Ifisiɛŋ 6 - Yálá laawoo hɛɓɛ (dc)Lon da gaa-nuą 1 Lɛapɛlɛɛ, 'ká lɛɛ ká kaa-nuą woo mu, gu Nąmu nwɛi hu, yili ɓə ɉaŋąą. 2 Ə nąn da ə́ lee di mąąwiɛ, dɔn dɔlɔɔ ka tii, mɛ̨nį laakwɛlanmoɔ ə ɓo bɔ, ya ɓaa: 3 Əgɛ, yɛ́ pɛli nwun na nɛ̨ɛ̨, da yíipɔɔ hɔlɔɓoi yɛnɛ̨ɛ̨. 4 Káái a lon gaa-nuą, 'ká hvo ká lonni hon a di liikələn bələ di kwəi. Kɛlaa, 'ká di kulɔ ɉu, káá di hutɔɔ, 'káá di liɛwoo kɛ a wooɠaai a həɠə gu Nąmu pɔ. Luwɔ da luwɔ-nąmu 5 Luwɔɠaa, ká nąmįnąi di kaa ɓɛ lɔi mɛ̨i, 'ká lɛɛ ká woo mu a ɲɔwmąąlaa da mąąkpɛlin, a ká kwəi kwɛlɛɛ, yɛ ká kɛli gɛ Kristə ɓa; 6 'ká hvo gɛ lɔ mąąhɔlɔɓo, di ɲɛ̨i kaa káá, yɛ ká kɛli ká nɛ̨ɛ̨i kwɛli nuą hu, kɛlaa, ká gɛ yɛ Kristə ŋą luwɔɠaa, diɛi da di mąą hulɔ diɛ Yálá liiɓa kɛ. 7 'Ká tí a ká kwəinɛ̨ɛ̨, yɛ ká kɛli tí gu Nąmu ɓa, ká hvo tíi nuą diɛ. 8 Gbaɠala kaa ti káá, káá; mɛ̨nį lɛlɛɛi nu tɛitɛi kaa pai gɛi, gaa pai kwiɛn ɉii la gu Nąmu kwɛlɛ, ə́ kɛ a luwɔ-o, ə́ kɛ a lii gbɔwɔ ɓamun. 9 Káái nwɔ̨nɔ̨ nuą kaa ká yee kɔnma, 'ká gɛ lɔ tii a diɛ. 'Ká haŋąmąą mɛ̨nį kulɔ ká lɔwai, ká kili kaa ɉu káá, diɛmąn-o, káámąn-o, ká nwun nąmu kaa yələi pələ, ɛlɛɛ, nwɛi, hva nu huyɛɠɛ. Laa na laa ŋą kɔ 10 Nwóó laa kulɔ woo ka, ká gu Nąmu ŋą huwalawalalaai kɛ a ka mąąkɔ̨nwɔ̨ kwɛli hɛn, yai vaŋą kɛnɛ̨. 11 'Ká Yálá ŋą kuláá hɛnŋaa kɛ káá, káá pɛli tɔɔi la nąnį ŋą ɲąąhɛn mɛ̨nįɠaa kəlee tɔwɔ 12 Nu kan hvə gu kaa kɔ pɛlɛi mą, kɛlaa, ɲɛnɛ̨ɛ̨ hu kpiniɛ ŋɛ̨i ɲąąwooɓo kili, ɉu hvaŋą, ɉu heeɓolaai tɔɔlaa kɛi, mɛ̨nį ɲɔ̨n gɛ kiliɠaai di kaa yələ kwəi, diɛ ɓə. 13 'Ká Yálá ŋą kuláá hɛnŋaai həɠə kani, ə gɛ, ɲələ ɲɔ̨nwɔ̨ɔ̨ a həli, káá pɛli tɔɔi na, káá kpɛɛ kɛa a mɛ̨nį kəlee kɛɛ, káá lɛɛ tɔɔni. 14 'Ká həɠə kani kɛa ká tɔɔ! 'Ká tɛ̨ą kɛ a ká hɛ̨ą-yili-kɔlɔ, tələnmolaa ə kɛ a ká kəɠə mɛ̨i həɠə, 15 ɛlɛɛ, ká kɔwɔ-ɲą-kɔlɔ ə kɛ a Liilaa wɛlɛɛ lɛlɛɛ laa həliɛ mąą lii. 16 'Ká laa na laa həɠə, ə kɛ a ká wɔɔ hə́mə́, yili ɓə pai gɛi káá kpɛ̨ąn na Gbąnąmun ŋą mɛ̨ɛ̨kɔw ɓáɠaaɠaa tɔwɔ. 17 'Ká nwun mąąɓo ɓɔlɔ lɔ, ká Kili-Mąąhəɠɛɛ ŋą ɓowa kwɛaai həɠə, yai a Yálá laa woo. 18 Gɛ Kili-Mąąhəɠɛɛ ə hvɛli woo kɛ pələ huwui lɔpee gəlee lɔ ká la, da nɛ̨ɛ̨mąą hvə woo mɛ̨nį kəlee hu, káá lɛɛ a ká ɲɛ̨i, káá Yálá hvɛli Kristalɛa kəlee diɛ. 19 'Ká Yálá hvɛli ɲą́ą́ kpɛlimąn mą́ą́, nwɛlɛɛ lɛlɛɛi mɛ̨n naa walaai ŋɛ̨i, naa həli woo ə tɛ ná, gɛ́ naa həli la a ɲɛ̨i ponolaa, 20 yai mąą kɛla ɓaa a ɲą́ą́, gɛ́ ɓo la yɔwɔn ɲą, 'ká Yálá hvɛli, ə gɛ, gɛ́ pɛli naa həli a kili la tee, yɛ bələi mąąnɛ̨ɛ̨i ŋą́ gɛ la. Yələ wala too woo 21 Gáá bɔ ká kili ə kɛ ɉu káá kpɛlimąn, bələi mą́ą́ mɛ̨nį kaa la, yii gáá gɛi, gu nąn non Tisikə, yai a gu Ną́mu ŋą tímun a kulɔ nwoo ɓa, nwɛli yɛ ɓo mą́ą́, gaa pai mą́ą́ mɛ̨nį kəlee hukulɔi káá. 22 Ŋą́ giliɓo, ŋą́ dɔɔ ká pɔɔli, ə gɛ, ɓɛi ku kaa laa, ə ɉukulɔ káá, ɛlɛɛ, ə ká hvaŋąlɔ. 23 Liilaa ə kɛ nąn nonnii diɛ, wɛlikɛmąąlaa da laa na laai, da həɠə gu Nąn Yálá da gu Ną́mu Jesus Kristə di yəi, di kɛ ká pɔ. 24 Nuąi kpɔ gu Nąmu Jesus Kristə wɛli kaa diɛ ɲɛ̨n deei hvo mą, Yálá ŋą nɛ̨ɛ̨laai ə kɛ di kəlee diɛ. |