Ɉeremi 10 - Yálá laawoo hɛɓɛ (dc)

Yálá kpɔ-kpɔɔ da lɛɛ yáláɠaa

¹ Israɛlə nuą, nwooi Yai-Laa kaa moi kaa! Ka ka wəli tɔɔ mą.

² Yai-Laa yɛ diɛ: «Ka hvo ka hiɛ pələ kɔ́ɔn lɔi takpɛliɠaa di wɛi ɓa! Ka hvo ka kpɔɔ ɓowo a yələ kwəi hɛnŋaa. Lɔi takpɛliɠaa ɓə da di kpɔɔ ɓowɔ a yiliɠaa.

³ Ɉɛn lɔi takpɛliɠaa da ɲɔw mą, hvo a hɛn da; wulu ɓə da li di bɔn lɔwɛi, yɛlɛ kɛ mun ə ɉaɠa,

⁴ di hɛni ya, a wala kɛ tii, wali ya hiɛ mą; diɛ gbanwo gee ɓa a madalan da kwɛli kpuwɔ, ə gɛ hvo pa kɛ yɛɠɛ-yɛɠɛ.

⁵ Ɉaliɠaa tii, kaa yɛ nwɛ̨nį kpɛ gbala, a nwɛ̨nį mąą ɲɔw, hva hɛn da kɛ mą; di hva hvaa, di hva hiɛ, hvo kɛ li daa kɛi di kpəŋə. Ka hvo kpɔ tai ɲɔw ɉaliɠaa tii diɛ. Di hva pɛli mɛ̨nį ɲąą nwąnąą laai nu ɓa; di tɔlɔ hvo kpɛli diɛ nu ta ɓa.»

⁶ Yai-Laa! Nu ta hvo laa gulaa yɛ́! Ə́ kɛnɛ̨i, ə́ laa kɛnɛ̨i, Ə́ kɛ mɛ̨nį ɲɛ̨i kɛnɛ̨ɠaai ə́ di kɛ, mąą mɛ̨nį ɓa.

⁷ Gbɛɛ a pɛli niikpələi a yɛ́! Lɔiɠaa di wɔ tɔɔmun! Mąą nɛ̨ɛ̨ kilimąą nuą di hɔlɔɓo lɔi kəlee hu, di tɔɔ, lɔiɠaa hu, Kɛlaa, nu ta hvo laa yɛ ɓo yɛ yɛ́!

⁸ Nu kəlee, nu ta nwɔ kwɛni hvo kulɔ li ɉu, di kilimąą a pɛlɛ di hva mɛ̨nį ɲąą kaa, kili kpɛɛ gwəi hɛnŋaa ɓə nuą tii da kili kwɛli di yəi; di hva kili hɔlɔɓo.

⁹ Ɉaliɠaa tii da di mąą tí a wali kwɛli ya yii da həɠə la Tarsisə da hɛni ya, yii da ɉəɠə Ufazə yɛlɛ nuą ɓə da bɛli, da kwɛli yɔw nuą. Diɛ di mąą yili a həɠə kpɔlu, a wala kɛ tii pala həɠə. Ɉaliɠaa tii kaa lɔ a yɛlɛ nuą kɛ kóló.

¹⁰ Kɛlaa, Yai-Laa nwɛi, yaa ɓə a Yálá; yii gaa a vulú, yɛ ɓo a tɔɔmun a yələ kəlee. A níiholi, lɔi a kpɛlin, yɛnɛ̨ɛ̨ lɔi ta hva pɛli tɔɔi nwɔ liiholi tɔwɔ.

¹¹ Mɛ̨nįi mąąnɛ̨ɛ̨ ka mo diɛ, ya ka, ka kɛ diɛ: Ɲáláɠaa di hvo yələkɔlɔn da lɔi di pɛli, mąąnɛ̨ɛ̨ di həɠə lɔi mɛ̨i; di kulɔ yələkɔlɔn mu.

¹² Yai-Laa ɓə nwɔ huwalawala lɛ lɔi pɛli mɛ̨nį hu, ə́ yɛnɛ̨ɛ̨ hee kpəlin na kɛ a kili, ə́ yələkɔlɔn ɉu hvólóon a nwɔ mɛ̨nį kɔ́lɔn ŋąą.

¹³ Hvo gaai, yaa ɓə ya tiɛ̨ gee mɛ̨i yələ kwəi yɛ tulɔ kpinįnŋaa kulɔ lɔi kpon ɉeei, a ɉu wia, diɛ tɛ, yɛ ɲee ɓo diɛ, diɛ pu. Ya ɓə a hvaŋąɠaa kulɔ, ɓɛi a di pu laa gee mɛ̨i.

¹⁴ Nu kəlee daa tɔɔ lɔ tupɛɛ, di hva mɛ̨nį ta ɲąą kaa, diɛ nwumɛ̨ di wɔ haliɠaai di bɛli mąą mɛ̨nį ɓa. Ɉɛn mąąnįnįnŋaa tii kaa a lɛɛ, di nɔ̨ɔ̨ hvo di hu.

¹⁵ Ɉɛnŋaa tii kaa a kili kpɛɛ gwəi hɛnŋaa di kaa a yɛlɛ kulɔ ɉu hɛn, di nwun na a pili a Yálá nwɔ kiti tee yələ.

¹⁶ Kɛlaa, Ɉakɔbə nwɔ Yálái hvo tii; ya ɓə hɛn gəlee pɛli, Israɛlə ə ɓo a gwɛlin nɔi; naa ɓaa: Yai-Laa Mɛ̨nį Kəlee ŋą Hééɓomun.

Nɔi hu kala mɛ̨nį aa lɛɠɛ

¹⁷ Ɉerusalɛmə taa! Ə́ tiɛ̨ kəlee həɠə, daa ə́ mąą tinɛ̨n a kɔ́.

¹⁸ Yai-Laa woo li, yɛ diɛ: Yii hu nwɛi, gáá nuą kəlee kulɔi nɔi; gɛ hvilɛn di pulu kpɔ hɔɔlɛɛ, ə gɛ, di hvo pa lan ɲə́i.

¹⁹ Ə́ kə néé! Lə mɛ̨nį ɲąą nwąnąą ɓəi! Mɛ̨nįi aa gáá, ɉalə hvo mą. Ɲą́ą́i kɛi kɛ diɛ: Mɛ̨nįi ŋɛ̨i naa mą́ą́ hvo walawala li, bɛliɛ mu.

²⁰ Daa nwɔ pɛlɛ́i pu, daa bɛlɛ hɔlɔɔn gəlee kulɔ, nónnii-o nwɔ́ taatɛlɛɛɠaai-o, dɔ̨nɔ̨ kpɛli hvo kɛa laa; nu hvo mą́ą́, hvo nwɔ́ pɛlɛ́i tɔɔ; hvo nwɔ taa kɔ́wɔ hvilɛn!

²¹ Daatɛlɛɛ mɛ̨i kaa nuą daa gɛ a kilikpɛɛgwəi laa Di hvo Yai-Laa ɲɛ̨ilaa kwɛli li, yili mąą mɛ̨nį ɓa di yee hvo lɔ li, ə lɛɛ daatɛlɛɛ kəlee daa taɠa.

²² Ka ka wəli tɔɔ din ŋɛ̨i ɓa; gaa yɛ nu kpulu kɛnɛ̨, di kaa həɠəi ɲanwuɔ̨ pələ, di kaa pai Ɉuda taaɠaa mąą pənəi a pun. Naa ə lɛɛ a góɓəɠaa pɛlɛi.

Ɉeremi kaa Yálá hvɛlii nɔi mąą mɛ̨nį ɓa

²³ Yai-Laa! Gíli kaa ɉu, gɛ́: Nu kanŋaa di hva pɛli di kpɔɔ tənən dɔɔi, yɛ bələi mąąnɛ̨ɛ̨ la. Di hvo kpɛli pɛli li di kpɔɔ kɔ́wɔ hvilɛn ɉi kili ɓoi.

²⁴ Ɉútɔɔ, Yai-Laa, Kɛlaa bɛli mą́ą́; hvó gɛ a liiholi, ə gɛ hvó pa ɉú kala.

²⁵ Yai-Laa! Ə wɔ liiholi ɲąątɔɔ nuą tii di hvo ə́ kɔ́lɔn diɛ; a diɛi tii di hva ə́ təli a ə́ laa; gbalai tɔɔ di kaa Ɉakɔbə mįi. Di kaa ɉuwu kpɛɛi, diɛ nwɔ lɔi hukala.