Ɉeremi 44 - Yálá laawoo hɛɓɛ (dc)

Ɉuifəɠaa tii pu diɛ li Eziptə lɔi hu mɛ̨nįi pai laai diɛ

¹ Mɛ̨nįi di mo Ɉeremi ɓa, yɛ hvilɛn na Ɉuda lɔi hu nuą kpɔ tii li heei Eziptə lɔi hu; Migdolə, Dafne, Mɛmfisə, da Patrɔsə lɔi hu, ya ka:

² «Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka: Mɛ̨ni ɲąąnwąnąąɠaai ŋą́ naa Ɉerusalɛmə taa da Ɉuda taaɠaa diɛ, ka di kɔ́lɔn, daa lɛɛ kɛa a lɔi pun, nu hvo laa.

³ Nɛ̨ŋɛ̨nŋaa di kɛi ɉəɠə mąą mɛ̨nį ɓa, di nwą́ną lɔ a ɉaláái di kɛi gulɔ haliɠaa diɛ, diɛ di mąąwiɛ. Ya pa, ɉaliɠaa tii di hvo ta kɛ di ta mąą mɛ̨nį ɲɛ̨i kulɔ li; diɛ mąn, ə mą kɛ, di kalani pɔlɔɠaa.

⁴ Vį́į́ hvo kɛi kpɛɛ nwɔ́ tínuą, da gwə́i mɛ̨nį hukulɔ nuą tɛɛi, diɛ kɛ kaa: Mɛ̨nįi nwɛli hvo mą́ą́, 'ká hvo di kɛ.

⁵ 'Ká hvo ká wəli tɔɔ li, ká hvo mɛ̨n, əgɛ, ka ka pulu tɔɔ ka wɔ kiliŋąhiɛ ɲɔ̨nŋaa tii diɛ, a ka kpɛla mɛ̨nį haláá kulaa ɓa haliɠaa diɛ.

⁶ Yili ɓə gɛ, gɛ́ nííholi di pɔ, a kɛɛ kala pələ, gɛ́ Ɉuda taaɠaa hukala da Ɉerusalɛmə kwəliɠaa, daa lɛɛ a taa kpoloon, a lɔi pun, yɛ bələi di kaa la háákələi!

⁷ «Yii hu, ə həli kɛa kaa! Yai-Laa Mɛ̨nį Kəlee ŋą Hééɓomun Yálá, Israɛlə nwɔ Yálá woo ka, yɛ diɛ: Lə ɓə kɛ, yaai, ka káá mɔ̨nɔ̨ taaləi tii lɔi ka kpɔɔ pɔ? Diɛ ka kəlee ka paa Ɉuda lɔi hu; ɉinąą mąn, nɛ̨ą mąn, nɛapɛlɛɛ da non gaa nįnɛ̨ɠaa? Ka kpəli logolo kpɛli hva lɛɛ!

⁸ Ka káá nwą́ną lɔi a ka túwɔ́ pələ, kaa halááɠaa kulɔ haliɠaa diɛ Eziptə lɔi hu, ɓɛi ka pa lɔ ka mąąkilɛi laa! Ka káá pai ka huwu kpɛɛi yɛnɛ̨ɛ̨, diɛ nɛ̨ŋɛ̨n naa huwu lɔpee gəlee gɔɔmąą həɠə ka mɛ̨i da lalan yɛnɛ̨ɛ̨ lɔiɠaa kəlee hu.

⁹ Akɛti, káá mɔ̨ɔ̨ lɛ̨ą ka nąnni di wɔ túwɔ́ pələ ɲɔ̨nŋaai diɛ, da Ɉuda tɔɔɓɛlaa di wɛiɠaa, bɛlɛɛ ka wɛiɠaa diɛ da ka nɛ̨ąni di wɛi? A nɛ̨ŋɛ̨nŋaai ka kɛi ɉəɠə Ɉuda lɔi hu da Ɉerusalɛmə gwəliɠaa hu?

¹⁰ Háá ɓa háá, ka hvo ni ka hɔn mąąhvalin ni, ka hva ɲɔw, mąąwiɛ hvo ka yəi, ka hvo hvilɛn na nwɔ́ tɔ́nŋaa da bɔ liɛwooɠaai ŋį́ dɛɛ ka nąnni pɔ di pulu, ká hvo hiɛ la.»

¹¹ «Yili mąą mɛ̨nį ɓa, Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ diɛ: Gáá pai heei ka hu, gɛ́ ka mɔ̨nɔ̨ ɓo, ɛlɛɛ, gɛ́ ka huwu kpɛɛ Ɉuda lɔi kəlee hu.

¹² Ɉuda nuą gbəli woloi tii ɉaŋan a Eziptə lɔi hu pələ, diɛ li di mąąkilɛi, gáá hvilɛn ɉii gəlee pulu, di kəlee di kaa pai haai Eziptə lɔi hu, nąą ɓə di kaa lɛɛi laa tooni, a kɔ́ kɔ́ ɓɔwa laa pɔɔ, diɛ haa a pulu. Kɔ́ da pulu ɓə pai di paai. Gbɛa-kpɛaa da bɛlɛɛ-pɛlɛɛ mąn, di kaa pai kɛi a mąąwɛli nuą, nuą diɛ di kwɛla a di laa, diɛ lalan bili, diɛ nɛ̨ŋɛ̨n naa kɛ a di laa.

¹³ Nuąi li Eziptə lɔi hu, gáá mɔ̨nɔ̨ laa di mɛ̨i, yɛ bələi ŋį́ naa laa Ɉerusalɛmə ɓa a kɔ́ da pulu, ə mą kɛ, nu paa ɲɔ̨n.

¹⁴ Nuą mąn lɛɛ Ɉuda lɔi hu, nuą di kaa Eziptə lɔi hu di mąąkilɛ pələi, da hvo pai kulɔi ɉu, di ta hvo pai lɛɛi, di ta hvo pai pənəi hvo li Ɉuda lɔi hu, di kili kaa ni di pulu pənə mɛ̨nį ɓa di pa di hee di pɔɔli. Kɛlaa, di hva pənə di hvo li laa. Nu kpulu wolo tiikpə lɔ ɓə pai kulɔi ɉu.»

¹⁵ Kɛlaa, ɉinąąi tii kɛ gbaɠala kɔ́lɔn, diɛ kɛ di nɛ̨ąni da kɛ haláá kulɔi haliɠaa diɛ, ə mą kɛ, da nɛ̨ąąi tii kɛ laa ɲąąkpɔn gɛnɛ̨ hu, nuąi kpɔ tii pa heei Eziptə, Patrɔsə lɔi hu, di Ɉeremi woo pulu pənə diɛ mą:

¹⁶ «Bələi mąn ə́ kaa yili ɓoi la tii ku wɔ Yai-Laa laa hu, ku hvo ku wəli tɔɔi mą.

¹⁷ Bələi gaa la ku kwəi, bələ ɓə ku kaa gɛi la. Ku kaa haláá kulɔi yələkɔlɔn ɉu tɔɔ-nɛ̨ɛ̨nui ɓa, kuɔ gɔ́ a lɔɔ, yɛ bələi ku kɛi gɛ la Ɉuda taaɠaa hu da Ɉerusalɛmə daai; kuɔ-o, ku nąnni-o, kuɔ tɔɔɓɛlaai-o, da ku ɲɛ̨itɔwɔ nuą, gɛi ku kɛi mo tii, ku kɛ ku nɛ̨ɛ̨ hu, ku hvo kɛi ɲɔ̨nwɔ̨ɔ̨ kaa.

¹⁸ Ə həɠə ɲələi ku kpɛla la yələkɔlɔn ɉu tɔɔ-nɛ̨ɛ̨nu tii kɔ́ɔ ɓa a lɔɔ, da wulɔ, da haláá hɛn, ku yəi aa kpɛɛ mɛ̨nį kəlee hu, kuɔ haa kɔ́ hu, pulu yɛ ku paa.»

¹⁹ Nɛ̨ąą di di wɛi laa na diɛ mą: «Kwa kɛi haláá kulɔ yələkɔlɔn ɉu tɔɔ-nɛ̨ɛ̨nui ɓa, kuɔ gɔ́ a lɔɔ da wulɔ, kuɔ kɔ̨nɔ̨n ɲili mą, yɛ bələi da gɛ la haliɠaa diɛ, ku hilɛni yee hva mɔ̨ɔ̨ kɛ ɉu?»

²⁰ Nąąlɔwai Ɉeremi yɛ nɔi nuą kəlee diɛ, ɉinąą mąn, nɛ̨ąą mąn, diɛ kpɔ nwoo pulu pənə pələ kɛ tii, yɛ diɛ:

²¹ «Ɉalááɠaa ka kɛi gulɔ Ɉuda taaɠaa hu, da Ɉerusalɛmə kwəliɠaa pɔ, kaa, ka kálaɓɔlɔni, ka wɔ tɔɔɓɛlaa, ka ɲɛ̨itɔwɔ nuą, da nɔi nąmįną kəlee, kɛlɛi yili ɓə a giliŋąhiɛ mą, yɛ yali niiɓa-ee?

²² Yai-Laa hva kɛa kɛ pɛli niilaai ka túwɔ́ pələ ɲɔ̨nŋaa tii mu, da ka wɔ nwuɔ̨ mɛ̨nįɠaa, kɛlɛi yili ɓə aa ka wɔ lɔi lɛɛ a lɔi pun, a lɔi kpoloon mąąwɛliɛ, aa kɛ a nɛ̨ŋɛ̨n naa hɛn, nui lɔpee ta hvo nɔi, bələ ɓə gaa la yiihu.

²³ Ɉalááɠaa tii ka kɛi gulɔi, da ka hɔn tii ka gɛ a Yai-Laa, a gɛ mɛ̨nį ka hvo nwoo mɛ̨n ni, ka hvo lɛɛ nwɔ tɔ́n nwoo pulu, da nwɔ tíɓoɠaa, da mɛ̨nįɠaa ə naa ka nwuɔ̨, kɛlɛi yili ɓə gɛ, mɔ̨nɔ̨ yɛ laa kaa, yɛ bələi gaa la yiihu-ee?»

²⁴ Yili pulu, Ɉeremi yɛ nuą kəlee da nɛ̨ą kəlee diɛ: «Ka ká wəli tɔɔ Yai-Laa woo ɓa, kaai a Ɉuda nɔi nuą, kaa ŋɛ̨i pa ɓɛ Eziptə lɔi hu,

²⁵ Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ: ‹Kaai ɓaa nɛ̨ąą, mɛ̨nįi gáá moi, gɛ hiɛ li! Kaa ɓə kɛ mą: mɛ̨nįi gaa ku kwəi ya ɓə ku kaa gɛi, ku kaa haláá kulɔi yələkɔlɔn ɉu tɔɔ-nɛ̨ɛ̨nu ɓa, kuɔ gɔ́ a lɔɔ da wulɔ.› Ka lɛɛ ka woo pulu, kaa nɔɔ da nwulɔ di pu.

²⁶ Ə həli kɛa kaa! Ka ká wəli tɔɔ Yai-Laa woo ɓa, kaai a Ɉuda nuą, kaa ŋɛ̨i pa heei Eziptə lɔi hu. Gáá gwɛ́lai a náá mąąwia! Ɲą́ą́ Yai-Laa nwóó li! Gɛ́ diɛ: Náá hvo kɛa pai kɛi Eziptə lɔi hu Ɉuda mun da lɔpee la, yɛ kɛ diɛ: ‹Yai-Laa ɓə mo!›

²⁷ Gáá ɲɛ̨i ɲɔ̨nwɔ̨ɔ̨ heei káá, gɛ́ ká mɔ̨nɔ̨ ɓo. Ɉuda nuąi heeni Eziptə lɔi hu, di kaa pai haai a kɔ́ da pulu, əlɛɛɉu, gəlee di kpɛɛ.

²⁸ Nu tɛitɛi kaa pai kulɔi gɔi tii hu, di lɛɛ a di hvulú də li Ɉuda lɔi hu. Akɛ kɛa tii, diɛ mąn, ɲą́ą́ mąn, nui tɛ̨ą kaa bɔ da gɔlɔn.

²⁹ Ɲą́ą́ Yai-Laa nwóó ka, ɉɛn ka káá pai gɔlɔn ɉii la, kaa gáá pai mɛ̨nį laai káá, nwóó tii ŋą́ mo bɔ mɛ̨nį kaa kɛi, ya ka:

³⁰ Ɲą́ą́ Yai-Laa nwóó li, gɛ́ diɛ: Gáá Eziptə tɔɔmun Hofra kwɛlɛi ɲowoɠaa diɛ, ɲowoɠaai diɛ di baa; yɛ bələi ŋą́ gɛ la a Ɉuda tɔɔmun Sedesiasə. Ŋą́ gwɛlɛ ɲowo Babilonə tɔɔmun Nabukodonosorə ɓa, yii kɛi gwɛli baa mɛ̨nį ɓa.»