Dutɛrɔnome 1 - Yálá laawoo hɛɓɛ (dc)

Mɛ̨nį tɔlɔɔi Moisə ə mo 1—4

¹ Mɛ̨nįɠaai Moisə ə mo Israɛlə lonnii diɛ Ɉurdɛn yá pulu pələ, nɔi pun ɉu, Ɉurdɛn ɲá-ɓoloon bɔ, Sufə tənə ma; Paran da Tofɛlə Lavan Haserotə da Di-Zahavə di lɔwai, diɛ ka:

² hvóló pow kɔ́w tɔ̨nɔ̨ ɓə nu ya gɛ hiɛ hu, ə həɠə Horɛbə yee ɓa yɛ li Kadɛsə-Barnea Seirə yee pɔ pələ.

³ Israɛlə lonnii kulaa Eziptə lɔi hu, kwɛlan bow nąąn dɛɛ pulu, ɲąnin bow kɔ́w tɔ̨nɔ̨ nwɔ hvóló dɔlɔɔ yələ ɓə mɛ̨nįi Yai-Laa ə mo Moisə ɓa, yili ə naa həli la Israɛlə lonnii diɛ.

⁴ Daa gbɛa kɛ Amɔrə nuą di wɔ tɔɔmun Sihɔn hon, yai kɛ heeni Hɛsbɔn; daa nwɔ̨nɔ̨ kɛ Basan tɔɔmun Ogə hon Ɛdrɛi daai ə kɛ heeni Astarotə.

⁵ Nąąlɔwai ɓə Moisə ə nɔi mąą tɔ́nŋąą hukulɔ la nuą diɛ, Ɉurdɛn yá pulu pələ, Moabə lɔi hu, yɛ diɛ:

Yálá ə Israɛlə nuą li mɛ̨nį ɓo

⁶ Ɓɛlɔwai gu kɛ laa Horɛbə yee ɓa, Yai-Laa gu wɔ Yálá ə mo, yɛ diɛ: «Kaa lamun ɲeei ŋɛ̨i koomu a mɔlɔ.

⁷ Ka ka muhəɠə, ka ɉon a Amɔrə yee hu pələ, da gwɛlɛ nuą kəlee di wɔ lɔi hu, Ɉurdɛn ɲá-ɓoloon bɔ pələ, ɲee lɔi hu, nɛ̨ŋɛ̨ hu lɔi, Negɛvə nɔi pun ɉu, gboloyá kwɛlɛ, Kanaan lɔi hu, da Liban lɔi, ə həli kpɔ ɲá kɛnɛ̨ Eufratə ɓa.

⁸ Ka gɔlɔn kaa diɛ, ŋą́ą́ nɔi tii tɛɛ ka pɔ, ka lɔ ɉu; nɔi tii ɓə Yai-Laa ə gwɛla yɛ gaa dɛɛi ka nąnni pɔ, Abrahamə, Isaakə da Ɉakɔbə, da di huwu, ka li ka hee laa.»

Moisə ə mɛ̨nįɓo kɛ nuą hee

⁹ Moisə ə mo nwɔ̨nɔ̨ yɛ diɛ: ŋį́ kɛ kaa: «Ɲą́ą́ dɔ̨nɔ̨ gbən vá pɛli ka mu.

¹⁰ Yai-Laa ka wɔ Yálái aa ka ɓuwuɓo, ka tamąąi háákələi, yɛ yələkɔlɔn ɉu pɛmɛ̨lɛ̨n-gɔwɠaa.

¹¹ Gɛ́ Yai-Laa ka nąnni di wɔ Yálái ə ka tamą nwɔ̨nɔ̨ gee mɛ̨i waa tamąą, ə lúwɔ́ too kaa yɛ bələi ə naakwɛlanmo la.

¹² Ɲą́ą́ dɔ̨nɔ̨ gbən ŋą́ mɔ̨ɔ̨ pɛli ka wɔ liiholiɠaa mu, ka wɔ mɛ̨nįɓoɠaa da ka lɔwai mɛ̨nįɠaa mu?

¹³ Ka nu tɛi tɛi həɠə huwu kəlee lɔwai, di ɓo a kilimąą nuą, di wɛlɛɛ mɛ̨nį ɓoi, nuąi nu kəlee laa di la, ŋį́ di hee ka nwun na.»

¹⁴ Ya ɓə ka kɛ mą: «Mɛ̨nii tii ə́ mo nɛlɛɛi.»

¹⁵ Yili ɓa, ka ɲɛ̨itɔwɔ nuą lɔwai, ŋį́ mɛ̨nį kɔ́lɔn nuą, da mɛ̨nį hu kpɛ nuą həɠə ɉu a kɔlaɠa nwun nąmįną; ŋį́ daɠaa hee nu waa tɛi tɛi nwun na, nu nwun dɛi tɛi nwun na, nu pow lɔɔli lɔɔli nwun na; Da nu pow pow nwun na; da hɛɓɛ́ kɛ nuą yɛ bələi ka huwu hee pələ kaa la.

¹⁶ Ya ɓə ŋį́ kɛ ka wɔ mɛ̨nįɓo-nuą diɛ: «Ka kaa pai kɛi ka wəli tɔɔi ka nąn nonnii woo ɓa. Kaa nuą lɔwai mɛ̨nįɠaa hutɔɔ a tɛ̨ą, ə mą kɛ nwɛ̨ąąi heeni ka kɔ́wɔ mɛ̨i.

¹⁷ Ka hvo kiti tee a ɲɛ̨i kɔ́lɔn. Ka lokolo woo mɛ̨n nɔ yɛ bələi ka nu kɛnɛ̨ woo mɛ̨n na. Ka hvo ɲɔw nu ta ɓa. Mąąhɔlɔɓo, kiti mɛ̨nį kaa a Yálá yəi mɛ̨nį. Mɛ̨nį ta a walawala ka yəi, ka ɉukulɔ lɔ mą́ą́, ŋį́ gbaɠala kaa.»

¹⁸ A kɛ tii, mɛ̨nįi mąąnɛ̨ɛ̨ ka gɛi, ŋį́ gəlee hon bələ lɛ kaa.

Israɛlə nwɔ kulɔ nwoo mu laai ə gɛ Kadɛsə-Barnea

¹⁹ Yili pulu, nɔi pun gɛnɛ̨ɛ mąą ɲɔuwɔ ŋɛ̨i Horɛbə, ku həɠə laa, yaai ka gaa Amɔrə yeeɠaa lɔwai, gu tɛɛ ɉu; yɛ bələi Yai-Laa gu wɔ Yálái ə mo la guɔ. Ka gu pa gu həli Kadɛsə-Barnea.

²⁰ Ŋą́ mo kaa, gɛ́ kaa: «Kaa həli Amɔrə yee ɓa, a yaai Yai-Laa ka wɔ Yálái kaa dɛɛi ka pɔi.

²¹ Ka ka ɲɛ̨i hee Yai-Laa ka wɔ Yálái aa nɔi ŋɛ̨i tɛɛ ka pɔ. Ka li ka hiɛ ɉu, yɛ bələi Yai-Laa ka wɔ Yálái ə naakwɛlanmo la kaa. Ka hvo ɲɔw, hɛn da hvo ka yee hu haa.»

²² Ya ɓə ka kəlee ka pa bɔ́ kaa mą́ą́: «Ka gu nuą tɔɔ gu ɲɛ̨i tɔwɔ, di nɔi hu hiɛ, di nąą mąąkpɛɛ. Di woo hukulɔ woo ɓə pai gu tɛɛ pələɠaa lɛi guɔ, da daaɠaa gu kaa pai tɛɛi ɉu.»

²³ Ŋą́ yili kaa a mɛ̨nį lɛlɛɛ, ŋį́ nu pow kɔ́w hveelɛ həɠə ka lɔwai; nu huwu tɛi tɛi kəlee nwɔ nu tɔ̨nɔ̨.

²⁴ Di ɉon a ɲee hu pələ, di həli Ɛskɔlə ɲee lɔwai lɔi hu di hiɛ nąą kɔ́lɔ kəlee.

²⁵ Di nɔi tii hu wulu ɓáɠaa həɠə, ə lɛɛ di yəi di paa la gu pɔ, di di woo hukulɔ guɔ diɛ guɔ: «Nɔi Yai-Laa kaa dɛɛi gu pɔ, lɔi lɛlɛɛ li.»

²⁶ Kɛlaa, ka hvo gɛ, ka hvo li laa. Ka ka nwun gulɔ Yai-Laa ka wɔ Yálái woo mu.

²⁷ Kaa lɛa hvaa lɔ poto-poto ka yəi bɛlɛ́nŋąą, kaa kɛ diɛ: «Wɛli kpɛɛ mąą laa ka ŋɛ̨i Yai-Laa ə gulɔ a kuɔ, a ku kulɔi ə mo Eziptə lɔi hu, ə pa ə ku lɔ Amɔrə nuą yee ŋą. Ku huwu pu mɛ̨nį ɓa.

²⁸ Mįnɛ̨ pələ ɓə ku kaa tɛɛi la? Ku nąn nonnii daa gbɛa ku hviikpɛɛ, a kɛi di mo kuɔ: ‹Nuą tii kpɛa-kpɛai, di hvaŋą kɛnɛ̨ guɔ, di wɔ taaɠaa kpɛa-kpɛai, di mąą tinɛ̨n ŋąą a hįį mɛ̨i kwɛaɠaa kpɔ ləɠə ləɠə yɛ tɛ yələkɔlɔn ma, nu huwui ŋɛ̨i da kɛ diɛ Anakə nuą di kaa hɔlɔɔ mun laa.›»

²⁹ Gɛ́ kaa: «Ka mąą hvo kpɛlin, ka hvo ɲɔw diɛ.

³⁰ Yai-Laa ka wɔ Yálái ɓə hiɛ́i ka ɲɛ̨itɔwɔ, yaa kpinįi lee ɓə pai gɔ́ kɔ́i a ka wɔ kɔ́; Yɛ bələi kpɔlɔɔ ə gɛ la Eziptə lɔi hu. Yɛ ka nwun mąąɓo, gbaɠala kaa tii kaa.

³¹ Yai-Laa ka wɔ Yálái ə ka kpəŋə yɛ bələi nu a non gbəŋə la, bələɠaa kpɔ ka tɛɛ la gəlee hu; ə lɛɛ ɉu ka həli gɛɛnąą ŋɛ̨i ɓa.»

³² Kɛlaa, mɛ̨nįi tii hu, ka ta lɔpee hvo gilitɔɔ Yai-Laa ɓa, yai a ka wɔ Yálá.

³³ A yai tii kɛ ka tɔwɔ bələ pɔ, yɛ ka hviitɔɔi kwɛli. Ə kɛ nwɔ̨n nən ɉu kwiihɛ̨ą, bələi ka kɛi hiɛ ɉu, yɛ ɉu pɔ̨nɔ̨ ka tɔwɔ. Hvóló ŋą, a kɛ tulɔ kpinįn ɉu.

³⁴ Mɛ̨nįɠaai ka kɛi mo, Yai-Laa ə́ mɛ̨n, ə nwoo kwɛlɛ.

³⁵ Yɛ kɛ diɛ: «Nɔi kpɔ ŋɛ̨i a nɔi lɛlɛɛ ŋɛ̨i, ŋį́ gwɛ́la gɛ́ gáá dɛɛi di nąnni pɔ, di tɔ̨nɔ̨ kpɛli hva nąą kaa.

³⁶ Ə kulɔ Yefune lon Kalɛbə pulu, nwɛi gaa pai nąą kaai, nɔi tii ə ɉu hiɛi, gáá pai dɛɛi, yaa da nonnii di pɔ. Mąąhɔlɔɓo ə hvilɛn Yai-Laa pulu a woo tɔ̨nɔ̨ laa.»

³⁷ Ə mą kɛ ɲą́ą́ ɓə, Yai-Laa ə níiholi bɔ́ a ka laa pɔɔ; yɛ mą́ą́: «Ə mą kɛ yɛ́, hvo pai lɔi laa,

³⁸ yii ɓaa Nun lon Ɉosue yaai a ə́ wɔ tímun, nwɛi gaa pai lɔi laa, vaŋąlɔ, mąąhɔlɔɓo, yaa ɓə pai nɔi tɛɛi Israɛlə pɔ a gwɛlin nɔi.

³⁹ Ɛlɛɛ, ka lonnii ŋɛ̨i ka kɛi di mąą mɛ̨nį ɓo, kaa kɛ diɛ: Di kaa pai lɛɛi a kɔluwɔɠaa, ka lonnii tii di hvo ni mɛ̨nį lɛlɛɛ da ɲɔ̨nwɔ̨ɔ̨ di kulɔ ɉu kɔ́lɔn, diɛ ɓə pai lɔi laa. Diɛ ɓə gáá pai nɔi tɛɛi di pɔ, diɛ ɓə pai heei nɔi tii hu.

⁴⁰ Ka wɛi, ka pənə ka pulu, ka ɉon a veen gbɔ̨nɔ̨ gboloyá pɔ pələ.»

⁴¹ Ya ɓə ka kɛ mą́ą́: «Kwaa nɛ̨ŋɛ̨n ɉəɠə Yai-Laa ɓa; ku kaa lii, ku gɔ́i tii kɔ́ kpɔlɔɔ yɛ bələi Yai-Laa ku wɔ Yálái ə mo la kuɔ.» Ka kəlee ka ka wɔ kɔ́ kɔ́ hɛnŋąą həɠə, a lɔ ka kwəi ka káá pai di hee lɔi hon ɉii lɔ ɲąą.

⁴² Nąąlɔwai Yai-Laa yɛ mą́ą́: «Mo diɛ, yɛ́ diɛ: ‹Ka hvo li ka hvo kɔ́ pɛlɛ diɛ, mąąhɔlɔɓo, və́ ka pulu yili hu; ə gɛ, ka yowoɠaa yee hvo pa tɛɛ kaa.›»

⁴³ Ŋą́ mo kaa, kɛlaa ka hvo ka wəli tɔɔ, ka ka nwun gulɔ Yai-Laa woo mu. Ka ka kilitɔɔ ka kɔ́wɔ ɓa kaa tɛ ɲee ɓa.

⁴⁴ Ya ɓə Amɔrə nuą tii heeni ɲee hu, di kulɔ, di ka laakwiɛn a kɔ́, di hvilɛn ka pulu. Yɛ kwɛ̨in gbulu, di ka paa lɔ poto-poto; ə həɠə Seirə ə həli la Hɔrma.

⁴⁵ Pənəi ka mo ka pa, ka wɔlɔ Yai-Laa ɓa, kɛlaa, Yai-Laa hvo nwəli tɔɔ ka woo ɓa.

⁴⁶ Ya ɓə ka lamun Kadɛsə a ɉu kwɛa, lɔ yɛ bələi kwaa gbɛa kɛ lamun la laa.