Ɛsdrasə 8 - Yálá laawoo hɛɓɛ (dc)

Ɛsdrasə mɛlaa

¹ Bɛlɛ nąmįną da nu huwuɠaai kwa diɛni ku həɠə Babilonə lɔi hu, tɔɔmun Artasɛrsɛsə nwɔ tɔɔlaa lɔwai, diɛ ka:

² Pinasə lonnii lɔwai, Gɛrsɔmə. Itamarə lonnii lɔwai, Daniɛlə. Davidə lonnii lɔwai, Hatusə;

³ Sekania lonnii lɔwai; Pareɔsə lonnii lɔwai, Ɉekaria; di nu nwu dɔ̨nɔ̨ ɲee lɔɔli (150) laa pɛ̨ɛ̨ bulu.

⁴ Pahatə-Moabə lonnii lɔwai, Ɛliehoenai; Zerahia lonnii da nu nwun veelɛ (200).

⁵ Sekania lonnii. Yahaziɛlə lonnii da nu nwun ɉaaɓa (300).

⁶ Adin lonnii lɔwai, Evɛdə, Yonatan lonnii da nu pow lɔɔli (50).

⁷ Elamə lonnii lɔwai, Yesaya, Atalia lonnii da nu pow mɛ̨ihveelɛ (70).

⁸ Sefatia lonnii lɔwai, Ɉevadia, Mikaɛlə lonnii da nu pow mɛ̨ihaaɓa (80).

⁹ Yoavə lonnii lɔwai, Ovadia, Yehiɛlə lonnii da nu nwun veelɛ nu pow kɔ́w mɛ̨ihaaɓa (218).

¹⁰ Selomitə lonnii, Yosifia lonnii, da nu nwundɔ̨nɔ̨ nu pow mɛ̨ida (160).

¹¹ Bevai lonnii, Ɉekaria, Bevai lon da nu pow hveelɛ kɔ́w mɛ̨ihaaɓa (28).

¹² Azgadə lonnii, Yohanan, Ha-Katan lonnii da nu nwundɔ̨nɔ̨ nu pow (110).

¹³ Adonikamə lonnii, diɛ ɓə kɛ a nu gbəliɠaa, di laa ka: Elifɛlɛtə, Yeiɛlə da Semaya da nu pow mɛ̨ida (60).

¹⁴ Bigwai lonnii, Utai da Zabudə da nu pow mɛ̨ihveelɛ (70).

Ɉiɛi Ɛsdrasə ə gulɔ yɛli Ɉerusalɛmə

¹⁵ Ŋą́ nuąi tii ŋąąkpɔn, ɲai tii a li Ahawa pələ, gwɛlɛ. Ku tɔɔlaa, ŋį́ nuą lɔwai kaa da ɉaláá laa həli nuą lɔwai, kɛlaa, və́ Levi lonnii ta kaa.

¹⁶ Nąąlɔwai, ŋį́ bɛlɛ nąmįną ŋɛ̨i təli, diɛ ɓaa: Eliezɛrə, Ariɛlə, Semaya, Ɛlnatan, Yarivə, Ɛlnatan, Natan, Ɉekaria, Mesulamə da dɔ́n galamɔ̨ɔ̨ hveelɛi, Yoyarivə da Ɛlnatan.

¹⁷ Ŋą́ di tɔɔ, ə gɛ, də li Ido pɔɔli, yii gaa a Kasifia taa nąmu, nwooi kɛ mąąnɛ̨ɛ̨ di mo Ido ɓa da gaayɔwɔɠaa, diɛi kɛi tíɓo kɛ Yálá hee pɛlɛ́ mu Kasifia daai, ŋį́ bu di la, ə gɛ, nuąi da kɛ tíi ku wɔ Yalái yəi bɛlɛ́n, da diɛni di pa.

¹⁸ Yɛ bələi Yálá yee ə kɛ la kuɔ a nɛlɛɛ, di pa ku pɔ da Mali lon dɔ̨nɔ̨, yii kulɔ Levi huwuhu, yɛ ɓo a nwun gɛ ɉu mun: da Serevia da nonnii, ɛlɛɛ, da gayɔwɔɠaa, di kɛ a nu pow kɔ́w mɛ̨ihaaɓa (18).

¹⁹ Ə mą kɛ nwɔ̨nɔ̨ Hasavia da Yesaya, da Merari lon da nąn nonnii, ɛlɛɛ yiliɠaai da di lonnii, di kɛ a nu pow hveelɛ (20).

²⁰ Nuąi tii Davidə da nɔi nąmįną di di tɛɛ, diɛ kpɔn Levi lonnii diɛ, di kɛ a tínuą, nu nwun veelɛ (200), gəlee laa pɛ̨ɛ̨.

²¹ Ŋą́ loloɓo Ahawa ya kwɛlɛ, gɛ diɛ, ku hin nɔ, ə gɛ, ku ku mąą yɛɛ Yálá lííla, ə gə ə hvaa mą ku ɉiɛ kulɔ a nɛlɛɛ kwa ku lonnii da ku tiɛ̨ɠaa.

²² Kɛlaa, ŋį́ kɛi nwunmɛ̨ kɛi tɔɔmun ma: Holahi kpulu tɛɛ ku pɔ, yii a ku mąą kpɔnmąąɓo bələ pɔ, ku yowoɠaa mąą mɛ̨nį ɓa. Ku mo tɔɔmun ma, kuɔ mą: «Nuąi da Yálá kwɛli, a ɲee lɛlɛɛ laa di mɛ̨i, kɛlaa, nuąi da di kili kulɔ ɉu a ɲɛ̨i ɲɔ̨nwɔ̨ɔ̨ hee diɛ.»

²³ Ku nɛɛ mą ku hin nɔ, ku Yálá hvɛli mɛ̨nįi tii hu, yaan ə ku woo ŋąąpənə.

²⁴ Yili pulu, ŋį́ nu pow kɔ́w hveelɛ həɠə ɉu, ɉaláá laa həli nuą nwun nąmįną lɔwai, ə mą kɛ Serevia da Hasavia, ə mą kɛ di kaayɔwɔɠaa nu pow.

²⁵ Ɉɛnɲąŋąɠaai ŋɛ̨i kɛ a wali da hɛni, yii tɔɔmun da gwɛlɛ nuą, da nwɔ ɲɛ̨itɔwɔ nuą, ə mą kɛ nwɔ nwun nąmįnąi da Israɛlə nuąi kɛ laa di gulɔ Yálá hee pɛlɛ́ mąą mɛ̨nį ɓa, ŋį́ yiliɠaai tɛɛ nuąi tii pɔ.

²⁶ Wali kwɛli kilə waapowhveelɛ (20.000) ɓə ŋą dɛɛ, da wali hɛɲąŋą kilə waahaaɓa (3000), da hɛni kilə waahaaɓa (3000),

²⁷ da kpələ kɔ́wɔ pow hveelɛ (20) a hɛni, yii ɉɔ̨nwɔ̨ a pɛli kɛi a wali kwələ waa tɔ̨nɔ̨ (1000). Ɓala kwɛli hɛɲąŋą hveelɛ, da hɛni di ɓɛlɛ pɛliɛ.

²⁸ Ŋą́ mo diɛ, gɛ́ diɛ: «Ka káá a nuą yiiɠaai di kwɛlɛɛ Yai-Laa ɓa, ɉɛnɲąŋąɠaai ŋɛ̨i kəlee kaa a Yálá kɔ́ hɛnŋąą; nwaliɠaa da ɉɛniɠaa, di kaa a naagwəi kɔ́ɓo hɛn yii di dɛɛ Yai-Laa pɔ, yaai gaa a ka nąnni di wɔ Yálá.

²⁹ Ka ka ɲɛ̨i kɛ diɛ a nɛlɛɛ, ə lɛɛ ɉu ka həli la Ɉerusalɛmə, ka di kɔ́ɔn ɉaláá laa həli nuą nwun nąmįną lííla, da Levi huwuhu nuą, da Israɛlə bɛlɛ nąąməna, Ɉerusalɛmə, Yai-Laa yəi bɛlɛ́n.»

³⁰ Nąąlɔwai, ɉaláá laa həli nuą da Levi lonnii di nwali da ɉɛni ɛlɛɛ ɉɛnɲąŋąɠaai tii kəlee həɠə, də li la Ɉerusalɛmə, ku wɔ Yálá yəi bɛlɛ́n.

Ɉiɛ kulɔ mɛ̨nį, ə lɛɛ ɉu di həli Ɉerusalɛmə

³¹ Ku həɠə Ahawa ya kwɛlɛ, ɲąnin dɔlɔɔ nwɔ hvóló pow kɔ́w hveelɛ yələ (12), kuɔ li Ɉerusalɛmə; ku wɔ Yalái yee ə kɛ ku mɛ̨i, ə ku kulɔ ku yowoɠaa yəi bələ pɔ, da doomɛ̨i kɛ nuąi da hee nuą tɔwɔ.

³² Ku həli Ɉerusalɛmə, ku ku hvii tɔɔlaa hvóló haaɓa yee mu.

³³ Voló nąąn ɲələ, nwali, ɉɛni da ɉɛnɲąŋąɠaa, ku di kɔ́ɔn gu wɔ Yálái yəi bɛlɛ́n, kuɔ kɛa dɛɛ ɉaláá laa həli mun Meremotə pɔ yii gaa a Uriya lon, Pinasə lon Eleazarə ə kɛ bɔ́, ə lɛɛ Yesua lon Yozavadə da Binui lon Noadi a, diɛi kɛ a Levi huwuhu nuą.

³⁴ Ɉɛnŋąą lonon ŋąą da di kɔ́ɔnŋąą, gəlee ə pɛli, di yili pɛ̨ɛ̨.

³⁵ Nąąlɔwai, nuąi həɠə nuwɔ laa hu, di nįŋɛ̨ hilɛ pow kɔ́w hveelɛ kulɔ Yálá ɓa a haláá yii da gəlee kələn, a Israɛlə lonnii kəlee mąą mɛ̨nį, ɓɛlaa lonnii pow mɛ̨inąąn kɔ́w mɛ̨ida, ɓɛlaa lonnii pow mɛ̨ihveelɛ kɔ́w mɛ̨ihveelɛ, ɓooli hilɛ pow kɔ́w hveelɛ, yai kɛ a nɛ̨ŋɛ̨n mąą hvaalɛɛ haláá, di gulɔ Yai-Laa ɓa a haláá yii da gəlee kələn.

³⁶ Yili pulu, mɛ̨nįɠaai tɔɔmun ə mo, di gəlee laa həli tɔɔmun nwɔ lɔi nwun nąmįną diɛ, diɛi da nɔi ɲąąwooɓo, diɛi kɛ Eufratə ya voló tooi pələ, di kpɔnmąą tɛɛ Israɛlə nuą pɔ, Yálá hee pɛlɛ́ tɔɔ mɛ̨nį hu.