Ɉeremi 6 - Yálá laawoo hɛɓɛ (dc)

Mɛ̨nį ɲąą nwąnąą kɛnɛ̨ hɛlɛn ŋaai Ɉerusalɛmə taa mɛ̨i

¹ Ka kulɔ Ɉerusalɛmə daai. Bɛnɉamɛn huwuhu nuą ka ka mąąkilɛi kwɛli pələ takpɛli. Ka kɔ́ tulu hvɛɛ Tekoa ka huu pili Bɛtə-Kɛrɛmə, mɛ̨nį ɲąą nwąnąą kaa ka mąą hɛɠii, gaa a lɔi kala mɛ̨nį kɛnɛ̨, gaa həɠəi ɲanwuɔ̨ pələ ɲeeɠaa hu.

² Yɛ́ Siɔn taa, Nɛ̨ɛ̨nu lɛlɛɛ gɔmɛ̨i, daa gɛ, ə́ mɛ̨i aa haa tón-tón.

³ Siɔn taa pɔ pələ ɓə taatɛlɛɛ mɛ̨i kaa nuą kaa pai la, da di wɔ taatɛlɛɛ kpuluɠaa; daa di wɔ kələɠaa tɔɔ daa mąątinɛn na. Nu kəlee tɔɔ nwɛi naa yɛ naa mį́i.

⁴ 'Ka ka hą́ą́ yili kɔ́ kɔ́ mɛ̨nį ɓa! 'Ka ka muhəɠə! 'Ka ɲili ŋą 'Ka li gɔ́ mɛ̨i a hvoló ŋą ɉə́ ɉə́! 'Ku nwun napiliɛ li! Hvóló mąą kaa laai! Pɛlɛ kɔ́n nįnįn yɛ kwɛa.

⁵ Ka ka muhəɠə ka kwəli gɔ́ mɛ̨i a kwii hą́ą́ tón tón. Ka gu di wɔ pɛlɛ lɛlɛɛɠaa wolo.

⁶ Mɛ̨nį Kəlee ŋą Hééɓomun Yai-Laa woo ka, yɛ diɛ: «Ka nwuluɠaa pɔn, daa ɓa, ka pələ laa yɛ li Ɉerusalɛmə daa kwəi ŋą́ą́ daa tii laakwɛlanmo kɔ́ ɓa.» Mąąhɔlɔɓo, weya mɛ̨nį lɔ ɓə ɉu.

⁷ Bələi lɔ yálɔwa a ya laa hɔnmo la, bələ lɔ ɓə daa tii yee kanąn ŋaai la nwɔ lii ɲɔ̨n kwəi ɓa. Too mɛ̨i da hulu mɛ̨nį lɔ ɓə laa, yələ kəlee ɲɛ̨́i a tɔɔ mɔ̨nɔ̨ hu, da kɛlɛ ɓo.

⁸ «Ɉerusalɛmə, ə́ yee hee niɛwoo mu. A wala kɛ tii, gwa yɛ́ hvəi kɛa gu tɔɔ! Ŋą́ ə́ mąą pənə a mąąwɛli lɔi, a lɔi kpoloo.»

Nu huwu yii hva nwəli tɔɔ Nąmu woo ɓa

⁹ Mɛ̨nį Kəlee ŋą Hééɓomun Yai-Laa woo ka, yɛ diɛ: Ka Israɛlə nu huwu gbəlii aa lɛɛ, ka gban ɉu kwɛli a nɛlɛɛ; yɛ daa kɛi viɲə wulu hu kwɛli; ka ka ɲɛ̨i laa nwonwoɠaa hu, yɛ daa kɛi gban ɉu kwɛli!

¹⁰ Gbɛɛ ɓə pai nwəli tɔɔ nwóóɠaa diɛ? Yɛ nwɔ́ liɛwooɠaa mɛ̨n! Diɛ ka di wəli non və ɉu! Mɛ̨nį hva pɛli lɔi ɉu. Yai-Laa! Di kaa ə́ woo kaai yɛ yɛlɛ kulɔ ɉu hɛn; di hvo bɔ.

¹¹ Gáá hvɛɛi a Yai-Laa nwɔ liiholi, Ə lɛɛ vá kɛa pɛli ɉu hon ɉii. Daɠa nɛapɛlɛɛ mɛ̨i gwəliɠaa pɔ, ə mą kɛ muhəɠə nįnɛ̨ɠaa mɛ̨i, da daai nuą kəlee, ɉinąą mąn nɛɛa mąn; ə kɛ a hulogolo, ə kɛ a nu nwunu.

¹² Di wɔ pɛlɛ́ɠaai daa lɛɛ nu takpɛliɠaa yəi; bɛlɛɛ di wɔ tííɠaa diɛ, da di nɛ̨ąni. Ŋą́ą́ ɲɛ̨́i ɲɔ̨nwɔ̨ɔ̨ hee nɔi nuą diɛ ɲą́ą́ Yai-Laa nwóó li.

¹³ Mąąhɔlɔɓo, di kəlee di hɛn nwɛliɛi. Nu kpɛa kpɛa mąn, ə́ mą kɛ yee mu nuą. Ə gɔwɔ tɔɔ Yálá kwəi mɛ̨nį ɓo nuą diɛ, ə həli la ɉaláá kulɔ nuą diɛ, di kəlee di túwɔ́ pələ kaa lɔ a hulu mɛ̨nį.

¹⁴ Di kaa nwɔ́ nuąi kili nwɔ pɛlɛ́i di wɔ mąąwɛli kɛnɛ̨i hu, diɛ kɛ diɛ: «Mɛ̨ni ta holi mɛ̨nį kəlee ɲąą nɛɛi,» ya pa, mɛ̨nį ta ɲąą hvo nɛɛ li.

¹⁵ Di wɔ túwɔ́ pələ ɲɔ̨n tii kaa pai di ɲɛ̨i paai. Ə mą kɛ tii, yiihu di hva kpɛli nwumɛ̨. Di kili hvo ɉu diɛ kɛ di ɓɛlɛ aa kpɛɛ diɛ; yili mąą mɛ̨nį ɓa, di kaa pai tooi yɛ nu kəlee; ɓɛlɔwai gáá pai múhəɠəi la di laa ɓa, di kaa pai tooi, ɲą́ą́ Yai-Laa nwóó li!

¹⁶ Yai-Laa yɛ diɛ: Ka tɔɔ tai, bələɠaa mɛ̨i, ka ka ɲɛ̨i laa! Ka ka hiɛ pələ pɔlɔ mɛ̨i kaa; ka mąąni kɛ kɛ; kaa diɛ: mįnɛ̨ pələ ɓə nwun na nɛ̨ɛ̨ pələ kaa la! Ɛlɛɛ, ka ɉon na. Ka káá pai hvįįtɔɔ hɔlɔɓoi ka wɔ yɛnɛ̨ɛ̨ hu. Kɛlaa ka káá kɛi diɛ: «Ku hvo ɉon ɉii la!»

¹⁷ Ŋą́ di mąąkpɛ mun dɛɛ di pɔ, yɛ ɲɛ̨i laa di mɛ̨i, yɛ di kilaa pɔ̨nɔ̨, yɛ kɛ diɛ: «Ka ka wəli tɔɔ dulu woo ɓa!» Kɛlaa, diɛ kɛ diɛ: «Ku hvo bɔ ku hvo ku wəli tɔɔ.»

¹⁸ Lɔiɠaa, ə həli kani kaa! Ka ka wəli tɔɔ! Kpulu kəlee, mɛ̨nįi pai laai diɛ ka kili ə pu ɉu.

¹⁹ Lɔi mɛ̨i hee ɓo nuą! Ka ka wəli tɔɔ! Gáá pai mɛ̨nį nwąnąą laai nuą ŋɛ̨i diɛ: Yii gaa di wɔ lii ɲɔ̨n gwəi laa tii vɛla. Kpaaləi ŋį́ nɛ diɛ, daa tɛɠɛ ɓo ɉu, daa di ɲɛ̨i laɠin nwɔ́ liɛwoo mɛ̨i.

²⁰ Lansan ŋɛ̨i ka həɠə la Saba, kaa paa la mą́ą́ mɛ̨nį ɓa, lə ɓə ŋį́ gɛ la? Lə ɓə ŋį́ gɛ a ɉɛn mąą kun nɛ̨ɛ̨i tii, ka həɠə la kwɛala lɔiɠaa hu? Ka wɔ haláá yiiɠaa da gəlee kələn, wɛli hvo mą́ą́. Ka wɔ haláá ɓɛlɛ hvo gwə́i.

²¹ Yili mąą mɛ̨nį ɓa! Yai-Laa woo ka, yɛ diɛ: Gáá hɛn da laai nu huwui ŋɛ̨i tɔwɔ, di kaa pai kalin ɉii la, lon da nąn, heeyɔwɔ da di ɓɛlaa, gəlee di haa kpɔ kpai.

Gɔ kaa kɛa bələ ɓa

²² Yai-Laa woo ka, yɛ diɛ: Nu huwu ta ka ŋɛ̨i həɠəi ɲanwuɔ̨ pələ yɛ pa! Lɔi ta li yii ɉu kɛnɛ̨, aa muhəɠə aa hvilɛn pələ ɓa, yɛ həɠə lɔi kpon ɉeei pələ.

²³ Nwɔ kulaaɠaa kaa di wɔ kpalaɠaa da mį́i kɔ́wɠaa kɔ̨nwɔ̨i. Di kili walawalaa ɲɛ̨imąąwɛli hvo di hu, di tin gaa tɔɔ yɛ gboloyá aa kɛi huluun, di kaa heeni hooɠaa mɛ̨i; di háán yiliɛ kɔ́ kɔ́ mɛ̨nį ɓa, daa tɔɔ a di yɛli, Siɔn taa! Yɛ́ ɓə di kaa pai pɛlɛi yɛ́.

²⁴ Bələ aa too ku wəlii, ku yee kɔ̨nwɔ̨nŋaa hu aa haa, liihɛlɛn aa too kuɔ, kuɔ mɔ̨nɔ̨ mį́i la, yɛ kwəi nwąną a naa tɛ Nɛ̨ɛ̨nu mu.

²⁵ Ka hvo kɛ ka káá lii yɛɛ kɔwɔ ta hu, ka hvo ɉon a pələ ta. Mąąhɔlɔɓo, ka yowoɠaa di wɔ kɔlaɠai pɛlɛɛ laa, aa kɛ a mɛ̨nį-o!

²⁶ Kaa ɓaa nwɔ́ nu huwui, ka mąąwɛli heeɓo! Ka too luwu hu ka kɔ́, yɛ nu non ɉulɔnu tɔ̨nɔ̨ gbən a haa. Ka ka woo laa a nwąnąą! A mąąwɛliɛ, mąąhɔlɔɓo, gɛɛ kala nuą tii, di kaa pai woloi lɔ kaa tanwɔn kpúlu, ka tɛɠii pələ.

²⁷ Ɉeremi! Ŋą́ ə́ kɛ nwɔ́ nuą lɔwai yɛ hɛn mąąkpɛɛ mun, ə gɛ, yɛ́ di túwɔ́ pələ mąąkpɛ, yɛ nɛlɛɛ kɔ́lɔn da ɲɔ̨nwɔ̨ɔ̨.

²⁸ Nu huwui ŋɛ̨i kəlee kaa a kulɔ nwoo mu nuą, di kili walawalaa; diɛ ɓo a laa kala nuą, di walawalaa yɛ kwɛli kpəlee a wala kɛ tii kwɛli kpɔlu. Di kəlee di kaa a lɔi kala nuą, túwɔ́ pələ ɲɔ̨n gulɔ nuą.

²⁹ Di kaa vulɔ hvɛɛ kwɛli ɓa, Kɛlaa, kpɛli-kpɛli ka tii di gɛi, gwɛli hu hvo waai,

³⁰ Di kaa pai kɛi nuą tii laa ɓaa: «Walə kwɛli yii mɛlɛ hvo mą.» Yai-Laa hvó di pɔ. Gwɛli gbo hvo gɛi hvo kulɔ mą.