Ɉeremi 20 - Yálá laawoo hɛɓɛ (dc)Ɉeremi da ɉaláá laa həli mun Pasehurə 1 Ɉaláá laa həli mun Pasehurə, yai kɛ a Imɛrə lon, yaai kɛ a Yai-Laa nwɔ pɛlɛ́i ɲąąwooɓomun, ə Ɉeremi woo mɛ̨n, yɛ mɛ̨nįɠaa tii kəlee ɓo. 2 Pasehurə ə pɛlɛ Yálá kwəi mɛ̨nį hukulɔ mun ɓa a hvaa. Ə mo di Ɉeremi yili Bɛnɉamɛn nwɔ kpon ɓa, di doo kpɔ̨nɔ̨ ŋą, Yai-Laa nwɔ pɛlɛ́i laaləi. 3 Yili pulu, yələ ɓoɔ, Pasehurə ə pa Ɉeremi hvólóon mɛ̨nį ɓa, Ɉeremi yɛ mą: «Ə́ laa hvaa kɛa Pasehurə, Yai-Laa aa ə́ laa mąąhvalin a: ɲɔw bələ kəlee. 4 Mąąhɔlɔɓo, mɛ̨nį Yai-Laa kaa moi, ya ka, yɛ diɛ: ‹Ə həɠə háákələi ɓa, gáá ə́ kɛi a mąą ɲɔw hɛn, ə́ kpɔɔ kpinįi yɛ́, da ə́ ɓɛlaa ni diɛ. Diɛi tii di kaa pai lɛɛi a di yowoɠaa di wɔ kɔ́ kɔ́ ɓɔwa kɔ̨nɔ̨n, yɛ́i ŋɛ̨i yá kɛ a gɛla. Gáá Ɉuda nuą lɛɛi Babilonə tɔɔmun ɲee kɔ́nma, Babilonə tɔɔmun gaa pai di paai a ɓɔwa kwɛaa. 5 Daai hɛnŋaa kəlee, da nwɔ kóló dɔlɔ kəlee, ɉɛn kpɔ daai a mąą mɛ̨nį nwąnąą, da Ɉuda tɔɔɓɛlaa di wɔ hɛn gɔw kəlee, gáá gəlee tɛɛi di yowoɠaa pɔ. Di kaa pai tooi ɉu, diɛ di yɛɠɛ, diɛ li a diɛ Babilonə. 6 Ɛlɛɛ, yɛ́ Pasehurə, ka ə́ yəi bɛlɛ́n nuą kəlee ka káá pai lii kɔluwɔlaa hu. Ə́ kpinįi kaa həlii Babilonə, nąą ɓə ə́ kaa pai haai laa; A tɛ̨ą, nąą ɓə di kaa ə́ powa looi laa, yɛ́ ka ə́ ɓɛlaa kpɔ tii ə́ kaa lɛɛ kɛi diɛ, yɛ́ kɛ ə́ kaa mɛ̨nįi pai kɛi ɉukulɔi diɛ.›» Ɉeremi kilitɔɔ lɔ Yálá ɓa 7 Yai-Laa, yáá ɲą́ą́nɛnɛn, yáá ɉón a gbanalaa, Ɛlɛɛ, ɲą́ą́n, ŋą́ą́ gbɔ́ɔ́ lɛɛ laa yáá ɉón, wea mɛ̨nį kpɔ ɓə ə́ gɛ mą́ą́ mɛ̨nį hu; Ɛlɛɛ, mɛ̨nįi ə kɛ bɔ, ə́ yee aa pɛli mą. Da túwɔ́ lɔ yɛlɛ kulɔi ɉú, nu kəlee diɛ di laa pu ɉú. 8 Ŋą́ kɛi kɛ ŋį́ pələ ɓo, hvo kɛli ŋį́ nu təli mą́ą́, gɛ́ tomą, gɛ́ kɛ mą: «Too mɛ̨i da wea ɓə» Yai-Laa woo mąą mɛ̨nį ɓa, da túwɔ́ lɔ nálan ɉii, diɛ di laa pu ɉú. 9 Ŋą́ tɔɔ gɛ́ kɛ diɛ: «Vá kɛa náá tunwɔ̨n mą, vá kɛa mɛ̨nį ta ɓo naa hu.» Ŋą́ gɛ tii, yaamun, a hee ɉú pələ yɛ nwɔ̨n gbəɠiɛ, gánan ŋąą gɔ́w hu. Ŋą́ tɔɔ kpɔ a nwą́nąąi, gɛ́ kɛ ŋį́ ɉu hon, Kɛlaa vá pɛli mą. 10 Gáá nu kpulu nwɔ lalan nwoo mɛ̨n ɉii, ɲɔw kaa həɠəi pələ kəlee. Diɛ kɛ diɛ: «'Ká ɉɔn nwolo mą, ka gu ɉɔn doo mą.» Mɛ́laaɠaa kpɔ kwa diɛni ku kɛ yɛnɛ̨ɛ̨ ɓa, di kaa dóói lɔwai mąąhɛŋii, diɛ kɛ diɛ: «Gaa pai kiɛ gbɔwɔ lɛɛi laa di mowo yɛ nu tunun, gu yee a pɛli kɛa mą; guɔ kɛa gu nwąną kulɔ ma.» 11 Kɛlaa, kwa Yai-Laa ɓə ku tɔɔ, ya ɓə gaa a kɔ́kuláá kpəɠiɛɛ. Nuąi di hvilɛn ŋąą búlú, di kaa pai kalin ɉii, mɛ̨nįi di kaa gwɛ́lii la, di yee hvo pai pɛlii mą. Nwumɛ̨ kaa pai di ɲɛ̨i paai. Di yee hvo pai lɔi. Di ɓɛlɛ kaa pai tooi a yələ kəlee, di hvo pai lɛ̨ąi yili ɓa. 12 Yai-Laa Mɛ̨nį Kəlee ŋą Hééɓomun, yɛ́i ya tələnmomun mąąkpɛɛ, yɛ́ goo kpala mɛ̨nį, da gwəi kiliŋąhiɛ kaa. Ə́ nwąną kulɔ mɛ̨nį nuą ŋɛ̨i diɛ, gáá pai naa kaai. Mąąhɔlɔɓo, yɛ́ ɓə ŋą́ą́ mą́ą́ mɛ̨nį lɛɛ ə́ yee kɔ́nma. 13 Ka wələ too Yai-Laa ɓa, ka mąątɛ̨nɛ̨ wələ too, a mąąwɛli nuą nwun mąąɓo, nu ɲɔ̨nwɔ̨ɔ̨ɠaa yəi. Ɉeremi kaa nwoolaai 14 Volói di gáá la, volói tii nɛ̨ŋɛ̨n naa ɓə, volói néé ə gáá la, lúwɔ́ hvo mą. 15 Nui pa nwɛlɛɛ ɓoi ną́n ma, yɛ kɛ mą: «Yáá lon ɉulɔnu hɔlɔɓo.» Ɛlɛɛ, yili yɛ mąą kwəinɛ̨ɛ̨ kulɔ, mąą nu nɛ̨ŋɛ̨n naa ɓə. 16 Mąą nu ə kɛ yɛ daaɠaai Yai-Laa aa di wolo, yaai hva pənə bulu, gaa pai woo mɛ̨n ɉii yələwala pɔ, diɛ kɛ mą: «Ka pa kilɛ!» Yɛ kɔ́ too woo mɛ̨n a hvoló tɔɔ nwun ma; 17 Lə mɛ̨nį ɓa hvo kɛ báá li néé kwəi, néé ə kɛ a gáma, Mąąhɔlɔɓo, hvə li naa yɛɛ a ɲą́ą́. 18 Lə ɓə kɛ yaai, ŋį́ li kulɔi néé kwəi? Gɛ́ mɔ̨nɔ̨ da mɛ̨nį nwąnąą di kɔ́lɔn? Ŋą́ ɓo lɔ nwúmɛ mɛ̨nį hu, a yələ kəlee, yɛ hee ɉú? |