Ɉeremi 31 - Yálá laawoo hɛɓɛ (dc)Israɛlə kaa pai pənəi ə hee nwɔ lɔi hu 1 Yai-Laa woo ka, yɛ diɛ: «Ɲələ a pa həlii, gáá pai kɛi a Israɛlə pɛlɛ́ɠaa kəlee di wɔ Yálá, diɛn, di ɓo a nwɔ́ nuą.» 2 Mɛ̨nįi Yai-Laa kaa moi, ya ka, yɛ diɛ: Nuąi tii kulɔ mowa kwɛaa yəi nɔi pun ɉu, ŋą́ ɲɛ̨́i lɛlɛɛ hee diɛ. Israɛlə lɔi pu hiɛ ka tii nįnɛ̨ kɔ́lɔi. 3 Yai-Laa ə gbɔwɔ lɛ mą́ą́ kwɛaa la, yɛ mą́ą́: Israɛlə, ə́ wɛli kaa mą́ą́, a wɛlikɛmąąi ɲɛn deei hvo mą, yili ɓə gɛi, gɛ́ ə́ yala la bɔ́ pələ a tələnmolaa. 4 Gáá bɔ ŋį́ pənə ŋį́ ə́ tɔɔ, Israɛlə nɛ̨ɛ̨gbɛla, ə́ kaa pai tɔɔi, ə́ kaa pai pənəi ə́ pu ə́ ninə kɔ́lɔi. Ŋą́ ə́ mąąyili, ə́ wɔ hvɛli kɛ hɛnŋaa di ɓo ə yəi, ə́ tɔɔ la nuą ɲɛ̨itɔwɔ nwələ yɛli hu, a ɉɛli yələ. 5 Israɛlə! Ə́ kaa nwɔ̨nɔ̨ pai pənəi yɛ́ ɓáwuluɠaa hin Samari yee ton ɉu. Nuąi pai ɉihɛnŋaa tii hin ɉii, diɛ ɓə pai ma kulɔi. 6 Mąą yələ, daa mąąkpɛ nuą kaa pai tomąi la Ɛfraimə yee tona, diɛ kɛ mą: «'Ká ka muhəɠə, ka gu tɛ Siɔn daai, Yai-Laa gu wɔ Yálái pɔ, daa gbɛa gu hee.» 7 Mɛ̨nįi Yai-Laa kaa moi, ya ka, yɛ diɛ: «'Ká ka yee lɔwa Ɉakɔbə ɓa a kwəinɛ̨ɛ̨, ka lɔiɠaa ɲąąwooɓomun laakwiɛn a ɲɛ̨i kɛnɛ̨, ka tomą ka kwəinɛ̨ɛ̨ kulɔ, kaa diɛ: ‹Yai-Laa nwɔ nu kpəlii aa lɛɛ a Israɛlə, gaa di nwun mąąɓoi›.» 8 Gáá pai di kulɔi ɲánwuɔ̨ pələ lɔiɠaa hu, gɛ́ pənə gɛ́ pa a diɛ; gɛ́ di kulɔ lɔi kpon ɉeei, gɛ́ di ɲąąkpɔn. Ɲɛ̨ipu nuąi di lɔwai, gɔwɔ nwąną nuą, goonɛ̨ąɠaa, da gɔ̨nwɔ̨leeɠaa kəlee da pa. Nu kpulu kɛnɛ̨ ka tii pai ɓɛ. 9 Di kaa pai ɲɛ̨iyá hu, diɛ kɛ mą: «Kookwəi!» Ɛlɛɛ, gáá pai tɔɔi di tɔwɔ, gɛ́ li a diɛ lɔiɠaa ya kaa di hu kɛnɛ̨. Diɛ tɛɛ a pələ hu pɔ̨nɔ̨ɔ̨, di hva kalin. Gáá kɛi a Israɛlə nąn, Ɛfraimə kaa a nón nu pɔlɔ laa mun. Wɔlɔ mąą aa pənə a kwəinɛ̨ɛ̨ 10 Lɔiɠaa! 'Ká ka wəli tɔɔ Yai-Laa woo ɓa! 'Ká ɉukulɔ gboloyá pulu lɔiɠaa diɛ, káá diɛ: «Nui Israɛlə lonnii hu taɠa lɔiɠaa lɔwai, gaa pənəi yɛ di ɲąąkpɔn, yɛ di laa honmo, yɛ bələi taatɛlɛɛ mɛ̨i kaa mun a nwɔ taatɛlɛɛɠaa mɛ̨i kaa la.» 11 Ɉakɔbə kaa a Yai-Laa nwɔɔ, gaa nwun mąąɓoi, ə gulɔ ɲeetɛɛmąą mun ɲəi. 12 Diɛ ka tii pai; diɛ wələ too a kwəinɛ̨ɛ̨ Siɔn yee tona. Di kaa pai Yai-Laa nwɔ mɛ̨inɛ̨ɛ̨ɠaa pɔ. Di kaa pai kɔ̨nɔ̨n nɔi hu, lɔɔ pɔ, wulɔ da lɔɔ nįnɛ̨, ə mą kɛ, daatɛlɛɛ bɛlɛɛɠaa da gbɛa-kpɛaa. Di kaa pənəi di pu di nįnɛ̨ kɔ́lɔi, di tɛlin yɛ nɔw yɛai, da kɛ ya pui ma. Pulu hva kɛa too diɛ. 13 Mąą yələi tii, nɛ̨ɛ̨lɛa kaa pai kɛi mąnąai, di ɓo di nɛɛ hu. Ɉilɛlɛa, da ɉulɔgoloɠaa kpɛli mąn, gáá pai di wɔlɔ woo mąą pənəi a kwəinɛ̨ɛ̨. Ŋą́ di kpɛgbɛn mo, gɛ́ di kwəinɛ̨ɛ̨ mɔ̨nɔ̨ mį́i pulu. 14 Gáá pai ɉaláá laa həli nuą pilɛi a huwɔ wulɔɔɠaa. Nwɔ́ nuą da pilɛ a ɲə́i mɛ̨inɛ̨ɛ̨. Ɲą́ą́ Yai-Laa nwóó li! 15 Yai-Laa woo ka, yɛ diɛ: Gboo təli woo kaa tɔɔi Rama, gaa a mąąwɛli wɔlɔ woo. Rasɛlə ɓə nonnii wɔlɔ ɓoi, hvo nwəli tɔɔi naapilɛ nuą woo ɓa. Mąąhɔlɔɓo, nonnii di hvo lɛɛ li. 16 Yai-Laa woo ka, yɛ diɛ: Nwoolaa woo aa pɛli ɉu, ka ka laapilɛ, ka ka ɲɛ̨i kələ, ə́ wɔ mɔ̨nɔ̨i vɛla ka; di kaa həɠəi di yowoɠaa pɔɔli diɛ pa. Yai-Laa woo li! 17 Yai-Laa woo ka, yɛ diɛ: Ə́ kilitɔɔi kaa mą, tínąą hvɛlaan; ə́ lonnii kaa pənəi di pa di pɔ lɔi, di kaa lɔi hu. 18 Gáá woo ta mɛ̨n ɉii! Gáá Ɛfraimə wɔlɔ woo mɛ̨n ɉii; yɛ kɛ diɛ: Yáá ɉón a ɉútɔɔ pələ, ŋą́ą́ gbɔ́ɔ́ lɛɛ laa diɛ ɉútɔɔ yɛ nįŋɛ̨ hilɛ lon ɉon naa walaa. Bə́nə pulu, əgɛ, ŋą́ bənə búlú ŋą́ pa. Mąąhɔlɔɓo, yɛ́ Yai-Laa, yɛ́ ɓə a nwɔ́ Yálá. 19 Ŋą́ búlu tɔɔ kɛ yɛ́, kɛlaa, ŋą́ą́ ɉɔ́n mąą hvalin: Pənəi ŋą́ mo gɛ́ gbɔ́ɔ́ kɛ pələ kaa, ŋą́ kɛi níí pɔ kɛlɛ. Kwəi pili mąą da nwumɛ̨ daa ɉón. Mąąhɔlɔɓo, gáá nwɔ́ hulɔnon naai ŋį́ gulɔ, bulu mɔ̨nɔ̨ mįi. 20 Ɛfraimə aa kɛ mɔ̨ɔ̨ a nwɛ́li kɛ mąą lon. A lón mąą mɛ̨nį kaa níí mɛ̨i? Mąąhɔlɔɓo, ŋį́ kɛ lɔ mąą mɛ̨nį ɓoi, mąą kiliŋąhiɛ yɛ too mą́ą́, ɛlɛɛ, nii yɛ kulɔ mą́ą́ mąą mɛ̨nį hu. Nwɔ wɛlikɛmąą kaa pai kɛi níí hu kpɔ a nwalawalaa. Yai-Laa woo li. Israɛlə pənə ə́ pa 21 Ə́ kɔ́lɔn ɉiɠaa kɛ ə́ kpaalə hu. Bələi ə́ kaa ɉon ɉii la, ə́ ɲɛ̨i pɔɔ lɛɛ mą a nɛlɛɛ. Pənə ə́ pa Israɛlə nɛ̨ɛ̨gbɛla. 'Pənə ə́ pa ə́ wɔ taaɠaai hu. 22 Ə́ kaa lɛɛi tɔɔi yai yai ɛlɛɛ ɉu mįnɛ̨ lɔwai, Nɛ̨ɛ̨non gwɛli teɠɛɛ? Ya pa Yai-Laa aa mɛ̨nį nįnɛ̨ pɛli lɔi mɛ̨i, Nɛ̨ɛ̨nu kaa hulɔnu kwɛlii. Ɉuda pu mɛ̨nį nįnɛ̨ kɔlɔi 23 Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka: Ɓɛlɔwai gáá pai pənəi ŋį́ pa la a gɔ́ luwɔɠaa, mɛ̨nįi di kaa pai kɛi moi Ɉuda lɔi da nwɔ taɠaa di hu, ya ka: «Yai-Laa ə lúwɔ́ too yɛ́, tələnmo hee taa. Yee mąąhəɠɛɛ.» 24 Ɉuda da nwɔ taaɠaai kəlee, di kaa pai heei laa di kee pɔ; tíi kɛ mun da taatɛlɛɛ mɛ̨i kaa mun. 25 Nuąi kpələ wɛli a kɛ diɛ, gáá pai kpələ wɛli kulɔi diɛ. Nui vii a kpɛɛ, gɛ́ vaŋa lɔ. 26 Nąąlɔwai, ŋą́ nwun, ɛlɛɛ, ŋą́ gbaɠala kaa, gɛ́ kɛ ŋą́ą́ yíi ɲąąnɛ̨ɛ̨ ɓo. Israɛlə da Ɉuda 27 Yai-Laa woo ka, yɛ diɛ: «Gaa pai kɛi a yələ ta kaa pai ɉəlii, gɛ nu kan da taatɛlɛɛ huwu híi Ɉuda da Israɛlə lɔiɠaa hu. 28 Háá ɓa háá, bələi ŋą́ ɲɛ̨́i ɲɔ̨nwɔ̨ɔ̨ hee la diɛ, gɛ́ di kulɔ a di nwun, gɛ́ di pu, gɛ́ di laa pɛlɛ nɔi ɓa, diɛ lɛɛ a taa kpoloon, gɛ́ di mąąwɛli, gɛ́ mɛ̨nį ɲąąnwąnąą laa diɛ; bələ lɔ ɓə gáá ɲɛ̨́i lɛlɛɛ heei la diɛ, ŋą́ di tɔɔ, ŋą́ di kɔ́wɔ hvilɛn. Ɲą́ą́ Yai-Laa nwóó li!» 29 Nąąlɔwai tii hu, di hvo kɛa pai kɛi diɛ: «Ku nąnni di viɲə ɓá kpəlee mįi, kɛlaa di lonnii ɓə di ɲįn ŋą ə kponą.» 30 Hvo pai kɛi tii, nu kəlee kaa pai haai gbɔwɔ kɛ nɛ̨ŋɛ̨n mąą mɛ̨nį hu, ɛlɛɛ, nui a wulu ɓa kpəlee mįi, mąą nu ɓə ɲįn ŋą a kponą. Mįnɛ̨ ninɛ̨ 31 Yai-Laa woo ka, yɛ diɛ: «Gaa pai kɛi a yələ ta, kwa Ɉakɔbə nwɔ pɛlɛ́i kuɔ mįnɛ̨ ninɛ̨ həɠə, da Ɉuda nwɔ pɛlɛ́i. 32 Hvo pai kɛi yɛ mįnɛ̨i kwa di nąnni ku ɉəɠə, ɓɛlɔwai ŋą́ di hon na a di yee, gɛ́ di kulɔ Eziptə lɔi hu. Mįnɛ̨i tii, di ɉukala, kɛlaa, ɲą́ą́n, gáá lɔ a di Nąmu di nwun na. Yai-Laa woo li!» 33 Mįnɛ̨i ku kaa pai ɉəɠəi kwa Israɛlə lonnii a ɲələi tii, ya ka: «Gáá pai nwɔ́ tɔ́n nwooɠaa lɔi di nįį hu, gɛ́ bɛ̨ɛ̨ di kili pɔ. Ŋą́ lɛɛ a di wɔ Yálá, diɛn, di kɛ a nwɔ́ nuą. Yai-Laa woo li! 34 Di hvo kɛa pai kɛi di kee ni mąąkwɛlii di kee lɔwai. Nu ta hva kɛa kɛ nąn non ma: ‹Ka Yálá kɔ́lɔn bələ mąąkwɛli›. Mąąhɔlɔɓo, di kəlee di kaa pai gɔ́lɔn ɉii; nu kpɛa kpɛaa mąn, nɛapɛlɛɛ mąn. Ɲą́ą́ Yai-Laa nwóó li! Ŋą́ di wɔ nɛ̨ŋɛ̨nŋaa mąą hvaalɛɛ, ŋį́ gíli kulɔ di hɔn ɉu.» 35 Gbɛɛ ɓə hvóló kulɔ, yɛ kɛɛ pɔ̨nɔ̨ kulɔ a yələ ɓɔɔ, ə ɲąnin da pɛmɛ̨lɛ̨n-gɔwɠaa kɛ, a kpinį hu pɔ̨nɔ̨ hɛnŋaa, gəlee da nwɔ kɛ pələ; a yaai a gboloyá tumo, yɛ nwoo kulɔ? Ɲálái tii mɛ̨nįɠaa kɛ, naa ɓaa: Yai-Laa Mɛ̨nį Kəlee ŋą Hééɓomun. Ɲálái tii nwoo ka, yɛ diɛ: 36 «Akɛ bələi yɛnɛ̨ɛ̨ mɛ̨nįɠaa hee kpəlin na kɛɛ la, ŋį́ wala pɛli mɛ̨i kaai! Ɲą́ą́ Yai-Laa nwóó li! Akɛtii, Israɛlə huwuhu nuą diɛ kpɛli, di hva kɛa lɛɛ a lɔi yələkɔlɔn mu ɲą́ą́ ɲɛ̨́i ɓa.» 37 Yai-Laa woo ka, yɛ diɛ: «Akɛ nu a pɛli yələkɔlɔn goloon gɔɔn ɉii, akɛ nu a pɛli lɔi kpon ɉukwɛa pələ kɔ́ɔn ɉii, akɛtii, ɲą́ą́ gbɛli, ŋį́ pɛli gíli kulɔi Israɛlə nuą hu, di túwɔ́ hɔn mąą mɛ̨nį ɓa. Ɲą́ą́ Yai-Laa nwóó li!» Ɉerusalɛmə nįnɛ̨ 38 Yai-Laa yɛ diɛ: «Yələ ta kaa pai ɉəlii, di kaa pai taa tɔɔi a Yai-Laa nwɔɔ. Ə həɠə Hananeɛlə kwəlii ɉįi mɛ̨i pɛlɛ́ ɓa, ə həli la gbon tii bɛlɛ́ nwąną hveelɛi kee kaai, ɓa. 39 Da yɛli haŋą nwɔ̨nɔ̨ ə həli Garɛvə ɲee kpu kpu ɓa, yili pulu, di ɉaŋą a Goa pələ. 40 Nu powa boloon da nuwu pili ɓoloon gəlee, ə mą kɛ, Sedrɔn nɛ̨ŋɛ̨ hu, əlɛɛɉu ə həli ɉoo kpon ma, voló həɠəi pələ, gəlee a kɛ a lɔi mąąhəɠɛɛ, a Yai-Laa nwɔɔ, nu ta hva kɛa nąą kala, di hva nąą wolo, a kwɛlan nɔpee ta.» |