Ɉeremi 29 - Yálá laawoo hɛɓɛ (dc)Ɉɛɓɛ́i Ɉeremi ə dɛɛ gɔ́ luwɔ dɔlɔɔɠaa diɛ 1 Yálá kwəi mɛ̨nį hukulɔ mun Ɉeremi ə lɛɛ Ɉerusalɛmə, ə hɛɓɛ́ tɔɔ galanɉonŋaai kɛ gɔ luwɔɠaa lɔwai diɛ, da ɉaláá laa həli nuą, ə mą kɛ, Yálá kwəi mɛ̨nį hukulɔ nuą, da nɔi lonnii kəlee, diɛi kpɔ Nabukodonosorə ə di kulɔ Ɉerusalɛmə yɛ li a diɛ Babilonə. 2 Yálá ə kɛti! Tɔɔmun Yekonia, da tɔɔmun nee, bɛlɛɛ dɔɔ kwəlii nuą, da Ɉuda lɔi, ɛlɛɛ, Ɉerusalɛmə taa nu kpɛa kpɛaa, gwɛliyɔw nuą, da ɲɛ̨lɛkɛ nuą, daa gbɛa kɛ kulɔ Ɉerusalɛmə daai. 3 Ə ɉɛɓɛ́i tii tɛɛ Eleasa Safan lon, da Gemaria, Hilkiya lon diɛ, diɛi Ɉuda tɔɔmun Sedesiasə ə kɛi di tɔɔ Babilonə tɔɔmun Nabukodonosorə pɔ, Babilonə; bɛ̨ɛ̨i kɛ diɛ kɛ mą: 4 «Yai-Laa Mɛ̨nį Kəlee ŋą Hééɓomun, Israɛlə nwɔ Yálá ɓə mɛ̨nįi ŋɛ̨i ɓoi, nuąi kpɔ ə di kulɔ Ɉerusalɛmə daai, yɛ li a diɛ Babilonə diɛ, yɛ diɛ: 5 Gɛ́ ka pɛlɛ́ɠaa tɔɔ, ká lɔ mu. Ka tííɠaa kɛ, ka ma mį́i. 6 Ka nɛ̨ą həɠə, ka lonŋaa kaa diɛ. Ka ka lon ɉinąą di nɛ̨ąni mɛ̨nį ɲɛ̨i kulɔ, ka ka lon nɛ̨ąą tɛɛ hilɛtaai. Diɛ kpɛli di lonŋaa kaa. Ka ka ɓuwuɓo laa, ka huwu hvo pu. 7 Daa tii ka tɛɛ ɉu, mąą liihɛlɛn ə too kaa, ka Yai-La hvɛli daa tii mąą mɛ̨nį ɓa. Daa tii a kɛ nɛ̨ɛ̨hu, kaa kpɛli ka kɛ laa ka nɛ̨ɛ̨hu. 8 «Mąąhɔlɔɓo, Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ diɛ: Ká hvo nɛɛ laa, nuąi di kaa ka lɔwai, diɛ kɛ di kaa Yálá kwəi mɛ̨nį hukulɔi, da dɔlukpɛ nuą di hvo ka ɓowo, ɛlɛɛ, ka hvo ka kilitɔɔ ka wɔ hįi wooɠaa diɛ. 9 Ɲą́ą́ Yai-Laa nwóó ka, gɛ́ diɛ: Lɛɛ mɛ̨nį ka tii di kaa moi a náá, və́ di tɔɔ li la. 10 «Yai-Laa woo ka, yɛ diɛ: Gwɛlan bow mɛ̨ihveelɛi bɛ̨ɛ̨ Babilonə nwuɔ̨, a tɛɛ, ŋą́ ka mąą mɛ̨nį ɲɛ̨i kulɔ, ka pənə ka pa, gɛɛnąą ŋɛ̨i ɓa, ɓɛi ŋį́ naakwɛlanmo kaa, gɛ́ nwóó tii pɔ mɛ̨nį kɛ. 11 Ɲą́ą́ Yai-Laa, mɛ̨nįi ŋą́ mąą kili tee gwə́i, yɛ hvilɛn na káá, gbaɠala kaa mą́ą́. Gaa a ka wɔ nwun na nɛ̨ɛ̨ mɛ̨nį, hvo a mɛ̨nį ɲąąnwąnąą, liilaa yɛnɛ̨ɛ̨ ɓə, ŋį́ ɉee ka tɔwɔ, ŋį́ ka tinąą tɔwɔ hee a nwun na nɛ̨ɛ̨. 12 Ka mą́ą́ hiɛ kulɔ pai kɛi, kaa pa ɓɛ, káá də́li a náá, káá vɛ́li, ɲą́ą́n ŋą́ ɲéé hee ka woo mu. 13 Ka gwɛ́li pai kɛi, ka gáá, ka gwɛ́li kpɔ a ka lii kəlee. 14 Ɛlɛɛ, gáá pai nɛɛi laa, káá gáá. Ɲą́ą́ Yai-Laa nwóó li! Gáá pai pənəi ŋį́ ka kulɔ ɓɛɠaa kpɔ ŋą́ ka hutaɠa kaa li laa, ŋą́ ka ŋąąkpɔn, ŋą́ ka tɔɔ. Ɲą́ą́ Yai-Laa nwóó li! Ŋą́ pənə ŋį́ pa a kaa ɓɛi ŋą́ ka həɠə laa. 15 «Ka káá kɛi diɛ: A tɛ̨ą, Yai-Laa aa gwəi mɛ̨nį hukulɔ nuą tɛɛ ku pɔ Babilonə. 16 «Dɔɔmun heeni Davidə nwɔ tɔɔkpəlin hu, mɛ̨nįi Yai-Laa kaa moi mą, da nuą kpɔ ɓɛ daa ŋɛ̨i hu, da galanɉonŋaai ka diɛni ka hvo li li mąąkilɛ lɔi hu, 17 mɛ̨nįi Yai-Laa Mɛ̨nį Kəlee ŋą Hééɓomun kaa moi di laa mɛ̨i, ya ka, yɛ diɛ: Gáá pai hvilɛn ɉii di pulu a ɓɔwa kwɛaa, da nu paa ɲɔ̨n, gɛ́ di hon yɛ wulu ɓa ɲɔ̨nwɔ̨ɔ̨ yii nu hva pɛli mįi. 18 Ŋą́ hvilɛn di pulu a ɓɔwa kwɛaa da pulu, da nu paa ɲɔ̨n; yɛnɛ̨ɛ̨ lɔiɠaa kəlee diɛ ɲɔw di mąą mɛ̨nį hu. Diɛ kɛ a nɛ̨ŋɛ̨n naa hɛn, a lɔi pun, nu a gaa, hvo kɛli a tomą. Nɔiɠaa kpɔ gáá pai di taɠa taɠai ɉu, da lalan ɉuwui lɔpee gəlee pili a diɛ. 19 Mąąhɔlɔɓo, di hvo di wəli tɔɔ li nwóó ɓa. Ɲą́ą́ Yai-Laa nwóó li! Ya pa, ŋą́ kɛi nwɔ́ tínuą tɔɔ di pɔ, diɛ gwə́i mɛ̨nį hukulɔ diɛ, vįi hvo kpɛɛ li; kɛlaa di kɛɛ mɔ̨ɔ̨ ŋɛ̨i, di hva mɛ̨nį mɛ̨n. Ɲą́ą́ Yai-Laa nwóó li! 20 «Kaa ŋɛ̨i mąąkilɛ lɔi hu, kaai ŋį́ ka kulɔ Ɉerusalɛmə daai, gɛ́ ka tɛɛ Babilonə, ka ka wəli tɔɔ Yai-Laa woo ɓa. 21 «Yai-Laa Mɛ̨nį Kəlee ŋą Hééɓomun, Israɛlə nwɔ Yálái woo ka, yɛ hvilɛn na Kolaya lon Akabə ɓa, da Maaseya lon Sedesiasə diɛ, yɛ nu hveelɛi tii, di kaa di kpɔɔ kɛi a Yálá kwəi mɛ̨nį hukulɔ nuą, diɛ mɛ̨nį ɓo a náá, a lɛɛ. Gáá pai di tɛɛi Babilonə tɔɔmun Nabukodonosorə pɔ, yɛ di paa ka ɲɛ̨i ɓa. 22 Di mąą mɛ̨nį a kɛ a nɛ̨ŋɛ̨n naa, gɔwɔ tɔɔ mąą Ɉuda kɔluwɔɠaa kpɔ tii Babilonə di lɔwai, diɛ kɛ diɛ: ‹Yai-Laa ə ə́ hon yɛ bələi ə Sedesiasə da Akabə di hon na, diɛi Babilonə tɔɔmun ə di mɔn.› 23 Di wɔ nɛ̨ŋɛ̨n kaa a mɛ̨nįi bələ hva ɓo Israɛlə lɔi hu; di kaa wɛli mɛ̨nį hu da di ɓɛlaa di nɛ̨ąni, diɛ mɛ̨nį ɓo a náá a lɛɛ; ya pa, və́ mɛ̨nį ta ɓo li diɛ. Gbaɠala kaa mą́ą́, ɛlɛɛ, gɛla ɓaa ɲą́ą́ gbinįi. Ɲą́ą́ Yai-Laa nwóó li!» Semayahu ə lɛɛ hɛɓɛ́ pɛ̨ɛ̨ 24 'Mo Semayahu Nehelamə mun ma, yɛ́ mą: 25 Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka, yɛ diɛ: Yáá hɛɓɛ́ɠaa tɛɛ a ə́ kpɔɔ laa, Ɉerusalɛmə nuą kəlee diɛ, da ɉaláá laa həli mun Sefania ɓa, yai gaa a Maaseya lon; da ɉaláá laa həli nuą kəlee, yɛ́ kɛ diɛ: 26 «Yai-Laa ɓə ə́ hee a ɉaláá laa həli mun a Yehoyada mąąhvalin, a haláá laa həli mun yai Yálá hee pɛlɛ́ mąą mɛ̨nį kaa nwuɔ̨; da nuą lɔpee mɛ̨nį kulɔi di nwun ɉu, diɛ yɛ mo, yɛ gbɔwɔ kɛ a Yálá kwəi mɛ̨nį hukulɔ mun. Mąą nɛ̨ɛ̨ ə́ di too kpɔ̨nɔ̨ ŋą, ə́ di kɛlɛ. 27 Akɛti, lə mɛ̨nį ɓa hvo kɛ haɠa li Anatotə mun Ɉeremi ɓa, yai gaa Yálá kwəi mɛ̨nį hukulɔi ka lɔwai. 28 Ká hɛɓɛ́ tɛɛ hɔlɔɔ ɓɛ kuɔ Babilonə, yɛ kɛ diɛ: Ku kaa pai lamui ɓɛ, ku pɛlɛ́ɠaa tɔɔ, ku tííɠaa kɛ ku má mįi.» 29 Ɉaláá laa həli mun Sefania ə ɉɛɓɛ́i tii hu woo ɓo Yálá kwəi mɛ̨nį hukulɔ mun Ɉeremi ɓa. 30 Nąąlɔwai, Yai-Laa ə hvaa Ɉeremi pɔ, yɛ mą: 31 «Nuą kpɔ luwɔlaa hu, mɛ̨nįi ŋɛ̨i ɓo, diɛ, yɛ́ diɛ: ‹Mɛ̨nii Yai-Laa kaa moi a Nehelamə mun Semaya laa, ya ka, yɛ diɛ: Semaya kaa mɛ̨nįɠaa ɓoi kaa a náá, yaan, ɲą́ą́ hvəi dɔɔ la, gaa ka kili nwɔ pɛlɛ́i a lɛɛ woo. 32 Yili mąą mɛ̨nį ɓa, ɲą́ą́ Yai-Laa, gáá ɲéé pɛlɛi Nehelamə mun Semaya ɓa, da ɉuwu kəlee. Di ta lɔpee hvo pai ɉeei hɔlɔɓoi nuą ŋɛ̨i lɔwai, di ɲɛ̨i hva tɔɔ mɛ̨nį lɛlɛɛɠaa gáá pai gɛi nwɔ́ nuą diɛ, da ɓa. Mąąhɔlɔɓo, ə nuą ɲąątɔɔ, diɛ kulɔ Yai-Laa woo mu. Yai-Laa woo li!›» |