Ɉeremi 8 - Yálá laawoo hɛɓɛ (dc)

¹ Yai-Laa woo ka, yɛ diɛ: Yələi di yowoɠaa di kaa pai nu kɔ́wɠaa kulɔi la gámąɠaa hu; dɔɔɓɛlaa kɔ́wɠaa da Ɉuda nu kpɛa kpɛaɠaa di wɛi, ə mą kɛ, ɉaláá laa həli mun, da Yálá kwəi mɛ̨nį hukulɔ nuą di wɛi, ə lɛɛ, da Ɉerusalɛmə nuą kɔ́wɠaa.

² Di kaa pai gəlee huhiɛi hvóló mu, di ɉuhiɛ ɲąnin voló ɓa, da yələkɔlɔn ɉu hɛnŋaa kəlee ɲɛ̨i ɓa. Ɉɛnŋaa tii ɓə di wɛli ə́ kɛ diɛ, diɛ di mąąwiɛ; diɛ kwɛli hvilɛn diɛ, diɛ di nwun dɔɔ a diɛ. Di kɔ́wɠaa da lɛɛ a ɉu taɠaa, di hva pənə di hvo di loo a nįnɛ̨. Da lɛɛ nɔi mɛ̨i yɛ tulun bɔlɔ.

³ Ə lɛɛ, haa hviɛla a ɓo nu kɛɛ yɛnɛ̨ɛ̨ ɓa, nuą pai lɛɛ nu huwui lɔwai a di hulu di ɲɛ̨i ɓa; gáá pai di taɠa taɠai kɛnaa kəlee ɓa. Ɲą́ą́ Mɛ̨nį Kəlee ŋą Hééɓomun Yai-Laa wóó li.

Israɛlə nuą wəlii kpɔlɔɔi

⁴ Mo diɛ: Yɛ́ diɛ: Yai-Laa woo ka; yɛ diɛ: Akɛti, nu a too, hva kɛa pənə hvo muhəɠə? Akɛti, nu a bulu tinɛ̨n, hva kɛa yali gələn ma?

⁵ Lə ɓə kɛ yaai, nu huwui ŋɛ̨i Ɉerusalɛmə, gaa lɔ nwun gulɔi nwóó mu diɛ nɛ́ɛ́ laa a ɉu kwɛa? Diɛ ka, daa kanąn nɔ hali mɛ̨nį ɓa, di hvo gɛi di hvo tinɛ̨n di hvo pa bɔ́.

⁶ Ŋą́ nwə́li tɔɔ kpɔ a nɛlɛɛ, di hvaa woo ɲąą hvo mą. Da lɔpee hvo ɲee kulɔi nwɔ kili ɲɔ̨nwɔ̨ɔ̨ hu, yɛ diɛ: «Akɛti lə ɓə ŋɛ̨i gáá gɛi?» Nu kəlee kaa lii nwun ma, yɛ hoo aa kɛi pili kɔ́ hu.

⁷ Kpalanwɛ̨nį, ə pai lɔwai kɔ́lɔn, hvólóon, da nįŋɛ̨ pulu nwɛ̨nį di di pa kuu da di li kuu kɔ́lɔn. Kɛlaa nwɔ́ nuąi di wɛi, tɔ́n Yai-Laa ə dɔɔ diɛ di hva hiɛ la.

Dɔ́n ɉɛɓɛ́ kɛ nuą daa mąą pənə

⁸ Ka tɔɔi ɓaa mį, kaa kɛ diɛ: mɛ̨nį kɔ́lɔn gili kaa ku yəi, mąąhɔlɔɓo, Yai-Laa nwɔ tɔ́n kaa ku yəi? Ya pa, ka dɔ́n ɉɛɓɛ́ mąą pənə a lɛɛ woo; dɔ́n ɉɛɓɛ́ kɛ nuą di wɔ kpɔn kɛ mɛ̨nį li.

⁹ Gilimąą nuą tii daa nwumɛ̨, di ɲɛ̨i aa paa, daa kɔ́ a hɛlɛn di kɛi tɛɠɛ ɓo Yai-Laa woo hu. Da pɛli di kpɔɔ kaai ləi a mɛ̨nį kɔ́lɔn nuą?

Nuąi kɛi kɛ diɛ mɛ̨nį ta hvə li

¹⁰ Yili ɓə gaa mą, Yai-Laa yɛ diɛ: Gáá di nɛ̨ąni tɛɛi nu takpɛliɠaa pɔ, di wɔ tííɠaa di lɛɛ nui a ɉəɠə ɲəi. Mąąhɔlɔɓo, di kəlee di hɛn nwɛliɛi, ə kɛ a lokolo, ə kɛ a nu kɛnɛ̨, gəlee túwɔ́ pələ kaa lɔ a lɛɛ, Yálá kwəi mɛ̨nį hukulɔ nuą mąn ə mą kɛ ɉaláá laa həli nuą mąn.

¹¹ Di kaa nwɔ́ nuą di wɔ mąąwɛli mɛ̨nį hali kɛi a hviikpɛɛ, diɛ kɛ diɛ: «Ka ka liilaa! Ka ka lilaa.»

¹² Di kaa pai nwumɛ̨i di wɔ túwɔ́ pələ ɲɔ̨n ɉu. Kɛlaa di hvo mąn kɛa nwumɛ̨ kɔ́lɔn. Di kili hvo ɉu, diɛ kɛ di ɓɛlɛ aa kpɛɛ diɛ. Yili ɓə gaa mą: Yai-Laa yɛ diɛ: Di kaa pai tooi yɛ nutakpɛliɠaa tii kəlee. Di woo hukulɔ yələ di ɲɛ̨i a paa.

¹³ Yai-Laa woo ka, yɛ diɛ: Gáá kwa diɛni ku lɔwai mɛ̨nį hutɔɔi tɔ̨nɔ̨; viɲə ɓá hvo kɛa ɉu; ɓɔɔlaa wuluɠaa ta ɓa hvo ɉu. Gəlee laa a kpala mą. Gáá di laakwɛlanmoi di hu kalamun ma.

¹⁴ Gu kaa ɓɛ tɔɔni kpɛli-kpɛli lə mɛ̨nį ɓa? Ka gu gu ɲąąkpɔn, ka gu lɔ daɠaa hįi kaa mą ɉu; ka gu lɛɛ laa gu haa mąąkpɔn. Hvo gaai guɔ Yálá a gu laakwɛlanmo haa ɓa; aa pilimąą tɔɔ gu la, gu haa mɛ̨nį ɓa. A tɛ̨ą, kwaa ku hɔn gɛ a Yai-Laa.

¹⁵ Ə kɛ ku kwəi, mɛ̨nį kəlee mąą kaa pai hvalin ɉii a nɛlɛɛ, ya ka ku hvo nɛlɛɛ kaa li. Ku ɲɛ̨i ə ɓo kɔ́lɔi pɔ̨nɔ̨ tɔwɔ, ya ka kpalo aa pa.

¹⁶ Hvo gaa, ku yowoɠaa di wɔ hooɠaa di tin gaa tɔɔi Dan, di wɔ hoo hilɛɠaa kɔ́wɔ mu tin yɛ nɔi kpɛlin. Di kaa pai nɔi da ɉu hɛnŋaa kəlee mįi diɛ daa da ɉu hee ɓo nuą mį́i.

¹⁷ Gáá kaaləɠaa a nu nwąną kaaləɠaa ɲąątɛi kaa. Gaaləɠaa tii, di hva ɲɔw kaalə ɉowo mun ma. Di kaa pai ka ɲin ɉii, ɲą́ą́ Yai-Laa nwóó li.

Ɉeremi kaa nwoo laai

¹⁸ Gáá mɔ̨nɔ̨ hu, yii naai hvo mą, ɉú aa haa,

¹⁹ ka bɔ́ lɔi nuą wɔlɔ woo mɛ̨n dai! Di woo kaa tɔɔi nɔi nąą kəlee. Diɛ kɛ mą: «Akɛ tii, Yai-Laa hvó mɔ̨ɔ̨ Siɔn daai? Akɛ tii tɔɔmun hvo kɛa laa ɓəi?» «Lə ɓə kɛ yaai di nwąną lɔ diɛ kwɛli hvilɛn hali ɓa, a gbɛli-kpɛli hɛnŋaa tii həɠə pələ takpɛli.»

²⁰ Daa kpɛɛ a di wɔ hihɛnŋaai ɓa kulaa, hvóló laa ɓɔɔ kaa tɛɛ, ə lɛɛ, ku hvo ni kulɔ li mɛ̨nįi, ku hvo ni ɓalo kaa li ku hvo mo.

²¹ Ɉú kpɔ-kpɔɔ aa yali, nwɔ́ nuą di wɔ mɔ̨nɔ̨ kɛnɛ̨i mąą mɛ̨nį ɓa. Gaa kpinįi, mą́ą́ aa wɛli.

²² Akɛti wulu laa hvo mɔ̨ɔ̨ Galaadə? Akɛti hali kɛ mun və mɔ̨ɔ̨ laa? Lə ɓə kɛ yaai hvaŋą wolo hvo kpɛli pui nwɔ́ nuą diɛ?

²³ Gbɛɛ ɓə pai nwún galən gɛi a yaton, ə ɲɛ̨ikɔwɠaa kɛ a ya kpowo, ə gɛ, nwɔ́ nuąi daa di paa, gɛ di haa wɔlɔ ɓo a hvoló da kpinį!