Ɛsdrasə 3 - Yálá laawoo hɛɓɛ (dc)

Ɉaláá kulɔi pɛli mɛ̨nį da Yálá hee pɛlɛ́ tɔɔ mɛ̨nį

¹ Ɲąnįn mɛ̨ihveelɛ lɔwai, Israɛlə nuą kəlee di həɠə di wɔ taaɠaai hu, di kəlee di pa, di di ɲąąkpɔn Ɉerusalɛmə daai, yɛ nu tɔ̨nɔ̨.

² Yosadakə lon Ɉosue, da gaayɔwɔɠaa; diɛi kɛ a haláá laa həli nuą, da Saltiɛlə lon Zorobabɛlə da gaayɔwɔɠaa, di pɛlɛ di kee ɓa, di Israɛlə nwɔ Yálá nwɔ haláá kulɔi pɛli. Ə gɛ, haláá hɛn yii da gəlee kələn, di gulɔ laa Yálá ɓa, yɛ bələi bɛ̨ɛ̨i la Yálá nwɔ tímun Moisə nwɔ tɔ́n ɉɛɓɛ́i hu.

³ Bələi mąn di kɛi ɲɔw la di kwɛlɛ lɔi hu nuą diɛ, ɓɛi wɔlɔ ɉaláá kulɔi tii ə kɛ laa, nąą lɔ ɓə di dɔɔ laa. Di ɉaláá kulɔ laa Yai-Laa ɓa, a haláá hɛn yii da gəlee kələn, yələwala da yələwulii.

⁴ Di nɛɛ mą, di ɉəɠə pɛlɛ́ mąą hɛli pu yɛ bələi bɛ̨ɛ̨i la. Hvóló kəlee haláá yii di kɛi gələn, di kɛi gulɔ yɛ bələi ə kɛ la a di huwula mɛ̨nį, hvóló tɛitɛi kəlee.

⁵ Yili pulu, haláá hɛn yii da gəlee kələn, yii di kɛi gulɔ a kwɛlan gəlee, ɲąnin dɔɔ nįnɛ̨ mąą mɛ̨nį ɓa, di yili kɛ, da Yai-Laa mąąwiɛ hɛli kəlee, ə mą kɛ, a nuąi kɛi naagwəi mɛ̨inɛ̨ɛ̨ kɛ Yai-Laa ɓa.

⁶ Ə gɔwɔ tɔɔ ɲąnin mɛ̨ihveelɛ nwɔ hvóló dɔlɔɔ tii ɓa, haláá hɛn yii da gəlee kələn, di kɛi gulɔ Yai-Laa ɓa. Kɛlaa, di hvo ni kɛ Yai-Laa hee pɛlɛ́ tɔɔ li.

⁷ Di wali tɛɛ kwɛni haɠa nuą pɔ, da pɛlɛ mɛ̨i kɛ nuą, ɛlɛɛ, kɔ̨nɔ̨n da lɔɔ, ə mą kɛ wulɔ, di tɛɛ Sidɔn da Tirə nuą pɔ, ə gɛ, yiliɠaai di kpitili wulu tee Liban, di tɛɛ la Ɉafa gboloyá ŋą pələ, di paa la. Yɛ pələi Pɛrsə tɔɔmun Sirusə ə mąą laa tɛɛ la di pɔ.

⁸ Pai ŋɛ̨i di mo Ɉerusalɛmə, Yálá nwɔ pɛ́lɛ́i kɛ laa, gwɛlan veelɛnąą nwɔ ɲąnin veelɛ lɔwai, Saltiɛlə lon Zorobabɛlə da Yosadakə lon Ɉosue, da di kaayɔwɔɠaai ŋɛ̨i kɛ a ɉaláá laa həli nuą, a Levi lonnii da nuąi kpɔ kulɔ luwɔlaa hu, diɛ pa Ɉerusalɛmə daai, di di yee pɛlɛ goló ɓa. Di Levi lonnii hee Yálá hee pɛlɛ́ tɔɔ mɛ̨nį golóɠaa nwun na, ə gɔwɔ tɔɔ nui gaa kwɛlan gaa pow hveelɛ mą, yɛ li la tɔwɔ pələ.

⁹ Ɉosue lonnii da gaayɔwɔɠaa: Kadmiɛlə da nonnii diɛ kɛ a Ɉuda lonnii, Hadavia lonnii, di di muhəɠə yɛ nu tɔ̨nɔ̨, ə gɛ, nuą ŋɛ̨i kɛi koló Yálá hee pɛlɛ́ ɓa, di tɔɔ golóɠaa nwun na. Ɛlɛɛ, Henadadə lonnii da di wɔ lonnii, ə mą kɛ di kaayɔwɔɠaa, Levi huwuhu nuą di too di pɔ, diɛ golói tii kɛ.

¹⁰ Ɓɛlɔwai bɛlɛ́ tɔɔ nuą di Yai-Laa hee pɛlɛ́ gwɛni dɔlɔɔ laa la, di ɉaláá laa həli nuą təli, di wɔ haláá laa həli həɠə yɛ ɓo di kwaną, túlúɠaa di ɓo di yəi, ə mą kɛ, Asafə lonnii ŋɛ̨i kɛ a Levi huwuhu nuą, lalo yɛ ɓo di yəi, diɛ Yai-Laa mąątɛ̨nɛ̨ la, yɛ bələi Israɛlə tɔɔmun Davidə ə mo la.

¹¹ Di kɛi nwələ too, diɛ di kee woo mu hon, diɛ kɛ mą: mąąwiɛ da kɛnɛ̨ laa kaa Yai-Laa ɓa; Mąąhɔlɔɓo, nwɔ mɛ̨inɛ̨ɛ̨, da nwɔ lii nɛɛ gwəi laa kpon ɉu kwɛaai Israɛlə ɓa. Di kɛi yili ɓo tii, mąąhɔlɔɓo, di kɛi Yai-Laa hee pɛlɛ́ tɔɔ.

¹² Nu pɔlɔɠaai kɛ ɉaláá laa həli nuą lɔwai, Levi huwuhu nuą lɔwai, bɛlɛ nąmįną lɔwai, diɛi kɛ Yai-Laa hee pɛlɛ́ bɔlɔ-pɔlɔ kɔ́lɔn, ɓɛlɔwai di nįnɛ̨i tii goloon gaa la, di kəlee di bu mą a wɔlɔ. Kɛlaa, nuąi di hvo kɛ bɛlɛi tii bɔlɔ-pɔlɔ kɔ́lɔn, di wɛi, di kɛi tomą a kwəinɛ̨ɛ̨.

¹³ Nu hvo kɛi pɛli nwɔlɔ woo da gwəinɛ̨ɛ̨ woo gulɔ ɉu kɔ́lɔn ɉii, mąąhɔlɔɓo, di húlúún nwoo ə kɛi li kwɛaa la.