Hanwon 2 - Yálá laawoo hɛɓɛ (dc)

Kili mɛ̨nį kaa a hɛn yii noɔ

¹ Nón! Akɛ mɛ̨nįi gáá ə́ kalan ɉii la, gili a lɛɛ ə́ ŋą Yii ŋą́ ə́ tí la, a kɛ ə́ ɲɛ̨i ɓa yɛ hɛn gɔw;

² Ə́i wəli tɔɔ kilimąą woo ɓa Ə́ tɔɔ a ə́ nwąnąi, ə́ gbaɠala kaa.

³ A tɛ̨ą, akɛ yá kilaa pɔ̨nɔ̨ kwɛli, ə́ nwun gɛ ɉu mɛ̨nį kwɛli,

⁴ Akɛ yá gwɛli yɛ bələi da hɛn gwɛli la, ə́ gwɛli pələ kɛ yɛ hɛn gɔw yii noɔ,

⁵ yá yili kɛ tii, bələi mąąnɛ̨ɛ̨ ə́ ɲɔw la Yai-Laa ɓa, yá kɔ́lɔn, yá pɛli mą ə́ Yálá kɔ́lɔn.

⁶ Mąąhɔlɔɓo, Yai-Laa ɓə a kili tɛɛ nu pɔ. Ya ɓə nwun gɛ ɉu da mɛ̨nį kɔ́lɔn ŋąą da kulɔ na.

⁷ Ya ɓə a kpɔmąą tɛɛ nu haŋąą pɔ, gaa a nu haŋąą mąąkɔ̨nwɔ̨ mun.

⁸ Nui a hiɛ tɛ̨ą pələ mɛ̨i, a mąą nu mɛ̨i kaa. A tələnmo nuą túwɔ́ pələ mɛ̨i kaa.

⁹ Akɛ yá ə́ wəli tɔɔ mą́ą́, yá mɛ̨nį haŋąą kɔ́lɔn, yɛ́ pɛli mɛ̨nį lɛlɛɛ kɛi.

¹⁰ Kili a kɛ yɛ́, mɛ̨nį kɔ́lɔn ŋąą yɛ kwəinɛ̨ɛ̨ tɛɛ ə́ pɔ. Ə́ nwun a kɛ ə́ hu, hva lan.

¹¹ Mɛ̨nį kɔ́lɔn ŋąą a ə́ mɛ̨i kaa. Kiliŋąhiɛ lɛlɛɛ yɛ kpɔmąą tɛɛ ə́ pɔ.

¹² Kili a kpɔnmąą tɛɛ ə́ pɔ, hva mɛ̨nį ɲɔ̨n gɛ. A ɲee kɛ yɛ́ ka lɛɛmun ka lɔwai,

¹³ ɛlɛɛ, nuąi da pələ haŋąą lɛɛ laa, diɛ hiɛ kpinį hu, hva hvilɛn too di pɔ.

¹⁴ Diɛi di kwəinɛ̨ɛ̨ mɛ̨nį ɓaa mɛ̨nį ɲɔ̨n gɛɛ, di liiɓa ɓaa nwąnąlɔ túwɔ́ ɓoɔ.

¹⁵ Di hva mɛ̨nį ta kɛ a tɛ̨ą, di túwɔ́ pələ kpəlaan ŋąą.

¹⁶ Kili a ɲɛ̨i kɛ yɛ́, hvá pɛli ə́ wəli tɔɔi nwɛ̨ą nɛ̨ɛ̨nu nwɔ gbanalaa woo ɓa.

¹⁷ Nɛ̨ɛ̨nui aa ɉilɛ dɔlɔɔ lɛɛ, mįnɛ̨i ŋɛ̨i ə ɉəɠə Yálá ɲɛ̨i ɓa, aa lɛ̨ą mą, hva too nwɔ hɛlɛn ŋą.

¹⁸ Nwɔ túwɔ́ pələ ɲɔ̨n tii a nwɔ pɛ́lɛ́i hɛŋɛnɛn haa pɔ pələ, yɛ nwun na pili.

¹⁹ Nuąi da li nɛ̨ɛ̨nui tii pɔ, di hva di pulu pənə. Di hva yɛnɛ̨ɛ̨ kɛ pələ kaa.

²⁰ Ə́ wɛi, hvilɛn nu túwɔ́ pələ lɛlɛɛɠaa pulu, ə́ nu haŋąɠaa pɔɔn kɔ́ɔn.

²¹ Mąąhɔlɔɓo, nu haŋąąɠaa di wɔɔ nɔi. Diɛ ɓə da hee laa.

²² Kɛlaa, nwąnąlɔ nuą, da nuąi di hvo haŋą li, da di kpɛ nɔi.