Ɉeremi 50 - Yálá laawoo hɛɓɛ (dc)Babilonə pu mɛ̨nį da Israɛlə ɓalo mɛ̨nį 1 Mɛ̨nįi Yai-Laa ə mo, yɛ hvilɛn na Babilonə ɓa, yɛ hvilɛn na Kalde lɔi ɓa, ya ka, ə bu gwəi mɛ̨nį hukulɔ mun Ɉeremi la. Babilonə mąą mɛ̨nį 2 'Ka mo lɔiɠaa hu, 'Ká nolo ɓo, 'ka ɉukulɔ, 'Ká mo, ká hvo ɲɔw, 'ka kɛ diɛ: Daa Babilonə hon, daa Bɛlə nwumɛ̨, Mardukə aa too, daa nwɔ haliɠaai ɓɛlɛkpɛɛ diɛ. Daa nwɔ halii mąąnįnįnŋaa hukala. 3 Gaa tii, ɲələi pələ, nu huwu ta kaa woloi mą, yɛ nwɔ lɔi mąą pənə a lɔi pun. Nu kan-nwoo huwɔ-oo. Gəlee daa pu, hɛn da hvo lɛɛ li laa. 4 Yai-Laa woo ka, yɛ diɛ: Voloi tii, nąąlɔwai kpɔ́ɔ́ kpɔɔ, Israɛlə nuą da Ɉuda nuą, di kaa pai a gee, di kaa pai, diɛ wɔlɔ, diɛ Yai-Laa kwɛli, yai a di wɔ Yálái. 5 Bələi a li Siɔn, di ka mąą mąąni kɛ kɛi, ɛlɛɛ, Siɔn pɔ pələ ɓə di ɲɛ̨i tinɛ̨nŋaa la. Di kaa pai, da Yai-Laa ni, di tɔɔi ə kɛ tɔ̨nɔ̨, diɛ mįnɛ̨ həɠə a yələ kəlee mɛ̨nį. Di hva kɛa lɛ̨ą mą, a yələ ta. 6 Nwɔ́ nuąi di kɛ kɛa yɛ, ɓɛlaaɠaai daa lan, di laa hɔn mo nuą daa kɛ di həɠə bələ mɛ̨i, diɛ li a diɛ di nwun ma, yeeɠaa ɓa, da həɠə yee yii mɛ̨i, də li yee kpukpu yii mɛ̨i, di pɛlɛ kili hvo kɛa di ŋą gála hu. 7 Nui lɔpee kɛi kwiɛn a diɛ, ə kɛi di mį́i, di yówóɠaa di kɛi kɛ diɛ: «Ku hvo nɛ̨ŋɛ̨n ɉəɠə li, mąąhɔlɔɓo, di nɛ̨ŋɛ̨n ɉəɠə Yai-Laa ɓa, tələnmoi da di nąnni di kilitɔɔi kɛ mą: ya ɓaa kɛ a Yai-Laa» 8 'Ka kulɔ Babilonə, Kalde lɔi hu. 'Ka kulɔ, ka kɛ yɛ, boli hilɛɠaa da kɛ taatɛlɛɛ kpulu tɔwɔ. 9 A tɛ̨ą, gáá pai ɲələi pələ lɔi kpɛa kpɛaɠaa yee lɔi gee hu, di pɛlɛ Babilonə ɓa a kɔ́, di kaa pai woloi mą, a kɛ a ɉonŋaa di yəi. Di wɔ tonwąɠaai kaa yɛ kɔ́kuláái kɔ́ aa nɛ̨ɛ̨ mą, hva pənə hvo pa a ɲee howolo. 10 Kalde lɔi aa kɛ a kɔ́ hon, nuąi kpɔ too mɛ̨i, gəlee kaa pilɛi, Yai-Laa woo li. 11 Gaa tii! 'Ka kwəinɛ̨ɛ̨ kulɔ! 'Ka hɛli pu, kaai a gwɛlin ɉu kala nuą. 'Ka pili yələi, yɛ nįŋɛ̨ lonnii da kɛ kala tiliin ɉu. 'Ka tomą yɛ hoo hilɛɠaa. 12 Nwumɛ̨ aa ka lee ɲɛ̨i paa, nɛ̨ɛ̨nui ŋɛ̨i ka kaai, nwumɛ̨ aa tɛ ma, lɔiɠaa lɔwai, aa kɛ a nɛɛ bulu, aa kɛ a: lɔi pun, ɉu kpalaa, a lɔi kpoloon. 13 Yai-Laa nwɔ liiholi aa gɛ, nu ta hvo kɛa ɉu, nąą kəlee aa lɛɛ a lɔi pun. Nui lɔpee a tɛɛ Babilonə kwɛlɛ, gwəi a pili mą. Da gɛɛ kala pələi tii kaa, da tomą a ɲɔw 14 'Ka tɔɔ a ka yɛli, ka kɔ́ pɛlɛ Babilonə ɓa. Kilɛn bili nuą, 'ka mǫn, 'ka hvo donwą ta lɛɛ ka yee pulu, mąąhɔlɔɓo, Babilonə aa ɉɔn gɛ a Yai-Laa. 15 'Ka tomą mɛ̨i gwɛlɛ kəlee, aa pɛlɛ, 'Ka ɉon. Mąąkɔ̨nwɔ̨ pɛlɛ́ɠaa daa wolo, mąąkpɛɛ hįiɠaa daa pu, Yai-Laa ka tii nwąną kulɔi. 'Ka ka nwąną kulɔ mą, 'Ka naa mą, yɛ bələi ə naa la kaa. 16 Ɉihɛn ɉuwu pili nuą kəlee, nui lɔpee wɛlɛɛ mɔ̨nun dee ɓɔwa lon pənə ɲee ŋą, a mɔ̨nun dee yələ, 'ká gəlee kulɔ Babilonə. 'Káá kɔ́ kɔ́ ɓɔwa kpəɠiɛɠaa kaa! Nu kəlee ə li nwɔ nuą pɔ, nu kəlee ə pu, ə li gaa lɔi hu. Israɛlə mąą mɛ̨nį 17 Israɛlə ə kɛ a ɓɛlaa haa lɛɛ gbɔwɔ ɓa, yalaɠaa hvilɛn ŋąą kɛ bulu, diɛ gbɛ. Asiri tɔɔmun aa gbɛa kɛ naa pɛlɛ mą, yili pulu, Babilonə tɔɔmun Nabukodonosorə ə gbəli mį́i kpɔ, ə ɉəli gɔw ɓa. 18 Yili mąą mɛ̨nį ɓa, Yai-Laa Mɛ̨nį Kəlee ŋą Hééɓomun, Israɛlə nwɔ Yálái yɛ diɛ: Gáá heei Babilonə tɔɔmun ɉu, da nwɔ lɔi, yɛ bələi ŋį́ hee la Asiri tɔɔmun ɉu. 19 Gáá pai pənəi ŋį́ pa a Israɛlə, naa mį́i lɔi pɔlɔ pɔlɔ ɓa, gaa pai naa mįi Karmɛlə da Basan yeeɠaa nwuɔ̨, ɛlɛɛ, yɛ pulu kulɔ ma Ɛfraimə da Galaadə yeeɠaa nwuɔ̨. 20 Nąąlɔwai, ɲələ lee lee tii, di kaa pai kɛi di ɲɛ̨i laai a Israɛlə nwɔ túwɔ́ pələ ɲɔ̨n, di hva kɛa gaa, da Ɉuda nwɔ nɛ̨ŋɛ̨nŋaai, di hva kɛa di kaa; Mąąhɔlɔɓo, nuą gbəliɠai da lɛɛ yɛnɛ̨ɛ̨, ŋą di mąąhvaalɛɛ, Ɲą́ą́ Yai-Laa nwóó li! Babilonə 21 'Wolo Maratimə lɔi ɓa a kɔ́, 'wolo da Pekɔdə nuą diɛ, 'di paa, nu gbəlii a lɛɛ, 'gulɔ mą́ą́ a haláá, 'gɛ kpɔlɔɔ yɛ bələi gáá ə́ tíi la. Ɲą́ą́ Yai-Laa nwóó li! 22 Kɔ mɛ̨i tín gaa tɔɔi nɔi, da paa ɓo kɛnɛ̨ kɛ tin. 23 Ee kə! Daa lɔi kəlee nwɔ taŋą kɔ́w hu ɓuwɔ, daa vunwɔhunwɔ, Babilonə aa kɛ a lɔi pun lɔiɠaa lɔwai. 24 Ŋą́ hɛlɛn dɛ ə́ tɔwɔ Babilonə, ya ka yaa gɔ́ la ə́ tɛɠii, ə́ mąą kali aa ɓo, daa ə́ kaa, daa ə́ hon, mąąhɔlɔɓo, ə́ tɔɔ, yɛ́ kɔ́ pɛlɛ Yai-Laa ɓa. 25 Yai-Laa aa nwɔ kɔ́ kɔ́ kwɛli hɛnŋaa pu pɛlɛ laa ɓo, gaa nwąną kulɔ kwɛli hɛnŋaa həɠəi, Nąmu Yai-Laa Mɛ̨nį Kəlee ŋą Hééɓomun ka tii lii Kalde lɔi hu, 26 'Ka həɠə lɔi kpon ɉeei ka pa, 'ka pa bɔ, 'ka nwɔ kɔ̨nɔ̨n gələɠaai laa ɓo, 'ka bu gee mɛ̨i, 'ka naa həli Yai-Laa ɓa. 'Ka hvo da lɔpee lɛɛ pulu. 27 'Ka Nįŋɛ̨ gbɔnŋaa kəlee paa, 'ka li a diɛ Nįŋɛ̨ paai. Aa kɛ a mɔ̨nɔ̨ aa laa diɛ, di wɛi ɲələ aa həli. Ɲələi da di nwąną kulɔ la diɛ, ɲələ li. Israɛlə mąą mɛ̨nį 28 'Ka ka wəli tɔɔ! Pu nuą, da nu kpəlii aa lɛɛ, daa həɠə Babilonə lɔi hu pələ, Di kaa pai wɛlɛɛ ɓoi Siɔn ya ɓaa: Yai-Laa gu wɔ Yálái nwąną kulɔ mɛ̨nį, Yálá hee pɛlɛ́ nwąną kulɔ mɛ̨nį. 29 'Ka kilɛn bili nuą kəlee ɲąątɔɔ Babilonə ɓa, 'Ka mąą tinɛ̨n a kɔlaɠaɠaa ka doo gee hu, nui lɔpee ta hvo kulɔ a ka yee wolo. Bələi ə túwɔ́ la, ka gwələ kulɔ mą. 'Ka naa mą, yɛ bələi ə gɛ la. Ə tɛɠɛɓoɉu laa kulɔ a Yai-Laa, a Israɛlə nwɔ Yálá mąąhəɠɛɛ. 30 «Yili mąą mɛ̨nį ɓə gɛi háákələi, nwɔ kɔkulaa laŋąą kaa tooi ɲəi gwəli hąąiɠaa, nwɔ kɔ́kulááɠaa kəlee mɛ̨i aa haa.» Ɲą́ą́ Yai-Laa nwóó li! 31 Yɛ́ ɓə vílɛn ŋąą ə́ pulu, tɛɠɛɓoɉu mun. Ə́ wɔɔ yələi aa həli, a nwą́ną kulɔ yələ. Ɲą́ą́ Nąmu Yai-Laa Mɛ̨nį Kəlee ŋą Hééɓomun nwóó li! 32 Tɛɠɛɓoɉu aa kalin aa too, nu ta hvo muhəɠəi. Ŋą́ą́ nwɔ̨n bili nwɔ taaɠaai hu, nwɔ̨n gaa gwɛlɛɠaa kəlee kələn ɉii. Yai-Laa Israɛlə ɓalo Yálá 33 Yai-Laa Mɛ̨nį Kəlee ŋą Hééɓomun nwoo ka, yɛ diɛ: Di kaa Israɛlə lonnii da Ɉuda nuą mɔ̨nɔ̨ ɓoi, di mɔ̨nɔ̨ ɓo nuą daa di hon, di hvo bɔ di hvo ɓo diɛ, 34 Kɛlaa, Israɛlə mąąkɔ̨nwɔ̨ mun vaŋa kɛnɛ̨i; di mąąkɔ̨nwɔ̨ mun tii laa ɓaa: Yai-Laa Mɛ̨nį Kəlee ŋą Hééɓomun. Ya ɓə a di mąą mɛ̨nį ɲɛ̨i kulɔ, yɛ liilaa hee nɔi tin-tin; ɛlɛɛ, yɛ Babilonə nuą hu kpɛlin. Babilonə 35 Yai-Laa woo ka, yɛ diɛ: Kɔ kɔ́ ɓɔwa kaa Kalde nuą hu hɛɓɛ́-hɛɓɛ́i, ə mą kɛ Babilonə nuą da di ɲɛ̨itɔwɔ nuą, bɛlɛɛ nwɔ mɛ̨nį kɔ́lɔn nuą diɛ. 36 Kɔ kɔ́ ɓɔwa, 'hee dɔlikpɛ nuą hu, di kaa a nu kpoloonŋaa. Kɔ kɔ́ ɓɔwa, 'hee gɔkulaaɠaa hu, di kaa tooi. 37 Gɔ kɔ́ ɓɔwa ə hee ɉooɠaa hu, da nwotoloɠaa, da nu hviikpɛɠaa kpɔ tii nįnįn mu, da kɛ yɛ nɛ̨ąą. Gɔ kɔ́ ɓɔwa ə hee gɔ́ kɔ́ hɛnŋaa pui, daa too ɉu. 38 Gɔ kɔ́ ɓɔwa, ə hee nwɔ yaɠaai hu, daa kpala. Mąąhɔlɔɓo, aa lɛɛ a mąąnįnįn ɉaɠaa lɔi, a nu mąąnįnįn ɉaɠaaɠaai daa di kili kulɔ di yəi. 39 Yili mąą mɛ̨nį ɓa, ɓilihiɠaa daa hee laa nąą aa lɛɛ a yalaɠaa pɛlɛi, nwɛ̨nįɠaa diɛ di taa tɔɔ laa. Nu hva kɛa hee laa. Nąą a lɛɛ a lɔi pun, əlɛɛɉu, yɛnɛ̨ɛ̨ ŋąą ə kpɛɛ la. 40 Gɛ pələ kaa kɛi kpɔlɔɔ yɛ bələi ə kɛ la a Sodomə da Gomorə taaɠaa, da di kwɛlɛ taaɠaa. Nui lɔpee ta hva kɛa hee laa, nu kan da hva kpɛli kɛa vįitɔɔlaa Ɲą́ą́ Yai-Laa Nwóó li! 41 Nu huwu ta kaa həɠəi ɲələi pələ, gaa a lɔi kɛnɛ̨ da tɔɔɓɛlaa tamąą, daa di muhəɠə, di həɠə kpɔ lɔi kpon ɉeei pələ. 42 Daa kilɛn, da kpalaɠaa həɠə, di kili walawalaa, di hva nu ɲɛ̨imąąwɛli kaa. Di tín gaa yɛ gboloyá huluun dín, di kaa hoo mɛ̨i, daa hvólóon a di yɛli, yɛ kɔlaɠa, di kaa pai kɔ́ pɛlɛi yɛ́ Babilonə. 43 Babilonə tɔɔmun aa bələ mɛ̨n, vii aa kpɛɛ kpɔ kɛnɛ̨, niikələn ŋąą gwəi, yɛ nɛ̨ɛ̨nui kwəi nwąną kɛi nwɔ mɔ̨nɔ̨. 44 «Bələi lɔ yala a kulɔ la Ɉurdɛn kpomó hu, yɛ tɛ taatɛlɛɛ kwənąnŋaa hu, ɓɛi taatɛlɛɛ kaa laa a yələ kəlee, bələ lɔ ɓə gáá pai kulɔi la Babilonə nuą tɛɠii, gɛ́ laŋą kɔ́kulááɠaa ɲąątɔɔ diɛ, Mąąhɔlɔɓo, gbɛɛ ɓə gaa yɛ Ɲą́ą́? Gbɛɛ ɓə a pɛli də́lii kiti haɠa ɓa? Taatɛlɛɛ mɛ̨i kaa mun nɛlɛ ɓə a pɛli tɔɔi ná?.» 45 Mɛ̨nįi nwɔ̨nɔ̨ Yai-Laa aa mąą kili tee gwəi, yɛ hvilɛn na Babilonə ɓa, ka ka wəli tɔɔ nwɔ̨nɔ̨ mą; aa mɛ̨nįɠaa mąą nwun dɔɔ kɛ, yɛ hvilɛn na Kalde ɓa, daatɛlɛɛ kpulu lɔwai, ə mą kɛ, yiiɠaa di pɛlɛɛ-pɛlɛɛ, di kaa pai kɛi di yalai, yili hva ɉəɠə mą. Gaa pai kɛi di wɔ lɔi huwoloi, di hɔn ma, yili hvo pai ɉəɠəi mą. 46 Babilonə tɔɔmun too tín gaa pai lɔi kpɛlin ɉii. Doma woo yɛ tɔɔ lɔiɠaa hu. |