Ikilisiati 1 - Yálá laawoo hɛɓɛ (dc)

Mɛ̨nį kəlee kaa a kpɛli-kpɛli

¹ Davidə lon ɉulɔnu, yai kɛ a Ɉerusalɛmə tɔɔmun, yɛ ɓo a Kilimąą mun, vaa woo ka, yɛ mą:

² kpɛli-kpɛli mɛ̨nį da kpɛli-kpɛli mɛ̨nį, kilimąą mun nwoo li, mɛ̨nį kəlee kaa lɔ a kpɛli-kpɛli mɛ̨nį.

³ Yɛnɛ̨ɛ̨ nuą da kóló walawalaɠaa kɛ, Kɛlaa, tɔlɔ lə kɛɛ kpɔ ɓə da ɉɔlɔɓo ɉu?

⁴ Həɠə gee pɔ yii kaa lɔ tɛɛi, həɠə gee pɔ takpɛli yɛ pa; Kɛlaa, yɛnɛ̨ɛ̨ kɛ pələ mąą hva hvalin.

⁵ Hvóló a muhəɠə, hvóló ə li ə too. Yili pulu, ə gɔwɔ mąą hulɔ, ə pənə yɛ li ɓɛi nəi ə həɠə laai.

⁶ Hvaŋą a tɛɛ ə yɛɛ hɛɠɛɛ, ə tɛɛ ə tɛ yánwuɔ̨ pələ, ə pənə ə tinɛ̨n; yili pulu, ɓɛ pələi ə həɠə la, ə pənə yɛ li nąą pələ.

⁷ Yá kpɛa-kpɛaɠaa kəlee da li di pu gboloyá ɓa, Kɛlaa, gboloyá hvo ta hvɛɛ li. Yá kpɛa-kpɛaɠaa kəlee da kɛ lɔ lii pələ tɔ̨nɔ̨ pɔ, di hva tɔɔ, diɛ li kɛɛnąą tɔ̨nɔ̨.

⁸ Bələi yɛnɛ̨ɛ̨ hɛnŋąą kaa la kóló ɓa, nu hva pɛli gəlee hukulɔi. Ɲɛ̨ikɔw hvį hva kpɛɛ kɛɛ kaai, wəli hvįi hva kpɛɛ mɛ̨nį mąn ɉi.

⁹ Mɛ̨nįɠaai gu kaa gaai yiihu, yaa lɔ ɓə pai kɛi nwɔ̨nɔ̨; mɛ̨nįi aa tɛɛ yaa lɔ nwɔ̨nɔ̨ pai kɛi. Mɛ̨nį ta hvo a nįnɛ̨ yələkɔlɔn mu.

¹⁰ Akɛ mɛ̨nį ta a kɛ laa, guɔ kɛ mą: «Mɛ̨ni nįnɛ̨ ɓaa a yii!» Gu mo kpɔ a tɛ̨ą, mɛ̨nį tɔ̨nɔ̨i tii aa wɔlɔ kɛ li, ɓɛlɔwai gu hvo kɛ la yɛnɛ̨ɛ̨.

¹¹ Kɛlaa, mɛ̨nįɠaai wɔlɔ gu kalaɓɔlɔni di kɛi gɛ, gwaa lɛ̨ą yiliɠaai diɛ. Nuą nwɔ̨nɔ̨ pai di muhəɠəi pulu ɓa, di pulu nuą di hvo pai di kili lɛɛi di tɔ́wɔ́ pələ hu.

Kilimąą mun nwɔ yɛnɛ̨ɛ̨ hu mɛ̨nį

¹² Ɲą́ą́ Kilimąą mun, ŋą́ tɔɔlaa kɛ Israɛlə nu huwu nwun na Ɉerusalɛmə.

¹³ Mɛ̨nįɠaai da kɛ tɛɛi yələkɔlɔn mu, ŋą́ gəlee mąąkpɛɛ kpɔ a nɛlɛɛ, a nwɔ́ kili mɛ̨nį, əgɛ, ŋą́ di kɛ mɛ̨nį nwun gɔlɔn. Kɛlaa, yili kaa a líihɛlɛn da yii Yálá a doo nu lonnii diɛ.

¹⁴ Mɛ̨nįɠaai kpɔ da tɛɛ ɓɛ lɔi mɛ̨i, ŋą́ gəlee kaa. Kɛlaa, gəlee kaa a kpɛli-kpɛli mɛ̨nį, yɛ nu a kɛi hvaŋą tənən dɔɔ.

¹⁵ Mąąhɔlɔɓo, hɛn gbinįn ŋąą, nu hva pɛli ɉaŋai, hɛn hvo yɛnɛ̨ɛ̨, nu nwɔ kiliŋąhiɛ hva hvilɛn mą.

¹⁶ Ŋą́ kɛ gbɔwɔ ɓa: Ɲą́ą́ ka, ŋą́ą́ kɛnɛ̨, ŋą́ą́ kili hɔlɔɓo; ŋą́ą́ tɛɛ dɔɔɓɛlaa yiiɠaa kpɔ daa tɛɛ dɔ́wɔ́, ɓɛ Ɉerusalɛmə diɛ. Yaan, nwɔ́ mɛ̨nį kɔ́lɔn ŋąą, da gíli ə kɛnɛ̨ yɛnɛ̨ɛ̨ mɛ̨nį kɔ́lɔn ŋąą hu a neelee.

¹⁷ Ŋą́ hvilɛn gbɔ, gɛ́ diɛ: Ŋą́ mɛ̨nį kɔ́lɔn ŋąą da ɓowo mɛ̨nį di kulɔ nɔwai kɔ́lɔn; ŋą́ kili mɛ̨nį, da kilikpɛɛgwəi, di kulɔ nɔwai kɔ́lɔn. Kɛlaa, ŋą́ yili kaa lɔ yɛ nu aa kɛi hvaŋą tənən dɔɔ.

¹⁸ Tɛ̨ą li, yaan, mɛ̨nįɠaai nu aa tɛɛ ɉu yɛnɛ̨ɛ̨, bələi lɔ damąąi la, bələ lɔ ɓə, nu nwɔ liihɛlɛn a tamą la. Bələi lɔ nu nwɔ mɛ̨nį kɔ́lɔn ŋąą a kɛnɛ̨ la, bələ lɔ ɓə nwɔ liikələn gwəi a kɛnɛ̨ la.

« Vorige

Bible Society in Guinea-Conakry

Volg ons:

Geborgde skakels

Advertensies