Tɛsalonikə dɔlɔɔ 4 - Yálá laawoo hɛɓɛ (dc)

Yɛnɛ̨ɛ̨ kɛ pələi a Yálá lii hon

¹ Ną́n nonnii, yii lɛɛ pulu, ya ka; mɛ̨nįi ku kaa ɉuhvɛlii, kuɔ gɛ a ká hvaŋąlɔ pələ gu Nąmu Jesus hu, ya ɓaa: Bələi mąąnɛ̨ɛ̨ ká túwɔ́ la káá pɛli Yálá lii hon ɉii, kwaa ká mąąkwɛli yili ɓa, ɛlɛɛ yaan, bələ kpɔ ɓə ká káá túwɔ́i la, 'ká ká yee mąą tɛ ká ɉon nwɔ̨nɔ̨ a nįnɛ̨.

² Káá kpinįi mɛ̨nįi ku ká mąąkwɛli mą yɛ həɠə gu Nąmu Jesus pɔ, ká gɔlɔn.

³ Yálá liiɓa ɓaa, ká mąąhəɠə mɛ̨nį, ɛlɛɛ, ká ká yee kulɔ mąąliɓi túwɔ́ hu.

⁴ Nu tɛitɛi ə nɛ̨ą laa hɔnmo mąąhəɠəlaa hu, da ɓɛlɛ laa;

⁵ hvo gbɔwɔ lɛɛ laa kiliŋąhiɛ ɲɔ̨nwɔ̨ɔ̨ yee hvo tɛɛ mą, yɛ bələi hali yíi hu nuą da gɛ la, diɛi di hvo Yálá kɔ́lɔn,

⁶ nu ta hvo kɛ gaa mɛlan vului, yɛ mɛ̨nį nwąnąą laa mą mɛ̨nįi ŋɛ̨i hu, gbala ə tɔɔ, gu Nąmu a yili kəlee gwələ kulɔ, yɛ bələi ku gbɛa mo la káá, kuɔ mąąlaŋąn.

⁷ Yálá hvo kɛ gu təli li gu yee lɔ mɛ̨nį ɓa mąąliɓi túwɔ́ hu, kɛlaa, Ə gu təli mąąhəɠə laa ɓa.

⁸ Yili ɓa, nui a ɲee kulɔ niɛwoo ŋɛ̨i mui, hvo ɲee kulɔ li nu ta mu, Yálá ɓə aa ɲee kulɔ mu, yai ŋą Kili-Mąąhəɠɛɛ tɛɛ ká pɔi.

⁹ Yii hvilɛn na lee-lon naa wɛlikɛmąą ɓai, ku mą wala mąą mɛ̨nį ta ɓo káá; hvó gaai, ká keeni wɛli la kɛ mɛ̨nį, káá kpinįi káá yili mąąkwɛli Yálá yəi,

¹⁰ ɛlɛɛ, ká kɛmun yili kɛi Kristalɛa kəlee diɛ Masedoanə nąą kəlee. Ną́n nonnii, ku kaa ká hvaŋąlɔi, kuɔ ká ká yee mąą tɛ ká ɉon nwɔ̨nɔ̨ a nįnɛ̨;

¹¹ 'Ká ká wɔ yɛnɛ̨ɛ̨ kɛ, a yíi-la-nɛ̨ɛ̨, 'nu kəlee ə ɲɛ̨i lɛɛ gbɔwɔ mɛ̨nį ɓa, ɛlɛɛ, ə kóló kɛ a gbɔwɔ yee, yɛ bələi ku ká tí la,

¹² əgɛ, ká túwɔ́ pələ mąą ə wiɛ yɛnɛ̨ɛ̨ nuą ɲɛ̨i ɓa, ɛlɛɛ, ká hvo pa nəi hɛlɛn nu ta ɓa.

Haa nuą nwun mə̨nį, gu Ną́mu ŋą hvólói mąąkpɔn mɛ̨nį

¹³ Ku hvo bɔ, ną́n nonnii, ká hvo lɛɛ kwəi pili mąą hu, yii hvilɛn na haa nuą diɛ, əgɛ, ká hvo pa kɛ liikələn gwəi hu, yɛ nuą yiiɠaa ti, kilitɔɔ mąą laa hvo di yəi.

¹⁴ Yii kani gu laai na guɔ, Jesus ə haa, ə nwun, bələ lɔ ɓə gaa la, nuąi daa haa, Jesus mąą mɛ̨nį ɓa, Yálá kaa pai di nwun ɉii Jesus hu, ə pa a diɛ.

¹⁵ Mɛ̨nįi kuɔ ku mo káa, yɛ kulɔ gu Ną́mu hvaa woo hu, ya ka: Guɔ pai lɛɛ a gu hvulú, gu Nąmu pa yələ yɛ həli, gu hvo pai tɛɛi nuąi daa haa di tɔwɔ.

¹⁶ Gbala ə tɔɔ, malaka kɛnɛ̨ ɓə pai nwoo pilii, ɛlɛɛ, Yálá nwɔ túlúi woo ə tɔɔ, gu Nąmu yaa kpinįi, a yɛɛ yɛ həɠə yələi, a kɛ tii, nuąi haa Kristə hu, da gbɛa nwun,

¹⁷ yili pulu, guɔi gwa lɛɛ a gu hvulú, gwa diɛni gwa gu nuhəɠə, gu tɛ túlɔ́ kpinįnŋaa mɛ̨i, gu Nąmu laakwiɛn ɉii, hvaŋą hu, yili pulu gwa lɛɛ laa kɛa gu Nąmu kwɛlɛ a yələ kəlee.

¹⁸ 'Ká ká keeni liilaa kani a niɛwoo tii.