Samuɛlə dɔlɔɔ 2 - Yálá laawoo hɛɓɛ (dc)

Anə nwɔ Yálá mąątɛ̨nɛ̨ wələ

¹ Anə ə Yálá hvɛli yɛ mą: Yai-Laa nwɔ lúwɔ́ haalai, gwə́inɛ̨ɛ̨i; Yai-Laa nwɔ lúwɔ́ haalai, ŋą́ą́ nwún muhəɠə, Gɛ́ pɛli yɛ́lɛ́i ɲówoɠaa diɛ. Gwə́inɛ̨ɛ̨i! Yálá aa kpɔnmąą tɛɛ bɔ́.

² Gbɛɛ ɓə nwɔ mąąhəɠə laa kaa yɛ Yai-Laa? Da hvo laa, ə kulɔ Yɛ́ tanɔ̨n gbən ə́ pulu. Nu mąąkɔ̨nwɔ̨ kwɛni ta hvo laa, nwalawala yɛ həli ku wɔ Yálái pɔ.

³ Ka hvo ka nwun dɛɠii hvaa ɓo lɔ tii, tɛɠɛɓo ɉu woo hvo kulɔ ka la. Yai-Laa kaa a Yálái mɛ̨nį kəlee kpaɠala kaa mą, ya ɓə a nuą kɛ mɛ̨nįɠaa kiti tee.

⁴ Kɔ́kulááɠaa di wɔ kilɛn hu a yali, Kɛlaa nuąi kɛi pa tooi, daa di hąą yili a huwalawalalaa.

⁵ Nuąi kɛi kɔ̨nɔ̨n ɉu kala, di kaa kóló kwɛlii kɔ̨nɔ̨n ɉɔlɔɓo mɛ̨nį ɓa. Nuąi kɛi pulu həɠə, diɛ di hvįitɔɔ. Ɛlɛɛ kpomąnɛ̨ą aa lon gaa mɛ̨ihveelɛ. Ɛlɛɛ, lon gaa nɛ̨ɛ̨nu kwəi aa haa.

⁶ Yai-Laa ɓə a nu paa, Yaa lɔ ɓə a nu ɓalo, nu a yɛɛ ɲąmuątaa, nu ə kulɔ laa.

⁷ Yai-Laa ɓə a nu kɛ a yeehowolo mun, yɛ nu kɛ a hɛn gɔw nąmu. A nu nwun mąą yɛɛ, yɛ nwɔ̨nɔ̨ nu nwun muhəɠə.

⁸ A mąąwɛli mun muhəɠə, ə gulɔ muluun ɉu. Yɛ yeehowolo mun gulɔ tulun ŋą. Yɛ di heei gulɔ tɔɔbɛlaa lɔwai, yɛ di hee kpəlin mąąwia mɛ̨i. Mąąhɔlɔɓo, Yai-Laa ɓə lɔi nąą kəlee kaa ɲəi. Ya ɓə lɔi kɔ́wɔ hvilɛn.

⁹ Nuąi da ɲɔw mą, a di mɛ̨i kaa. Kɛlaa, nu ɲɔ̨nwɔ̨ɔ̨ɠaa nwun na kaa pai pilii kpįnįi. Mąąhɔlɔɓo, nu nwɔ huwalawala hvee a kɔ́ nɛ̨ɛ̨ mą.

¹⁰ Yai-Laa ɲowoɠaa hu kaa pai yalii. Gaa pai lɛɛi yələkɔlɔn ɉu yɛ nwɔ yələgbąnąą ɓɛla di mɛ̨i. Yai-Laa kaa pai lɔi pilɛɛ gee mɛ̨i kiti teei, gaa pai heeɓo laa tɛɛi nwɔ tɔɔmun bɔ. Nui a dɔɔi, ə́ mąątí a dɔɔ wulɔ, yɛ ɲɛ̨i pɔ̨nɔ̨.

¹¹ Ɛlkana ə li bɔɔli Rama, nokolo nwɛi, ə kɛi tí Yai-Laa ɓa, ɉaláá laa həli mun Eli ɲɛ̨i ɓa.

Ɉaláá laa həli mun Eli lonnii di kɛi túwɔ́ a ɲɔ̨nwɔ̨ɔ̨ a nuą

¹² Eli lonnii di kɛ a nu kpoloonŋaa, Yai-Laa mąą mɛ̨nį hvo kɛ di ɲɛ̨i ɓa a hɛn da.

¹³ Bələi nuąi tii di kɛi túwɔ́ la a nuą, bələ ka: Nu ta a haláá kulɔ kɛ, da kɛi ɉuwɔ yili, ɉaláá laa həli mun nwɔ tímun ə pa, kwɛli mįnɛ̨ ə ɓo ɲəi, ɲin ə ɓo na haaɓa,

¹⁴ ə kɛi nɔ ɉɛnɲąŋą hu, nəɠi hu, gəgən ɉu, hɛn nɔpee kɛi lɛɛ gwɛli mįnɛ̨ ɓa, ɉaláá laa həli mun ə kɛi yili həɠə a nwɔɔ. Bələ ɓə di kɛi túwɔ́ la a Israɛlə nuąi kɛi pa Silo daai.

¹⁵ Hvo lɛɛ lɔ a yili, gɛɛ di hvo ɉuwɔ wulɔ kələn, ɉaláá laa həli mun ɲee pɔ mun ə kɛi pa, nui kɛi ɉaláá hɛnŋaa kɛ, yɛ kɛ yili ɓa: «Ɉaláá laa həli mun nwɔ mɔn ɉuwɔ hve, hvo pai huwɔ yilɛɛ hon ɉii ə́ yəi, huwɔ nwunu ɓə gaa bɔ.»

¹⁶ Mąą nu a kɛ mą: «Tɔɔ nii di ɉuwɔ wulɔ kələn, yili pulu yii lɔpee ya kɛ bɔ ə ɉəɠə», ə kɛi kɛ mą: «Kpaa, yiihu ɓə mąąnɛ̨ɛ̨ ə dɛɛ la, a wala kɛ tii, ŋą́ ɉəɠə a wea.»

¹⁷ Eli lonnii di wɔ nɛ̨ŋɛ̨n kɛnɛ̨i kɛ Yai-Laa ɲɛ̨i ɓa, mąąhɔlɔɓo, di kɛi Yai-Laa nwɔ haláái hon a mɛlɛ too pələ.

Samuɛlə ə kɛ Yálá nwɔ́ kóló ɓa Silo

¹⁸ Samuɛlə nwɛi, ə kɛi nwɔ kólói kɛ Yai-Laa lííla, ə kɛ kɛa a hulɔnon, kilɛn ɉəɠə kwɛlɛɛ ə ɓo mą.

¹⁹ Nee ə kɛi bɛli mąą həɠə kɛ, yɛ li la bɔ a kwɛlan gəlee, ɓɛlɔwai da ɉilɛ di kɛi li la gwɛlan ɲeemu haláá kulɔ mɛ̨nį ɓa.

²⁰ Eli ə kɛi lúwɔ́ too Ɛlkana da nɛ̨ą diɛ, yɛ kɛ diɛ: «Yai-Laa ə ə́ kɔ́ a nɛ̨ɛ̨nui ŋɛ̨i kwəi lon, ə kɛ a yii ka dɛɛ Yai-Laa pɔ a mąąhvalin.» Di pənə də li di pɔ taai.

²¹ Yai-Laa ə ɲɛ̨i lɛlɛɛ hee Anə ɓa, Anə ə lon ɉinąą haaɓa da lon nɛ̨ą hveelɛ kaa. Samuɛlə logolo nwɛi, ə kɛi kɛnɛ̨ Yai-Laa lííla.

Eli ə haŋą nonnii diɛ

²² Eli pɔlɔɔ kɛa kɛ kɛnɛ̨, dúwɔ́ taaləi nonnii di kɛ gɛ a Israɛlə nuą kəlee, ə kɛi bələ mɛ̨n; Ə mą kɛ laai ŋɛ̨i di kɛi mo a nɛ̨ąąi ŋɛ̨i kɛi pa gee kaa kələ laaləi.

²³ Ə mo diɛ, yɛ diɛ: «Lə ɓə kɛ yai ka káá dúwɔ́ taaləi ŋɛ̨i ɓoi, nu kəlee yɛ bələ ɓo, bələ yɛ həli mą́ą́?

²⁴ Ka kpɛla mą nónnii, mɛ̨nįi Yai-Laa nwɔ nu huwui kaa Lɛa mo a ka laa hvo kpɔ lɛlɛ li.

²⁵ Nu a nɛ̨ŋɛ̨n ɉəɠə nu ɓa, Yálá a dɛ̨ą ɓo, kɛlaa nu a nɛ̨ŋɛ̨n ɉəɠə Yai-Laa ɓa, gbɛɛ ɓə pai giti teei?» Di hvo di wəli tɔɔ Yai-Laa woo ɓa, mąąhɔlɔɓo, Yai-Laa ə kɛ bɔ ə di paa.

²⁶ Samuɛlə nwɛi, ə kɛi kɛnɛ̨, yɛ Yai-Laa da nu haŋąą di lii hon.

Yálá yɛ gaa pai Eli da ɲəi bɛlɛ́n nuą di hutɔɔi

²⁷ Yálá kwəi mɛ̨nį hukulɔ mun da ə pa, ə Eli kaa, yɛ mą: «Mɛ̨nįi Yai-Laa aa mo ya ka: ‹Ŋą́ gbɔ́ɔ́ lɛ ka nąnni diɛ, ɓɛlɔwai di kɛ la Eziptə tɔɔmun ɲee mu luwɔlaa hu,

²⁸ ŋą́ ə́ nąn ɉəɠə Israɛlə nu huwuɠaa kəlee lɔwai, gɛ́ gɛ a nwɔ́ haláá laa həli mun, yɛ tɔɔ nwɔ́ haláá kulɔi kɛɛnąąi ɓa, yɛ lansan kələn, yɛ ɉaláá kulɔ həɠə too ɲɛ̨i ɓa, hɛn lɔpee Israɛlə lonnii di kɛi gɔ́ la, ŋą́ kɛi gəlee tɛɛ ə́ nąn nwɔ pɛlɛ́i pɔ.

²⁹ Lə ɓə kɛ yai ka káá tɛɠɛɓoi nwɔ́ haláái hu, da gɔ́ hɛnŋaai ŋą́ vaaɓo nuą diɛ ɲəi bɛlɛ́n? Lə ɓə kɛ yai, yá nwumɛ̨ ə́ lonnii diɛ, yɛ di hviɛlaɓo mą́ą́? Lə mɛ̨nį ɓa ka koo kaa laai ka ŋą a nwɔ́ nu huwui Israɛlə nwɔ haláá hɛn nɛ̨ɛ̨mun?

³⁰ Yili mąą mɛ̨nį ɓa, Yai-Laa Israɛlə nwɔ Yálá woo ka: Ŋą́ ta mo tii, gɛ́ kɛ diɛ, ə́ wɔ pɛlɛ́i da ə́ nąn nwɔ pɛlɛ́i di kaa pai hiɛi ɲɛ̨i ɓa a yələ kəlee, kɛlaa, yiihu, Yai-Laa woo yili aa həɠə mą. Mąąhɔlɔɓo, nuąi da mą́ą́wiɛ, ŋą́ di mąąwiɛ, nuąi da tɛɠɛɓo ɉú, di ɓɛlɛ aa kpɛɛ diɛ.

³¹ Yələ ta kaa pai həli, gɛ́ ə́ huwu pu, da ə́ wɔ pɛlɛ́i. Hulɔgolo hva kɛa hɔlɔɓo ə́ yəi bɛlɛ́n.

³² Ə́ kaa pai nu takpɛli kaai bɛlɛ́ mąąhəɠɛɛ mu, da mɛ̨nį lɛlɛɛɠaai gáá pai gɛi Israɛlə ɓa. Kɛlaa, nu pɔlɔ-pɔlɔ hva kɛa hɔlɔɓo ə́ yəi bɛlɛ́n.

³³ Kɛlaa, gáá pai ə́ yəi bɛlɛ́n mun da lɛɛi nwɔ́ haláá kulɔ kəhi ɓa; ɲɛ̨i yɛ ɲɔ̨n, vii yɛ kpɛɛ, ə́ wɔ pɛlɛ́i mu nuą kəlee kaa pai kɛi lɛɛi a di nwunu kɔ́lɔi, diɛ haa.

³⁴ Ə kaa pai yili kpaɠala kaai a mɛ̨nįi pai laai ə́ lonnii hveelɛi ŋɛ̨i Hɔfni da Pinasə diɛ, di kaa pai haai a hvóló tɔ̨nɔ̨.

³⁵ Yili pulu, gáá pai nwɔ́ hala laahəli mun nɛlɛɛ həɠəi, gaa pai túwɔ́i a nííɓa, yɛ bələi gáá la bɔ. Gáá pai pɛlɛ́ tɔɔi mą, vilɛn ŋąą kpilin, gaa pai kɛi hiɛi a yələ kəlee nwɔ́ nui ŋɛ̨i ŋą́ mąątí a dɔɔ wulɔ, nií la.

³⁶ Ɛlɛɛ, ə́ yəi bɛlɛ́ nuą gbəliɠaai pai lɛɛi, di kaa pai kɛi pɛlɛi nií la, wali logolo mɛ̨nį ɓa, da kɔ̨nɔ̨n nogolo mɛ̨nį ɓa, diɛ kɛ mą: Nán! Dɔ́ɔ́ ɉaláá kulɔ kóló ta ɓa, gɛ́ kɔ̨nɔ̨n ɉɔlɔɓo, gɛ́ mįi.›»