Hanwon 3 - Yálá laawoo hɛɓɛ (dc)

Nu a kili hɔlɔɓo pələ kɛ ləi

¹ Nón, mɛ̨nįi gáá ə́ kala ɉii la, 'hvó lɛ̨ą mą, ə́ kili ə́ lɛɛ nwɔ́ liɛwooɠaa hu.

² Mąąhɔlɔɓo, ɉaalai ɓə ə́ yíi a kwɛa la, ə́ wɔ kwɛlanŋaa hu ə kwɛa, ɲąą ə nɛ̨ɛ̨.

³ Tələnmolaa da mɛ̨nį haŋąą kɛ, 'doo ə́ kwąną, bɛ̨ɛ̨ ə́ lii pɔ.

⁴ Yá gɛ tii, ə́ wɛli a too Yálá ɓa, da nu kanŋaa.

⁵ 'Hvó ə́ kilitɔɔ ə́ kpɔwɔ nwɔ nwun gɛ ɉu laa ɓa, Kɛlaa, ə́ kilitɔɔ Yai-Laa ɓa.

⁶ Mɛ̨nį lɔpee ə́ kaa gɛi, ə́ kilitɔɔ mą, a ə́ tɔwɔ pɔ̨nɔ̨

⁷ 'Hvó kɛ ə́ kpɔwɔ ɲɛ̨i ɓa a kilimąą mun, ɲɔw Yai-Laa ɓa, ə́ ə́ pulu tɔɔ mɛ̨nį ɲɔ̨n ma.

⁸ Yili ɓə a ə́ kɔ́lɔi pɔ̨nɔ̨, ɛlɛɛ, ə ə́ kɔ́wɠaa huwalawala.

⁹ Yai-Laa mąąwiɛ a ə́ hɔlɔɓo hɛn gɔwɠaa, a ə́ hɔlɔɓo hɛn nįnɛ̨ kɛi yá mo a gɔ́ hɛn;

¹⁰ Yá yili kɛ tii, ə́ wɔ kɔ̨nɔ̨n gələi laa a hvɛɛ, ə́ wɔ viɲə yá kulɔi, lɔɔ nįnɛ̨ hva kpɛɛ laa.

¹¹ Nón, Yai-Laa a ə́ hutɔɔ, ə́ yee hee mu, a ə́ kilaa pɔ̨nɔ̨ mɛ̨nį ta hu, 'hvó nwąną yɛ́.

¹² Mąąhɔlɔɓo, nui nwɛli kaa Yai-Laa ɓa, ya ɓə Yai-Laa a ɉu tɔɔ, yɛ bələi lon yii nwɛli kaa nąn ma, a gɛ la.

Kili mɛ̨nį kaa a yíipoo wulu

¹³ Nwun na nɛ̨ɛ̨ mun mąą nui a kili hɔlɔɓo, ɛlɛɛ, yɛ mɛ̨nį hukpɛ.

¹⁴ Mąąhɔlɔɓo, kili kɛɛ nu yəi hviɛlaɓoɔi wali kɛɛ nu yəi ɓa, ɛlɛɛ, yili dɔlɔ kɛnɛ̨i dɛɛ hɛni ɓa.

¹⁵ Kili hviɛla ɓoɔi dɛɛ hɛn gɔw mąą mɛ̨nį nwąnąą ɓa. Hɛn kpɔ nɛlɛɛ nu ɲɛ̨i ɓa, viɛlaɓoɔi dɛɛ gəlee diɛ.

¹⁶ A nu yíi kwɛa, ɛlɛɛ, yɛ yee la hvólón da mąąwiɛ tɛɛ bɔ pələ kəlee hu.

¹⁷ A nu tənən dɔɔ pələ lɛlɛɛ mɛ̨i, yɛ hiɛ ɉu a kili la tee.

¹⁸ Gaa a yíipoo wulu, nuąi da di yee hee mu diɛ. Nui a ɉon kpaan, a kɛ nwun na nɛ̨ɛ̨ hu.

¹⁹ Yai-Laa ə lɔi pɛli a kili, ə yələkɔlɔn bɛli a nwu gə ɉu laa.

²⁰ Nwɔ mɛ̨nį kɔ́lɔn ŋąą pɔ pələ ɓə, lɔi mɛ̨i yáɠaa da tɛ la yələi, tulɔ kpinįnŋąą diɛ tulɔ pu.

Yai-Laa a kilimąą mun mɛ̨i kaa

²¹ Nón, kɛ gili-gili laa, mɛ̨nį hukpɛ kili, mąą hvo kwɛa ə́ ɲɛ̨i mu, 'hvó lɛ̨ą mɛ̨nį hveelɛi tii ɓa.

²² Di kaa a ə́ nįį nwɔ yii-yɛnɛɛ, di ɓo a mɛ̨inɛ̨ɛ̨ kwɛɛn ə́ kwąną.

²³ A kɛ tii, yá pɛli hiɛi a ə́ wɛli pulu laɠiɛ, ə́ kɔ́wɔ nuą kalin.

²⁴ Yá laa a kpinį, hva ɲɔw, yá laa, ə́ yíi a nɛ̨ɛ̨ hvɛ-hvɛ.

²⁵ Gulɔ la mɛ̨nį hva ə́ mąą ɲɔw. Hvá ɲɔw nwąnąlɔ nuą di wɔ nwąnąlɔ ɓa.

²⁶ Mąąhɔlɔɓo, Yai-Laa ɓə a kɛ a ə́ tɔɔ bulu. Hɛlɛn nuą da dɛ ə́ tɔwɔ, a gəlee pola.

Lúwɔ́ lon maa nui a mɛlaa wɛlilakɛ

²⁷ Nuąi di kaa kpaan ɉu, kpɔmąą tɛɛ di pɔ, akɛ yili ŋą yee pɛli mąą a kɛ yɛ́.

²⁸ 'Hvó kɛ ə́ ɓɛlan gaalon ma: Li ə́ pa tinąą, gáá pai vəi. A kɛ hen ganąn gaa mą gaa ə́ yəi dɛɛ ɓo, 'hvó lənə dɛɛi mɛ̨nį ɓa bɔ.

²⁹ Ə́ ɓɛlan gaalon a hee ə́ kwɛlɛ, ə gilitɔɔ yɛ́, 'hvó kiliŋąhiɛ ɲɔ̨nwɔ̨ɔ̨ kɛ hvo vilɛn mą.

³⁰ 'Hvó ɓaɠaɓo nu ɓa, 'hvó hvaa pɛlɛ mą kpɛli-kpɛli.

³¹ Ə́ ɲɛ̨i hvo kulɔ mɛ̨nį ɲɔ̨n gɛmun bɔ, 'hvó kpɛli dúwɔ́ pələ ta pɔɔkɔɔn.

³² Mąąhɔlɔɓo, túwɔ́ pələ ɲɔ̨n gɛmun nwɛli hvo Yai-Laa ɓa, Kɛlaa, nu haŋąąɠaa wɛli kaa mą.

³³ Yai-Laa a nwąnąlɔ nuą di wɔ pɛ́lɛ́i nɛ̨ŋɛ̨n naa, Kɛlaa, a lúwɔ́ too nu haŋąąɠaa di wɔ pɛ́lɛ́ɠaai diɛ.

³⁴ Yai-Laa a yɛlɛkulɔ yɛlɛmąą kɛ nuą hu, Yɛ ɲɛ̨i lɛlɛɛ hee kpɔwɔmąą yɛɛ nuą diɛ.

³⁵ Kilimąą nuą da mąąwiɛ hɔlɔɓo a di kwɛlin, nwunmɛ a tɛ a kilikpɛɛgwəi nuą.