Ifisiɛŋ 5 - Yálá laawoo hɛɓɛ (dc)

¹ 'Ká Yálá pɔɔ kɔɔn, hvo gaai, ká káá a nwɛlikɛmąą lonnii;

² 'Ká ɲɛnɛ̨ɛ̨ kɛ wɛlikɛmąąlaa hu, yɛ bələi Kristə ə gu wɛlila kɛ la, ə gbɔwɔ kulɔ a halaa, mąą kun nɛ̨ɛ̨ Yálá ɓa, gu mąą mɛ̨nį ɓa.

³ Túwɔ́ pələ ɲɔ̨n, mąąliɓi mɛ̨nį huwui lɔpee, hɛn nwɛli laa, di mąą hvo kpɛli nɛ̨ɛ̨li ká lɔwai, ka ka yee kulɔ yiliɠaai hu, ya ɓə a mąąhəɠə nuą mąą hon.

⁴ Mąą hvo kpɛli nɛ̨ɛ̨li, lono ɲɔ̨nwɔ̨ɔ̨ɠaa, kili kpɛɛ gwəi lonoɠaa di hvo kɛ ká la, yili hva ká mąą hon; káámun, ká yee ə kɛ lɔ, Yálá hɛɠɛɛɓo mɛ̨nį hu.

⁵ Mąąhɔlɔɓo, ká kili ə́ pu ɉu, yáámun, káá, wɛlikɛ nuą, mąąliɓi túwɔ́ ɓo nuą, hɛn nwɛlilaa yai gaa a kwɛli hvilɛŋąą hali ɓa; mąą nuą di wɔɔ nąą hvo Kristə da Yálá di wɔ tɔɔlaai hu.

⁶ Nu ta hvo ka ɓowo a ká kili ɲąą pɛlɛ wooɠaa, yili kəlee ɓə a pa a Yálá ŋą liiholui, nuąi da di nwun gulɔ ɲee mu di mɛ̨i.

⁷ 'Ká hvo too di pɔ.

⁸ Tɔlɔɔ yələ, ká kɛ a kpinį, kɛlaa, yiihu, káá kɛ a kɛɛ pono gu Nąmu hu. 'Ká ɲɛnɛ̨ɛ̨ kɛ kɛa, a kɛɛ pono lonnii di wɔɔ yɛnɛ̨ɛ̨ kɛ pələ.

⁹ Ɛlɛɛ, kɛɛ pono ɓá ɓaa: Lii nɛ̨ɛ̨ gwəi laa, tələnmo laa da tɛ̨ą.

¹⁰ Mɛ̨nįi a nɛ̨ɛ̨ gu Nąmu ɓa, 'Ká yili kwɛli a yɛlɛ.

¹¹ 'Ká hvo ká yee too kpinį kólóɠaa hu, diɛi di tɔlɔ hvo diɛ, 'káámun, 'ká di too pono ɲą.

¹² Mɛ̨nįi nuą tii da gɛ loo pələi, bələ ɓoɔ kpɛli kpɛli kaa a nwumɛ̨ mɛ̨nį.

¹³ Kɛlaa, mɛ̨nįi bulu aa kulɔ, doo hiɛ li pono ɲą;

¹⁴ gbala ə tɔɔ, mɛ̨nįi aa doo pono ɲą, kɛɛ pono li. Yili ɓə gɛ, da kɛ mą: «Yɛ́i ŋɛ̨i yįi, 'nwún, ə́ muhəɠə 'ə́ kulɔ haa nuą lɔwai, ɛlɛɛ, Kristə kaa pai ə́ mąą ponoi.»

¹⁵ 'Ká ká yíi pələ mąą kpɛɛ a nɛlɛɛ, 'ká hvo túwɔ́ yɛ kilikpɛɛɲəi-nuą, kɛlaa yɛ kilimąą nuą;

¹⁶ diɛi, da yiihu yɛnɛ̨ɛ̨ ŋɛ̨i dɔlɔ hɔlɔɓo, mąąhɔlɔɓo hvóló ɲɔ̨nwɔ̨ɔ̨ɠaa kaa hɔɔi gu mɛ̨i

¹⁷ Yili ɓa, 'ká hvo gɛ yɛ nuąi di hvo mɛ̨nį kɔlɔn, kɛlaa, ká tɔɔ a ká nwąnąi, ká kɛ a gu Ną́mu liiɓa kɔlɔnŋąą.

¹⁸ 'Ká hvo kɛ a lɔɔ hon, a nu nwun na pili, kɛlaa, 'ká pilɛ a Yálá nwɔ Kilii.

¹⁹ 'Ká kɛ Yálá mąątɛ̨nɛ̨ wooɠaa ɓoi gee ɓa, 'káá Yálá laa tɛ wələɠaa too, da kalan nwələɠaa, 'ká kɛ wələɠaa tooi káá gu Nąmu laa tɛ la, a ká lii kəlee.

²⁰ Yələ kəlee, mɛ̨nį kəlee hu, 'ká Nąn Yálá hɛɠɛɛɓo, gu Ną́mu Jesus Kristə laa hu.

Nɛ̨ɛ̨nu da Ɉilɛ

²¹ 'Káái kpɔ ká ɲɔw Kristə ɓa, 'ká lɛɛ ká keeni woo mu a mąąwiɛlaa.

²² Nɛ̨ąą, 'ká lɛɛ ká hilɛni woo ɲą, yɛ bələi ká gɛ la gu Nąmu ɓa.

²³ Mąąhɔlɔɓo, nɛ̨ɛ̨nu nwun nąmu ɓaa a ɉilɛ; yɛ bələi lɔ Kristə kaa la a gbɔn nwun nąmu, yai a kɔlɔ nwun mąąɓomun.

²⁴ Bələi lɔ Yálá ŋą kpɔn kaa la Kristə woo mu, nɛ̨ąą diɛ kpɛli, di mąąnɛ̨ɛ̨ di kɛ tii di hilɛni woo mu mɛ̨nį kəlee hu.

²⁵ Hinąą, káán, 'ká ká nɛ̨ąni wɛlilakɛ yɛ bələi Kristə ə Yálá ŋą kpɔn wɛlilakɛ la, ɛlɛɛ, ə gbɔwɔ kulɔ a haláá mąą mɛ̨nį ɓa.

²⁶ Bələ ɓə ə kɛ la tii bɔ, ə mąąhəɠə, a nwaai a mo a yá, ə yili kɛ tii a Nwoo.

²⁷ Bələ ɓə ə kɛ la tii bɔ, ə dɔɔ gbɔwɔ kpinįi liila, mąąhəɠɛɛ, ɲɔ̨n ɉii da mąąkulɔi lɔpee ta hva kɛ mą ɲɛ̨i ɓa. Bələ ɓə ə kɛ la bɔ, nwɔ kpɔn ə kɛ a mąąhəɠɛɛ kiliin ɉii ɲɔ̨nwɔ̨ɔ̨ hva kɛ mą.

²⁸ Bələ kpɔlɔɔ ɓə mąąnɛ̨ɛ̨ hulɔnu yaa kpɛlimąn, ə nɛ̨ą wɛlilakɛ la, yɛ gbɔwɔ kpinįlee. Nui nɛ̨ą wɛlikaa mą, gbɔwɔ kpinįlee wɛlikaa mą.

²⁹ Nui lɔpee ta hvo ta wɛli kpɛɛmąą laa kulɔ li a gbɔwɔ kpinįlee, yaamun, a gɔ̨nɔ̨n gɛ, yɛ naa honmo, yɛ bələi Kristə a gə la a ŋą kpɔn;

³⁰ Gu hvo mɔ̨ɔ̨ a gɔ́lɔ tii tɔɔ-tɔɔnŋaa?

³¹ Yili mąą mɛ̨nį ɓa ɓə, hulɔnu a nąn da nee di lɛɛ laa, ə pa ə yili nɛ̨ą ɓa, ɛlɛɛ, di nu hveelɛi, di kɛ kɛa a kɔlɔ tanɔ̨n.

³² Noo mɛ̨nįi ŋɛ̨i gɛnɛ̨i, nwɛ́i gáá kpɔ kɛi diɛ: yili hvilɛnŋąąi Kristə da nwɔ kpɔn diɛ.

³³ Ə kɛ a pələi lɔpee, vilɛnŋąą káá kpɛlimąn káá: ká ká nɛ̨ąni wɛlilakɛ yɛ gbɔwɔ kpinįlee, nɛ̨ɛ̨nu ə ɉilɛ mąąwiɛ.