɛ ɉinɛ̨ ɓa, ɓɛɠaai ti lɔ ə ɉaláá ɲąmą hiɛ laai.

¹⁸ Nwulɔ kpəlii a lɛɛ ɉaláá laa həli mun ɲee ɲą, a nɔ nui di mąą həɠəi nwun ma; a gɛ tii, nɛ̨ŋɛ̨n mąą hvaalɛɛ kóló ka tii aa gɛ nui tii ɓa Yai-Laa lííla.

¹⁹ Ɉaláá laa həli mun ə nɛ̨ŋɛ̨n ɉaláá kulɔ, ə gɛ Yálá ə nui tii mąąhvaalɛɛ, mɛ̨nį da gɛ nu ɓa tɔ́n yɛ kulɔ mą, ə yili kɛ nui pai gbɔwɔ mąąhəɠəi mɛ̨i. Yili pulu, ə ɉaláái da gələn nwɔ taatɛlɛɛ nwun dee.

²⁰ Ɉaláá laa həli mun ə ɉaláái da gələn, da Yálá kɔ́ haláá laa həli ɉaláá kulɔi. Ɉaláá laa həli mun a nɛ̨ŋɛ̨n mąąhvaalɛɛ kóló kɛ tii nui tii mɛ̨i, a kɛ tii kɛa nui tii mąą aa həɠə.

Hvólóɲɔ̨n gɛ mun a kɛ a yeehowolomun mąąhəɠə mɛ̨nį

²¹ «Nui tii a kɛ a yeehowolomun, a wala pɛli ɉɛnŋąą kəlee hɔlɔɓoi, a ɓɛlaa lon dɔ̨nɔ̨ həɠə a bɔɔŋą pɛli haláá, diɛ naa həli a naa həli pələ, di nɛ̨ŋɛ̨n mąąhvaalɛɛ kóló kɛ mɛ̨i, ə lɛɠɛ hunwɔ̨ kəgən ɉu haaɓa həɠə yii daa ɲɔwɔn a wulɔ, a Yálá kɔ́ hɛn da kəgən gbulɔ wulɔ;

²² Tonwələn veelɛ a wala kɛ tii ɓopo hveelɛ, yii ɲee a pɛli mą. Dɔ̨nɔ̨ a kɛ a nɛ̨ŋɛ̨n ɉaláá dɔ̨nɔ̨ ə ɓo a haláái da gələn.

²³ A pa a diɛ ɉaláá laa həli mun bɔ a voló mɛ̨ihaaɓa yələ, gbɔwɔ mąą həɠə mɛ̨nį ɓa gee kaa kələ laaləi; Yai-Laa lííla.

²⁴ Ɉaláá laa həli mun a nu pɔɔŋąą pɛli haláá ɓɛlaa lon ɉəɠə da gəgən gbulɔ wulɔi tii, ɉaláá laa həli mun a di laa həli a naa həli pələ Yai-Laa ɓa.

²⁵ Ə nu pɔɔŋą pɛli haláá ɓɛlaa lon nwun dee, ə daatɛlɛɛ ɲąmą ta həɠə, ə da hiɛ nui di kaa mąą haláá kulɔi mamįiyee wəli ɓa, ə da hiɛ mamįiyee kpiɛ ɉinɛ̨ ɓa, ə da hiɛ mamįiyee kɔ́wɔ kpiɛ ɉinɛ̨ ɓa.

²⁶ Ɉaláá laa həli mun ə ɲąmą ta pu gɔɓɛ yee ɲą.

²⁷ Ɉaláá laa həli mun ə gɔɓɛ yee ɲą wulɔi tii ta taɠa gee mɛ̨i mɛ̨ihveelɛ a mamįiyee kpiɛ bələ kəleen, Yai-Laa lííla.

²⁸ Ə nwulɔi ti ta lɔ nui di kaa mąą haláá kulɔi mamįiyee wəli ɓa, ə da lɔ mamįiyee kpiɛ ɉinɛ̨ ɓa da mamįiyee kɔ́wɔ kpiɛ ɉinɛ̨, gɛɛnąąɠaai tii lɔ ə nu pɔɔŋą pɛli taatɛlɛɛ ɲąmą hiɛ laa.

²⁹ Nwulɔ kpəlii a lɛɛ ɉaláá laa həli mun ɲee ɲą, a ɉiɛ nui di kaa mąą haláá kulɔi nwun ma, ə nɛ̨ŋɛ̨n mąąhvaalɛɛ kóló kɛ mą Yai-Laa lííla,

³⁰ Dowənən a wala kɛ tii mopo hveelɛi ti, yii lɔpee nu yee a pɛli mą,

³¹ nwɛ̨niɠaai nui tii yee a pɛli diɛ, ɉaláá laa həli mun a dɔ̨nɔ̨ kɛ a nɛ̨ŋɛ̨n mąąhvaalɛɛ haláá, ə dɔ̨nɔ̨ kɛ a haláái da gələn, yɛ bɛlɛ Yálá kɔ́ haláá hɛn ma. Ɉaláá laa həli mun ə nɛ̨ŋɛ̨n mąąhvaalɛɛ kóló kɛ nui tii mɛ̨i Yai-Laa liila.»

³² Hvólóɲɔ̨n gɛ mun ɲee hva pɛli gbɔwɔ mąąhəɠə haláá kulɔ hɛnŋąą kəlee ɓa, mąą mɛ̨nį kɛ pələɠaa ka tii.

Pɛlɛ́ nwąną mąą ɲɔ̨nŋąą

³³ Yai-Laa yɛ Moisə da Aarɔn diɛ:

³⁴ «Ɓɛlɔwai ka lɔ la Kanaan lɔi hu, yai gáá dɛɛi ka pɔ a ka wɔɔ, ŋą́ pɔɔ ta kɛ nɔi nįnɛ̨i tii ka káá pai lii ɉu nwɔ pɛlɛ́ ta ɓa,

³⁵ mąąnɛ̨ɛ̨ bɛlɛ nąmu ə li ə mo ɉaláá laa həli mun ma, yɛ mą: ‹Ŋą́ą́ hɛn da kaa nwɔ́ pɛ́lɛ́i ɓa, gaa bɛlɛ́ nwąną ɓa.›

³⁶ Ɉaláá laa həli mun a mo di bɛlɛ́n ɉɛnŋąą kəlee kulɔ; yaai tii a ɉaláá laa həli mun, hvo tɛɠa kɛ lɔi laa, ɓɛi bɔɔ tii kaa laa, nąą mąąkpɛɛ mɛ̨nį ɓa. A kɛ tii ɉɛnŋąąi tii kɛ bɛlɛ́n, tɔ́n va pɛli kɛi dɔ̨nɔ̨ kpɛli ɓa. Da ɉɛnŋąąi tii kəlee kulɔ bɛlɛ́n, ɉaláá laa həli mun a pa ə nąą mąąkpɛɛ.

³⁷ Ɓɛi bɔɔi tii kaa laa, a nąą mąąkpɛɛ, akɛ gɛɛnąąi tii bɛlɛ́ nwąną ɓa, nąą hviliin ŋąą, a wala kɛ tii nąą ta wolo kpɔluɔ, nąą nwolo a kɛ ɉu,

³⁸ ɉaláá laa həli mun a kulɔ bɛlɛ́n ə tɔɔ bɛlɛ́ laaləi, ə bɛlɛ́ laa kpulu hvóló mɛ̨ihveelɛ yee mu.

³⁹ Voló mɛ̨ihveelɛ yələ, ɉaláá laa həli mun a pənə ə nąą mąąkpɛɛ, akɛ bɔɔ tii ta aa pɛlɛ mą.

⁴⁰ Ɉaláá laa həli mun a mo di gwɛniɠaai tii bɔɔ kaa diɛ, di di kulɔ, di di pili kɛɛnąą ɲɔ̨nwɔ̨ɔ̨ ɓa ɉįi pulu pələ.

⁴¹ A mo di bɛlɛ́ mąą kalaan ɉu pələ, bɔlɔi tii da gulɔ mą, di bili ɉįi pulu pələ kɛɛnąą ɲɔ̨nwɔ̨ɔ̨ ɓa.

⁴² Di kwɛni takpɛliɠaa həɠə, di yiiɠaa tii mąąhvalin na, di pənə di bɛlɛ́ tɛ a pɔlɔ takpɛli.

⁴³ «Da gwɛniɠaa kulɔ tii, ə lɛɛ da bɛlɛ́ nwąną mąą kalaan, di pənə di dɛ, ɉɛn tii pɔɔ a pənə a kulɔ bɛlɛ́ ɓa,

⁴⁴ ɉaláá laa həli mun a pənə nwɔ̨nɔ̨ ə li ə nąą mąąkpɛɛ, akɛ ɉɛn tii pɔɔ hu a kɛnɛ̨ bɛlɛ́n, akɛ tii ɲɔ̨n ɉuwu ɲɔ̨nwɔ̨ɔ̨ ta ka tii bɛlɛ ɓa. Tɔ́n gaa bɛlɛ́i tii ɓa.

⁴⁵ Mąąnɛ̨ɛ̨ di bɛlɛ pu, bɛlɛ́ kpaɉaɠa, bɛlɛ́ kpoloon da bɛlɛ́ kpoloon ɲą bɔlɔ kəlee da di kulɔ taai di di pili kɛɛnąą ɲɔ̨nwɔ̨ɔ̨ ta ɓa.

⁴⁶ «Nu a lɔ bɛlɛ́n, ɓɛlɔwai tɔ́n gaa la bɛlɛ́ ɓa, akɛ tii mąą nu aa tɔ́n ɉee gbɔwɔ ɓa ə lɛɛ ɉu yələ ə́ wulu.

⁴⁷ Nu ta a yii bɛlɛ́n, mąąnɛ̨ɛ̨ ə mąą həɠə waa; ɛlɛɛ nu a kɔ̨nɔ̨n mįi laa, mąąnɛ̨ɛ̨ ə mąą həɠəɠaa waa.

⁴⁸ «Kɛlaa ɉaláá laa həli mun a lɔ a nąą mąąkpɛɛ, ɉɛn tii pɔɔ hu a wala kɛnɛ̨ bɛlɛ́ ɓa, bɛlɛ́ tɛɛ pulu, a mo yɛ tɔ́n və bɛlɛ́ ɓa. Mąąhɔlɔɓo, ɲɔ̨n tii kɛ bɛlɛ́ ɓa aa kpɛɛ.

⁴⁹ «Bɛlɛ́ mąąhəɠə pələ ka: Da nwɛ̨ni hveelɛ həɠə, di bɛlɛ kpitili kwɛi ɓa, da həɠə ɓɛla kpɔluɔ yɛ tɛ́ɛ́ kpɛlɛ, da isopə kpaɠa.

⁵⁰ Da dɔ̨nɔ̨ nwun dee ləɠi kpɛli mɛ̨i yá ə ɓo ɉu yii di ɉaɠa tɛɛ ya hu.

⁵¹ Di gbitili kwɛi tii həɠə da isopə kpaɠa, da ɉəɠə ɓɛla kpɔlui tii bɛlɛɛ nwɛ̨ni kpəli hvúlu ɓa, ə di lɔ nwɛ̨ni ɲąmą hu ɲái, ə da taɠa gee mɛ̨i mɛ̨ihveelɛ bɛlɛ́ ɓa.

⁵² Bələ ɓə da bɛlɛ́ mąąhəɠə la, tɔ́n ə kulɔ mą, a nwɛ̨ni ɲąmą da dɛɛyá, nwɛ̨ni hvulú, kpitili kwɛi, isopə kpaɠa, da ɉəɠə ɓɛla kpɔluɔ yɛ tɛ́ɛ́-kpɛlɛ.

⁵³ Ə ɲee ɓo nwɛ̨ni hvúlu ɓa yili ə kulɔ taai, ə li gbomoi pələ, ɉaláá laa həli mun ə nɛ̨ŋɛ̨n mąąhvaalɛɛ hvɛli ɓo kɛ bɛlɛ́ ɓa. Akɛ tii, bɛlɛ́ mąą aa həɠə.»

⁵⁴ Yii hvilɛn na hvólóɲɔ̨n, da ɲɔ̨n yiiɠaa kpɔ a nu kɔ́lɔ təɠən diɛ, bələi da di mąą mɛ̨nį kɛ la bələ ka tii.

⁵⁵ Ə kɛ a həɠə hviliin ŋąą, da hɛn da pɔɔ kɛɛ pɛlɛ́ ɓa,

⁵⁶ ə kɛ a tɔɔ hɛn da pɔɔ, ə kɛ a pala kpɔlɔɔn ɉu yɛ len, bələi da di mąą mɛ̨nį kɛ la, bələ li.

⁵⁷ Ɲələɠaai tɔ́n a kɛ la diɛ, da ɲələɠaa tɔ́n va kɛ la diɛ, bələ ka tii. Hvólóɲɔ̨n mąą mɛ̨nį kɛ pələ ka tii.