Ɉeremi 39 - Yálá laawoo hɛɓɛ (dc)

Di Ɉerusalɛmə hon Mɛ̨nįi tɛɛ Ɉerusalɛmə honŋaa pulu, ya ka:

¹ Ɉuda tɔɔmun Sedesiasə nwɔ tɔɔlaa gwelan mɛ̨inąąn, ɲąnin bow nąą, Babilonə tɔɔmun Nabukodonosorə ə kɔ́ pɛlɛ Ɉerusalɛmə ɓa, a nwɔ kɔlaɠaɠaai kəlee. Ə daa mąątinɛ̨n a nwɔ kɔ́kuláá kpulu, ə doo gee hu.

² Sedesiasə nwɔ tɔɔlaa gwɛlan bow gɔw tanɔ̨n nąą, a ɲąnin nąąn nwɔ hvóló mɛ̨inąąn, di daa mąąkpɛ hįi wolo nąą ta;

³ Babilonə tɔɔmun nwɔ kɔ́kuláá kpɛa kpɛaɠaa di pa di hee gwəli hąą ɓɔlɔ ɓa, Nɛrgalə-Sarɛsɛrə Sin-Magirə mun, Nebu-Sarsekimə yii a dɔɔ kwəlii nuą nwun nąmu, Nɛrgalə-Sarɛsɛrə gɔ́kulááɠaa kəlee nwun nąmu, da gɔ́kuláá takpɛliɠaai tii.

⁴ Di kaai Ɉuda tɔɔmun Sedesiasə da gɔ́ kɔ́ nuą kəlee di mo, di pu di kulɔ daai kwii hąą, di tɛɛ a tɔɔmun yəi nɔw yɛa pələ, ɓɛi tii bɛlɛ́ nwąnąɠaa da di kee kaa laa gbon gwɛlɛ, di ɉaŋa a Ɉurdɛn ɲa-ɓoloon bɔ pələ.

⁵ Kɛlaa, Kalde kɔ́kulááɠaa di hvilɛn di pulu, di Sedesiasə hon Ɉeriko yɛɛkɔwɔ hu, də li la Rivla, Hamatə lɔi hu, Babilonə tɔɔmun Nabukodonosorə pɔ. Yili ə giti tee.

⁶ Babilonə tɔɔmun ə Sedesiasə lonnii nwun dee di nąn ɲɛ̨i ɓa, Rivla. Babilonə tɔɔmun ə Ɉuda nu kpɛa kpɛa kəlee nwun dee.

⁷ Yili pulu, ə Sedesiasə ɲɛ̨i wolo, ə ɲili a yɔwɔn veelɛ, yɛ li la Babilonə.

⁸ Kalde nuą di nwɔ̨n bili dɔɔ pɛlɛ́ da nu kpɛa kpɛaɠaa di wɔ pɛlɛ́ɠaai hu. Di Ɉerusalɛmə mąąkpɛ hįį pu.

⁹ Galanɉonŋaai kɛ ni daai, tɔɔmun mąąkpɛ kɔ́kulááɠaa di nwun nąmu Nebuzaradan, ə li a diɛ Babilonə, da nuąi tii kɛ daa pu, diɛ di kpɔɔ tɛɛ bɔi, da gwəli nąmįną gbəliɠaa.

¹⁰ Kɛlaa, ɲeehowolo nuąi hɛn da hvo kɛ di yɛi, di bələ tɔ̨nɔ̨ lɛɛ nɔi hu, di tííɠaa da hihɛnŋaa ɲąąkwɛlɛ diɛ.

¹¹ Ɉeremi nwɛi, Babilonə tɔɔmun Nabukodonosorə ə ɉon bələ lɛ mąąkpɛ kɔ́kulááɠaa nwun nąmu Nebuzaradan ɓa, yɛ mą:

¹² «'Ə́ ɲɛ̨i kɛ mą, mąą mɛ̨nį ɲɛ̨i kulɔ, hvó mɔ̨nɔ̨ ɓo, mɛ̨nįi a ɉu hvɛli yɛ́, gɛ́.»

¹³ Tɔɔmun mąąkpɛ kúlaaɠaa nwun nąmu Nebuzaradan da Nebusazban yai kɛ a dɔɔ kwɛlii ɲąąwooɓomun, Nɛrgalə-Sarɛsɛrə yai gaa a gɔ́ ɲɛ̨itɔwɔ mun, da Babilonə tɔɔmun nwɔ kɔ́kuláá kpɛa-kpɛa kəlee,

¹⁴ di nu ta tɔɔ yɛ li Ɉeremi təlii dɔɔ kwəli mąąkpɛ nuą yəi gwəlii. Di dɛɛ Ahikamə lon Gedaliasə yai kɛ a Safan lon bɔ. Yili yɛ mą: Yá pɛli mą ə́ li ə́ yəi bɛlɛ́n; bələ ɓə Ɉeremi ə lɛɛ la nuą lɔwai.

Ɛvɛd-Melɛkə nwun gulɔ mɛ̨nį gɔ́ hu

¹⁵ Ɓɛlɔwai Ɉeremi ə kɛ la dɔɔ kwəlii mąąkpɛ nuą yəi gwəlii gaho ŋą, Yai-Laa woo ə həli mą, yɛ mą:

¹⁶ «'Li, yɛ́ Nubi mun Ɛvɛd-Melɛkə: ‹Yai-Laa Mɛ̨nį Kəlee ŋą Hééɓomun, Israɛlə nwɔ Yálái yɛi: Gáá pai nwóóɠaa pɔ mɛ̨nį kɛi daa ŋɛ̨i ɓa, gɛ́ mɛ̨nį laa mą, nɛlɛɛ hvei, mɛ̨nįɠaai tii kaa pai kɛi ə́ ɲɛ̨i ɓa.

¹⁷ Nąąlɔwai, ŋą́ ə́ hvólóon na ɓo, hvo pai tooi nuąi tii ə́ kaa ɲɔwi diɛ, di yee ŋą; Yai-Laa woo li.

¹⁸ Hɛa hvo ɉu, gáá pai ə́ nwun mąąɓoi, ɓɔwa kwɛa hvo pai ə paai, ya ə́ kilitɔɔ mą́ą́, ə́ nwun gaa pai kulɔi ɉu. Yai-Laa woo li.›»