Samuɛlə dɔlɔɔ 9 - Yálá laawoo hɛɓɛ (dc)Saulə ə kɛi nąn nwɔ hoohvaalənŋaa kwɛli 1 Bɛnɉamɛn mun da ə kɛ laa, diɛ kɛ naa ɓaa Kisə yai kɛ a Aviɛlə lon Serɔrə lon Bekoratə lon, Afia lon, yai kɛ a Bɛnɉamɛn mun da lon. Kpakolo li kɛ. 2 Kisə lon ɉulɔnu ə kɛ laa, diɛ kɛ mą: Saulə. Saulə ə kɛ a laŋąlon nɛlɛɛ ta, Israɛlə nuą lɔwai, nu ta hvo kɛi həli bɔ; nwun naɠin ŋąąi kɛ nu kəlee mɛ̨i. 3 Saulə nąn Kisə nwɔ hoohvaalənŋaa di pili, Kisə yɛ non Saulə ɓa: Nuwɔɠaa ŋɛ̨i bɛlɛ́n dɔ̨nɔ̨ həɠə, ka yaa ka li, ka ɉoohvaalənŋaa kwɛli. 4 Di Ɛfraimə yeeɠaa hu hiɛ, di Salisa lɔi hu hiɛ, di Saalimə lɔi hu hiɛ, di hvo ɉoohvaalənŋaa kaa. Di Bɛnɉamɛn lɔi hu hiɛ di hvo di kaa. 5 Di həliɛ Sufə lɔi hu, Saulə yɛ bɔ mun ma: «Gwə li, gáá ɲɔwi, ną́n və kɛa pai giliŋąhiɛi ɉoohvaalənŋaa diɛ, gu mąą liihlɛn mə kɛa pai tooi mą.» 6 Yili yɛ Saulə ɓa: «Kɛlɛi Yálá nwɔ nu ta kaa daa ŋɛ̨i hu-ee! Ɉulɔnui tii laa tɛɛi, yii a mo, a kɛ, hva ɉəɠə mą. Gwə li laa, gaa kiɛ pai gu tənən dɔɔi ɉiɛi ŋɛ̨i gu gulɔ mąą mɛ̨nį hu.» 7 Saulə yɛ bɔ mun ma: «Ee! Gwə li laa, kɛlaa, lə ɓə gwa pɛli lííla ɉulɔnui tii pɔ? Lɛɠɛ hvo kɛa gu yəi míiɠaa hu, ə lɛɛ, mąą hvo nɛ̨ɛ̨li gu hvo bələ pɔ kɔ̨nɔ̨n dɛɛ Yálá nwɔ nu pɔ. Lə ɓə gu yəi guɔ li la?» 8 Saulə pɔ mun tii ə nwoo pulu pənə yɛ mą: «Aa kɛ a nɛlɛɛ, wali kwələ tiikpə kaa ɲə́i, gáá lii dɛɛi Yálá nwɔ nui tii pɔ, ə gu kilaa pɔ̨nɔ̨ ɉiɛ mɛ̨nįi ŋɛ̨i hu.» 9 Di kɛi wɔlɔ mo diɛ kɛ Israɛlə lɔi hu, nuą da kɛi li Yálá mąąnin gɛ, da kɛ diɛ: «Ka pa, ka gwə li gɛɛkaamun bɔ», mąąhɔlɔɓo Yálá kwəi mɛ̨nį hukulɔ mun mə di kɛi kɛ mą wɔlɔ kɛɛkaamun. 10 Saulə yɛ bɔ mun ma: «Yáá mo a nɛlɛɛ, pa gwə li.» Di tɛ taai, ɓɛi Yálá nwɔ nui ə kɛ laa. 11 Di kɛɛ tɛi taai, di nɛ̨ɛ̨lɛa kaa daa həɠə taai pələ, diɛ li yá haɠai. Diɛ yiliɠaa diɛ: «Gɛɛkaamun gaa ɓɛ?» 12 Yiliɠaa diɛ mą: «Ee! Lɛɛ lɔ ə́ ɲɛ̨i tɔwɔ ə́ li, kɛlaa, ə́ mąąhulɔ ə́ li, mąąhɔlɔɓo, ə pa taai háákələi, gbala ə tɔɔ, taa haláá kulɔ mɛ̨nį kaa laa ɉaláá kulɔi. 13 Ka lɛɛ kpɔlɔɔ tɛi taai, ka li ka həli mą, hvo tɛɠa kɛ pai lii ɉala kulɔi pələ. Mąąhɔlɔɓo, yaa tii ɓə nuą kaa mąąkpɔn ɉii; di hva pɛli kɔ̨nɔ̨n mįi dɔwɔ. Gbala ə tɔɔ, ya ɓə mąąnɛ̨ɛ̨ ə lúwɔ́ too ɉaláá kɔ̨nɔ̨n ma. Yili kɛɛ pulu ɓə, nuąi di di təli, da pɛli kɔ̨nɔ̨n mįi la. Ka li kɛa, nwɛi tii, ka káá lii gaai háákələi.» Samuɛlə da Saulə 14 Di tɛ taai. Di kɛi kpɔlɔ tɛ taai-yoo, Samuɛlə yɛ həɠə di ɲɛ̨i tɔwɔ pələ yɛ li ɉaláá kulɔi. 15 Yan, Yai-Laa ə gbɛa kɛ Samuɛlə kiliŋą pono hvóló tɔ̨nɔ̨ ə kulɔ ɉu, Saulə hvo tɛɠa kɛ pai; Yai-Laa yɛ Samuɛlə ɓa: 16 «Tínąą ɓɛlɔwai ɲɔ̨nwɔ̨mąn, gáá pai Bɛnɉamɛn lɔi hu mun da tɛɛi yɛ́, ə́ nwulɔ mąąhəɠɛɛ lɔ ma, ə́ gɛ a nwɔ́ nu huwu Israɛlə ɲąąwooɓomun, ya ɓə pai nwɔ́ nu huwui kulɔi Filisti nuą yee mu. Ŋą́ą́ nwɔ́ nu huwui kaa, nwɔlɔ woo aa həli mą́ą́.» 17 Samuɛlə ə Saulə kaa, Yai-Laa ə nɛɛ mą ə gilaa pɔ̨nɔ̨ yɛ mą: «Ɉulɔnui ŋą́ mąą mɛ̨nį ɓo, gɛ́ kɛ yɛ́, ya ɓə pai nwɔ́ nu huwui ɲąąwooɓo, ya ka.» 18 Saulə ə mąą lɛɠɛ Samuɛlə ɓa ɉįi la, yɛ mą: «Nán! Gɛ́ ə́ gɛɛkaamun nwɔ pɛlɛ́i lɛ mą́ą́.» 19 Samuɛlə yɛ Saulə ɓa: «Ɲą́ą́ ɓə a gɛɛkaamun, tɛɛ dɔ́wɔ gwə li ɉaláá kulɔi. Gu kaa pai kɔ̨nɔ̨n mįi gee ɓa háákələi, tínąą yələwala pɔ, ŋą́ ə́ lɛɛ laa ə́ li. Ɛlɛɛ, mɛ̨nįɠaai ə́ kwəi pilɛɛ la, ŋą́ gəlee pulu pənə. 20 Yii hvilɛn na ɉoohvaalənŋaai daa pili ə́ yəi aa kɛ a hvoló haaɓa diɛ, hvo niihɛlɛn ɉee daa di kaa. Ə lɛɛ, gbɛɛ ɓə hɔlɔ mun nwɔɔ ɓaa ɉɛnŋaa kpɔ mąą mɛ̨nį nwąnąą Israɛlə lɔi hu? Kɛlɛi yɛ́ ka ə́ nąn ɲəi bɛlɛ́n mə-ə?» 21 Saulə yɛ mą: «Gbului golɔɔ Israɛlə nuą lɔwai, yaai ɓaa Bɛnɉamɛn yəi bɛlɛn, nąą mun ɓaa a ɲą́ą́. Ku huwu kaa Bɛnɉamɛn nu huwu lɔwai a pɛlɛ́ logolo; yá pɛli mɛ̨nį taaləi ŋɛ̨i ɓo pələ kɛi ləi náá mɛ̨i?» 22 Samuɛlə ə Saulə da bɔmun di həɠə, di lɔ naa mįi pɛlɛ mu, ə di hee nuąi kɛ di təliɛ gɔ̨nɔ̨n ma di ɲɛ̨itɔwɔ. Nuąi tii di kɛ a nu pow haaɓa ɲɔ̨nwɔ̨mąn. 23 Samuɛlə yɛ nəɠi yili mun ma: «Ɉuwɔi tii lee ŋą́ dɛɛ ə́ pɔ, gɛ́ yɛ́ naa a dee, paa la.» 24 Nəɠi yili mun ə pa a ɉuwɔ wələ da nwon, ə naa Samuɛlə lííla, yɛ mą: «Yii di naa ə́ tɔwɔ, ya ka daa ɉee ə́ lííla, mįi, mąąhɔlɔɓo, di ɉee ə́ tɔwɔ kpɔlɔ yili mąą mɛ̨nį ɓa; ɓɛlɔwai di kɛ la mą́ą́: ‹Gáá galanɉonŋaa təlii.›» Samuɛlə da Saulə di di laa mįi gee ɓa a mąą yələ. 25 Di həɠə ɉaláá kulɔi də li daa kwəi. Samuɛlə da Saulə di hee ɲələi pɛlɛ ɲimąn mu, di hee laa di tɔ̨nɔ̨ kɛɛnąą di lono kɛ. 26 Mąą yələ laa ɓoɔ, Saulə da bɔ mun di humo a di ɲįnąąɓoɔ. Yii kɛa kɛɛ hu ə pɔ̨nɔ̨, Samuɛlə ə Saulə təli ɲələi pɛlɛ ɲimąn mu, yɛ mą: «Gwə li, ŋą́ ka kɔwɔla pili.» Saulə da Samuɛlə di hvilɛn bələ ɓa. Samuɛlə ə Saulə hee a tɔɔmun 27 Di kulaa kɛa ɉíín pulu, Samuɛlə yɛ Saulə ɓa: «'Mo ə́ pɔ mun ma, ə mąątɛ tɔwɔ pələ, ə́ wɛi, kpɛla ə́ tɔɔ, ə́ ə́ wəli tɔɔ, nwooi Yálá ə mo, ŋį́ mo yɛ́.» |