Ɉeremi 46 - Yálá laawoo hɛɓɛ (dc)

¹ Yálá kwəi mɛ̨nį hukulɔ mun Ɉeremi, Yai-Laa ə mɛ̨nį ɓo mą, yɛ hvilɛn na yɛnɛ̨ɛ̨ lɔiɠaa diɛ.

Kɔ ə kala Eziptə nuą diɛ Karkemisə

² Yii hvilɛn na Eziptə ɓa, nwɛi ka: Eziptə tɔɔmun Neko nwɔ kɔlaɠai ŋɛ̨i kɛ Eufratə ya kɛnɛ̨ kwɛlɛ Karkemisə taa tənən ma, ɓɛlɔwai Babilonə tɔɔmun Nabukodonosorə ə ɉon na kɔ́ hu, ə kɛ a Ɉuda tɔɔmun Yoyakimə, Ɉosiasə lon nwɔ tɔɔlaa gwɛlan nąąn nɔwai.

³ «'Ká donwą-taɠa həɠə, 'ká ɉə́mə́ɠaa həɠə, 'ká li gɔ́ ɓa.

⁴ 'Ká ɉooɠaa hąą yili, hoo mɛ̨i nuą; 'ká tɛ ɉoo mɛ̨i. 'Ká tɔɔ a ka yɛli, 'ká mɔlɔɠaa lɔ, 'ká gbalaɠaa ɲąąli. 'Ká gɔ́ kɔ́ həɠəɠaa too.»

⁵ Lə ɓə kɛ? Ɲɔw aa pili di hu; Di kaa pui. Daa di wɔɔ huwalawala nuą paa. Nuą kaa tɛɛi a gilɛ, diɛ li, di hvo di pulu kaai! Ɲɔw aa di hon bələ kəlee. Ɲą́ą́ Yai-Laa nwóó li!

⁶ Gilɛ həɠə nuą di hva pɛli pui, huwalawala nuą di hva pɛli kulɔi ɉu. Ɲánwuɔ̨ pələ Eufratə kwɛlɛ, daa kalin, diɛ too.

⁷ Gbɛɛ gaa yɛ Nilə yá, yɛ hvɛɛ yɛ yáleeɠaa, yɛ huluun?

⁸ Eziptə ɓə gaa yɛ Nilə yá, yɛ hvɛɛ, yɛ tɛɛ yákpɛa kpɛa diɛ, ɲaɠaa diɛ huluun. Eziptə ə kɛi kɛ diɛ: «Gáá hvɛɛi, ŋą́ laa lɔi mɛ̨i, ŋą́ taaɠaa hukala, da di hu nuą.

⁹ Hooɠaa! 'Ká li kɔ́ mɛ̨i, kɔ́ kɔ́ wotoloɠaa! 'Ká li gɔ́ ɓa. Kɔkulaaɠaa! 'Ká tɛɛ tɔwɔ Nubi da Putə nuą; kaai ka wɛlɛɛ hə́mə pənə, 'ká hə́mə həɠə. Ludə nuą; kaai wɛlɛɛ kilɛn bili, 'ká həɠə.»

¹⁰ Kɛlaa volói tii, gaa a Nąmu Yai-Laa Mɛ̨nį Kəlee ŋą Hééɓomun nwąną kulɔ hvóló, yɛ nwąną kulɔ ɲowoɠaa diɛ. Kɔ kɔ́ ɓɔwa kaa paa ɓo kɛi, yɛ pilɛ, yɛ pilɛ ɲąmą hu. A tɛ̨ą Nąmu Yai-Laa Mɛ̨nį Kəlee ŋą Hééɓomun, gaa paa ɓo kɛnɛ̨ kɛi ɲánwuɔ̨ pələ Eufratə kwɛlɛ.

¹¹ 'Tɛ Galaadə lɔi hu, ə́ ə́ hali kwɛli laa, yɛ́i ɓaa Eziptə nɛ̨ɛ̨gbɛla. Nwululaa tamąąi ə́ kaa gulɔi, gaa a kpɛli-kpɛli, wululaa ta hva pɛli ə́ ɓaloi.

¹² Lɔiɠaa daa ə́ nwumɛ̨i kaa, ə́ tomą woo aa lɔi nąą kəlee kulɔ. Kɔkulaa kaa kɛlɛi kɔkulaa hu, gəlee hveelɛi diɛ too a gee.

Eziptə lɔi hon mɛ̨nį a kɔ́

¹³ Nwooi Yai-Laa ə mo gwəi mɛ̨nį hukulɔ mun Ɉeremi ɓa, ya ka, yɛ mą: Babilonə tɔɔmun Nabukodonosorə kaa pai pai, ə Eziptə lɔi kɛlɛ:

¹⁴ 'Ká mɛ̨nįi tii laa həli Eziptə lɔi ɓa, 'ká noloɓo Migdolə, 'ká noloɓo Mɛmfisə da Dafne; kaa mą: 'Haŋąn ə́ tɔɔ, ə́ ə́ kpɔɔ pɛli, mąąhɔlɔɓo, kɔ́ kɔ́ ɓɔwa kaa kɛɛ kalai ə́ kwɛlɛ nąą kəlee.

¹⁵ Kwə! Pu ɓə tii Apisə kaa moi! Ə́ wɔ nįŋɛ̨ hilɛi hvo tɔɔ li? Yai-Laa aa bili,

¹⁶ Aa hviɛn gbɔ kɛnɛ̨, nuą kpɛli mąn, di kaa tooi di kee mɛ̨i. Diɛ kɛ di kee ni diɛ: «'Ká gu gu muhəɠə, 'ká gwə li gu wɔ nuą pɔ, ka gwə li gu kaa lɔi hu. Gu gu mąą kwɛa gɔ́ kɔ́ ɓɔwa kpəɠiɛɠaa ŋɛ̨i diɛ.»

¹⁷ Ka Eziptə tɔɔmun laa mɛ̨i hee kaa mą: «Ɉu woo lɔ ɓə gɛnɛ̨.»

¹⁸ Akɛ kpɔ gáá a vulú, dɔɔmun da kɛ mą: Yai-Laa Mɛ̨nį Kəlee ŋą Hééɓomun nwoo li! Gáá pai yɛ bələi Tabɔrə yee kaa la yeeɠaa lɔwai, yɛ bələi Karmɛlə yee hɛlɛn ŋąą la gboloyá mɛ̨i.

¹⁹ Eziptə lɔi hu nuą, 'Ka ká tiɛ̨ pɛli ka mąąkilɛ mɛ̨nį ɓa. Mɛmfisə kaa pai lɛɛi a lɔi mąąwɛliɛ, a taa kələn, nu hvo ɉu.

²⁰ Nįŋɛ̨ haa gbɔn nɛlɛɛ ɓaa Eziptə, kɛlaa, vɔnŋaa daa həɠə ɲələi pələ, diɛ pa mɛ̨i.

²¹ Ə mą kɛ, gɔ́kulááɠaai da di ya, nwɔ lɔi hu, di kaa yɛ Nįŋɛ̨ hilɛ gbɔnŋaa, kɔ̨nɔ̨n nɔ ɓə da mį́i; diɛ kpɛli mąn, daa yali di pulu, di kaa pui. Di hvo pɛli li gɔ́ mu, di nwun na pili yələ aa həli diɛ; a ɲələi mąąnɛ̨ɛ̨ di di woo hukulɔ la.

²² Ka ká wəli tɔɔ, gaa yɛ kaalə pa tin aa kɛi tɔɔ. Di kaa pai a di kpulu kɛnɛ̨, di kaa pai, yowaɠaa di ɓo di yəi, yɛ wulu pɔn nuą.

²³ Yai-Laa yɛ diɛ: Ka nwɔ wəlaɠaai pɔn, ə mą kɛ nu hva pɛli lɔi ɉu. Di kpulu kɛnɛ̨ pələ, lono hvo diɛ.

²⁴ Nwumɛ̨ aa Eziptə nwɔ lɛlɛ ɲɛ̨i paa, aa too yələi pələ nuą yee ɲą.

²⁵ Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ diɛ: Gáá pai heei Tɛbɛsə taa nwɔ halii Amɔn hu, ŋą́ hee Eziptə tɔɔmun ɉu da nwɔ haliɠaa, da nwɔ tɔɔɓɛlaa. Tɔɔmun da nwɔ nuą kpɔ kɛ di kilitɔɔ mą.

²⁶ Nuą kpɔ di hvilɛn ŋąą di pulu, gáá di tɛɛi di pɔ, diɛi ɓaa Babilonə tɔɔmun Nabukodonosorə da nwɔ nuą. Yili pulu, Eziptə lɔi a pənə ə hee, yɛ bələi ə kɛ la a bɔlɔ pɔlɔ.

²⁷ Kɛlaa, ə́ wɛi, Ɉakɔbə, yɛ́i ɓaa nwɔ́ tímun, hvo ɲɔw. Ə́ hu hvo pu yɛ́ Israɛlə, gáá pai ə́ kulɔi kwɛaa la lɔiɠaa yəi, ŋą́ ə́ huwu kulɔ mąąkilɛ lɔi hu. Ɉakɔbə kaa pənəi yɛ pa liilaa hu, nwəli pulu laɠiɛ; nu ta hvo kɛa viikpɛɛi.

²⁸ Nwɔ́ tímun Ɉakɔbə, hvo ɲɔw. Ɲą́ą́ Yai-Laa nwóó li! Hvó ɲɔw, gáá ə́ pɔ. Nɔiɠaa kpɔ tii ŋį́ ə́ huwu taɠa taɠa ɉu, gáá gəlee hukalai. Kɛlaa, ə́ wɛi, və́ ə́ hukalai. Gáá ə́ mąąkwɛlii, yɛ́ lɛɛ tɔ́n nwoo mu. Kɛlaa, və́ ə́ hɔn da lɛɛi laa kpɛli kpɛli.