Ifisiɛŋ 1 - Yálá laawoo hɛɓɛ (dc)

Túwɔ́-woo

¹ Ɲą́ą́ Polə, Jesus Kristə nwɔ tímun, a Yálá liiɓa, gáá ɉɛɓɛ́i tɛɛ, nuąi Yálá aa di tolu, di laa mɛ̨nį ɓa Jesus Kristə la, diɛ;

² Gu Ną́n Yálá da gu Ną́mu Jesus Kristə di wɔ nɛ̨ɛ̨laa da di wɔɔ liilaa ə kɛ ká pɔ.

Nɛ̨ɛ̨laai ɲɛ̨n deei hvo mą

³ Lúwɔ́ ə kɛ gu Ną́mu Jesus Kristə Nąn Yálá ɓa, yai aa yələkɔlɔn ɉu lúwɔ́ɠaa kəlee too guɔ Kristə hu.

⁴ Kristə hu ɓə, Yálá ə gbɛa gu həɠə laa ɉu, gɛɛ hvo yɛnɛ̨ɛ̨ pɛli, ə gɛ, gu kɛ a nwɔ nuąi hɔn və diɛ, yaa ɲɛ̨i ɓa, wɛlikɛmąąlaa hu.

⁵ Ə gbɛa gu həɠə ɉu, ə gu kɛ a nwɔɔ ɲąąkɔn nonnii Kristə hu, yɛ bələ nwɔ wɛlikɛmąą laa ə kɛ la bɔ;

⁶ Ká gu Yálá mąmąɓo mɛ̨inɛ̨ɛ̨ kɛnɛ̨ɛ̨i aa gɛ guɔ nwɔ wɛlikɛmąą Lon ɉáálai, mąą mɛ̨nį ɓa.

⁷ Non tii ɲąmą háálai ɓə, gu nwun mąą ə ɓo la, ɉáálai lɔ ɓə, di gu wɔ túwɔ́ pələ ɲɔ̨nŋaa mąą hvaa lɛɛ la, lɔ yɛ bələi ŋą nɛ̨ɛ̨laa hu kɛnɛ̨ɛ̨ la, gu pɔ pələ.

⁸ Yálá ə gu pilɛ a ɲəi mɛ̨inɛ̨ɛ̨, a mɛ̨nį kɔlɔn gili, da kilikɛɲəi laa.

⁹ Nwɔ loo mɛ̨nįɠaai a niiɓa, aa nɛ guɔ, a mɛ̨nįɠaai tii, ə gbɛa mąą kili tee gwəi, gbɔwɔ kpinį hu.

¹⁰ Mɛ̨nį kəlee laa kulɔ ɲələ; gaa pai yələkɔlɔn ɉu hɛnŋaa da lɔi mɛ̨i hɛnŋaa ɲąąkpɔn ɉii nwun nąmu tanɔ̨n ɲee mu, ya ɓaa a Kristə.

¹¹ Yaa ti ɉu lɔ ɓə, gu gu wɔɔ nąą kɔlɔɓo laa, a nui a mɛ̨nį kəlee hee kpəlin na kɛ, a niiɓa, yɛ bələi ə gbɛa gu həɠə la ɉu.

¹² Guɔi gbɛa gu kilitɔɔ Kristə ɓa tɔwɔi, 'ká gu Yálá mąątɛ̨nɛ̨ wələ too.

¹³ Yaa tii ɉu lɔ ɓə nwɔ̨nɔ̨, ká dɛ̨ą woo mɛ̨n na, yai a nwɛlɛɛ lɛlɛɛi a nu nwun mąąɓo, yaa ɉu lɔ ɓə nwɔ̨nɔ̨, ká laa na laa hɔlɔɓo laa, ɛlɛɛ, yɛ gɔlɔn ɉii kɛ káá, a Gilii ə naakwɛlanmo, yai a Kili-Mąąhəɠɛɛ.

¹⁴ Gilii tii ɓə gaa a Yálá kwɛlin gu kaa pai ɉɔlɔɓoi, tɔlɔɔ, guɔ gu wɔɔ hɔlɔɓo naa tɛ́ mɛ̨ni da mąąwiɛ mɛ̨ni hu.

Polə nwɔ Yálá hvɛli woo

¹⁵ Yili ɓə gɛ, ɲą́ą́ kpɛlimąn,, 'ká laa mɛ̨nį gu Nąmu Jesus la, da mąąhəɠə nuą wɛli la kɛ pələ ká yəi, yii kpɔ kɛa ŋą́ yili bələ mɛ̨n;

¹⁶ vá kpɛla Yálá hɛɠɛɛɓoi ká mąą mɛ̨nį ɓa; gɛ́ ká mąą mɛ̨nįɠaa laa həli nwɔ́ hvɛli wooɠaa hu.

¹⁷ Gu Nąmu Jesus Kristə nwɔ Yálá, Nąn, yai mąąwiɛlaa kəlee kaa a nwɔɔ, ə ká kɔ́ a mɛ̨nį hukpɛ kili, yɛ Yálá mąą mɛ̨nį hu pono ká ɲɛ̨i ɓa, káá pɛli gɔlɔn ɉii la a neelee;

¹⁸ ə ká kili laaɓo nwɔ kɛɛ ponoi tɔwɔ, mɛ̨nįi ə ká təli mą, yai ká ɲɛ̨i kaa dɔwɔ, káá pɛli gɔlɔn ɉii, da nwɔɔ mąąwiɛlaa hu kɛnɛ̨ pələ, ya ɓaa, gwɛlin tii gaa ká kɔ́i ɉu, ka mąąhəɠə nuą;

¹⁹ ɛlɛɛ, da nwɔ Hééɓolaa kɛnɛ̨i tii, ə ku mąą mɛ̨nį ɲɛ̨i kulɔ la, kuɔi ŋɛ̨i a laa na nuą, yɛ bələi lɔ ɉuwalawalaai la, da vaŋą kɛnɛ̨ pələ.

²⁰ Ə ŋą huwalawalalaa tii kəlee lɛ Kristə hu, a nwun ə mo haa nuą lɔwai, yɛ ɉee mamįiyee hu pələ yələkɔlɔn ɉu.

²¹ Ɲąąwooɓo laa, Huwalawalalaa, Hvaŋą laa, Hééɓolaa, ɛlɛɛ, da laa huwui lɔpee, ɉeɛi kpɔ gəlee mɛ̨i; hvo lɔ a ɲɛnɛ̨ɛ̨ ŋɛ̨i hu mɛ̨nį, kɛlaa, ə mą kɛ, ɲɛnɛ̨ɛ̨ yii pai, ɉu.

²² A tɛ̨ą, Yálá ə hɛn gəlee laa Kristə kɔ́wɔ mu, ə ɉee hɛn kəlee nwun mɛ̨i, ə gɛ a Yálá nwɔ kpɔn nwun ganįn,

²³ gbɔn tii ɓə a Kristə kpinį lee, a yai, Yálá kpinįi ə mąą mɛ̨nį laa kulɔi, ə bɛli ɉu, mɛ̨nį ta lɔpee hvo lɛɛ pulu.