Samuɛlə dɔlɔɔ 18 - Yálá laawoo hɛɓɛ (dc)

¹ Ɓɛlɔwai Davidə ə kpɛɛ la a nwoo hukulaa Saulə ɓa, Davidə nwɔ wɛlikɛmąą ə lɔ Ɉonatan lii mu, ə nwɛli la kɛ yɛ gbinį.

² Mąą yələ, Saulə ə ɲee too Davidə hu, hvo nɛɛ laa hvo pənə hvo li nąn bɔɔli.

³ Ɉonatan da Davidə di mįnɛ̨ həɠə, mąąhɔlɔɓo, ə kɛi Davidə wɛli la kɛ yɛ gbinį.

⁴ Ɉonatan ə nwɔ həɠəi tii kɛ gwąną, ə gulɔ gwąną ə dɛɛ Davidə pɔ, da nwɔ kuláá həɠəɠaa, da gɔ́ kɔ́ ɓɔwa, gilɛn, da ɉąą-yili-kɔ́lɔ.

⁵ Ɓɛi lɔpee Saulə ə kɛi Davidə tɔɔ laa kɔ́ mɛ̨i, gɔ́ ə kɛi lɔ nɛɛ Davidə ɓa. Yili ɓə gɛ, Saulə ə Davidə hee gɔ́ kɔ́ nuą nwun na. Davidə wɛli ə kɛ nɔi nuą kəlee diɛ; Ə mą kɛ Saulə yee pɔ nuą kpɛa-kpɛaa kəlee.

Ɉonatan ə Davidə mąąkɔ̨nwɔ̨ Saulə yəi

⁶ Yii kɛa Davidə ə Goliatə paa, gɛɛ kɛa həɠəi gɔ́ ɓa yɛ pa, nɛ̨ąą di həɠə Israɛlə lɔi kəlee hu, diɛ pa tɔɔmun Saulə laakwiɛn ɉii, diɛ wələ too, daa wələ yɛliɠaa laa, diɛ kwəinɛ̨ɛ̨ wələɠaa too, diɛ damąn da gwɛni di ɲɔw.

⁷ Nwələi mąną kaa nɛ̨ąą di kɛi doo ya ka: «Saulə a waa tamąą paa ɲowoɠaa lɔwai; Davidə aa waa pow tamąą paa.»

⁸ Saulə lii ə holi kpɔ kɛnɛ̨, nwələ woo tii ə nwąną ma, yɛ kɛ diɛ: «Daa waa pow tɛɛ Davidə pɔ; ə lɛɛ, ɲą́ą́n diɛ waa tɛɛ bɔ́. Lə kpɔ ɓə kɛa lɛɛ pulu Davidə yəi, ə kulɔ dɔɔlaa pulu!»

⁹ Ə həɠə kɛa ɲələi tii ɓa, Saulə hvo kɛa kɛi Davidə kaa a ɲɛ̨i lɛlɛɛ.

¹⁰ Bulu ɓa yələ laa ɓoɔ, Yálá ə ɲįnɛ̨n da tɔɔ, ə hvilɛn Saulə pulu, hvo kɛi kɛa mɛ̨nį ta kɛ ɲəi bɛlɛ́n gbɔwɔ yee kɔ́ma. Davidə ə kɛi nwɔ gwɛnįn ɲɔw, yɛ bələi ə kɛi gɛ la a yələ takpɛliɠaa, Saulə nwɔ kpalai ə ɓo ɲee ŋą.

¹¹ Ɲąąɓa Saulə ə nwɔ kpalai tɛ ɲee mɛ̨i, yɛ diɛ: «Gáá Davidə kpanwoi bɛlɛ ɓa.» Kɛlaa gee mɛ̨i hveelɛ, Davidə ə kɛi həɠə gbala tɔwɔ.

¹² Saulə ə ɲɔw Davidə ɓa. Mąąhɔlɔɓo, Yai-Laa ə kɛ bɔ; ə lɛɛ Yai-Laa aa kɛ kulɔ Saulə pulu.

¹³ Yili ɓə gɛ, Saulə ə Davidə mąą kwɛa mą, ə ɉee kuláá waa tɔ̨nɔ̨ na. Ə həɠə ɲələ ɓa, Davidə ə kɛ nuą tii nwun na.

¹⁴ Gɔɠaai kpɔ ə kɛi doo, ə kɛi nɛ̨ɛ̨ mą; ə lɛɛ, Yai-Laa ə kɛ Davidə pɔ.

¹⁵ Gɔ kpɛa-kpɛaa nɛ̨ɛ̨ pələi tii Davidə ɓa, Saulə ə ɲɔw mą.

¹⁶ Kɛlaa, Israɛlə nuą da Ɉuda nuą kəlee, Davidə wɛli ə kɛ diɛ. Mąąhɔlɔɓo, Davidə ɓə kɛ di nwun na da diɛni diɛ li gɔɠaa mɛ̨i diɛ pa.

Davidə ə Saulə lon ɉəɠə a nɛ̨ą

¹⁷ Saulə yɛ Davidə ɓa: «Nón nɛ̨ɛ̨nu nu pɔlɔ laa mun ga a Meravə ya ɓə gáá pai dɛɛi ə́ pɔ a ə́ nɛ̨ą. Kɛlaa, tɔɔ a ə́ nwąnąąi nwɔ kólói ɓa; Yai-Laa nwɔ kɔ́ɠaai kɔ́.» Saulə ə kɛi mo gwəi pələ yɛ kɛ diɛ: «Hɛn vəli, və́ baa ɲą́ą́ gbinįi, gaa yili lɛɛi Filisti nuą yee kɔ́nma.»

¹⁸ Davidə yɛ Saulə ɓa: «Lə ɓaa ɲą́ą́? Ɉúwu ɓaa a lə? Nán nwɔ pɛlɛ́i hvo a hɛn da Israɛlə nuą lɔwai; Yaai ŋą́ li kɛi a tɔɔmun mɔlɔ?»

¹⁹ Kɛlaa ɓɛlɔwai kɛ mąąnɛ̨ɛ̨ kɛ di Saulə lon nɛ̨ɛ̨nu Meravə tɛɛ la Davidə pɔ di ɉilɛ taa kɛ Adriɛlə ɓa, Mehola daai.

²⁰ Kɛlaa, ə mą kɛ tii, Davidə wɛli hvo too Saulə lon nɛ̨ɛ̨nu Mikalə ɓa. Di ɉukulɔ Saulə ɓa, Saulə ə gaa yɛ mɛ̨nį lɛlɛɛ li.

²¹ Saulə ə kɛi mo gwəi pələ yɛ kɛ diɛ: «Gáá Mikalə hilɛtaa kɛi Davidə ɓa, ə kɛ Davidə ɓa a ɓaalə ə lɛɛ Filisti nuą di ɉon.» Gee mɛ̨i hveelɛ, Saulə a kɛ Davidə ɓa: «Ə́ kaa kɛi a mɔ́lɔ́ háákələi.»

²² Saulə yɛ ɲee pɔ nuą diɛ; yɛ diɛ: «Ka mo Davidə ɓa, kaa mą: ‹Ə́ wɛli kaa Saulə ɓa, gaa ə́ wɔ́ mɛ̨inɛ̨ɛ̨ pɔ, ə lɛɛ ə́ wɛli kaa ɲee pɔ nuą diɛ, hvaa mą, ə́ kɛ a mɔlɔ.›»

²³ Saulə yee pɔ nuą di mɛ̨nįɠaa tii ɓo Davidə ɓa. Davidə yɛ diɛ: «Gaa ka kwəi yɔla ɓaa a nu kɛ mɛ̨nį a tɔɔmun mɔlɔ? Ɲą́ą́ ka a yeelaawolo mun, kɔ́lɔn və mą́ą́.»

²⁴ Saulə yee pɔ nuą di nwooɠaa tii hukulɔ mą.

²⁵ Saulə yɛ diɛ: «Ka li kaa Davidə ɓa: ‹Tɔɔmun və ɓɔlɔ laa hɛn takpɛli pɔ hvo kɛli lɔ Filisti nuą towo piɲɛ̨n nwun dɔ̨nɔ̨, yili a kɛ a tɔɔmun nwąną kulaa diɛ.›» Ə kɛ Saulə kwəi, yɛ kɛ, bələ ɓə gaa pai Davidə tooi la Filisti nuą yee ŋą.

²⁶ Saulə yee pɔ nuą də li di nwooɠaa tii ɓo Davidə ɓa. Davidə ə gaa yɛ mɛ̨nį a kɛ tii, pələ a pɛli hɔlɔɓoi yɛ pɛli kɛi a tɔɔmun mɔlɔ. Guui di ɉee ma, hvo kpɛli həli,

²⁷ Davidə ə muhəɠə, da nwɔ nuą diɛ li, ə Filisti nwun veelɛ paa, ə pa a di towo piɲɛ̨nɠaa, ə di lono Saulə ɲɛ̨i ɓa; ə kɛ kɛa a tɔɔmun mɔlɔ, Saulə ə non Mikalə tɛɛ pɔ a nɛ̨ą.

²⁸ Saulə ə gbaɠala kaa, gili ə pu ɉu yɛ Yai-Laa kaa Davidə pulu, ə lɛɛ, nwɛli ə kɛ Mikalə ɓa, yai kɛ a Saulə non nɛ̨ɛ̨nu.

²⁹ Ɲɔwii Saulə ə kɛi mo Davidə ɓa, da ə pɛlɛ nwɔ̨nɔ̨ mą. Saulə ə gɛ kpɔ kɛa a yowolaa kpɔ kpɔɔ.

³⁰ Filisti kɔ́ nwun nąmįną di kɔ́ muhəɠə, kɛlaa, gɔ́ muhəɠə pələ tɛitɛi di yəi, gɔ́ ə kɛi nɛɛ Davidə ɓa, yɛ tɛɛ Saulə yee pɔ nuą kəlee diɛ. Davidə laa ə tɛ kpɔ kɛnɛ̨.