Ɉeremi 26 - Yálá laawoo hɛɓɛ (dc)Di Ɉeremi hon di doo gaho ŋą 1 Ɉuda tɔɔmun Yoyakimə, Ɉosiasə lon nwɔ tɔɔlaa kɔ́wɔ tɔɔ lɔwai, nwooi ŋɛ̨i ɓə tɔɔ, yɛ həɠə Yai-Laa pɔ. 2 Yai-Laa woo ka, yɛ mą: «'Li ə́ tɔɔ Yai-Laa nwɔ pɛlɛ́i gwəli hąąi, nwooɠaai kpɔ ŋą́ ə́ tí la, ə́ gəlee ɓo, yɛ hvilɛn na Ɉuda taɠaa hu, nuą kəlee diɛ, diɛi tii da pa Yai-Laa yəi bɛlɛ́n diɛ kwɛli hvilɛn mą, gəlee ɓo diɛ, hvə da lɔpee kulɔ ɉu. 3 Gbəli hu, di kaa pai di wəli tɔɔi, diɛ di pulu tinɛ̨n tɛitɛi di wɔ túwɔ́ pələ ɲɔ̨n ɓa, mɛ̨nį ɲąąnwąnąąi gwə́i gɛ́ kɛ ŋį́ naa diɛ, di kɛ mɛ̨nį ɲɔ̨nwɔ̨ɔ̨ɠaa mąą mɛ̨nį ɓa, gɛ́ pɛli nɛɛi laa. 4 Yá kɛ diɛ Yai-Laa woo ka, yɛ: ‹Ká wala gɛ a nɛlɛɛ, nwooɠaai gáá moi kaa ka hvo lɛɛ bulu, 5 ká wala ká wəli tɔɔ nwɔ́ tínuą, da gwə́i mɛ̨nį hukulɔ nuą woo ɓa, diɛi ŋą́ kɛ di tɔɔ ká pɔɔli a yələ kəlee, ɛlɛɛ, yaan, ka hva kpɔ kɛ ka wəli tɔɔi diɛ. 6 Ka gɛ tii, gáá pai bɛlɛ́i ŋɛ̨i hon ɉii, yɛ bələi ŋį́ Silo hon na, ɛlɛɛ, ŋą́ daai ŋɛ̨i kɛ a taai da mɛlaa kɔ́ɔn mą, nɛ̨ŋɛ̨n naa mɛ̨nį hu, yɛnɛ̨ɛ̨ nąąkəlee lɔiɠaa hu.›» 7 Ɉaláá laa həli nuą, Yálá kwəi mɛ̨nį hukulɔ nuą, da nɔi lonnii kəlee di wəli tɔɔi kɛ Ɉeremi woo ɓa, ɓɛlɔwai ə kɛi mɛ̨nįɠaai tii ɓo la Yai-Laa hee pɛlɛ́ gwəli hąąi. 8 Mɛ̨nįɠaa kpɔ tii Yai-Laa ə Ɉeremi tí la, yɛ hvilɛn na nɔi lonnii diɛ, gbɛɛ a gəlee ɓoɔ, ɉaláá laahəli nuą, da Yálá kwəi mɛ̨nį hukulɔ nuą, da nɔi lonnii kəlee di ɉon, diɛ kɛ mą: «Yáá haa kwɛli a ə́ kpɔwɔ! 9 Ə́ liikpələi pələ kaa ləi, yɛ mɛ̨nį lɛɛ kwɛa la, yɛ mo a Yai-Laa laa, yɛ kɛ diɛ, bɛlɛ́i ŋɛ̨i kaa pai kɛi yɛ Silo, ɛlɛɛ, di kaa pai daa kalai di ɉu nuą kulɔ ɉu?» Nuą kəlee di tinɛ̨n Ɉeremi ɓa Yai-Laa hee pɛlɛ́ mu. 10 Mɛ̨nįɠaai tii mɛ̨n di mo, Ɉuda lɔi ɲąąwooɓo nuą di həɠə tɔɔmun ɲəi bɛlɛ́n, di ɲee tɛ Yálá hee pɛlɛ́ mu, di hee gbon nįnɛ̨ laaləi pələ. 11 Ɉaláá laa həli nuą da Yálá kwəi mɛ̨nį hukulɔ nuą, di mo nɔi lonnii kəlee diɛ, diɛ diɛ: «Mąąnɛ̨ɛ̨ di nui ŋɛ̨i paa, mąąhɔlɔɓo, gaa daai ŋɛ̨i nɛ̨ŋɛ̨n naai, kaa kpinįi kaa nwoo mɛ̨n.» 12 Ɉeremi yɛ nɔi ɲąąwooɓo nuą da nɔi lonnii kəlee diɛ: «Yai-Laa ɓə́ dɔ́ɔ́, mɛ̨nįɠaai pai laai bɛlɛ́i ŋɛ̨i ɓa, da daai ŋɛ̨i ɓa, gɛ́ di lɛɛ kwɛa la, gɛ́ di ɓo, yɛ bələi ka di mɛ̨n na. 13 Yii hu kɛa, ka ka yíi pələ mąąhvalin a nɛlɛɛ, da ka túwɔ́ pələ, ka ka wəli tɔɔ Yai-Laa ka wɔ Yálái woo ɓa. Akɛti, mɛ̨nį ɲąnwąnąąi Yai-Laa ə gili tee gwəi, yɛ kɛ ə naa kaai, gaa pai ɉəɠəi mą. 14 Nwɛ́i, gáá ka yee ŋą, mɛ̨nįi kaa ka gɛ a ɲą́ą́, ɉaŋąąi ka ɲɛ̨i ɓa, ka gɛ. 15 Kɛlaa, ka gɔlɔn kaa diɛ ka báá, akɛtii, kaa mąn, daai ŋɛ̨i da ɉu nuą kəlee, kwəi kwələ mun baa wulu a lɛɛ ka nwuɔ̨. Mąąhɔlɔɓo, Yai-Laa kpɔ ɓə dɔ́ɔ́ nwooɠaai tii kəlee ɓo mɛ̨nį ɓa, ə́ too ka wəlii.» 16 Nɔi ɲąąwooɓo nuą da nɔi lonnii kəlee, diɛ ɉaláá laa həli nuą da Yálá kwəi mɛ̨nį hukulɔ nuą diɛ: «Ɉulɔnui ŋɛ̨i hvo haa kwɛli li gbɔwɔ ɓa, Yai-Laa gu wɔ Yálái laa hu ɓə, ə hvaa laa.» 17 Nɔi hu hilɛ golo taɠaa di haŋą di tɔɔ, nuąi tii kɛ di ɲąąkpɔnŋaa laa, diɛ diɛ: 18 «Morɛsɛtə hulɔnui ŋɛ̨i kɛ a Mise, ə kɛi Yálá kwəi mɛ̨nį hukulɔ, a Ɉuda tɔɔmun Ezekiasə nwɔ yələi. Ə ta mo Ɉuda lɔi hu nuą kəlee diɛ, yɛ diɛ: Mɛ̨nį Kəlee ŋą Hééɓomun Yai-Laa woo ka, yɛ diɛ: «‹Di kaa pai Siɔn hin ɉii yɛ tíi, Ɉerusalɛmə kaa pai kɛi a pɛlɛ́ kpoloon buɔ pɛlɛ́ kpoloon mɛ̨i, ɛlɛɛ, ɲee ŋɛ̨i Yálá hee pɛlɛ́ tɔɔ nwuɔ̨, a lɛɛ a kpomo.› 19 «Ɉuda tɔɔmun Ezekiasə da nɔi lonnii di mɔ̨ɔ̨ haa? Kɛlɛi yaamun, di Yai-Laa ɓɛlɛ kɛ mą, di tɔɔ a di nwąnąąi, diɛ níilaa. Ɛlɛɛ, mɛ̨nį ɲąąnwąnąąi Yai-Laa aa kɛ naa gwəi yɛ kɛ ə naa diɛ, ə nɛɛ laa. Ya ka tii gu wɛi gu kaa pai gu tɔɔ pələ ɲɔ̨nwɔi kpɔ tɛ̨ɛ̨tɛ̨ɛ̨.» Di Uriahu paa 20 Hulɔnu takpɛli ə kɛ laa, ə ɓo a Semayahu lon diɛ kɛ naa ɓaa: Uriahu yɛ həɠə Kiriatə-Yearimə, ə kɛi pələ ɓo Yai-Laa laa hu. Ə wooɠaa ɓo yɛ hvilɛn na daai ŋɛ̨i da nɔi ŋɛ̨i ɓa, lɔ yɛ Ɉeremi wooɠaa. 21 Tɔɔmun Yoyakimə da nwɔ kɔ́kulááɠaai da galanɉonŋaai di nwooɠaai tii mɛ̨n. Tɔɔmun yɛ nui tii paa pələ kwɛli. Uriahu kili ə pu ɉu, ə ɲɔw, ə pu, ə li Eziptə lɔi hu. 22 Kɛlaa, tɔɔmun Yoyakimə ə nuą tɔɔ Akbɔrə lon Ɛlnatan da nu taɠaa, də li kpɔ Eziptə lɔi hu. 23 Di Uriahu kulɔ Eziptə lɔi hu, di paa la tɔɔmun Yoyakimə pɔ, yili ə baa, ə bowa pili kpɔnmąą kámą hu. 24 Ɉeremi nwɛi Safan lon Ahikamə nįnįn bɛlɛɛ kɛ mɛ̨i, yili ɓə gɛ di hvo doo nuąi kɛi baa pələ kwɛli di yeeŋa. |