Ɉeremi 32 - Yálá laawoo hɛɓɛ (dc)Ɉeremi yɛ ə galá nwɔ tíi nwun mąąɓo 1 Ɉuda tɔɔmun Sedesiasə nwɔ tɔɔlaa gwɛlan bow nąąn ɲələ, Nabukodonosorə nwɛi bow gɔw mɛ̨ihveelɛ ɲələ li kɛ, Yai-Laa ə mɛ̨nį ɓo Ɉeremi ɓa. 2 Nąąlɔwai, Babilonə tɔɔmun nwɔ kɔlaɠaɠaa daa kɛ Ɉerusalɛmə taa mąątinɛ̨n, a kɔ́. Yálá kwəi mɛ̨nį hukulɔ mun Ɉeremi yaan, ə kɛ gaho ŋą dɔɔmun mąąkpɛ kulááɠaa pɔɔli, Ɉuda tɔɔmun ɲəi gwəlii. 3 Ɉuda tɔɔmun Sedesiasə ɓə nɔ laa. Yɛ kɛ Ɉeremi ɓa: «Lə mɛ̨nį ɓa, ə́ kaa kɛi diɛ: ‹Yai-Laa lawoo ka ŋɛ̨i gáá moi kaa, yɛ diɛ: Ɲą́ą́ Yai-Laa, gáá pai daa ŋɛ̨i lɛɛi Babilonə tɔɔmun ɲee kɔ́nma; Babilonə tɔɔmun kaa pai ɉon ɉii a kɔ́. 4 Ɉuda tɔɔmun hvo pai kulɔi Kalde kɔ́kulááɠaa yəi, di kaa pai dɛɛi Babilonə tɔɔmun bɔ, da yaa diɛ pələ́ pili di kee ɓa nu ta hva kɛ di lɔwai. 5 Babilonə tɔɔmun gaa pai lii a Sedesiasə Babilonə, nąą ɓə gaa pai lɛɛi laa, əlɛɛɉu, ŋą́ mąą mɛ̨nį ɲɛ̨i kulɔ. Ɲą́ą́ Yai-Laa nwóó li! Ka mąn pa kɛ ka káá tɔɔi Kalde nuą la, ka yee hvo pai lɔi.›» 6 Mɛ̨nįi Ɉeremi ə mo ya ka, yɛ mą: «Yai-Laa ə mo mą́ą́, yɛ mą́ą́: 7 Ə́ kálá Salumə lon Hanameɛlə kaa pai pai, yɛ kɛ yɛ́: ‹Nwɔ́ tíi tii Anatotə, ɲá. Mąąhɔlɔɓo, bələi ɉɛnŋaa nwun mąąɓo tɔ́n gaa la gu yíi pələ hu, yɛ́ ɓə mąąnɛ̨ɛ̨ ə́ ɲa.›» 8 Bələi kpɔlɔɔ tii Yai-Laa ə mo la mą́ą́, bələ lɔ ɓə ə kɛ la; gálá lon ə pa, ə həli mą́ą́ tɔɔmun mą́ą́kpɛ kulááɠaa yəi gwəlii, yɛ mą́ą́: «Nwɔ́ tíi tii Anatotə, Bɛnɉamɛn nwɔ lɔi hu, ɲá. Mąąhɔlɔɓo, gu kaa bələ hu, da ɉɛnŋaa nwun mąąɓo tɔ́n nąą pələ, yɛ́ ɓə mąąnɛ̨ɛ̨ ə lɛɛ ə́ yəi, yili ɓa, ɲa kani. Ŋą́ gɔlɔn gɛ́ kɛ diɛ, Yai-Laa woo li.» 9 Ŋą́ tíi tii yá kɛa gálá lon Hanameɛlə yəi, a díi tii kɛ Anatotə. Ŋą́ nwali lono, ŋą́ dɛɛ bɔ, Ə kɛ a ɲąnin dɔ̨nɔ̨ hvɛla a wali kwələ pow kɔ́w mɛ̨ihveelɛ. 10 Ŋą́ díi tii yá hɛɓɛ́ pɛ̨ɛ̨ huwɔ kɔlɔ paa mɛ̨i, ŋą́ ɲéé pɔɔ too ɉu a gɔ́lɔn ɉii, nuą ŋɛ̨i ŋį́ di təli di ɲɛ̨i ɓa. Ŋą́ nwali lono a di ɲɛ̨i. 11 Ɉɛɓɛ́i ŋɛ̨i ŋį́ gɛ a nɔi ya hɛɓɛ́, ə kɛ hveelɛ, dɔ̨nɔ̨ kpinįn gɛɛ, yɛ bələi mąą tɔ́nŋaa kaa la ku yíi pələ hu. 12 Ŋą́ nɔi ya hɛɓɛ́ tɛɛ Neriya lon Barukə pɔ, yai kɛ a Maseya nwɔ lon, gálá lon Hanameɛlə ɲɛ̨i ɓa; da gəlaɠaai di yee pɔɔ too nɔi yá hɛɓɛ́ hu, di ɲɛ̨i ɓa. Da Ɉuda nuąi kpɔ kɛ tɔɔmun mąąkpɛ nuą yəi gwəlii nąąlɔwai. 13 Ŋą́ Barukə tí, di ɲɛ̨i ɓa, gɛ́ mą: 14 «Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka, yɛ diɛ: ‹Ɉɛɓɛ́ɠaai ŋɛ̨i həɠə diɛi tii a díi ya hɛɓɛ́i yii naa kpulɔɔ da yii naa ɓoɔ, ə́ di laa ləɠi kpɛli hu, ə́ naa yili kpąąn hvo pa kala.› 15 Mąąhɔlɔɓo, Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka, yɛ diɛ: ‹Di kaa nwɔ̨nɔ̨ pai pɛlɛ́ɠaa da tííɠaa yai nɔi ŋɛ̨i hu.›» 16 Yii kɛa ŋį́ ɉɛɓɛ́ tɛɛ Neriya lon Barukə pɔ, ŋą́ Yai-Laa hvɛli, gɛ́ mą: 17 «Ée Yai-Laa nwɔ́ Yálá! Yɛ́ ɓə yələ kɔ́lɔn da lɔi di pɛli a ə́ wɔ yeewalawalaa, a ə́ yee kɔ̨nwɔ̨n ɉuwalawalaa, ə́ yee a pɛli mɛ̨nį kəlee ɓa. 18 Yá nuą ɲɛ̨imąąwɛli kaa, gee mɛ̨i waa tamąą. Kɛlaa, yá lon gaa nuą di wɔ nɛ̨ŋɛ̨nŋaai kwələ kulɔ di lonnii diɛ. Yɛ́i a Yálá kɛnɛ̨, Kɔlaɠa Ną́mu, ə́ laa ɓaa: Yai-Laa Mɛ̨nį Kəlee ŋą Hééɓomun. 19 Ə́ kaa a liɛwoo kɛ mun nɛlɛɛ, mɛ̨nį lɛlɛɛ kɛ mun. Ə́ ɲɛ̨i kaa nu kəlee túwɔ́ pələ ɓa, yá nu kəlee hvɛla kulɔ, yɛ bələi ə túwɔ́ la; yɛ bələi gɛ koló kaa la. 20 «Ə́ kpalo mɛ̨nįɠaa da mɛ̨nį kpɛa kpɛa kɛ Eziptə lɔi hu, dɔlɔ kaa ni kuɔ, háá ɓa háá, yaa ə́ kpɔɔ laa tɛ Israɛlə lɔi hu, da yɛnɛ̨ɛ̨ nuą lɔwai. Ku ɲɛ̨i ɓa mɛ̨nį li háákələi. 21 Ə́i wɔ nu kpului Israɛlə kulɔ Eziptə lɔi hu, a kpalo mɛ̨nįɠaa, da mɛ̨nį kpɛa kpɛa kɛɛ, a ə́ hvaŋą kɛnɛ̨, a ə́ yee kɔ́ŋɔn ɉu walawalaa; yɛ nuą kwəi pili diɛ. 22 Yili pulu, ə́ nɔi ŋɛ̨i tɛɛ di pɔ, yaai ə́ gbɛa naakwɛlanmo di nąnni diɛ. Nɔi hɛn gəlee a lɛlɛ ɉu. 23 Di pa di hee ɓɛ, kɛlaa di hvo di wəli tɔɔ ə́ woo ɓa, di hvo lɛɛ ə́ wɔ tɔ́n nwooi pulu, mɛ̨nįɠaai kpɔ ə mo diɛ, di hvo da kɛ. Yili ɓə gɛ, yɛ́ mɛ̨nį ɲąąnwąnąą huwu lɔpee gəlee laa diɛ. 24 «Babilonə nuą ka, di kaa pai, di hvaŋą kɛnɛ̨, diɛ kɔlaɠa pɛlɛ daa ɓa, di kaa pai daa hon ɉii, daa gbɛa daa kwɛlɛ diɛ, gwa mo kpɔ tii, di yee yɛi tɛɛ daa ɓa, a kɔ́ kɔ́ bowa, da pulu, ɛlɛɛ da kwəi kulɔ ɲɔ̨n; yɛ́n, ə́ heɛ yɛ́ nąą kaa. 25 Ɛlɛɛ, Yai-Laa nwɔ́ Yálá, yaan yɛ́ ɓə kɛ mą́ą́: ‹Díi ŋɛ̨i yá, nwali lono, gəlaɠaa ɲɛ̨i ɓa, ya pa, daa ə ɓo kɛa Kalde nuą yee kɔ́nma.›» 26 Yai-Laa ə hvaa Ɉeremi pɔ, yɛ mą: 27 «Ɲą́ą́ Yai-Laa, ɲą́ą́ ɓə hɛn gəlee pɛli, mɛ̨nį ta kaa mɔ̨ɔ̨ laa yii vá pɛli gɛi? 28 Yili mąą mɛ̨nį ɓa, Yai-Laa woo ka, yɛ diɛ: Gáá daai ŋɛ̨i tɛɛi Kalde nuą pɔ, da Babilonə tɔɔmun Nabukodonosorə, di kɔ́ pɛlɛ mą. 29 Kalde nuąi tii pai gɔ́ pɛlɛi daai ŋɛ̨i ɓa, di kaa pai nwɔ̨n bilii daai, ɛlɛɛ, bɛlɛ́ɠaai di kɛi Baalə kɔ́ halááɠaa kulɔ mui, diɛ haliɠaa kɔ́ mui, di gəlee kələn. 30 A tɛ̨ą, ə həɠə Israɛlə da Ɉuda di muhəɠə yələ ɓa, mɛ̨nįi nwɛli hvo mą́ą́, yaa lɔ ɓə da kɛ gɛi. Israɛlə lonnii daa nwąnąlɔ a di túwɔ́ pələ. 31 Daai ŋɛ̨i aa níí holi, aa níí kələn gwə́i, ə həɠə háákələi ɓa, mąąnɛ̨ɛ̨ ŋį́ gulɔ ɲɛ̨́i mu. 32 Mɛ̨nį ɲɔ̨nwɔ̨ɔ̨ɠaai Israɛlə nuą da Ɉuda nuą di gɛ, mąą mɛ̨nį ɓa, di nwą́nąlɔ, diɛ-oo, di wɔ tɔɔɓɛlaai-oo, di wɔ kalanɉonŋaai-oo, di wɔ haláá laahəli nuąi-yoo, di wɔ Yálá kwəi mɛ̨nį hukulɔ nuąi-yoo; Ɉuda lɔi hu nuą kəlee, ɛlɛɛ, da Ɉerusalɛmə hee ɓo nuą. 33 Daa di pulu tɔɔ mą́ą́, di hva di ɲɛ̨i hee mą́ą́, bələi mąn váŋą lɔɔ la di mąą kwɛlii, di hva di wəli tɔɔ nwóó ɓa. Di hva di yee hee di mąą kwɛli woo mu. 34 Bɛlɛ́i da vɛli mu, diɛ di wɔ haliɠaa hee laa, diɛ bɛlɛ́ mąąliɓi. 35 Daa haláá kulɔi pɛli Baalə ɓa, Bɛn-Hinɔmə moloon ɉu, diɛ di lon ɉinąą da lon nɛ̨ąą kələn nąą nwɔ̨n ɉu; Molɛkə ɓa. Ɲą́ą́ hvəi di tí la, mɛ̨nį ɲɔ̨nwɔ̨ɔ̨ taaləi tii, mąą kili hvo ta hɔlɔ too li gwə́i, gɛ́ Ɉuda yee lɔ tii nɛ̨ŋɛ̨n ɉu. 36 Yili ɓa, Yai-Laa Israɛlə nwɔ Yálái yɛ; yii gaa a daai ŋɛ̨i mąą mɛ̨nį, yaai ka kɛ kɛi la mą: ‹Gaa pai tooi Babilonə yee kɔ́n ma, a ɓɔwa kwɛaa, da pulu, da kwəi kulɔ ɲɔ̨n naa pɔɔ.› 37 Gáá pai di ɲąą kpɔn ɉii, gɛ di kulɔ nɔiɠaai kpɔ ŋą di taɠa taɠa ɉu, níí holi pələ ɓa, níí kələn bələ ɓa gwə́i da nwą́ną lɔ pələ ɓa, ŋą́ pənə ŋą́ pa a diɛ gɛɛnąąi ŋɛ̨i ɓa, gɛ́ di hee laa liilaa hu. 38 Nąąlɔwai da kɛ a nwɔ́ nuą, gɛ ɓo a di wɔ Yálá. 39 Ŋą́ kiliŋąhiɛ tɔ̨nɔ̨ too diɛ, di hiɛ pələ ə ɓo tɔ̨nɔ̨, diɛ mą́ą́wiɛ a yələ kəlee; yili a kɛ diɛ a nwun na nɛ̨ɛ̨, da di lonnii pai lɛɛi di pulu di wɔ nwun na nɛ̨ɛ̨. 40 Kwa diɛni kwa mįnɛ̨ həɠə, vá kpɛla nwɔ́ mɛ̨inɛ̨ɛ̨ kɛi diɛ. Ɛlɛɛ, ŋą́ gɛ, diɛ mą́ą́wiɛ a di kwəi tɔ̨nɔ̨ mɛ̨i. Di hva kɛa di mąą kwɛa mą́ą́ a yələ ta. 41 Gwə́inɛ̨ɛ̨ mɛ̨nįi lɔ ɓa pai kɛi a mɛ̨inɛ̨ɛ̨ kɛɛ diɛ, gáá pai di kɔ́wɔ hvilɛn ɉii nɔi ŋɛ̨i hu. Gáá pai gɛi tii gwə́i tɔ̨nɔ̨ mɛ̨i, kpɔ a gwə́i kwəlɛɛ. 42 «Mąąhɔlɔɓo, Yai-Laa yɛi, bələi lɔ ŋą́ mɛ̨nį ɲąąnwąnąą kɛnɛ̨ laa la nuąi ŋɛ̨i diɛ, bələ lɔ ɓə, nwun na nɛ̨ɛ̨i ŋą́ mąą kili tee gwə́i yɛ hvilɛn na diɛ, gáá pai dɛɛi la di pɔ. 43 Di kaa nwɔ̨nɔ̨ pai tííɠaa yai nɔi ŋɛ̨i hu, yai ka kɛ kɛi diɛ lɔi pun ni, nu hvo ɉu, taatɛlɛɛ hvo ɉu, ə ɓo Kalde kɔlaɠa yee kɔ́n mą. 44 Di kaa pai kɛi tííɠaa yai, diɛ nwali lono, diɛ nɔwɔtɔɔ hɛɓɛ́ pɛ̨ɛ̨, diɛ di kɔ́lɔn ɉii kɛ mą, diɛ kɛlaɠaa hee Bɛnɉamɛn nwɔ lɔi hu, Ɉerusalɛmə kwɛlɛ da Ɉuda taaɠaa hu. Yiiɠaai ɲee hu, da yiiɠaai nɛ̨ŋɛ̨ hu, da yiiɠaai di kaa ɉɛɠɛɛ pələ. Mąąhɔlɔɓo, gáá pai pənəi ŋą́ di pu di nįnɛ̨ kɔ́lɔi. Ɲą́ą́ Yai-Laa, nwóó li.» |