Levetekɔ 10 - Yálá laawoo hɛɓɛ (dc)

Haa mɛ̨nį kɛ pələ

¹ Aarɔn lonnii, Nadavə da Avihu di di wɔ lansan kələn hɛnŋąąi həɠə, di nwɔ̨n naa ɉu, di lansan pu ŋą, nwɔ̨n lúwɔ́ hvo mą, diɛ naa həli Yai-Laa ɓa; Yaan hvo kɛ di tí li a yili.

² Nwɔ̨n ə kulɔ Yai-Laa lííla, ə di kələn, di haa Yai-Laa lííla.

³ Moisə yɛ Aarɔn ɓa: «Yai-Laa ə mo kpɔ, yɛ: Bələi Mą́ą́həɠɛɛ la, mąąnɛ̨ɛ̨ nwɔ́ kóló kɛ nuą di yili kɔ́lɔn, ɛlɛɛ di mą́ą́wiɛ nɔi nuą kəlee ɲɛ̨i ɓa». Aarɔn ə tɔɔ lɔ tin.

⁴ Moisə ə Aarɔn galá Uziɛlə lonnii hveelɛi, Misaɛlə da Ɛlsafan di təli, yɛ diɛ: Ka lɛɠɛ ɓɛ, ka ka nąn nonnii həɠə gɛɛnąą mąąhəɠɛɛ ɓa, ka li a diɛ daa pulu pələ.

⁵ Di lɛɠɛ laa, də li a diɛ ɉįi pulu pələ, di di lɛɛ di wɔ haláá kulɔ həɠəɠaai hu, yɛ bələi Moisə ə mo la.

⁶ Moisə yɛ Aarɔn da nonnii hinąą hveelɛi, Eleazarə da Itamarə diɛ: «Ka hvə ka nwuɔ̨ kɛ yɔhɔ-yɔhɔ, ka hvo ka mąąhəɠə huɓɛla; ə gɛ ka hvo pa haa, Yai-Laa hvo pa niiɲąnwąną nɔi nuą kəlee diɛ. Ka nɛ̨ɛ̨ laa ka kaayɔwɔɠaa Israɛlə nuą kəlee di nuąi Yai-Laa ə di paa a nwɔ̨n, di haa wɔlɔ ɓo.

⁷ Ka wɛi, mąą hvo nɛ̨ɛ̨li ka hvo həɠə gee kaa kələ laaləi; ə gɛ ka hvo pa haa, mąąhɔlɔɓo, daa Yai-Laa nwɔ wulɔ mąąhəɠɛɛi hiɛ kaa.» Bələi tii Moisə ə mo la, di gɛ tii.

Lɔɔ mɛ̨nį

⁸ Yai-Laa ə mo Aarɔn ɓa yɛ mą:

⁹ «Yɛ́ ka ə́ lonnii, ɓɛlɔwai ka kɛi li la gee kaa kələ mu, ka hvo lɔɔ kpələ, da kpələ hɛn a nu hon, ə gɛ ka hvo pa haa, ka mąą tɔ́n ni, a yələ kəlee ka ka huwuhu nuą, yili hva ɉəɠə mą.

¹⁰ Bələ ɓə ka pɛli hɛnŋąą lɔwai tɔɔi la, hɛn gaa a nwɔ́ɔ́ da hɛn hvo ɓaa a nwɔ́ɔ́, ɛlɛɛ hɛn tɔ́n gaa mą da hɛn tɔ́n və mą.

¹¹ Ɛlɛɛ kaa pɛli Israɛlə lonnii mąąkwɛlii diɓoɠaa diɛ, diɓoɠaai Yai-Laa ə di tɛɛ Moisə pɔ, yili yaan yɛ nɛ diɛ.»

Ɉaláá huwɔ mąą mɛ̨nį

¹² Moisə yɛ Aarɔn da nonnii yiiɠaai tii lɛɛ ɲəi, Eleazarə da Itamarə diɛ: «Ka Yai-Laa nwɔ haláá kɔ̨nɔ̨n kulɔ kɛa ɉaláá hɛn ɉui, gbəlii tii a lɛɛ, ka ɉəɠə, ka mįi a lɛɠɛi dɛ hɛn va kɛ ɉu, ɉaláá kulɔi kwɛlɛ; mąąhɔlɔɓo, mąąhəɠɛɛi kpɔ kpąą;

¹³ ka mįi kɛɛnąą mąąhəɠɛɛ ɓa, mąąhɔlɔɓo, kɔ̨nɔ̨n mąąnɛ̨ɛ̨i ə tɛɛ ka pɔ ka ə́ lonnii, diɛ gulɔ Yai-Laa nwɔ haláá kɔ̨nɔ̨n hu, yaa li. Mɛ̨nįi di dí la, yaa li.

¹⁴ Ɉuwɔ kəŋən tii di naa həli da ɉuwɔɠaai tii di gulɔ ɉu, ka gəlee mįi kɛɛnąą mąąhəɠɛɛ ɓa ka ə́ lonnii hinąą da nɛ̨ąą. Mąąhɔlɔɓo, Israɛlə lonnii di wɔ liilaa halááɠaai hu, ka wɛi mąąnɛ̨ɛ̨ ə kulɔ ɉu ə tɛɛ ka ə́ lonnii ka pɔ, yaa li.

¹⁵ Ɉuwɔ wəlai tii di gulɔ ɉu da gəŋən tii, nuąi tii ɉaláá hu hvɛli da pa a diɛ, da ɉuwɔ wulɔɠaai mąąnɛ̨ɛ̨ ə kələn, diɛ di laa həli a naa həli pələ Yai-Laa ɓa. Yili pulu, a lɛɛ a yɛ́ ka ə́ lonnii ka wɔɔ, a yii mąąnɛ̨ɛ̨ ə tɛɛ ka pɔ. Yələ kəlee mɛ̨nį li, Yai-Laa ɓə mo tii.»

¹⁶ Molu hilɛi tii di gulɔ a nɛ̨ŋɛ̨n mąąhvaalɛɛ haláá, Moisə ə kɛɛ mąąningɛ; ə gaa daa kɛ gələn, ə niiholi Eleazarə da Itamarə di pɔ, diɛi kɛ a Aarɔn lonnii hveelɛi lɛɛ. Yɛ diɛ:

¹⁷ «Lə ɓə kɛ yai ka hvo ɉaláá hɛn tii mįi li kɛɛnąą mąąhəɠɛɛ ɓa? Mąąhɔlɔɓo, hɛn mąąhəɠɛɛ ka tii. Di dɛɛ ka pɔ nɔi lonnii di wɔ nɛ̨ŋɛ̨n mąąhvaalɛɛ haláá kulɔ mɛ̨nį ɓa, a nu mąąhvaalɛɛ kólói ka gɛ ɉaláái tii mɛ̨i Yai-Laa lííla.

¹⁸ Yii di hvo lɔ li a ɲąmą gɛɛnąą mąąhəɠɛɛ ɓa, mąąnɛ̨ɛ̨ kɛ ɉuwɔ ə mįi gɛɛnąą mąąhəɠɛɛ ɓa, yɛ bələi ŋį́ mo la kaa.»

¹⁹ Aarɔn ə Moisə woo ɲąąpənə, yɛ mą: «Ə́ wəli tɔɔ: Ɲələi nuą di di wɔ nɛ̨ŋɛ̨n mąąhvaalɛɛ haláái kulɔ la Yai-Laa ɓa, da ɉaláá yii da gələn, mɛ̨nįi həli mą́ą́, ə́ gɔlɔn; volói tii, molu hilɛi tii di gulɔ a nɛ̨ŋɛ̨n mąąhvaalɛɛ haláá, ŋą́ mɔ̨ɔ̨ pɛli kɛ ɉuwɔ ta mįi? Ə kɛ a pələi lɔpee, yili hvəli nɛ̨ɛ̨ Yai-Laa ɓa.»

²⁰ Mɛ̨nį hutoo pələi tii, ə Moisə lii hon.