Abdiasə 1 - Yálá laawoo hɛɓɛ (dc)

Edɔmə lɔi too mɛ̨nį

¹ Mɛ̨nįi Abdiasə ə gaa. Mɛ̨nįi Nąmu Yai-Laa ə mo yɛ hvilɛn na Edɔmə lɔi ɓa, ya ka, yɛ mą: Kwaa wɛlɛɛ ta mɛ̨n yɛ həɠə Yai-Laa pɔɔli, daa wɛlɛɛ ɓomun da tɔɔ hį́i takpɛliɠaa pɔ, nwɛlɛɛ ɓomun tii, ku nwoo mɛ̨n, yɛ kɛ mą: «Yai-Laa yɛ diɛ: ‹Ka ka muhəɠə! Ka gu gu muhəɠə! Ka gu kɔ́ pɛlɛ Edɔmə lɔi ɓa.›»

² Yai-Laa yɛ diɛ: Edɔmə lɔi, ŋą́ą́ ə́ tiikpə lɔiɠaa lɔwai, di ɲɛ̨i tɛɠɛ aa ɓo ə́ hu kpɔ kɛnɛ̨.

³ Ə́ wɔ huɲąŋą kɛnɛ̨ lalan bilɛɛ aa ə́ ɓowo, yɛ́i ə́ mąą tinɛ̨n ŋąą a kwɛni hįį, nu ta yee hvaa tɛɛ laa yɛ́. Ə́ heɛ mɔ̨ɔ̨ tii laa, ya kɛ kɛi ə́ kpɔwɔ ɓa: «Gbɛɛ ɓə pai gúlɔi ɓɛ?»

⁴ Ə mą kɛ yaa tɛ yələi, yaa ə́ taa pu laa yɛ kuwɔ, ə mą kpɛli kɛ yaa ə́ taa pu pɛmɛ̨lɛn-gɔwgaa lɔwai, ŋą́ ə́ kulɔ laa, ŋį́ ə́ yɛɛ lɔi ɓa. Ɲą́ą́ Yai-Laa, ɲą́ą́ ɓə yili ɓoi tii.

⁵ Akɛ nwɔ̨nɔ̨ nuą, a wala kɛ tii, too mɛ̨i kɛ nuą da pa ə́ tɛɠii kpinįi, yii kpɔ di kaa bɔ, da gəlee həɠə də li la, nąąlɔwai, ya too kpɔ tɛ̨ɛ̨tɛ̨ɛ̨. Akɛ kɛɛ kala nuą da lɔ ə́ wɔ viɲə yɛai hu, viɲə tɛitɛi lɔ ɓə da nɛɛ nwulu ɓa.

⁶ Yili ɓa, kaa ŋɛ̨i a Esau huwuhu nuą, ka pɔɔli ɓɛli, nąą kəlee a kɛ a gbalan, ə mą kɛ ka wɔ hɛn gɔw loɔɠaa kəlee mɛ̨i a həɠə.

⁷ Da ka kpɛ ka wɔ lɔi ɓa, ka nuąi ka tɔɔ, yiliɠaai da ka ɓowo, ka lɛɛ ka nɛ̨ɛ̨yɔwɔɠaa yee mu a luwɔ. Ka nuąi kɛi kɔ̨nɔ̨n mįi gee ɓa, yiliɠaai da hɛlɛn dɛ ka tɔwɔ, diɛ kɛ ka mąą mɛ̨nį ɓa: «Nuą tii kili aa kpɛɛ di yəi».

⁸ Yaan, ɲą́ą́ Yai-Laa, gɛ́ diɛ: Nwɔ́ liiɲąnwąną hvólói tii hu, ŋą́ Edɔmə lɔi nwɔ kilimąą nuą kəlee paa. Ə mą kɛ nwun gɛ ɉu nuąi di kaa Esau huwuhu diɛ ɓo ɲeeɠaa ɓa, vá di lɛɛ laa.

⁹ Tema taa, ə́ wɔ kɔ́kulááɠaai hu a pu diɛ, ɛlɛɛ, da ə́ pɔ lɔi kɔ́kulááɠaa kəlee paa, Esau nwɔ yeeɠaai ɓa.

Edɔmə nuą hɔn ga

¹⁰ Edɔmə nuą, ka kaayɔwɔɠaa ŋɛ̨i a Ɉakɔbə huwuhu nuą, kaa ɓə di mąą kpoloon, kaa daɠaa paa. Yili ɓa, nwumɛ̨ kaa pai tɛi a kaa, ka laa hvo kɛa pai lɛɛi lɔi mɛ̨i

¹¹ Ɓɛlɔwai di yowoɠaa di kɛi lɔ la di pɔ daaɠaa hu a kɔ́, ɛlɛɛ, diɛ Ɉerusalɛmə dai hɛngɔw ŋąąkwɛlɛ yɛ pələi da tɔ̨nɔ̨ huwɔ ŋąąkwɛlɛ la, kaa kpɛli mąn, ka gɛ yɛ pələi tii di yowoɠaa di gɛ la.

¹² Edɔmə nuą, ka kaayɔwɔɠaa ŋɛ̨i di kaa Ɉuda lɔi hu, ɓɛlɔwai mɛ̨nį nwąnąą tii ə laa la diɛ, mąą hvo nɛ̨ɛ̨li kɛ, yili hvo ka kwəinɛ̨ɛ̨; ɓɛlɔwai di too la, yili hvo kɛ a ka wɔ kwəinɛ̨ɛ̨ mɛ̨nį, ɛlɛɛ, nalan da hvo kulɔ ka la, ɓɛlɔwai di kɛ la mɛ̨nį nwąnąą hu.

¹³ Ɓɛlɔwai tii laanɔ̨nwɔ̨ ə laa la di mɛ̨i, mąą hvo nɛ̨ɛ̨li kɛ ka hvo lɔ nwɔ́ nuą tii di wɔ taai hu, di wɔ taai woloi lɔwai. Mɛ̨nį nwąnąą tii laa diɛ, mąą hvo nɛ̨ɛ̨li kɛ, hvo kɛ kaa a kwəinɛ̨ɛ̨, gu hvo mun kɛ, ə́ daai tii hu hɛn gɔw ta həɠə, ɓɛlɔwai di kɛi too la di mɛ̨i.

¹⁴ Mąą hvo nɛ̨ɛ̨li kɛ, hvo tɔɔ bələ taŋąnaɠaa, nuąi da kɛi kɛ di pu, yɛ́ di paa, a wala kɛ tii, yiiɠaai da pu, yɛ́ di hon, yɛ́ di tɛɛ di yowoɠaa pɔ a mɛ̨nį nwąnąą hvólói tii.

¹⁵ Mąąhɔlɔɓo, volói Yai-Laa kaa pai hį́i kəlee kiti teei la, mąą aa kpuɔ. Nąąlɔwai, pələi tii ə́ gɛ la a ə́ ɓɛlaa, pələ lɔ ɓə da gɛ la a yɛ́. Mɛ̨nį ɲɔ̨n tii ə́ gɛ, gwələ a kulɔ yɛ́.

Israɛlə kaa pai nwɔ kwələ kulɔi Edɔmə ɓa

¹⁶ Kaai ɓaa Israɛlə nu huwu, kaa gbɛa nwɔ́ liiɲąnwąną kpələ kɔ́wɔi hu lɔɔ kpələ, nwɔ́ yee ŋɛ̨i ɉéé pɛlɛ kaa tɔɔ ni mɛ̨i, mą. Yii ɓaa nɔi yiiɠaa tii di wɛi, gbəlɛɛ hvo pai kpɛlai pələi, di kaa pai gbələi, ə di kɛlɛ. Yili pulu, di kaa pai kpɛɛi kpɔ lɔi mɛ̨i tɛ̨ɛ̨tɛ̨ɛ̨??.

¹⁷ Nąąlɔwai, Siɔn yee ɓa, yii gaa pai pənəi ə kɛ a ɲą́ą́ nwɔ́ɔ́, yii wolaai da kulɔ ɉu, di kaa pai liilaa hɔlɔɓoi. Ɉakɔbə huwu kaa pai pənəi di di wɔ lɔi hɔlɔɓo.

¹⁸ Ɉakɔbə nwɔ pɛlɛ́i kaa pai kɛi yɛ nwɔ̨n. Ɉosɛfə nwɔ pɛlɛ́i kaa pai kɛi yɛ nwɔ̨n nən, di kaa pai Esau huwu kəlee kələn ɉii, yɛ pələi nwɔ̨n a kɛɛ kpalaa kələn na. Dɔ̨nɔ̨ kpɛli hva lɛɛ yɛnɛ̨ɛ̨. Ɲą́ą́ Yai-Laa, Nwóó li.

¹⁹ Ɉuda nu huwu kaa pai Esau huwu nwɔ yeeɠaai həɠəi ɉɛɠɛɛ pələ, di hee nɛ̨ŋɛ̨ lɔi hu, ɓɛi ŋɛ̨i kɛ a Filisti nuą di wɔ lɔi, ə mą kɛ da Samari taa, yii Ɛfraimə nuą di wɔ lɔi hu. Bɛnɉamɛn huwu kaa pai Galaadə lɔi həɠəi.

²⁰ Israɛlə nu huwui ŋɛ̨i kɛ luwɔlaa hu, mąą kwɛlan tii ɓa, di Kanaan lɔi hu nuą kpɛ ə lɛɛ kpɔ ɉu, di həli la Sarɛpta. Ɉerusalɛmə nuąi kɛ luwɔlaa hu Sefaradə, di ɉɛɠɛɛ pələ taaɠaa hon.

²¹ Di kaa pai yeetɛɛmąą kɛi di Siɔn yee tumun, nąą ɓə di kaa pai heei laa; Esau huwu nwɔ yeeɠaa ə lɛɛ di yee mu. Nąąlɔwai, tɔɔlaa a kɛ a Yai-Laa nwɔɔ.