Ɉeremi 25 - Yálá laawoo hɛɓɛ (dc)

Babilonə kaa a Yálá nwɔ hvaɠa

¹ Mɛ̨nįi di mo Ɉeremi ɓa, Ɉuda nuą kəlee laa mɛ̨i, Yoyakimə lon Ɉosiasə nwɔ tɔɔlaa gwɛlan nąąn nɔwai Ɉuda lɔi nwun na; nąąlɔwai Babilonə tɔɔmun Nabukodonosorə nwɔ tɔɔlaa gwɛlan dɔlɔɔ li kɛ, ya ka:

² Yálá kwəi mɛ̨nį hukulɔ mun Ɉeremi ə nwoo tii hukulɔ Ɉuda lɔi hu nuą da Ɉerusalɛmə daai nuą kəlee diɛ, yɛ diɛ:

³ «Ə həɠə Ɉuda tɔɔmun Ɉosiasə Amɔn lon nwɔ tɔɔlaa gwɛlan pow kɔ́w haaɓa yələ ɓa, ə həli la yiihu ɓa, aa kɛ kɛa a kwɛlan pow hveelɛ kɔ́w haaɓa, Yai-Laa a kɛ kpɔlɔɔ mɛ̨nį ɓoi mą́ą́, gɛ́ pa gɛ́ naa həli kaa, vįi hva kpɛɛ, kɛlaa, ka hvo ta ka wəli tɔɔ li nwóó ɓa.

⁴ Yai-Laa aa lɛɛ nwɔ tínuą, diɛi a gwəi mɛ̨nį hukulɔ nuą tɔɔi ka pɔ, vįi hvo ta kpɛɛ li, kɛlaa, ka hvo ta ka wəli tɔɔ li di mą, ka hvo Yai-Laa woo mɛ̨n.

⁵ Ə kɛi kɛ kaa: ‹Ka kəlee ka həɠə ka hiɛ pələ ɲɔ̨nŋaa pulu, da ka wɔ túwɔ́ pələ ɲɔ̨nŋaa, ya ɓə a gɛ, nɔi ŋɛ̨i Yai-Laa ə dɛɛ ka pɔ, ka ka nąnni, ka pɛli heei ɉu, kaa lɛɛ laa a yələ kəlee.

⁶ Ká hvo kɛ ka káá hvilɛn ɉii haliɠaa pulu, kaa tí diɛ, ɛlɛɛ, kaa kwɛli hvilɛn diɛ. 'Ká hvo kɛ ka káá nwą́ną lɔi a ka túwɔ́ pələ, və́ pa mɛ̨nį ɲɔ̨n naa káá.›

⁷ Yai-Laa yɛ diɛ: ‹Ká hvo ka wəli tɔɔ li nwóó ɓa, kɛlaa kaa mun, ka nííkələn gwə́i a ka túwɔ́ pələ, yili yɛ mɔ̨nɔ̨ laa kaa.›

⁸ «Yii gaa tii, Mɛ̨nį Kəlee ŋą Hééɓomun Yai-Laa woo ka, yɛ diɛ: Yii kpɔ ka hvo nwóó mɛ̨n ni,

⁹ gáá nuą tɔɔi, di ɲələi pələ lɔiɠaa kəlee ɲąąkpɔn nwɔ́ tí mun Babilonə tɔɔmun Nabukodonosorə yee mu. Ɲą́ą́ Yai-Laa nwóó li! Gáá nuą tɔɔi di pa di wolo nɔi ŋɛ̨i ɓa, da ɉu hee ɓo nuą kəlee, bɛlɛɛ gwɛlɛ lɔiɠaa kəlee diɛ. Gáá di kɛlɛi di paa pələ pɔ. Gáá nɔi mąąpənəi a lɔi pun a yələ kəlee, a mąą ɲɔw lɔi, a lɔi kpoloon.

¹⁰ Gáá kwəinɛ̨ɛ̨ da lono nɛ̨ɛ̨ kpɛɛi di pɔ lɔi, gáá hilɛtaa wələ, da dooɲəi wələ kpɛɛi, ə mą kɛ, kwənąi hiɲɛ tin, ŋį́ nwulɔ nwɔ̨n nuwun.

¹¹ Nɔi ŋɛ̨i naa kəlee kaa pai lɛɛi a kpomó, da lɔi pun. Ɛlɛɛ, ɉu nuą kəlee da kɛ Babilonə tɔɔmun ɲee mu əlɛɛɉu, kwɛlan bow mɛ̨ihveelɛ.

¹² «Gwɛlan bow mɛ̨ihveelɛi tii a tɛɛ, ŋį́ hee Babilonə tɔɔmun ɉu, di wɔ túwɔ́ pələ ɲɔ̨n mąą mɛ̨nį ɓa. Ŋą́ hee Kalde lɔi hu. Ɲą́ą́ Yai-Laa nwóó li! Ŋą́ nąą mąą pənə a lɔi pun a yələ kəlee.

¹³ Mɛ̨nįɠaa ŋɛ̨i gáá moi yɛ́, yɛ hvilɛn na nɔi ŋɛ̨i ɓa, yii kpɔ bɛ̨ɛ̨i hɛɓɛ hu, gáá gəlee kɛi yɛ bələi ŋą́ mo la. Mɛ̨nįɠaa kpɔ Ɉeremi ə di lɛɛ tɔwɔ yɛ mo, yɛ hvilɛn na nɔiɠaa tii diɛ, ŋį́ gəlee kɛ.

¹⁴ Diɛ kpɛli mąn, di kaa pai kɛi a luwɔɠaa, lɔi tamąą yee mu, da tɔɔɓɛlaa huwalawalaa yee mu. Ŋą́ di túwɔ́ pələ da di kɛ mɛ̨nį ɲɔ̨n gwələ kpɛ diɛ.»

Kiti tee kpələ kɔ́wɔ

¹⁵ Nwooi Yai-Laa Israɛlə nwɔ Yálá ə mo mą́ą́, ya ka, yɛ mą́ą́: «Nɔɔ gbamąi ŋɛ̨i hon ɲə́i, yai naahvɛɛ a nwɔ́ liiholi lɔɔ kpəɠiɛ; nɔiɠaai gáá ə́ tɔɔ di pɔ, ə́ dɔɔ di la.

¹⁶ Di kaa pai gbələi, diɛ tɔɔ la takpa-takpa, ɓɛlɔwai gáá pai kɔ́ kɔ́ ɓɔwa pilii la di lɔwai, da gaa yɛ di hu pu diɛ.»

¹⁷ Ŋą́ nɔɔ kɔ́wɔ tii hon Yai-Laa yəi; nɔiɠaa kpɔ Yai-Laa ə dɔ́ɔ́ di pɔɔli, ŋį́ dɔɔ gəlee la.

¹⁸ Ɉerusalɛmə taa, da Ɉuda taaɠaa, da nwɔ tɔɔɓɛlaa, da di wɔɔ kalanɉonŋaa; yɛ di kɛ a lɔi pun, a taa kpoloon. Nu ta a gaa hvo kɛli a tomą, yɛ nɛ̨ŋɛ̨n naa. Bələ kpɔlɔɔ ɓə gaa la yiihu.

¹⁹ Eziptə tɔɔmun, da nwɔ lɔi nwun nąmįną, da nɔi kalanɉonŋaa kəlee di kaa a nwɔ́ tí nuą.

²⁰ Voló tooi pələ kəlee, Usə lɔi dɔɔɓɛlaa kəlee, Filisti tɔɔɓɛlaa kəlee: Askelɔn, Gaza, Ɛkrɔn da nu kpəlii aa lɛɛ Asdɔdə;

²¹ Edɔmə, Moabə, Amɔn nuą;

²² Tirə tɔɔɓɛlaa kəlee, da Sidɔn tɔɔɓɛlaa da gboloyá pulu pələ lɔi hutɔɔɓɛlaa kəlee.

²³ Dedan nuą Tema nuą, Buzə nuą da nuąi kpɔ tii da di nwun galaan,

²⁴ Arabə tɔɔɓɛlaa kəlee, nu humɔɔɠaa di wɔ tɔɔɓɛlaa kəlee, diɛi tii heeni nɔi pun ɉu.

²⁵ Zimri tɔɔɓɛlaa kəlee, Elamə tɔɔɓɛlaa kəlee, Medi tɔɔɓɛlaa kəlee,

²⁶ ɲánwuɔ̨ pələ tɔɔɓɛlaa kəlee, kpuwɔ la nuą da kwɛa la nuą. Nu tɛitɛi yɛ lɛɛ mɛlan bulu. Lɔi mɛ̨i tɔɔɓɛlaa kəlee, diɛi kpɔ bɔlɔi ŋɛ̨i mɛ̨i. Ɛlɛɛ, Sesakə tɔɔmun a lɛɛ pulu a gbəlɛɛ.

²⁷ Ə́ kaa pai kɛi diɛ: «Yai-Laa Mɛ̨nį Kəlee ŋą Hééɓomun, Israɛlə nwɔ Yálá woo ka: ka ká kpələ kpɔ ə lɛɛ ɉu ə ka hon, kaa ɓaɠi, ka too ka hva pɛli ka muhəɠəi, gɔ́ kɔ́ ɓɔwai gáá pai bilii ka lɔwai ɲɛ̨i tɔwɔ.»

²⁸ Yɛ diɛ: «Da wala gɛ di hvo gbələ kɔ́wɔ hon ə́ yəi di hvo gbələ, kɛ diɛ: Mɛ̨nį Kəlee ŋą Hééɓomun Yai-Laa woo ka: Ə mą kɛ tii, ka káá pai gbələi lɔ.

²⁹ Gáá mɛ̨nį ɲąąnwąnąą tɛɛi, gáá gbala tɔɔi daai da Náá ɓo ɉu, mą. Ɛlɛɛ, káán ka nwun yɛ kulɔ ɉu, yili hva kɛ tii, gáá kɔ-kɔ ɓɔwa təlii yɛnɛ̨ɛ̨ nąą kəlee mɛ̨i. Mɛ̨nį Kəlee ŋą Hééɓomun Yai-Laa woo li.»

³⁰ Ɛlɛɛ, yɛ́, mɛ̨nįɠaai ŋɛ̨i kəlee hukulɔ diɛ, yɛ diɛ: Yai-Laa aa lɛɛ yələkɔlɔn ɉu yɛ tomą Aa lɛɛ nwɔ pɛlɛ́ mąąhəɠɛɛ mu, nwoo yɛ tɔɔ, gaa tomąi nwɔ lɔi pɔ yɛ tomą yɛ viɲə yá kulɔ nuą hvúluun nwoo, yɛnɛ̨ɛ̨ nuą kəlee pɔ.

³¹ Din gaa həlii lɔi kpon ɉeei, Yai-Laa a kiti pɛlɛ lɔiɠaa diɛ. Aa mɛ̨nį ɓo kpalatɔɔ, yɛ vilɛn nu kan gəlee ɓa, nuąi a kala diɛ, a di tɛɛ ɓɔwa kwɛa pɔ. Yai-Laa woo li.

³² Mɛ̨nį Kəlee ŋą Hééɓomun Yai-Laa woo ka, yɛ: Mɛ̨nį ɲąąnwąnąą a həɠə lɔi, ə li dakpɛli hu. Tulɔ hvaŋą kɛnɛ̨ a muhəɠə lɔi kpon ɉeei.

³³ Volói tii, ə həɠə nɔi kɔ́wɔ tɔɔi ə həli la naa kulɔi, nuąi Yai-Laa kaa pai di paai, di hvo pai di looi, di hvo pai di powa yɛɠɛi diɛ di loo, di kaa pai lɛɛi a tulun bɔlɔ lɔi mɛ̨i.

³⁴ Taatɛlɛɛ mɛ̨i kaa nuą! Ka gboo təli! Ka nu kwɛli kaa! Taatɛlɛɛ tɔɔ nuą, ka too nɔi ɓa, ka kiliɠilin; ka nwun deei lɔwai aa həli, di kaa pai ka ɲąąkwɛlɛi, kaa too yɛ haláá kulɔ ɓɛlaa hilɛɠaa.

³⁵ Taatɛlɛɛ mɛ̨i kaa nuą mąąkilɛi hvo kɛa mą, taatɛlɛɛ tɔɔ nuą looi hvo kɛa mą.

³⁶ Taatɛlɛɛ mɛ̨i kaa nuą gboo təli woo kaa tɔɔi, taatɛlɛɛ tɔɔ nuą tomą woo yɛ tɔɔ. Yai-Laa kaa daatɛlɛɛ laa mɛɛiɠaa hukalai.

³⁷ Gala tiliin nɛlɛɛ kɛɛnąąɠaa mɛ̨i a haa, Yai-Laa nwɔ líiholiiɓa.

³⁸ Di kaa lii yɛ yala kulɔ gwənąn ɉu, yɛ li, di wɔ lɔi aa lɛɛ a lɔi mąąwɛliɛ a kɔ́ kɔ́ ɓɔwaɠaa laa pɔɔ, níiholi kɛnɛ̨ pələ ɓa.