Ɉeremi 16 - Yálá laawoo hɛɓɛ (dc)

Ɉeremi nwɔ kwɛa laai ə kɛ ɉu

¹ Yai-Laa ə nwoo ŋɛ̨i ɓo mą́ą́, yɛ mą́ą́:

² Hvo kɛ ə́ kaa nɛ̨ą həɠəi, hvo lon ɉulɔnu da lon Nɛ̨ɛ̨nu, hvo da hɔlɔɓo gɛɛnąą ŋɛ̨i ɓa.

³ Gbalai tɔɔ, bələi Yai-Laa kaa hvaai la, lon ɉinąą, da lon nɛ̨ą, da di kaa lee, ə mą kɛ, di nąn diɛi nɔi ŋɛ̨i hu, mąą mɛ̨nį hu, bələ ka, yɛ:

⁴ Pulu kaa pai di mɔ̨nɔ̨ ɓoi, diɛ haa ɉu, di hvo pai wɔlɔi di powa mɛ̨i, di hvo pai kámą hɔlɔɓoi, di kaa pai lɛɛi nɔi mɛ̨i, di kɛ a tulun bɔlɔ. Kɔ kaa pai di paai, pulu ə di paa, di powa ə lɛɛ a yələi nwɛ̨nįɠaa da lɔwɔ huwɔɠaa kɔ̨nɔ̨n.

⁵ A tɛ̨ą Yai-Laa woo ka, yɛ diɛ: Pɛlɛ́i da di ŋąąkpɔn mu, diɛ haa wɔlɔ ɓo, 'hvó lɔ laa, hvó li haa mɛ̨i, hvó ə́ yee too di yəi a pələ lɔpee ta. Gbalai tɔɔ, nwun na nɛ̨ɛ̨i ŋą́ nuą ŋɛ̨i kɔ́ la, ŋą́ą́ pənə ŋą́ą́ gulɔ di yəi, di wɛli la kɛi ŋį́ mo, gɛ́ di ɲɛ̨imąąwɛli kaa yili aa kpɛɛ. Ɲą́ą́ Yai-Laa nwóó li!

⁶ Nɔi ŋɛ̨i hu nu kpɛa kpɛaa, da bɛlɛɛɠaa di kaa pai haai, di powa loo mun hva hɔlɔɓo, wɔlɔ woo hva tɔɔ di mɛ̨i; nu ta hva gbɔwɔ mąą ɓɛla, nu ta hva nwun gbəlaan mo.

⁷ Nui haa a too mą, di hva li bɔ a kɔ̨nɔ̨n. Ə mą kɛ, nee a haa, a wala kɛ tii, nąn a haa, di hva ɉaa lɔɔ pu.

⁸ Pɛlɛi nwɔ̨nɔ̨ di kaa hɛli pui mu, 'hvó li laa. Ka diɛni ka hvo ka yee lɔ kɔ́wɔ tɔ̨nɔ̨ hu, ka hvo lɔɔ kpələ gee ɓa.

⁹ Mąąhɔlɔɓo, mɛ̨nįi Yai-Laa Mɛ̨nį Kəlee ŋą Hééɓomun, Israɛlə nwɔ Yálá ə mo, ya ka, yɛ diɛ: Kwɛinɛ̨ɛ̨ kulɔ woo, yola kulɔ woo, da hvúlúlɔ wələɠaa, gáá pai gəlee kpɛɛi nɔi ŋɛ̨i hu, ka hvulú kɔ́wɔ ŋą, kaa kpinįi ka ɲɛ̨i kwələən ma.

¹⁰ Yá pa mɛ̨nįɠaa ŋɛ̨i kəlee ɓoi nuą tii diɛ, da kɛ yɛ́: «Lə mɛ̨nį ɓa, yaai, Yai-Laa ə mɛ̨nį nwąnąą taaləi tii kili tee gwəi, yɛ naa kuɔ? Kɛɛ lə kɛɛ ɓə ku gala?.»

¹¹ Da mo tii yɛ́, yá kɛ diɛ: Mąąhɔlɔɓo, ka nąnni di Yai-Laa lɛɛ laa, di hvilɛn ŋąą haliɠaa pulu, diɛ di mąąwiɛ, diɛ kwɛli hvilɛn diɛ, diɛ pɛlɛ di lííla. Nwɛ́i di lənə mą́ą́, di hvo nwɔ́ tíɓoɠaa lɛɛ li di kili pɔ.

¹² Yii ɓaa ka wɛi, ka túwɔ́ pələ ɲɔ̨nwɔ̨ɔ̨i dɛɛ ka nąnni di wɛi ɓa. Ka kəlee ka kanąn ŋąą ka wɔɔ túwɔ́ pələ ɲɔ̨n ma, ka hva ti, ka hvo ka wəli tɔɔ nwóó ɓa.

¹³ Yili ɓə gɛi, gáá ka kulɔi ɓɛ nɔi, ka li ɓɛi ka nąnni di hvo nąą kɔ́lɔn, ə mą kɛ kaa kpinįi ŋɛ̨i. Ka pa lii laa, ka káá lii kɛi haliɠaa mąąwiɛi laa a yələ kəlee, ɛlɛɛ, ka hva pɛli ka kilitɔɔi nwɔ́ wɛlikɛmąąlaa ɓa.

Nuą kaa həɠəi kɔluwɔlaa hu

¹⁴ Hvólóɠaa kaa pai həlii, di hvo kɛa pai kɛi diɛ: Yai-Laa tii Israɛlə nuą kulɔ Eziptə lɔi hu, gaa a vulú,

¹⁵ Kɛlaa, di kaa pai kɛi diɛ: Yai-Laa tii Israɛlə nuą kulɔ ɲələi pələ lɔiɠaa hu da nɔi kpɔ ə di taɠa taɠa gəlee hu, gaa a vulú. A tɛ̨ą, ŋą́ pənə ŋą́ pa a diɛ, nɔi ŋɛ̨i ŋą́ dɛɛ di nąnni pɔ ɉu. Ɲą́ą́ Yai-Laa nwóó li!

¹⁶ Yai-Laa yɛ diɛ: Gáá pai nu hɔ̨nwɔ̨lee kpɛ nuą tɛɛi, diɛ di hon, yili pulu, ŋą́ nu kpɛ loɉoɠaa tamąą tɛɛ, diɛ di kpɛ ɲeeɠaa kəlee tona, da ɲee kpu kpuɠaa kəlee nwuɔ̨, ə mą kɛ, gwɛni woloɠaa hu.

¹⁷ Ɲɛ̨́i kaa kpɔlɔɔ di túwɔ́ pələɠaa kəlee diɛ, da hva tɛɛ mą́ą́, di wɔ kiliŋąhiɛ ɲɔ̨nwɔ̨ɔ̨ ta lɔpee hvo loo li mą́ą́.

¹⁸ Daa nwɔ́ lɔi laa pu, a di wɔ túwɔ́ pələ ɲɔ̨n, da di kɛ nɛ̨ŋɛ̨nŋaa di gɛ, ə mą kɛ, a di wɔ hɛn mąąliɓiɛ powaɠaa, a gwɛ́lin nɔi laahvɛɛi di mo a di wɔɔ hɛn ɲɔ̨nwɔ̨ɔ̨ɠaa. Gáá nɛ̨ŋɛ̨n veelɛi tii mąą kwələ kulɔi diɛ.

Lɔiɠaa hɔn mąą pənə mɛ̨nį

¹⁹ Yai-Laa kaa a nóo kpɔlɔ, da mą́ą́kilɛi, ya ɓə ŋį́ li bɔ a mą́ą́wɛlii lɔwai, lɔiɠaa kaa pai pai ə́ pɔ, diɛ həɠə lɔi kpɔn ɉeei, diɛ kɛ diɛ: «Ɉɛnŋaa kɛ ku nąnni yəi a di kwɛlin, ə kɛ a kpɛli kpɛli, a kilikpɛɛgwəi hɛnŋaa, di yee hva lɔ mɛ̨nį ta ɓa.

²⁰ Akɛti nu a mɔ̨ɔ̨ pɛli yáláɠaa pɛlii a gbɔwɔ nwɔɔ? Ya pa, ɉɛnŋaa tii di hvo ɓaa yáláɠaa.»

²¹ Gáá kɛa pai kili tɛɛi di pɔ, gili tii pɔ pələ ɓə gáá nwɔ́ yee walawalalaa lɛi la diɛ, da gili kɔ́lɔn nąąlɔwai diɛ kɛ diɛ; náá ɓaa: «Yai-Laa.»