Ɉeremi 35 - Yálá laawoo hɛɓɛ (dc)

Mɛ̨nį Rekavə nu huwu ə gɛ

¹ Nwooi ŋɛ̨i ə həɠə Yai-Laa pɔ, yɛ həli Ɉeremi ɓa, Ɉuda tɔɔmun Ɉosiasə lon Yoyakimə nwɔ tɔɔlaa lɔwai, yɛ mą:

² «'Li Rekavə nu huwu pɔ, ə́ di təli, di lɔ Yai-Laa hee pɛlɛ́ mu, bɛlɛ kɛnɛ̨ tɔ̨nɔ̨ mu; lɔɔ tɛɛ di pɔ di gbələ»

³ Ŋą́ li ŋą́ Yaazania təli, Yimeyahu lon, da Havasinia mąnįn, da di kaayɔwɔɠaa kəlee, da di lonnii kəlee, Rekavə yəi gwəlii nuą kəlee; ŋį́ pa a diɛ Yálá hee pɛlɛ́ mu.

⁴ Yálá nwɔ nu Yigdaliahu lon Hanan lonnii yəi bɛlɛ́n, bɛlɛi tii galanɉonŋaa di wɔ pɛlɛ́i kwɛlɛ, bɛlɛ́ laaləi mun Salumə lon Maaseyahu lon nwɔ pɛlɛ́i nwun mɛ̨i pələ.

⁵ Ŋą́ mulúunŋaa laa hvɛɛ a lɔɔ, ŋį́ ɉee Rekavə yəi gwəlii nuą lííla, da lɔɔ gbamąɠaa. Gɛ́ diɛ́: «'Ká gbələ!»

⁶ Diɛ mą́ą́: «Ku hva lɔɔ kpələ, ku kalaɓɔlɔ Yonadavə, Rekavə lon ə tɔ́n naa ku mɛ̨i, yɛ kuɔ, 'ká hvo lɔɔ kpələ a yələ lɔpee ta, kaa mąn, ə mą kɛ, ka lonnii mąn.

⁷ 'Ká hvo pɛlɛ́ tɔɔ, 'ka hvo tíi kɛ, 'ka hvo ɓá wulu hin, 'ka hvo da yá. Kɛlaa, 'ka kɛ yíi həgə pɛlɛ́ɠaa mu ka yɛnɛ̨ɛ̨ kəlee hu, ya ɓə a gɛ, ká lamu nɔi ŋɛ̨i ka káá ɉu, mɛ̨i.

⁸ Niɛwooɠaai tii ku kalaɓɔlɔ Yonadavə, Rekavə lon ə gɛ kuɔ, kwa kɛ gəlee kɛi, ku hvo ta lɔɔ kpələ li; kuɔ, ku nɛ̨ąni, ku lon ɉinąą da ku lon nɛ̨ąą.

⁹ Ku hvo ta pɛlɛ́ tɔɔ li, kuɔ lɔ mu. Ku hvo ta hihɛn ɉi li a ku wɔɔ, ku hva tíi kɛ, kuɔ gɛ.

¹⁰ Kwa ku wɔ yɛnɛ̨ɛ̨ kɛ həɠə-pɛlɛ́ɠaa mu, mɛ̨nįi ku kalaɓɔlɔ Yonadavə ə ku tí la, kwa kɛ gɛi yɛlɛ tɛ-tɛ.

¹¹ Ɓɛlɔwai Babilonə tɔɔmun Nabukodonosorə ə pili la nɔi hu, ya ɓə ku kɛ la diɛ, ka gu lɔ Ɉerusalɛmə daai, ka gu pu Kalde kɔ́kulááɠaa da Aramə kɔ́kulááɠaa tɔwɔ. Yili ɓə gɛ kuɔ hee la Ɉerusalɛmə daai.»

¹² Yai-Laa ə nwooi ŋɛ̨i ɓo kɛa Ɉeremi ɓa yɛ mą:

¹³ «Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ mą: Li, yɛ́ Ɉuda nuą da Ɉerusalɛmə nuą diɛ: Ka hva pɛli kɛ ka yee heei ka mąą kwɛli woo mu, kaa ka wəli tɔɔ nwóó ɓa? Yai-Laa woo li.

¹⁴ Nɔɔ tɔ́n Rekavə lon Yonadavə ə dɔɔ nonnii diɛ, di ɉon, di hvo ta mąą kala li, di hvo ta lɔɔ kpələ li, aa lɛɛ ɉu háákələi aa həli; daa lɛɛ di kalaɓɔlɔ woo ɲą. Kɛlaa nwɛ́i, ŋą́ pələ ɓo káá, vįi hvo ta kpɛɛ li; kɛlaa, ka hva mɛ̨n. Ŋą́ túwɔ́ pələ ɓoi kaa, ka hva mɛ̨n.

¹⁵ Yələ kəlee, gwə́i mɛ̨nį hukulɔ nuą ŋɛ̨i a nwɔ́ tínuą, ŋą́ kɛi di tɔɔ ka pɔɔli, diɛ kɛ káá: ‹Nu kəlee ə ɲee kulɔ túwɔ́ pələ ɲɔ̨n ɉu, 'ká túwɔ́ a nɛlɛɛ, 'ká hvo hvilɛn haliɠaa pulu, kaa di mąąwiɛ. Ka yili kɛ tii, nɔi ŋɛ̨i ŋą́ dɛɛ ka ká nąnni ka pɔ, ka lɛɛ heeni ɉu, ka nwɛli kulɔ.› Kɛlaa, ka hvo ka wəli tɔɔ li, ka hvo nwóó mɛ̨n.

¹⁶ Yonadavə lonnii di wɛi, dɔ́n di kálaɓɔlɔ ə dɔɔ diɛ, di lɛɛ bulu; kɛlaa, nu huwui ŋɛ̨i hva nwóó mɛ̨n.»

¹⁷ Yili mąą mɛ̨nį ɓa, Yai-Laa Mɛ̨nį Kəlee ŋą Hééɓomun Yálá, Israɛlə nwɔ Yálá woo ka, yɛ diɛ: «Mɛ̨ni ɲąąnwąnąąɠaa kpɔ ŋį́ mąą kili tee gwə́i, yɛ hvilɛn na Ɉuda da Ɉerusalɛmə nuą diɛ, gáá gəlee laai diɛ. Mąąhɔlɔɓo, ŋį́ mɛ̨nį ɓo diɛ, ɛlɛɛ, di hvo mɛ̨n. Ŋą́ di təli, di hvo nwóó mu hon ni.»

¹⁸ Ɉeremi yɛ Rekavə kwəlii nuą diɛ: «Yai-Laa Mɛ̨nį Kəlee ŋą Hééɓomun, Israɛlə nwɔ Yálá nwoo ka, yɛ diɛ: Yii kpɔ ka lɛɛ ka kála ɓɔlɔ Yonadavə nwɔ tɔ́n nwooɠaa pulu, niɛwooɠaai ə gɛ kaa kaa gəlee hon, mɛ̨nįɠaa ə mo kaa, ka di pɔ túwɔ́ ɓo,

¹⁹ Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ: ‹Rekavə lon Yonadavə nwɔ nu hvo pai kpɛɛi nííla a yələ kəlee.›»