Timote dɔlɔɔ 4 - Yálá laawoo hɛɓɛ (dc)

Yálá kɛ mɛ̨nį kəlee lɛlɛɛi

¹ Yálá nwɔ Kilii a mo kpɔ a neelee yɛ, vóló gbɛla mąąɠaa ŋɛ̨i hu, nu tamąą kaa pai laa na pələ lɛɛi, diɛ hvilɛn di ɓowo nuą woo pulu, ɛlɛɛ da kalan ɉuwuɠaai a həɠə ɲinɛ̨nŋaa pɔ;

² a nɛɛi di pai moi laa, huhveelɛ nuą da lɛɛ nuą, diɛ lan, a diɛi, daa di pɔɔ kɛ di kili ɓa a kwɛli kpɔlu.

³ Di pai tɔn dɔɔi hilɛtai mɛ̨nį ɓa, diɛ tɔn dɔɔ kɔ̨nɔ̨n daɠaa diɛ, ya pa, Yálá ə di pɛli, laa na nuąi álá kɔlɔn a neelee, da kɛli mįi, diɛ Yálá mąmąɓo.

⁴ Mąąhɔlɔɓo, hɛn kpɔ Yálá ə bɛli, gəlee lɛlɛɛi, da laa hvo kulɔ li ɉu, yá kɛli mįi, yɛ́ Yálá mąmąɓo.

⁵ A tɛ̨ą, Yálá laa woo, da hvɛli woo a mąąhəɠə.

⁶ Mɛ̨nįɠaa ŋɛ̨i laa kalan nɛa ɲɛ̨i; yili hu ɓə, yá pɛli kɛi la a Jesus Kristə ŋą kpɔn ɉu mɛ̨nį ɲɛ̨i kulɔmun nɛlɛɛ, ə́ kɔ̨nɔ̨n ə ɓo a laa na laa hu wooɠaa, ɛlɛɛ, da mɛ̨nįi di ə́ mąąkwɛli mą a tələnmolaa.

⁷ Yii hvilɛn na nɛɛ pɔlɔ kiliinŋąaɠaa tii diɛ, yai nɛ̨ɛ̨goloɠaa lɔ ɓə da ɉee gee lai, 'ə́ wəli kulɔ yiliɠaa kəlee hu. 'Ə́ kpɔwɔ ɲąątɔɔ a Yálá mɛ̨nį.

⁸ Nu yá ə́ kɔ́lɔ ɲąątɔɔ a mɛ̨nį ta, dɔlɔ kaa lɔ mą mɛ̨nį pɛlɛɛɠaa hu, kɛlaa Yálá mɛ̨nį nwɛi, dɔlɔ kaa mą mɛ̨nį kəlee hu. Kɛlɛi yili mun mə, yɛnɛ̨ɛ̨ laakwɛlanmoɔ ɉu, yɛ ə kɛ a, háákələi yɛnɛ̨ɛ̨, awala kɛ tii, tínąą gaa pai?

⁹ Nwoo ŋɛ̨i kaa a kilitɔɔmąą woo, mąąnɛ̨ɛ̨ nu kəlee ə ɲee hee mu kpɔ a tɛ̨ą.

¹⁰ Gbala ə tɔɔ, akɛ gu kaa mɔ̨nɔ̨ mįi, ɛlɛɛ, guɔ kɔ́, gu kili ɓə gu dɔɔ Yálá hvúlúmąą ɓa, yai a nu kanŋaa kəlee ɓalomun, gəlee ə mą kɛ, laa na nuą.

Laa na nuą kɛ pələ

¹¹ Yili ɓə mąąnɛ̨ɛ̨ ə́ nu kəlee tí la, ə́ di mąąkwɛli mą.

¹² Nu ta hvo tɛɠɛɓo ə́ wɔ hulɔnon naa hu. Kɛlaa yaamun, 'kɛ́ nui da di yíi pələ kɔɔnmą, ə́ hvaa woo hu, ə́ túwɔ́ pələ hu, wɛlikɛmąąlaa hu, laa na laa hu, da mąąhəɠəlaa hu.

¹³ Gɛɛ və́ kɛ pai, kąnąn Yálá laa woo hɛɓɛ́ kalanŋąą ɓa, yɛ́ nuą liɛwoo kɛ, yɛ́ nuą mąąkwɛli.

¹⁴ Yálá ŋą nɛ̨ɛ̨laa hu mɛ̨inɛ̨ɛ̨ tii ə́ hu, hvó tɛɠɛɓo ɉu, a yai ə́ ɉɔlɔɓo a Yálá kwəi mɛ̨nį hukulaa laa pɔɔ, ɛlɛɛ, da nu pɔlɔɠaa yee pɛlɛɛ ə́ mɛ̨i.

¹⁵ Yili ɓə mąąnɛ̨ɛ̨ ə́ ə́ kiliŋąlaa mą. Yili ɓə mąąnɛ̨ɛ̨ ə́ tɔɔ la kpąą, ə gɛ, nu kəlee di ə́ wɔ tɛ tɔwɔ laa kaa.

¹⁶ 'Ə́ kpɔwɔ mɛ̨ikaa ə́ bɛlɛ ə́ wɔɔ nu mąąkwɛli pələ ɓa. 'Kąnąn mą kpąą; yili pɔ pələ ɓə, yá pɛli ə́ ə́ kpɔwɔ ɓalo la, da nuąi da kɛ ə́ woo mɛ̨n ɉii.