Izikiɛ 3 - Yálá laawoo hɛɓɛ (dc)

¹ Yɛ mą́ą́: «Hulɔnu lon, ɉon 'ə́ mįi, ɉɛɓɛ́ yilii ŋɛ̨i mįi; yili pulu, ə́ li ka ə́ pələ́ ɓo Israɛlə nwɔ pɛlɛ́i mu nuą diɛ.»

² Ŋą́ náá taɠa, ə ɉɛɓɛ́ lɔ ná, ŋą́ mįi;

³ yɛ mą́ą́: «Hulɔnu lon, ɉɛɓɛ́i ti ŋą́ dɛɛ ə́ pɔ, mįi ə́ pilɛ ɉu, ə́ ə́ koo laahvɛɛ la.» Ŋą́ mįi; nɛ̨ɛ̨ ná, yɛ kwɛin nwulɔ.

⁴ Yɛ mą́ą́: «Hulɔnu lon, 'li ə́ həli Israɛlə nwɔ pɛlɛ́i mu nuą diɛ, ə́ nwóóɠaa laa həli diɛ.

⁵ Hvo gaai, və́ ə́ tɔɔi nu huwui vaa woo hu kpinɛ̨ɛ̨, mɛ̨n naa walaa bɔ; ya ɓaa a Israɛlə nwɔ pɛlɛ́i.

⁶ Nu huwu tamąą hvə gáá ə́ tɔɔi bɔ, di laa woo hu kpinɛ̨ɛ̨, mɛ̨n naa walaa; diɛ kɛ hvo pai di laa woo mɛ̨n ɉi; ɛlɛɛ mun hɔlɔɔ, ŋą́ ə́ tɔɔ kɛ yiliɠaa pɔ, kɛlɛ di li kɛ di wə́li tɔɔ ə́ woo ɓa?

⁷ Kəlɛɛ Israɛlə nwɔ pɛlɛ́i hvo pai nwəli tɔɔi ə́ woo ɓa, gbala ə tɔɔ, di hvo bɔ di hvo di wəli tɔɔ nwóó ɓa; mąąhɔlɔɓo Israɛlə nwɔ pɛlɛ́i kəlee nwun ɉu wala walai, gili wala walaa.

⁸ Kɛlaa gáá ə́ ɲɛ̨i wala walai lɔ yɛ diɛ, ŋą́ ə́ nwun ɉu wala wala, yɛ diɛ.

⁹ Gáá ə́ nwun ɉu wala walai yɛ kúwɔ-kwɛni, ŋą́ nwala wala ə tɛɛ kwɛni ɓa; 'hvó ɲɔw diɛ, ə́ mąą hvo kpɛlin di ɲɛ̨i ɓa; kulɔ nwoo mu nuą li.»

¹⁰ Yɛ mą́ą́: «Hulɔnu lon, nwooɠaai kpɔ gáá moi yɛ́, ə́ wə́li tɔɔ diɛ, di lɛɛ ə́ kili pɔ.

¹¹ 'Li ə́ həli gɔluwɔɠaa diɛ, ə́ huwu hu nuą diɛ, pələ ɓo diɛ. Di mɛ̨n-oo, di hvo mɛ̨n-oo, kɛ diɛi: ‹Yai-Laa Hééɓo kəlee Nąmu woo li.›»

¹² Nąąlɔwai Yálá nwɔ Kilii ə gbə́ŋə; ɛlɛɛ ŋą́ tomą wóó kɛnɛ̨ ta mɛ̨n búlu pələ, woo kɛnɛ̨ ta yɛ mą́ą́: «Mąąwiɛ ə kɛ Yai-Laa kɛnɛ̨ pələ ɓa ɓɛi gaa laa!»

¹³ Yili pulu ɉɛn vulúmąąɠaa koonŋaa tin di kɛi hee di kee ɓa, da ɉɛn giliɠilin gɛɛɠaa tin, tin da yɛ tɔɔ lɔ nwɔ̨nɔ̨ da tomą woo ta.

¹⁴ Yálá nwɔ Kilii ə gbə́ŋə́ nwɔ̨nɔ̨ ə li a ɲą́ą́ nąąlɔwai; ŋą́ kɛi li, níí ɲąą nwąnąą gwə́i, níí holiɛ kɛ, Yai-Laa yee pɛlɛɛi kɛ mɛ̨́i kpɔ a nwala wala.

¹⁵ Ŋą́ həli gɔluwɔɠaa diɛ, Tɛlə-Avivə, nuąi ti kɛ Kebarə yá kwɛlɛ di pɔ. Gbala ə tɔɔ, nąą ɓə di həɛ ə kɛ laa. Ŋą́ hvóló mɛ̨ihveelɛ kɛ laa di lɔwai, ŋą́ ɓo lɔ tupɛɛ.

Ezekiɛlə kaa pai kɛi a kɔ́-nɛ̨nɛ̨ɛ̨n naa mun

¹⁶ Voló mɛ̨ihveelɛ kulaa ɉu, Yai-Laa woo ə həli mą́ą́, yɛ mą́ą́:

¹⁷ «Hulɔnu lon, gáá ə́ tɔɔi yɛ kɛɛnąą mąąhɛn mun, Israɛlə nwɔ pɛlɛ́i mąą mɛ̨nį ɓa; yá woo ta mɛ̨n, yɛ həɠə ná, mąąnɛ̨ɛ̨ ə́ di kili pu ɉu náá hu.

¹⁸ Ŋą́ kɛ nu ɲɔ̨nwɔ̨ɔ̨ ɓa: ‹Ə́ kaa pai haai!› Ɛlɛɛ, yá wala gili pu ɉu, yá wala hvaa nu ɲɔ̨nwɔ̨ɔ̨i ti pɔ, yɛ́ gili ɲą pɔ̨nɔ̨ la ti ɲee kulɔ mɛ̨nį ɓa nwɔ tuwɔ pələ ɲɔ̨n ɉu, yɛ pɛli lɛɛi la yɛnɛ̨ɛ̨, mąą nu a haa, a nwɔ nɛ̨ŋɛ̨n laa pɔɔ; kɛlaa yɛ́ ɓə gáá pai ɲąmą wulu lɛɛi ə́ nwuɔ̨.

¹⁹ Kɛlaa, yá nu ɲɔ̨nwɔ̨ɔ̨ kili ɲą pɔ̨nɔ̨, ɛlɛɛ, a wala bulu tɔɔ nwɔ kili ɲɔ̨nwɔ̨ɔ̨i ɓa, da nwɔ tuwɔ pələ ɲɔ̨n, yai ti ɓə pai haai a nwɔ nɛ̨ŋɛ̨n laa pɔɔ, kɛlaa ə́ wɛi, yá kulɔ ɉu nɛ̨ŋɛ̨kpɛlɛɛ.

²⁰ Tələnmomun a bulu tinɛ̨n ŋą tələnmolaa ɓa, yɛ hvulu mɛ̨nį kɛ, gáá pai gɛi ə kalin; gaa pai haai; gili ɲą pɔ̨nɔ̨i hvó pai moi, yili ɓə pai gɛi yɛ haa la a nwɔ nɛ̨ŋɛ̨nŋąąi, dələnmo yíi ə mo, di hvo kɛa pai di kili lɛɛi ɉu; kɛlaa, yɛ́ ɓə gáá pai ɲąmą wulu lɛɛi ə́ nwuɔ̨.

²¹ Kɛlɛɛ, ya tələnmomun gili ɲą pɔ̨nɔ̨, dələnmomun ti hvo pa nəi nɛ̨ŋɛ̨n ɉəɠə; ɛlɛɛ yaan hva nɛ̨ŋɛ̨n ɉəɠə, gaa pai lɛɛi yɛnɛ̨ɛ̨; mąąhɔlɔɓo di gili ɲą pɔ̨nɔ̨, yɛ́ kpɛlimąn, yá kulɔ ɉu nɛ̨ŋɛ̨kpɛlɛɛ.»

Yálá ə Ezekiɛlə laa kpulu a lɔwai ta

²² Nąąlɔwai Yai-Laa yee ə kɛ lɔ nwɔ̨nɔ̨ mɛ̨́i; yɛ mą́ą́; «'Ə́ muhəɠə, 'li, ɲɛɛkɔwɔ hu, ŋą́ mɛ̨nį ɓo laa yɛ́.»

²³ Ŋą́ múhəɠə, ŋą́ li ɲɛɛkɔwɔ hu; Yai-Laa mąąɲįnɛ̨n ə kɛ laa, lɔ yɛ bələi, ŋą́ mąąɲįnɛ̨n gaa la Kebarə yá kwɛlɛ; ŋą́ pɛlɛ nííɓa, nɔi ɓa.

²⁴ Yálá nwɔ Kilii ə too ɉú, ə ɉáŋán ə dɔ́ɔ́; ə mo mą́ą́, yɛ mą́ą́: «'Lɔ́ ə́ yəi bɛlɛ́n, ə́ naa kpulu yɛ́;

²⁵ Hulɔnu lon, Ə́ wə́li tɔɔ, nuą kaa pai yɛli pɛlɛi yɛ́, di ə́ yili la, ɛlɛɛ, hvá kɛa kulɔ di lɔwai.

²⁶ Gáá pai ə́ nɛn ganąn ɉii ə́ la; ə́ kɛ a muugbɛ, 'hvó pai kɛa pai di hɔn moi diɛ; mąąhɔlɔɓo kulɔ nwoomu nuą li.

²⁷ Kɛlaa ŋą́ pa mɛ̨nį ɓoi yɛ́, ŋą́ gɛ ə́ laa ə hvaa, yɛ́ kɛ diɛ: Yai-Laa ka wɔ Yálái woo ka, yɛ; nui yɛ ə nwəli tɔɔ, ə nwəli tɔɔ; nui hvo bɔ hvo nwəli tɔɔ, hvo nwəli tɔɔ; mąąhɔlɔɓo kulɔ nwoo mu nuą li.»